បទ​វិភាគ៖ ប្រជាប្រិយភាព​និង​ការ​លំបាក​របស់​បក្ស​កាន់​អំណាច​ក្នុង​ពេល​ជាប់​គាំង​នយោបាយ

ដោយ តាំង សារ៉ាដា
2014-04-27
អ៊ីម៉ែល
មតិ
Share
បោះពុម្ព
ក្បួន​ដង្ហែ​ញត្តិ​របស់​គណបក្ស​សង្គ្រោះ​ជាតិ ឆ្ពោះ​ទៅ​កាន់​ស្ថានទូត​អាមេរិក កាល​ពី​ព្រឹក​ថ្ងៃ​ទី​២៤ តុលា ឆ្នាំ​២០១៣។
ក្បួន​ដង្ហែ​ញត្តិ​របស់​គណបក្ស​សង្គ្រោះ​ជាតិ ឆ្ពោះ​ទៅ​កាន់​ស្ថានទូត​អាមេរិក កាល​ពី​ព្រឹក​ថ្ងៃ​ទី​២៤ តុលា ឆ្នាំ​២០១៣។
RFA/Uon Chhin

អស់​រយៈពេល​ជាង ៨​ខែ​មក​ហើយ​ចាប់​តាំង​ពី​ការ​បោះ​ឆ្នោត​នៅ​ថ្ងៃ​ទី​២៨ ខែ​កក្កដា ឆ្នាំ​២០១៣ ដែល​ស្ថានការណ៍​នយោបាយ​របស់​កម្ពុជា នៅ​បន្ត​ភាព​ចម្រូងចម្រាស​ចាក់ស្រេះ​ដោះស្រាយ​មិន​ចេះ​ចប់។ បក្ស​ប្រជាជន​កម្ពុជា ដែល​ប្រកាស​ជ័យជំនះ​ដោយ​ខ្លួន​ឯង​ថា បាន​សំឡេង ៦៨​អាសនៈ ហើយ​បក្ស​សង្គ្រោះ​ជាតិ​បាន ៥៥​អាសនៈ​មុន គ.ជ.ប ប្រកាស​តួលេខ​ដូច​គ្នា​នោះ កំពុង​ក្ដោបក្ដាប់​អំណាច​តែ​ម្នាក់ឯង ជា​ពិសេស ការ​ត្រួតត្រា​រដ្ឋ​សភា​ជាតិ​ដោយ​គណបក្ស​តែមួយ។

តើ​បញ្ហា​នេះ​បាន​ធ្វើ​ឲ្យ​ប៉ះពាល់​ដល់​ប្រជាប្រិយភាព​របស់​បក្ស​កាន់​អំណាច និង​ធ្វើ​ឲ្យ​បក្ស​មួយ​នេះ​ជួប​ការ​លំបាក​យ៉ាង​ណា​ក្នុង​ស្ថានភាព​ជាប់​គាំង​នយោបាយ​នោះ?

ការ​ប្រកាស​លទ្ធផល​ឆ្នោត​ដោយ​ខ្លួន​ឯង ការ​ក្ដោបក្ដាប់​រដ្ឋសភា​តែ​ម្នាក់​ឯង ការប្រជុំ​សភា​តែ​ម្នាក់​ឯង ការ​អនុម័ត​ច្បាប់​ជាច្រើន​តែ​ម្នាក់​ឯង មិន​ត្រឹមតែ​ធ្វើ​ឲ្យ​កេរ្តិ៍​ឈ្មោះ​របស់​បក្ស​ប្រជាជន​កម្ពុជា ធ្លាក់​ប្រជាប្រិយភាព​ក្នុង​ស្រុក​ប៉ុណ្ណោះ​ទេ ប៉ុន្តែ​មាន​ការ​រិះគន់​ពី​បណ្ដា​ប្រទេស​លោក​សេរី​ជា​ច្រើន។ ជា​ពិសេស​បណ្ដា​ប្រទេស​ជា​សមាជិក​នៃ​កិច្ចព្រមព្រៀង​សន្តិភាព​ទីក្រុង​ប៉ារីស។

