ខ្ទម​ចាំ​ចម្ការ​របស់​អ្នក​ភូមិ​ប៉ាតាង ខេត្ត​រតនគិរី ត្រូវ​ក្រុមហ៊ុន​ដុត​បំផ្លាញ

អ្នក​ភូមិ​ប៉ាតាង ខេត្ត​រតនគិរី រាយការណ៍​ថា ខ្ទម​ចម្ការ​ប្រមូលផល ត្រូវ​បាន​ដុត​បំផ្លាញ​ដោយ​ក្រុម​កម្មករ​ដឹកនាំ​ដោយ​មេការ​ក្រុមហ៊ុន​ឌីអឹម ហ្រ្គូប ក្រោម​កិច្ច​ការពារ​ដោយ​កង​ទាហាន​និង​ប៉ូលិស​ប្រមាណ​១០​នាក់ ហើយ​បន្ទាប់​មក ក្រុម​ទាហាន​ឯកសណ្ឋាន​អាវុធ​បាន​ដាក់​របាំង​រាំង​ផ្លូវ​មិន​ឲ្យ​ចូល​ទៅ​កាន់​ទី​កើតហេតុ​នោះ​ទេ។
ដោយ រដ្ឋាវិសាល
2008.11.30
ជម្លោះ​ដី​នៅ​រតនគិរី ទាហាន​យាម​នៅ​តំបន់​ដែល​អ្នក​ភូមិ​ប៉ាតាង ខេត្ត​រតនគិរី ចោទ​ថា ខ្ទម​ចាំ​ចម្ការ​របស់​ពួកគេ​ត្រូវ​មនុស្ស​របស់​ក្រុមហ៊ុន​ដុត​បំផ្លាញ​នា​ថ្ងៃ​ទី​៣០ វិច្ឆិកា ២០០៨។
RFA/Ratha Visal

អ្នក​ភូមិ​ក្នុង​ហេតុការណ៍ និយាយ​ថា កម្មករ​ចំនួន​៣​ក្រុម​អម​ដោយ​កង​ទាហាន​និង​ប៉ូលិស​ប្រដាប់​អាវុធ​កាល​ពី​រសៀល​ថ្ងៃ​សៅរ៍ បាន​ចាក់​សាំង​ដុត​កម្ទេច​រោង​ប្រមូល​ផល​ចម្ការ ហើយ​គំរាម​បណ្តេញ​អ្នក​ភូមិ​ឲ្យ​ចាក​ចេញ​ពី​ចម្ការ​ដែល​កំពុង​ប្រមូល​ផល​នៅ​ឯ​ចម្ការ​ម៉ៃ​ក្នុង​ឃុំ​ប៉ាតាង ៖ «មាន​ទាហាន ប៉ូលិស និង​មេការ​ហ្នឹង គេ​រើ​រុក ហើយ​គេ​ប្រមូល​ដុត​អស់ យក​សាំង​មក​ចាក់​ដុត​អស់ ខ្ញុំ​ឃើញ​ផ្ទាល់...»

នៅ​ថ្ងៃ​អាទិត្យ ទី​៣០ វិច្ឆិកា​នេះ តាម​ការ​សង្កេត​ឃើញ​ជាក់ស្តែង កង​ទាហាន​ឯកសណ្ឋាន​ចំនួន​៥​នាក់ ប្រដាប់​ដោយ​អាវុធ​គ្រប់​ដៃ​បាន​ដាក់​របាំង​ខ្ទប់​ផ្លូវ​មិន​ឲ្យ​អ្នក​សារព័ត៌មាន ក្រុម​សិទ្ធិ​មនុស្ស​និង​មន្ត្រី​ប៉ូលិស​មូលដ្ឋាន​ចូល​ទៅ​ពិនិត្យ​មើល​ទី​ដែល​អ្នក​ភូមិ​រាយការណ៍​ថា មាន​ការ​រំលោភ​នោះ​ទេ។ ទាហាន​ម្នាក់​ដៃ​កាន់​កាំភ្លើង​និយាយ​ថា ជា​បញ្ជា​របស់​ក្រុមហ៊ុន។

នាយ​រង​ប៉ូលិស​ប៉ុស្តិ៍​ឃុំ​ប៉ាតាង លោក​កែវ វណ្ណា មាន​ប្រសាសន៍​ថា ៖ «ទៅ​ព្រឹក​មិញ សុំ​ចូល​គេ​មិន​ឲ្យ​ផង»

វិទ្យុ​អាស៊ីសេរី​មិន​អាច​ទាក់ទង​តំណាង​ក្រុមហ៊ុន​ដើម្បី​អធិប្បាយ​បញ្ហា​នេះ​បាន​ទេ ពីព្រោះ​មិន​អាច​ស្វែងរក​អត្តសញ្ញាណ​និង​អាសយដ្ឋាន​ទាក់​ទង​បាន។

