ប្រជាពលរដ្ឋទាំងនោះបានឲ្យដឹងនៅព្រឹកថ្ងៃអង្គារ ទី៣០ ខែកញ្ញានេះ ថា លោកអភិបាលរងស្រុកមិនបានប្រកាសគម្រោងអភិវឌ្ឍន៍ច្បាស់លាស់ទេ ប៉ុន្តែបានចុះតាមផ្ទះនីមួយៗបញ្ចុះបញ្ចូលឲ្យពួកគេផ្តិតមេដៃតាមផែនការរបស់គាត់។
ប្រជាពលរដ្ឋឈ្មោះ សំបូរ បានមានប្រសាសន៍ថា អភិបាលរង លោក យី វណ្ណៈ បានទៅចុះជួបជាមួយពួកគេនិងបានលើកហេតុផលថា គេត្រូវឈូសឆាយដីនោះឲ្យស្មើនិងចែកដីនោះឲ្យប្រជាពលរដ្ឋវិញដែលមានទទឹង៤ម៉ែត្រនិងបណ្តោយ៨ម៉ែត្រ។ ទោះជាយ៉ាងនេះក្តីលោកនៅតែមានការបារម្ភខ្លាចមិនបានដូចសន្យា។
លោក សំបូរ បានឲ្យដឹងថា ៖ «បើសិនជាគេឲ្យបង្កាន់ដៃយើង ស៊ីញ៉េពីមេភូមិ មេឃុំ ហើយនិងអភិបាលស្រុកហ្នឹង ស៊ីញ៉េមក បានខ្ញុំផ្ដិតមេដៃឲ្យ»។
ប្រជាពលរដ្ឋម្នាក់ទៀតឈ្មោះ សូធី បានមានប្រសាសន៍ថា លោកអភិបាលរងស្រុកបានទៅសន្យាជាមួយពួកគេថា លោកនឹងរៀបចំផ្ទះនៅក្នុងភូមិបឹងដែងឲ្យមានសណ្តាប់ធ្នាប់ឡើងវិញ និងធានាលើថ្លៃរុះរើនៅពេលគេឈូសឆាយដីនោះ។
លោកបានបន្ថែមទៀតថា លោកមានការបារម្ភព្រោះប្រជាពលរដ្ឋពួកលោកមិនសូវយល់ដឹងច្រើន លោកខ្លាចតែមានបញ្ហានៅថ្ងៃក្រោយដែលធ្វើឲ្យពួកគាត់បាត់បង់ទីលំនៅ។
លោក សូធី បានមានប្រសាសន៍ថា ៖ «បើចិត្តខ្ញុំវិញ ខ្ញុំថាប្រហែលជាចាញ់បោកគេ ឬក៏យ៉ាងម៉េចខ្ញុំមិនដឹងផង ព្រោះអត់មានស៊ីញ៉េពីមេភូមិ មេឃុំ ចៅហ្វាយស្រុកផង គេគ្រាន់តែយកហ្វូតូមកថា ដីនេះជាដីរបស់យើង»។
សូមបញ្ជាក់ថា កាលពីថ្ងៃទី៣ ខែកញ្ញាកន្លងទៅនេះ ប្រជាពលរដ្ឋទាំងនោះធ្លាប់បានចោទប្រកាន់អភិបាលរងស្រុក លោក យី វណ្ណៈ ថា ចង់បណ្តេញពួកគេចេញពីភូមិនោះម្តងរួចមកហើយ។
អភិបាលរងស្រុក លោក យី វណ្ណៈ មិនបានឆ្លើយតបទៅនឹងសំណួររបស់វិទ្យុអាស៊ីសេរីស្ដីអំពីគម្រោងអភិវឌ្ឍន៍នោះទេ ៖ «ខ្ញុំកំពុងធ្វើ ខ្ញុំអត់ទាន់ជម្រាបជូនទេ»។
រីឯអាជ្ញាធរឃុំក៏មិនបានដឹងគម្រោងអភិវឌ្ឍន៍របស់អភិបាលរងស្រុកនោះដែរ។
មេឃុំព្រែកកក់ លោក អ៊ាត គឹមលាង បានមានប្រសាសន៍ថា ៖ «ខ្ញុំមិនទាន់ដឹងទេ ហើយក៏មិនមែនប្រកាន់ជាមួយខាងលើដែរ អ៊ីចឹងបានថា វាទាក់ទិនទៅលើឯកសារពេក តែបើមិនមានឯកសារទេ គ្រាន់តែឮតាមភាសាសម្ដី ហ្នឹងមិនជាផ្លូវការទេ»។
លោកបានបន្តថា លោកមានគម្រោងអភិវឌ្ឍន៍ធ្វើសួនច្បារនៅតាមមាត់ទន្លេដែលបានដាក់គម្រោងស្នើសុំទៅរដ្ឋាភិបាលតំាងពីឆ្នាំ២០០២ ប៉ុន្តែមិនទាន់ដឹងលទ្ធផលនៅឡើយទេ។
សូមជម្រាបថា ដីភូមិបឹងដែងជាដីរបស់រដ្ឋដែលជាទីតាំងផ្សារចាស់នៅក្នុងឃុំព្រែកកក់ ហើយប្រជាពលរដ្ឋបាននាំគ្នាទៅរស់នៅទីនោះតាំងពីឆ្នាំ១៩៨២មក ភាគច្រើនជាទាហានរំសាយ៕