ចាប់​តាំង​ពី​កម្ពុជា បាន​ចុះ​កិច្ចព្រមព្រៀង​សន្តិភាព​ទីក្រុង​ប៉ារីស ដែល​មាន​ប្រទេស​ចំនួន ១៨ ធ្វើ​ជា​សាក្សី​ថា កម្ពុជា​នឹង​គោរព ហើយ​អនុវត្ត​តាម​គោលការណ៍​លទ្ធិប្រជាធិបតេយ្យ​សេរី​ពហុបក្ស ក្រោយ​ការ​បោះ​ឆ្នោត​ឆ្នាំ​១៩៩៣ រួច កម្ពុជា​បាន​បង្កើត​រដ្ឋធម្មនុញ្ញ​ជា​ច្បាប់​កំពូល​របស់​ខ្លួន​​មួយ ដោយ​យោង​ទៅ​តាម​គោលការណ៍​របស់​កិច្ច​ព្រមព្រៀង​សន្តិភាព​ក្រុង​ប៉ារីស។ គោលការណ៍​ទាំង​នោះ​គឺ​តម្រូវ​ឲ្យ​កម្ពុជា មាន​ការ​គោរព​សេរីភាព​ជា​មូលដ្ឋាន​របស់​មនុស្ស និង​មាន​ពហុភាគី​ក្នុង​អង្គការ​នីតិប្បញ្ញត្តិ។

ចាប់​តាំង​ពី​រដ្ឋសភា​ដែល​មាន​អាសនៈ​របស់​គណបក្ស​នយោបាយ​ចំនួន ៤ នៅ​ឆ្នាំ​១៩៩៣ រហូត​ដល់​នៅ​សល់​អាសនៈ​របស់​គណបក្ស​នយោបាយ​ចំនួន ២ នៅ​ឆ្នាំ​២០១៣ គណបក្ស​ប្រជាជន​កម្ពុជា ហាក់​ចង់​បោះពួយ​ឲ្យ​មាន​តែ​គណបក្ស​តែមួយ។

តើ​កិច្ច​ខិតខំ​ប្រឹងប្រែង​របស់​ក្រុម​មន្ត្រី​បក្ស​កាន់​អំណាច​ដែល​ព្យាយាម​ធ្វើ​ឲ្យ​សំឡេង​បក្ស​ប្រឆាំង​ចុះ​ទន់​ខ្សោយ ឬ​ព្យាយាម​បំបាត់​សំឡេង​ក្រុម​ប្រឆាំង​នេះ អាច​ធ្វើ​ឲ្យ​ប្រជាប្រិយភាព​របស់​ខ្លួន​ក្នុង​ស្រុក និង​ឆាក​អន្តរជាតិ រីក​ស្រស់បំព្រង​ល្អ​ដូច​ផ្កា​ដែរ​ទេ?

ចម្លើយ​នេះ​អ្នក​ណា​ក៏​ដឹង​សឹង​គ្រប់ៗ​គ្នា​ទៅ​ហើយ​ថា គណបក្ស​ប្រជាជន​កម្ពុជា ដែល​កំពុង​ដឹកនាំ​ដោយ​លោក ហ៊ុន សែន ហាក់​មាន​ភាព​ឯកា ដែល​មិន​ត្រឹមតែ​បាត់បង់​ការ​គាំទ្រ​ពី​សំណាក់​មន្ត្រី​រាជការ សិស្ស និស្សិត គ្រូបង្រៀន និង​ព្រះសង្ឃ​ប៉ុណ្ណោះ​ទេ តែ​ថែម​ទាំង​មាន​ការ​រិះគន់ និង​ថ្កោលទោស​ជា​ប្រចាំ​ពី​សំណាក់​ប្រទេស​អ្នក​ផ្ដល់​ជំនួយ​ជា​ច្រើន។

ចាប់​តាំង​ពី​ការ​បោះ​ឆ្នោត​ជាតិ​នា​ខែ​កក្កដា រួច​មក កម្លាំង​មហាជន​បាន​នាំ​គ្នា​បះបោរ​ធ្វើ​បាតុកម្ម​ជា​បន្តបន្ទាប់​ដើម្បី​តវ៉ា​ទៅ​នឹង​លទ្ធផល​ឆ្នោត ដែល​ពួកគេ​ចាត់​ទុក​ថា មិន​ត្រឹមត្រូវ មិន​យុត្តិធម៌ និង​មិន​តម្លាភាព។

