បទ​វិភាគ៖ នយោបាយ "ឯង​ជួយ​អញ អញ​ជួយ​ឯង" របស់​លោក ហ៊ុន សែន

ដោយ ជី វិតា
2014-09-16
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី​ ហ៊ុន សែន ថ្លែង​ក្នុង​ថ្ងៃ​សម្ពោធ​បើក​ការដ្ឋាន​សាងសង់​ស្ពាន​អាកាស​ស្តុប​ទួលគោក រាជធានី​ភ្នំពេញ នៅ​ថ្ងៃ​ទី០៩ ខែ​កញ្ញា ឆ្នាំ ២០១៤។
លោក​នាយករដ្ឋមន្ត្រី​ ហ៊ុន សែន ថ្លែង​ក្នុង​ថ្ងៃ​សម្ពោធ​បើក​ការដ្ឋាន​សាងសង់​ស្ពាន​អាកាស​ស្តុប​ទួលគោក រាជធានី​ភ្នំពេញ នៅ​ថ្ងៃ​ទី០៩ ខែ​កញ្ញា ឆ្នាំ ២០១៤។
Photo: RFA

នៅ​ក្នុង​ប្រព័ន្ធ​សភា​និយម​ដូចជា​កម្ពុជា សមាជិក​រដ្ឋសភា ឬ​តំណាង​រាស្ត្រ​មាន​តួនាទី​សំខាន់​ណាស់​ក្នុង​ការ​ការពារ​ផល​ប្រយោជន៍​ជាតិ។ ដើម្បី​លើក​ទឹក​ចិត្ត​ដល់​អ្នក​តំណាង​រាស្ត្រ​អោយ​បំពេញ​បេសកកម្ម​នេះ រដ្ឋធម្មនុញ្ញ​ដែល​ជា​ច្បាប់​កំពូល​នៃ​ប្រទេស បាន​ផ្តល់​សិទ្ធិ​ពិសេស​ដល់​ពួក​គេ​ថែម​ទៀត។

សិទ្ធិ​ពិសេស​ទាំង​នោះ ហៅថា អភ័យ​ឯក​សិទ្ធិ ដែល​ការពារ​តំណាង​រាស្ត្រ​ពី​ការ​សម្លុត គំរាម​កំហែង ចោទ​ប្រកាន់ ឬ​ចាប់​ចង ដោយ​គ្រាន់​តែ​បាន​សម្ដែង​មតិ​យោបល់ ក្នុង​ការ​បំពេញ​តួនាទី​របស់​ខ្លួន​ជា​អ្នក​តំណាង​រាស្ត្រ។

ប៉ុន្តែ បើ​សិន​តំណាង​រាស្ត្រ​ដែល​មាន​តួនាទី​ឃ្លាំ​មើល​សកម្មភាព​របស់​រដ្ឋាភិបាល ដើម្បី​ជួយ​រាស្ត្រ​បំពេញ​ការងារ​របស់​ខ្លួន ពោរពេញ​ទៅ​ដោយ​ការ​ភ័យ​ខ្លាច​ទៅ​ហើយ​នោះ តើ​បាន​នរណា​ជួយ​រាស្ត្រ?

ត​ទៅ​នេះ លោក ជី វិតា មាន​បទ​វិភាគ​មួយ​ដោយ​ពិនិត្យ​មើល​នយោបាយ “ឯង​ជួយ​អញ អញ​ជួយ​ឯង” របស់​លោក​នាយក​រដ្ឋមន្ត្រី ហ៊ុន សែន ប៉ះពាល់​ដល់​នីតិរដ្ឋ​យ៉ាង​ណា​ខ្លះ៖