យ៉ាង​នេះ​ក្តី មេបញ្ជាការ​យោធា​ខេត្ត​លោក ម៉ុង ថែន ទទួល​ស្គាល់​ថា ក្រុមហ៊ុន​បាន​ស្នើ​សុំ​កម្លាំង​ទាហាន​លោក​ដាក់​ប្រចាំ​ការដ្ឋាន​ដើម្បី​ការពារ​ខ្លាច​មាន​អំពើ​លួច​ប្លន់ ប៉ុន្តែ​មិន​មាន​គោលការណ៍​ឲ្យ​ទាហាន​ដាក់​របាំង​ខ្ទប់​ផ្លូវ​អ្វី​នោះ​ឡើយ។

ចំណែក​អធិការ​ប៉ូលិស​ស្រុក​លំផាត់ លោក សូយ ថាវ បាន​បដិសេធ​ថា ៖ «រឿង​ទាហាន​អី ខ្ញុំ​អត់​ដឹង​ដែរ ដឹង​ជា​ដុត​មិន​ដុត​ទេ អត់​ដឹង ព្រោះ​ខ្ញុំ​អត់​បាន​ចូល​ទៅ»

មន្ត្រី​ស៊ើបអង្កេត​សមាគម អាដហុក លោក ប៉ែន ប៊ុណ្ណារ៍ បញ្ជាក់​ថា ក្រុមហ៊ុន​មាន​ចេតនា​បិទ​បាំង​ការ​ពិត។

លោក​ថា នេះ​គឺ​ជា​ដំណាក់កាល​ប្រើ​ប្រាស់​កម្លាំង​យោធា​រំលោភ​កាន់​តែ​ធ្ងន់ធ្ងរ​មក​លើ​សិទ្ធិ​ជន​ជាតិ​ដើម​ដែល​ខិតខំ​ការពារ​ដី​ធ្លី​សហគមន៍​ព្រៃ​ឈើ​ស្រប​ទៅ​តាម​សេចក្តី​អំពាវនាវ​របស់​ប្រមុខ​រាជ​រដ្ឋាភិបាល។

លោក ប៉ែន ប៊ុណ្ណារ៍ មាន​ប្រសាសន៍​ដូច្នេះ​ថា ៖ «ការ​បំបាក់​ស្មារតី​ដោយ​ចាប់​ឃុំ​តំណាង​សហគមន៍ រួច​សកម្មជន​អាដហុក​ដែល​លោក​ខំ​ការពារ​ព្រៃ​ឈើ​បាន​ទៅ​ហ្នឹង ប្រើប្រាស់​កម្លាំង​ទ័ព​ដើម្បី​ការពារ​ក្រុមហ៊ុន​ត​ទៅ​ទៀត អ៊ីចឹង​យើង​ឃើញ​ថា រូបភាព​អយុត្តិធម៌​ណាស់»

ក្រុមហ៊ុន ឌីអឹម ហ្គ្រូប ត្រូវ​អ្នក​ភូមិ​ប្តឹង​ចោទ​ប្រកាន់​ថា បាន​ប្រើប្រាស់​មន្ត្រី​ក្នុង​កង​អង្គរក្ស​លោក​នាយក​រដ្ឋមន្ត្រី រំលោភ​ឈូស​ឆាយ​ផល​ដំណាំ​ដី​ចម្ការ​វិល​ជុំ​និង​ព្រៃ​ឈើ​ប្រមាណ ២០០​ហិកតារ​ដើម្បី​យក​ដី​ជា​កម្មសិទ្ធិ​ឯកជន​តាំង​ពី​ឆ្នាំ​២០០៥ ក៏​ប៉ុន្តែ​ពុំ​មាន​ចំណាត់ការ​ឡើយ ហើយ​កាល​ពី​ថ្ងៃ​ទី​២៦ វិច្ឆិកា ឆ្នាំ​២០០៨ តុលាការ​ខេត្ត​បាន​កោះហៅ​តំណាង​សហគមន៍​ចំនួន​ពីរ​នាក់​និង​ធ្វើការ​ចាប់​ខ្លួន​ពួក​គេ​ដោយ​ចោទ​ប្រកាន់​ថា​អ្នក​ភូមិ​បំផ្លាញ​ដើម​កៅស៊ូ​ក្រុមហ៊ុន ក៏​ប៉ុន្តែ​អ្នក​ភូមិ​ប្រមាណ​ជាង ៣០​នាក់ បាន​បះបោរ​សម្រុក​ចូល​រំដោះ​តំណាង​ម្នាក់​បាន​វិញ ហើយ​ហៅ​ចំណាត់ការ​តុលាការ​ថា​អយុត្តិធម៌៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។