កម្ដៅ​នៃ​កំហឹង​មហាជន​បាន​ផ្ទុះ​ឡើង​ចេញ​ជា​បាតុកម្ម​យ៉ាង​គគ្រឹកគគ្រេង​ពុះ​កញ្ជ្រោល​សឹង​ពាសពេញ​ទីក្រុង​ជា​ញឹកញាប់​ស្ទើរ​រៀងរាល់​ថ្ងៃ។ អ្នកខ្លះ​សុខ​ចិត្ត​លក់​មាន់ លក់​ទារ លក់​ឆ្កែ ឬ​ដើរ​ដង្ហែ​ទាំង​កូន ទាំង​ចៅ ឲ្យ​តែ​បាន​មក​ស្រែក​ហៅ​ឲ្យ​លោក ហ៊ុន សែន ចុះ​ចេញ​ពី​តំណែង។

ចំនួន​អ្នក​ធ្វើ​បាតុកម្ម​នៅ​តាម​ដង​ផ្លូវ​នៅ​ពេល​នោះ បាន​កើន​ឡើង​ជា​ប្រចាំ រហូត​ដល់​ចំនួន​ជាង ១​លាន​នាក់ នៅ​ចុង​ខែ​ធ្នូ ឆ្នាំ​២០១៣។ កម្លាំង​យុវជន​បាន​ដើរ​តួនាទី​យ៉ាង​ខ្លាំងក្លា​ក្នុង​ការ​ដឹក​មុខ​គេ​ដោយ​ផ្ទាល់ និង​តាម​រយៈ​បណ្ដាញ​ទំនាក់ទំនង​សង្គម ហ្វេសប៊ុក (Facebook) ដើម្បី​ទាមទារ​ឲ្យ​មាន​ការ​បោះ​ឆ្នោត​ឡើង​វិញ និង​កែទម្រង់​ស៊ី​ជម្រៅ​នៃ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប) ដែល​ពួកគេ​ចាត់​ទុក​ថា​មិន​ឯករាជ្យ។

​ជា​ការ​ឆ្លើយតប កង​កម្លាំង​របស់​បក្ស​កាន់អំណាច​បាន​បំបែក​ទាំង​ហ្វូង​បាតុកម្ម និង​បំបែក​ការ​ជួប​ប្រជុំ​គ្នា​នៅ​ទីលាន​ប្រជាធិបតេយ្យ​ចាប់​ពី ២​នាក់​ឡើង​ទៅ។​

គណបក្ស​ប្រជាជន​កម្ពុជា ដែល​កំពុង​ដឹកនាំ​ដោយ​គណបក្ស​តែ​មួយ​នៅ​ក្នុង​រដ្ឋសភា ក្រៅ​តែ​ពី​ជួប​នូវ​វិបត្តិ​នីត្យានុកូលភាព ឬ​វិបត្តិ​នៃ​ភាព​ស្រប​ច្បាប់​ក្នុង​ការ​បង្កើត​រដ្ឋាភិបាល និង​ការ​ធ្លាក់​ចុះ​នូវ​ប្រជាប្រិយភាព​នោះ បក្ស​មួយ​នេះ​ក៏​កំពុង​ជួប​ការ​លំបាក​ក្នុង​ការ​ដឹកនាំ​សង្គម​ទាំង​មូល​ផង​ដែរ។

ភាព​លំបាក​វេទនា​របស់​គណបក្ស​ប្រជាជន​កម្ពុជា នៅ​ពេល​នេះ គឺ​ដោយសារ​តែ​មនុស្ស​ក្មេង​ចាស់​ប្រុស​ស្រី​ភាគ​ច្រើន​បាន​ក្លាយ​ទៅ​ជា​មនុស្ស​ថ្មី​ដែល​ចេះ​ដឹង​ខុស​ត្រូវ ចេះ​តាមដាន​ព័ត៌មាន ចេះ​ស្គាល់​អំពី​សិទ្ធិ​របស់​ខ្លួន មាន​សមត្ថភាព និង​ចេះ​វិភាគ​បាន ចាប់​ផ្ដើម​ទាមទារ និង​ចាប់​ចូលរួម​នៅ​ក្នុង​ឆាក​នយោបាយ​សង្គម។