ពេល​ចប់​អាណត្តិ​ចាស់​ចូល​ដល់​អាណត្តិ​ថ្មី​ម្តងៗ ទាំង​សហគមន៍​ជាតិ និង​អន្តរជាតិ តែង​សង្ឃឹម​ថា ការ​គ្រប់គ្រង​ប្រទេស​កម្ពុជា នឹង​មាន​ការ​ផ្លាស់​ប្ដូរ​ទៅ​រក​ភាព​ល្អ​ប្រសើរ។ ប៉ុន្តែ​ក្រោម​ការ​គ្រប់គ្រង​របស់​លោក​នាយក​រដ្ឋមន្ត្រី ហ៊ុន សែន ជាង​ពីរ​ទសវត្សរ៍​កន្លង​មក​នេះ វិបត្តិ​ធំៗ​ដូចជា បញ្ហា​អំពើ​ពុក​រលួយ បញ្ហា​ឯករាជ្យ​តុលាការ បញ្ហា​គាប​សង្កត់​រដ្ឋសភា បញ្ហា​បំផ្លាញ​ធនធាន​ធម្មជាតិ បញ្ហា​ដីធ្លី បញ្ហា​អនុវត្តន៍​ច្បាប់​អន្តោប្រវេសន៍ និង​បញ្ហា​និទ្ទណ្ឌភាព ហាក់​កាន់​តែ​ធ្ងន់ធ្ងរ។ កាន់​តែ​ធ្ងន់ធ្ងរ ដោយសារ​តែ​លោក​នាយក​រដ្ឋមន្ត្រី ហ៊ុន សែន នៅ​តែ​បន្ត​នយោបាយ​ការពារ​មន្ត្រី និង​ឈ្មួញ​ខិលខូច ដរាប​ណា​ពួក​គេ​មាន​ភក្តី​ភាព និង​ប្រយោជន៍​ចំពោះ​លោក។ ប៉ុន្តែ​បើ​បុគ្គល​ណា​ធ្វើ​អ្វី​មួយ​ប៉ះពាល់​ដល់​ប្រយោជន៍​របស់​លោក​ហើយ លោក​មិន​អោយ​នៅ​សុខ​ទេ។

ឧទាហរណ៍​ថ្មីៗ លោក​នាយក​រដ្ឋមន្ត្រី ហ៊ុន សែន មិន​ត្រឹម​តែ​មិន​បាន​ថ្លែង​សាទរ​គាំទ្រ​ចំពោះ លោក កឹម សុខា អនុប្រធាន​ទី​១​រដ្ឋសភា ដែល​ចេញ​មុខ​ប្រកាស​ប្រយុទ្ធ​ប្រឆាំង​អំពើ​ពុក​រលួយ​ប៉ុណ្ណោះ​ទេ ប៉ុន្តែ​លោក​បាន​ថ្លែង​គំរាម​ដក​ហូត​តំណែង លោក កឹម សុខា ថែម​ទៀត​ផង។

លោក ហ៊ុន សែន៖ «អើ! ថា​រក​វិធី​បោះ​ឆ្នោត​ទម្លាក់​រដ្ឋមន្ត្រី អឺ! បើ​បោះ​ឆ្នោត​ទម្លាក់​រដ្ឋមន្ត្រី យើង​គិត​បោះ​ឆ្នោត​ទម្លាក់​អនុប្រធាន​រដ្ឋសភា​វើយ។ សំឡេង​អាណា​ខ្លាំង​ជាង​អាណា អា​ហ្នឹង​ប្រយ័ត្ន​ផង​វើយ»

ក្នុង​របប​ប្រជាធិបតេយ្យ រដ្ឋសភា​ដែល​ជា​អង្គ​នីតិប្បញ្ញត្តិ មាន​តួនាទី​សំខាន់​ណាស់​ក្នុង​ការ​ជួយ​ធ្វើ​អោយ​សង្គម​ជាតិ​ស្អាតស្អំ គ្មាន​អំពើ​ពុក​រលួយ និង​លើក​ស្ទួយ​នីតិរដ្ឋ។ រដ្ឋសភា អាច​សម្រេច​គោលដៅ​ទាំង​នេះ​បាន តាម​រយៈ​ការ​ធ្វើ​ច្បាប់​ល្អ​តាម​ដាន​សកម្មភាព​អនុវត្តន៍​ច្បាប់​របស់​រដ្ឋាភិបាល និង​កោះ​ហៅ​មន្ត្រី​រដ្ឋាភិបាល មក​ឆ្លើយ​បំភ្លឺ​នូវ​បញ្ហា​ជាតិ រហូត​ដល់​បោះ​ឆ្នោត​ទម្លាក់​រដ្ឋមន្ត្រី ឬ​នាយក​រដ្ឋមន្ត្រី ដែល​រំលោភ​អំណាច និង​បំពាន​ច្បាប់ ជាដើម។

