គ្មានឡើយវត្តមានគណបក្សប្រឆាំងធំជាងគេ គឺគណបក្សភ្លើងទៀន ចូលរួមប្រកួតប្រជែងក្នុងការបោះឆ្នោតជាតិខែកក្កដា ខាងមុខនេះ។ ក្រុមប្រឹក្សាធម្មនុញ្ញ ដែលរងនូវការរិះគន់ថា ស្ថិតក្រោមខ្សែញាក់របស់លោកនាយករដ្ឋមន្ត្រី ហ៊ុន សែន មិនខុសពីគណៈកម្មាធិការជាតិរៀបចំការបោះឆ្នោត (គ.ជ.ប) នោះ នៅថ្ងៃទី២៥ ខែឧសភា បានសម្រេចបិទផ្លូវតវ៉ាមិនអនុញ្ញាតឱ្យគណបក្សនេះ ចូលរួមការបោះឆ្នោតជាតិខែកក្កដា ខាងមុខនេះ។ គណបក្សភ្លើងទៀនថា ការមិនឱ្យគណបក្សខ្លួនចូលរួមប្រកួតប្រជែងការបោះឆ្នោត គឺជាការរំលោភឆន្ទៈពលរដ្ឋខ្មែរជាតិ២លាននាក់ ដែលគាំទ្រគណបក្សខ្លួន។ រីឯ អ្នកជំនាញសិទ្ធិមនុស្សអន្តរជាតិថា សេចក្តីសម្រេចនេះ ធ្វើឱ្យការបោះឆ្នោតខែកក្កដា ខាងមុខនេះ ក្លាយជា «ឆាកល្ខោនលេងសើច» ទាំងស្រុង ដែលត្រូវបានធ្វើឡើង ដើម្បីតែប្រថាប់ត្រាដល់ការបន្តគ្រប់គ្រងអំណាចបែបផ្តាច់ការរបស់លោក ហ៊ុន សែន និងគណបក្សប្រជាជនកម្ពុជា តែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។