ចំណុច​ដែល​ប្រជាពលរដ្ឋ​ទាំង​នេះ​ក្លាយ​ទៅ​ជា​មនុស្ស​ថ្មី ហើយ​ស្គាល់​ច្បាស់​អំពី​សិទ្ធិ និង​ប្រជាធិបតេយ្យ កាន់តែ​ក្លាយ​ជា​ឧបសគ្គ​សម្រាប់​បក្ស​កាន់​អំណាច​ដែល​ប្រជុំ​ទៅ​ដោយ​ក្រុម​មន្ត្រី​ចាស់​គំរឹល​ដែល​មាន​វប្បធម៌​ដឹកនាំ​ហួស​សម័យ មាន​របៀប​ធ្វើ​តាម​ទម្លាប់​ចាស់ ការ​គិតគូរ វែកញែក​តាម​បែប​ចាស់​អន់ថយ។ កត្តា​ទាំង​នេះ​បាន​ធ្វើ​ក្រុម​មន្ត្រី​រដ្ឋាភិបាល​ជាន់​ខ្ពស់​ចាស់ៗ​ទាំង​នោះ​ខ្វះ​បទពិសោធន៍​ក្នុង​ការ​ដឹកនាំ​មនុស្ស​ថ្មី។

ភាព​លំបាក​មួយ​ទៀត គឺ​នៅ​ត្រង់​កាំបិត​ចិត​ដង​ឯង ខណៈ​ដែល​គណបក្ស​ប្រជាជន​កម្ពុជា ចង់​ធ្វើ​កំណែ​ទម្រង់​ស៊ី​ជម្រៅ ប៉ុន្តែ​អាច​ប៉ះ​ទង្គិច​ដល់​ក្រុម​គ្រួសារ​របស់​ខ្លួន​ក្នុង​ជួរ​រដ្ឋាភិបាល។

ការ​កែ​ទម្រង់​ប្រព័ន្ធ​ដឹកនាំ​រដ្ឋ​ស៊ី​ជម្រៅ​អាច​ធ្វើ​ទៅ​បាន​លុះត្រាតែ​ឲ្យ​មាន​បញ្ចូល​មនុស្ស​ថ្មី រៀបចំ​ប្រព័ន្ធ​ថ្មី និង​រចនា​យុទ្ធសាស្ត្រ​ថ្មី​ប្រកបដោយ​តម្លាភាព​ត្រឹមត្រូវ។

ប្រសិនបើ​មាន​ការ​កែទម្រង់​ស៊ី​ជម្រៅ​របៀប​នេះ​មែន នោះ​គណបក្ស​ប្រជាជន​កម្ពុជា នឹង​មាន​ការ​លំបាក​ដោយសារ​មន្ត្រី​ពុករលួយ និង​មន្ត្រី​ខិលខូច​ជា​ច្រើន​សុទ្ធសឹងតែ​ជា​សែស្រឡាយ​របស់​មេដឹកនាំ​ដ៏​មហិមា​ក្នុង​ប្រទេស​កម្ពុជា។

របាយការណ៍​របស់​អង្គការ​ឃ្លាំមើល​ពិភពលោក (Global Witness) ចេញ​ផ្សាយ​នៅ​ថ្ងៃ​ទី​៣១ ខែ​ឧសភា ឆ្នាំ​២០០៧ ដែល​មាន​ចំណង​ជើង​ថា សែស្រឡាយ​អ្នក​លក់​ជាតិ រក​ឃើញ​ថា សាច់ញាតិ​របស់​លោក​នាយក​រដ្ឋមន្ត្រី ហ៊ុន សែន ភាគ​ច្រើន​ជា​អ្នក​លក់​ទ្រព្យសម្បត្តិ​សាធារណៈ​របស់​រដ្ឋ ជាពិសេស​ធនធាន​ធម្មជាតិ ដូចជា​ព្រៃឈើ​ប្រណិតៗ និង​ភោគទ្រព្យ​រ៉ែ។

ក្រៅ​ពី​ភាព​លំបាក​ខាង​ការ​កែទម្រង់​ប្រព័ន្ធ​ដឹកនាំ​រដ្ឋ​ដោយសារ​លំបាក​ក្នុង​ការ​ដោះស្រាយ​សំណាញ់​អំណាច​ដ៏​ស៊ី​ជម្រៅ​ចាក់ស្រេះ​មិន​អាច​ប្រេះឆា​នោះ រដ្ឋាភិបាល​ដែល​ត្រួតត្រា​ដោយ​បក្ស​ប្រជាជន​កម្ពុជា ក៏​កំពុង​ជួប​ការ​ធ្លាក់​ចុះ​ខាង​ផ្នែក​សេដ្ឋកិច្ច​ថែម​ទៀត។