ប៉ុន្តែ រហូត​មក​ដល់​ចុង​អាណត្តិ​ទី​៤ សហគមន៍​ជាតិ និង​អន្តរជាតិ មើល​ឃើញ​ថា រដ្ឋសភា​កម្ពុជា មិន​ត្រឹម​តែ​មិន​បាន​ប្រើប្រាស់​អំណាច​របស់​ខ្លួន​អោយ​សម​តាម​គន្លង​ប្រជាធិបតេយ្យ ដែល​រដ្ឋធម្មនុញ្ញ​បាន​ប្រគល់​អំណាច​អោយ​ប៉ុណ្ណោះ​ទេ ប៉ុន្តែ​ថែម​ទាំង​ក្លាយ​ជា​ស្ថាប័ន​ចាំ​តែ​ប្រថាប់​ត្រា ឬ​សម្រួល​កិច្ចការ​ដែល​ជា​ប្រយោជន៍​នយោបាយ ជូន​ដល់​រាជ​រដ្ឋាភិបាល​កម្ពុជា ថែម​ទៀត​ផង។

ទោះ​ជា​យ៉ាង​ណា សញ្ញា​ផ្លាស់​ប្ដូរ​ឥរិយាបថ​របស់​ស្ថាប័ន​កំពូល​មួយ​នេះ ហាក់​ដូចជា​ចាប់​ផ្ដើម​ហើយ គឺ​ផ្លាស់​ប្ដូរ​ពី​រដ្ឋសភា​ដែល​ចាំ​តែ​លើក​ដៃ ទៅ​ជា​រដ្ឋសភា​ថ្លៃថ្នូរ គោរព​រដ្ឋធម្មនុញ្ញ។ ប៉ុន្តែ​ពន្លក​ថ្មី​ដែល​កំពុង​អើត​ក្បាល​ប៉ឹមៗ​មក​នេះ ត្រូវ​រង​ការ​គំរាម​ក្តិច​ចោល​ទៅ​វិញ។

នៅ​ដើម​ខែ​កញ្ញា ឆ្នាំ​២០១៤ នេះ លោក កឹម សុខា អនុប្រធាន​ទី​១​រដ្ឋសភា បាន​ប្រកាស​ថា លោក​នឹង​ប្រើប្រាស់​រដ្ឋសភា ដើម្បី​បោះ​ឆ្នោត​ដក​ហូត​មន្ត្រី​រាជការ​ណា​ដែល​ពុក​រលួយ។ ប៉ុន្តែ ការ​ប្ដេជ្ញា​របស់​តំណាង​រាស្ត្រ​រូប​នេះ ត្រូវ​បន្ទច់​បង្អាក់​ដោយ​លោក​នាយក​រដ្ឋមន្ត្រី ហ៊ុន សែន ទៅ​វិញ។ ការ​គំរាម​ដក​ហូត​តំណែង លោក កឹម សុខា ធ្វើ​អោយ​មតិ​ជាតិ និង​អន្តរជាតិ​ខ្លះ​មាន​ការ​ភ្ញាក់ផ្អើល និង​កាន់​តែ​បាត់​បង់​ជំនឿ​លើ​លោក​នាយក​រដ្ឋមន្ត្រី ហ៊ុន សែន ក្នុង​ការ​ប្រយុទ្ធ​ប្រឆាំង​នឹង​អំពើ​ពុក​រលួយ​ថែម​ទៀត។

ភ្ញាក់​ផ្អើល ពីព្រោះ​នា​ពេល​ចុង​ក្រោយ​នេះ លោក​នាយក​រដ្ឋមន្ត្រី ហ៊ុន សែន បាន​លើក​ទឹក​ចិត្ត​អោយ​គណបក្ស​ប្រឆាំង ជួយ​បោស​សម្អាត​អំពើ​ពុក​រលួយ ដោយ​ចាត់​គណបក្ស​ប្រឆាំង គឺ​ជា​កញ្ចក់​សង្គម​ទៀត​ផង។

ប៉ុន្តែ សម្រាប់​អ្នក​តាម​ដាន​ព្រឹត្តិការណ៍​កម្ពុជា យ៉ាង​ដិត​ដល់​នោះ ប្រាកដ​ជា​មិន​ភ្ញាក់​ផ្អើល​អ្វី​ទេ ពីព្រោះ​លោក​នាយក​រដ្ឋមន្ត្រី ហ៊ុន សែន តែង​ឱប​ក្រសោប​ការពារ​មន្ត្រី និង​ឈ្មួញ​ខិលខូច​តែ​អ៊ីចឹង​តាំង​ពី​ដើម​មក។

