ប្រជាពលរដ្ឋមួយរូបឈ្មោះ ហេង ឆេងហ៊ាង ភេទស្ត្រី រស់នៅឃុំទឹកក្រហម ស្រុកជាំខ្សាន្ត ខេត្តព្រះវិហារ បានប្ដឹងលោកផ្កាយមួយ ស្នងការប៉ូលិសខេត្តព្រះវិហារ ឈ្មោះ ម៉ៅ ពៅ ទៅតុលាការខេត្ត ដើម្បីរកយុត្តិធម៌ និងទារសំណង ដោយអ្នកស្រីបានចោទថា លោកស្នងការប៉ូលិសបានជេរ និងវាយទៅលើរូបអ្នកស្រី។
ពាក្យប្ដឹងរបស់អ្នកស្រី ហេង ឆេងហ៊ាង បានរៀបរាប់ឲ្យដឹងថា កាលពីថ្ងៃទី១៧ ខែកក្កដា អ្នកស្រីត្រូវប៉ូលិសចាប់នៅស្រុកឆែប ដោយសារឡានអ្នកស្រីជួលដឹកឈើបានក្រឡាប់នៅម្ដុំស្ពានដែក ហើយប៉ូលិសបានបញ្ជូនខ្លួនមកកាន់ស្នងការដ្ឋានប៉ូលិសខេត្ត ដើម្បីឃុំខ្លួន។
អ្នកស្រី ហេង ឆេងហ៊ាង មានប្រសាសន៍នៅថ្ងៃទី៧ ខែសីហា ថា នៅក្នុងកន្លែងឃុំខ្លួននោះ លោកស្នងការ ម៉ៅ ពៅ បានជេរ និងវាយអ្នកស្រី ដោយមិនមានសាកសួរអ្វីឡើយ៖ «ខ្ញុំអត់ដែលស្គាល់ស្នងការប៉ូលិស លោក ម៉ៅ ពៅ នោះទេ។ តើបញ្ហាហេតុអីហៅខ្ញុំមកដោះស្រាយ តែពេលយកខ្ញុំមកអត់មានសួរចម្លើយខ្ញុំសូម្បីតែមួយម៉ាត់អត់សោះ? គ្រាន់តែយកខ្ញុំមកដល់ស្នងការ គឺលោក ម៉ៅ ពៅ នោះតែម្ដង អ្នកវាយខ្ញុំ ហើយខ្ញុំមិនដែលស្គាល់គាត់ទេ។ ប៉ុន្តែដល់វាយរួចហើយ គ្រួសារខ្ញុំអ្នកសួរថា តើអ្នកវាយនោះឈ្មោះអីគេ? កូនចៅគាត់ឆ្លើយថា ឈ្មោះ ពៅ ។ ទី១ គាត់យកទូរស័ព្ទខ្ញុំវាយក្បាលខ្ញុំមួយសា ផុតពីនោះមក គាត់យកកាំភ្លើងមកវាយខ្ញុំ ដោយខ្ញុំមិនបានដឹងខ្លួនសោះ មិនបានប្រុងប្រៀបខ្លួនសោះ គឺគាត់វាយខ្ញុំសង្គ្រុបយក វាយហើយជេរខ្ញុំទៀត»។
លិខិតពាក្យប្ដឹងរបស់អ្នកស្រី ហេង ឆេងហ៊ាង បានសុំឲ្យចៅក្រមតុលាការផ្ដល់យុត្តិធម៌ដល់អ្នកស្រី និងផ្ដន្ទាទោសជនប្រព្រឹត្តបទល្មើសទៅតាមច្បាប់។ ពាក្យប្ដឹងនោះក៏បានទាមទារប្រាក់ជំងឺចិត្តចំនួន ៣ម៉ឺនដុល្លារអាមេរិកផងដែរ។
ទាក់ទងពាក្យប្ដឹងនេះ វិទ្យុអាស៊ីសេរី បានទូរស័ព្ទទៅលោក ម៉ៅ ពៅ ស្នងការប៉ូលិសខេត្តព្រះវិហារ ដើម្បីសុំការបកស្រាយតបចំពោះពាក្យប្ដឹងចោទប្រកាន់ចំពោះរូបលោក តែមិនមានអ្នកលើកទូរស័ព្ទ។
ចំពោះពាក្យប្ដឹងករណីអ្នកមានអំណាចវាយទៅលើប្រជាពលរដ្ឋនេះ លោក ឡោ ចាន់ អ្នកសម្របសម្រួលអង្គការការពារសិទ្ធិមនុស្សឈ្មោះអាដហុក (Adhoc) នៅខេត្តព្រះវិហារ មានប្រសាសន៍ថា បើតុលាការរកទៅឃើញថា មានបទល្មើសកើតឡើងមែននោះ ជនប្រព្រឹត្តត្រូវមានទោសតាមក្រមព្រហ្មទណ្ឌជាមិនខាន។
លោក ឡោ ចាន់៖ «នៅក្នុងពាក្យបណ្ដឹងនោះ គឺគាត់បានប្ដឹងទៅលើលោកស្នងការពាក់ព័ន្ធវាយនោះ គឺការវាយរបស់លោកស្នងការអត់មានមូលហេតុ អត់មានហេតុផលច្បាស់លាស់ទេ។ ក្នុងនាមខ្ញុំជាអ្នកធ្វើការនៅក្នុងសង្គមស៊ីវិល ខ្ញុំយល់ថា លោកស្នងការមិនគួរណាវាយទៅលើជនរងគ្រោះបែបហ្នឹងទេ។ ទោះបីជាជនរងគ្រោះគាត់មានការខុសអ្វីក៏ដោយ ក៏យើងគួរណាដោះស្រាយតាមផ្លូវច្បាប់ដែរ ហើយទង្វើការវាយរបស់លោកស្នងការ វាខុសទៅនឹងក្រមព្រហ្មទណ្ឌ មាត្រា ២១៧ ពាក់ព័ន្ធបទហិង្សាដោយចេតនា។ ម៉្យាងវិញទៀត ទោះបីជាជនរងគ្រោះគាត់បានប្រព្រឹត្តដោយពិតមែន តែលោកស្នងការគួរណាដោះស្រាយតាមនីតិវិធីច្បាប់»។
តាមការរៀបរាប់របស់អ្នកស្រី ហេង ឆេងហ៊ាង បានឲ្យដឹងថា អ្នកស្រីត្រូវគេឃុំខ្លួនសរុបចំនួន ១៤ថ្ងៃនៅកន្លែងខុសៗគ្នា។ អ្នកស្រីត្រូវអាជ្ញាធរចោទពីបទដឹកជញ្ជូនឈើដោយមិនមានច្បាប់អនុញ្ញាត។ ចំពោះរឿងលោកស្នងការប៉ូលិសខេត្តជេរ និងវាយអ្នកស្រីនោះ ក្រៅពីប្ដឹងទៅតុលាការខេត្តដើម្បីរកយុត្តិធម៌ អ្នកស្រី ហេង ឆេងហ៊ាង បានដាក់ពាក្យប្ដឹងទៅសមាគមអាដហុក ការពារសិទ្ធិមនុស្សដើម្បីឲ្យជួយអ្នកស្រីផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។