​តើ​ការ​បន្ត​ដឹកនាំ​ប្រទេស​ដោយ​រដ្ឋសភា​ដែល​មាន​គណបក្ស​តែ​មួយ អាច​ធ្វើ​ឲ្យ​ដង្ហើម​សេដ្ឋកិច្ច​របស់​ប្រទេស​នៅ​រស់​យូរ​ដល់​ប៉ុណ្ណា?

តាំង​ពី​អ្នក​លក់​ដូរ​តូចតាច​នៅ​តាម​ផ្សារ រហូតដល់​ក្រុម​អាជីវករ​ធំៗ បាន​ត្អូញត្អែរ​សឹង​គ្រប់គ្នា​ទៅ​ហើយ​ថា ការ​រក​ស៊ី​ប្រកប​របរ​ជួញដូរ​របស់​ពួកគេ​ហាក់​មិនសូវ​កាក់កប​ដូច​មុនៗ ជាពិសេស​វិស័យ​កសិកម្ម ឧស្សាហកម្ម និង​សេវាកម្ម កំពុង​បោះជំហាន​ទៅ​រក​ចំណុច​អន់ថយ​ជា​បណ្តើរៗ។

ធនាគារ​អភិវឌ្ឍន៍​អាស៊ី (ADB) បាន​បង្ហាញ​របាយការណ៍​ឆ្នាំ​២០១៤ របស់​ខ្លួន​ថា សេដ្ឋកិច្ច​កម្ពុជា បាន​ធ្លាក់​ចុះ​ពី​ចំនួន ៧.៥​ភាគរយ មក​ត្រឹម ៧​ភាគរយ ដែល​ចំនួន​នេះ​មាន​កម្រិត​ទាប​ជាង​ប្រទេស​ភូមា និង​ប្រទេស​ឡាវ ទៅ​ទៀត។ ការ​ធ្លាក់​ចុះ​នេះ​ភាគច្រើន​ទៅលើ​វិស័យ​កាត់ដេរ សំលៀកបំពាក់ ខណៈ​កម្ពុជា​ស្ថិត​ក្នុង​ស្ថានភាព​នយោបាយ​ជាប់​គាំង​ចាប់​តាំង​ពី​ខែ​កក្កដា។

របាយការណ៍​របស់ ADB បង្ហាញ​ថា ចាប់​តាំង​ពី​ភាព​តានតឹង​ផ្នែក​នយោបាយ​ចាប់​ផ្តើម​ឡើង​កាល​ពី​ខែ​កក្កដា និង​បាតុកម្ម​ទាមទារ​ដំឡើង​ប្រាក់ខែ​គោល ១៦០​ដុល្លារ​របស់​កម្មករ​រោងចក្រ​កាត់ដេរ​បាន​បង្អាក់​ដល់​ការ​នាំ​ចេញ​ផលិតផល​សំលៀកបំពាក់​ចេញទៅ​លក់​នៅ​ក្រៅ​ប្រទេស​នៅ​ចុង​ឆ្នាំ​២០១៣ និង​ឆ្នាំ​២០១៤។ របាយការណ៍​នោះ​ក៏បាន​ឲ្យ​ដឹង​ផង​ដែរ​ថា ភាព​មិន​ច្បាស់លាស់​ខាង​ផ្នែក​នយោបាយ និង​ភាព​ប្រថុយប្រថាន​នៃ​ចលាចល​របស់​កម្មករ បាន​ធ្វើ​ឲ្យ​វិស័យ​វិនិយោគ​ធ្លាក់​ចុះ​ព្រមទាំង​ប៉ះទង្គិច​ខ្លាំង​ដល់​វិស័យ​ទេសចរណ៍ និង​សកម្មភាព​លក់ដូរ​ផ្ទះសម្បែង។  ប៉ុន្តែ​តាម​ការ​ព្យាករ​បឋម​សម្រាប់​ឆ្នាំ​២០១៣ របស់​ក្រសួង​សេដ្ឋកិច្ច និង​ហិរញ្ញវត្ថុ ដែល​យោង​តាម​ទិន្នន័យ​ស្ថិតិ​ផ្លូវការ​របស់​ស្ថាប័ន​ពាក់ព័ន្ធ និង​វិទ្យាស្ថាន​ជាតិ​ស្ថិតិ​នៅ​ខែ​មិថុនា ឆ្នាំ​២០១៣ កំណើន​ផលិតផល​ក្នុង​ស្រុក​សរុប​នៅ​ឆ្នាំ​២០១៣ មាន​ចំនួន ៧.៦%។