ចរិត​នយោបាយ “ឯង​ជួយ​គ្នា​អញ អញ​ជួយ​គ្នា​ឯង ឯង​ជួយ​គ្រួសារ​អញ អញ​ជួយ​គ្រួសារ​ឯង” របស់​លោក​នាយក​រដ្ឋមន្ត្រី ហ៊ុន សែន នេះ​ហើយ​ដែល​បាន​ជួយ​អោយ​លោក​ផ្ដួល​រំលំ​សម្ដេច​ក្រុម​ព្រះ នរោត្តម រណឫទ្ធិ អតីត​នាយក​រដ្ឋមន្ត្រី​ទី​១​ក្នុង​អាណត្តិ​ទី​១ បាន​ដោយ​ជោគជ័យ។ ខុស​គ្នា​ពី លោក ហ៊ុន សែន ដែល​តែង​ការពារ​អ្នក​មាន​ស្វាមីភ័ក្តិ​ចំពោះ​លោក ទោះ​ប្រព្រឹត្ត​អ្វី​ខុស​ក៏ដោយ​ចុះ សម្ដេច​ក្រុម​ព្រះ នរោត្តម រណឫទ្ធិ វិញ​មិន​ដូច្នេះ​ទេ។

ព្រះអង្គ​បាន​ឃុបឃិត​គ្នា​ជាមួយ លោក ហ៊ុន សែន នាយក​រដ្ឋមន្ត្រី​ទី​២ នា​ពេល​នោះ ដក​មន្ត្រី​ស្មោះ​ត្រង់​របស់​ព្រះអង្គ គឺ​លោក សម រង្ស៊ី ពី​តំណែង​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ ដោយសារ​តែ​រដ្ឋមន្ត្រី​រូប​នេះ ហ៊ាន​ចេញ​មុខ​បង្ក្រាប​ថៅកែ ថេង ប៊ុនម៉ា ជា​ម្ចាស់​ក្រុមហ៊ុន ថៃ ប៊ុនរ៉ុង ដែល​ល្មើស​ច្បាប់​មិន​បង់​ពន្ធ​លើ​ទំនិញ​នាំ​ចូល។

គ្មាន​នរណា​ហ៊ាន​ក្អក​ជាមួយ លោក ថេង ប៊ុនម៉ា ទេ នៅ​អំឡុង​ទសវត្សរ៍​ឆ្នាំ​១៩៩០ ពីព្រោះ​ឧកញ៉ា​ដ៏​មាន​ឥទ្ធិពល​រូប​នេះ ស្និទ្ធ​នឹង លោក ហ៊ុន សែន។ សូម្បី​តែ លោក ថេង ប៊ុនម៉ា ដក​កាំភ្លើង​ខ្លី​កា​៥៩ បាញ់​បំបែក​កង់​យន្តហោះ ឌឹ រូយ៉ាល់ អ៊ែ ខេមបូឌ (the Royal Air Cambodge) នៅ​ឆ្នាំ​១៩៩៧ ផ្អើល​ពេញ​ពិភពលោក បន្ទាប់​ពី​រក​វ៉ាលី​របស់​គាត់​មិន​ឃើញ​ក៏ដោយ ពេល​ត្រឡប់​ពី​ហុងកុង វិញ​នោះ ក៏​មិន​មាន​អាជ្ញាធរ​មាន​សមត្ថកិច្ច​ណា​ហ៊ាន​ចាប់​ឃាត់​ខ្លួន​គាត់​ដែរ។ ក្រោយ​ព្រឹត្តិការណ៍​រដ្ឋ​ប្រហារ​ទម្លាក់​សម្ដេច​ក្រុម​ព្រះ ឆ្នាំ​១៩៩៧ បាន​ជោគជ័យ លោក ថេង ប៊ុនម៉ា បាន​និយាយ​អួត​ប្រាប់​អ្នក​សារព័ត៌មាន​បរទេស​ថា លោក​បាន​អោយ​លុយ ១​លាន​ដុល្លារ​អាមេរិក​ដល់ លោក ហ៊ុន សែន ដើម្បី​ឧបត្ថម្ភ​ដល់​សកម្មភាព​រដ្ឋ​ប្រហារ​នា​ពេល​នោះ។