ទោះជា​យ៉ាងណា​ក៏ដោយ ក្រុម​អ្នកស្រាវជ្រាវ​អំពី​ការ​អភិវឌ្ឍ​សង្គម រក​ឃើញ​ថា វិស័យ​សេដ្ឋកិច្ច​របស់​ប្រទេស​ដែល​ធ្លាក់​ចុះ​ខ្លាំង​ជាង​គេ គឺ​វិស័យ​កសិកម្ម។ ក្នុង​ឆ្នាំ​២០១៣ កន្លង​ទៅ កម្ពុជា​ជួប​ប្រទះ​បញ្ហា​គ្រោះ​ទឹក​ជំនន់ និង​គ្រោះ​រាំង​ស្ងួត​ធ្ងន់ធ្ងរ។ គ្រោះ​ទឹក​ជំនន់​នៅ​ឆ្នាំ​២០១៣ បាន​ប៉ះទង្គិច​កម្ពុជា ខ្លាំង​សឹង​ប្រហាក់​គ្នា​ទៅ​នឹង​គ្រោះ​ទឹកជំនន់​កាល​ពី​ឆ្នាំ​២០១១ កន្លង​ទៅ​ដែរ គឺ​ប៉ះទង្គិច​រហូត​ដល់​ទៅ ២០​ខេត្ត-​ក្រុង ធ្វើ​ឲ្យ​ពលរដ្ឋ​ជាង ៣​សែន ៧​ម៉ឺន​គ្រួសារ ស្មើ​នឹង​ជាង ១​លាន ៦​សែន​នាក់ ដែល​ភាគ​ច្រើន​ជា​កសិករ​ជួប​ការ​លំបាក។ បញ្ហា​នេះ​នឹង​អាច​ធ្វើ​ឲ្យ​គណបក្ស​ប្រជាជន​កម្ពុជា ជួប​ហានិភ័យ​ធ្ងន់ធ្ងរ​ខាង​ផ្នែក​ហិរញ្ញវត្ថុ​នៅ​គ្រា​ស្ថានភាព​នយោបាយ​ជាប់​គាំង ហើយ​ខ្វះ​ការ​គាំទ្រ​ពី​ប្រទេស​លោក​សេរី។

ទាក់ទិន​ទៅ​នឹង​អោនភាព​ខាង​ផ្នែក​សេដ្ឋកិច្ច​នៅ​គ្រា​នយោបាយ​កំពុង​ជាប់​គាំង​ទ្រឹង​នេះ មិន​ត្រឹមតែ​ធ្វើ​ឲ្យ​ប៉ះទង្គិច​ដល់​ចំណូល​របស់​ប្រជាពលរដ្ឋ មន្ត្រី​រាជការ និង​អាជីវករ​ប៉ុណ្ណោះ​ទេ ប៉ុន្តែ​ក៏​ប៉ះទង្គិច​ដល់​ក្រុម​អ្នកនយោបាយ​ពី​ខាង​បក្ស​ប្រឆាំង​ផង​ដែរ។

រហូត​មក​ទល់​ពេល​នេះ មាន​តំណាងរាស្ត្រ​របស់​បក្ស​ប្រឆាំង​ជា​ច្រើន​បាន​ចេញ​មក​ធ្វើ​ទស្សនកិច្ច​នៅ​ក្រៅ​ប្រទេស ជាពិសេស​មក​កាន់​សហរដ្ឋអាមេរិក កាណាដា និង​អូស្ត្រាលី ដើម្បី​ស្វែងរក​ជំនួយ និង​ការ​គាំទ្រ​បន្ថែម។

អនុ​ប្រធាន​គណបក្ស​សង្គ្រោះ​ជាតិ លោក កឹម សុខា បាន​ថ្លែង​ទៅ​កាន់​ក្រុម​អ្នកគាំទ្រ​របស់​លោក​ក្នុង​រដ្ឋ​វឺជីនៀ (Virginia) សហរដ្ឋអាមេរិក កាល​ពី​ពាក់​កណ្ដាល​ខែ​មេសា ថា ដង្ហើម​សេដ្ឋកិច្ច​របស់​បក្ស​ប្រឆាំង​គឺ​នៅ​តាម​បណ្ដា​ប្រទេស​លោក​សេរី ដែល​មិន​អាច​ធ្វើ​ឲ្យ​បក្ស​នេះ​ក្ស័យធន​នោះ​ឡើយ។

ទោះបីជា​ក្រុម​មន្ត្រី​បក្ស​ប្រឆាំង​អះអាង​ថា ពួកគេ​នៅ​តែ​មាន​លទ្ធភាព​ខាង​ផ្នែក​ហិរញ្ញវត្ថុ​ដើម្បី​តតាំង​ជាមួយ​បក្ស​កាន់​អំណាច​ក៏ដោយ ហើយ​បក្ស​កាន់​អំណាច​នៅតែ​មិន​ព្រម​ដោះស្រាយ​បញ្ហា​ជាប់​គាំង​នយោបាយ​របស់​ប្រទេស​ក៏ដោយ ក៏​ចុង​បញ្ចប់​អ្នក​ដែល​ត្រូវ​រង​ទុក្ខ​វេទនា គឺ​មាន​តែ​ប្រជារាស្ត្រ​របស់​ខ្លួន​ប៉ុណ្ណោះ។

​នៅ​ពេល​ពលរដ្ឋ​ស្ថិត​ក្នុង​ភាព​ក្រីក្រ មនុស្ស​ជាច្រើន​នឹង​បន្ទោស​ទៅ​ដល់​ការ​ដឹកនាំ​របស់​បក្ស​កាន់​អំណាច ហើយ​ដែល​អាច​នាំ​ឲ្យ​មហាជន​ងើប​តវ៉ា​កាន់​តែ​ខ្លាំង ធ្វើ​ឲ្យ​សង្គម​កាន់តែ​វឹកវរ។ នៅ​ពេល​នោះ បក្ស​កាន់​អំណាច មិន​ត្រឹមតែ​បាត់បង់​ប្រជាប្រិយភាព​ក្នុង​ស្រុក​ធ្ងន់ធ្ងរ​ទេ តែ​បក្ស​មួយ​នេះ​អាច​រង​ការ​ថ្កោលទោស​ខ្លាំង​ពី​សហគមន៍​អន្តរជាតិ ដែល​អាច​ឈាន​ដល់​ការ​ដាក់​ទណ្ឌកម្ម​ផ្នែក​សេដ្ឋកិច្ច​ពី​មហា​អំណាច​លោក​សេរី​ថែម​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (11)
Share

អ្នក​អាន​អនាមិក

GOOD GOOD ...True true 100%

May 04, 2014 11:51 AM

អ្នក​អាន​អនាមិក

វិភាគបានល្អ ហ៊ុន សែនអត់យល់ថា នៅយូររិតតែលំបាកខ្លាំង ដឹងអញ្ចឹងដែរម៉េចបាន សម រង្សី កឹម សុខាចង់ចរចាជាមួយមេចោរហ៊ុន សែនទៀត គ្រាន់តែដាក់គំនាបថែមបន្តិចទៀត ហ៊ុន សែនដួលឯង មិនទៅចរចាជាមួយទៀតទេ

Apr 28, 2014 12:27 PM

អ្នក​អាន​អនាមិក

The UN and international Community is useless! You only could see the problem but you can do nothing! if you can't do anything then stop barking!

Apr 28, 2014 06:09 AM

តា៥ជំនាន់

ខុសជាន់លើខុស​ ពិបាកដកថយណាស់ មានតែរុលទៅមុខហើយខ្ញុំ​ !!!

Apr 28, 2014 12:18 AM

អ្នក​អាន​អនាមិក

Dr.political deadlock,economic crisis,law corruption,no school,speak vietnam cannot and do not know how to solve the proplem.

Apr 27, 2014 11:02 PM

មើល​មតិ​ទាំង​អស់.

គេហទំព័រ​ទាំងមូល