ករណី​ការពារ​ប្រយោជន៍​គ្នា​ទៅ​វិញ​ទៅ​មក “ឯង​ជួយ​គ្នា​អញ អញ​ជួយ​ឯង” របស់​លោក​នាយក​រដ្ឋមន្ត្រី ហ៊ុន សែន ដែល​បាន​ស្ដែង​ចេញ​មក​នៅ​មាន​ទៀត។ នេះ​បើ​គិត​តែ​ករណី​ដែល​លាត​ត្រដាង​ចេញ​មក​ប៉ុណ្ណោះ ដូចជា ករណី​ឧកញ៉ា ម៉ុង ឬទ្ធី ដែល​ជាប់​ពាក់ព័ន្ធ​នឹង​ការ​រត់​ពន្ធ​កញ្ឆា​ចំនួន ៧​តោន តាម​ផែ​កំពង់សោម ឆ្នាំ​១៩៩៧ ក៏​ត្រូវ​លោក​នាយក​រដ្ឋមន្ត្រី ហ៊ុន សែន ចេញ​មុខ​ការពារ​ដែរ។ ឧកញ៉ា ម៉ុង ឬទ្ធី ដែល​ជា​ទីប្រឹក្សា​ជាន់​ខ្ពស់​របស់​លោក​នាយក​រដ្ឋមន្ត្រី​ផង​នោះ ជា​អ្នក​ជួយ​លុយ​រាប់​សិប​លាន​ដុល្លារ​ដល់​គម្រោង​អភិវឌ្ឍន៍ ហ៊ុន សែន។

ឧទាហរណ៍​ករណី​ជាក់ស្តែង​ថ្មីៗ​នេះ​ទៀត គឺ​សំណុំ​រឿង​របស់​ទណ្ឌិត ឈូក បណ្ឌិត អតីត​ចៅហ្វាយ​ស្រុក​បាវិត ដែល​ត្រូវ​តុលាការ​កាត់​ទោស​អោយ​ជាប់​គុក ២​ឆ្នាំ ពី​បទ​បាញ់​កម្មករ​រោងចក្រ​បី​នាក់​អោយ​របួស ប៉ុន្តែ​មិន​ដែល​ត្រូវ​បាន​ចាប់​ខ្លួន។ នេះ​ក៏​ដោយសារ​មាន​មន្ត្រី​ជាន់​ខ្ពស់​ការពារ ហើយ​លោក​នាយក​រដ្ឋមន្ត្រី ហ៊ុន សែន ធ្វើ​ជា​មិន​ដឹង​មិន​ឮ។ ក្រោម​ការ​គ្រប់គ្រង​របស់​លោក​នាយក​រដ្ឋមន្ត្រី ហ៊ុន សែន ជាង​ពីរ​ទសវត្សរ៍​មក​នេះ អំពើ​និទ្ទណ្ឌភាព ឬ​ជនល្មើស​ច្បាប់​គេច​ផុត​ពី​សំណាញ់​ច្បាប់ ដោយសារ​តែ​នយោបាយ “ឯង​ជួយ​អញ អញ​ជួយ​ឯង” នេះ នៅ​មាន​ច្រើន​ទៀត។

ងាក​ត្រឡប់​មក​រឿង​គំរាម​ទម្លាក់ លោក កឹម សុខា វិញ។ តើ​ការ​គំរាម​របស់​លោក​នាយក​រដ្ឋមន្ត្រី ហ៊ុន សែន ដោយសារ​តែ​អនុប្រធាន​ទី​១​រដ្ឋសភា​រូប​នេះ ចង់​ខ្ចី​ដៃ​តំណាង​រាស្ត្រ​គណបក្ស​ប្រជាជន​កម្ពុជា ដើម្បី​កម្ចាត់​រដ្ឋមន្ត្រី​ដែល​ពុក​រលួយ មាន​ផល​ប៉ះពាល់​ផ្លូវ​ច្បាប់​យ៉ាង​ណា​ដែរ? មិន​មាន​បញ្ញត្តិ​ណា​មួយ​ចែង​អំពី​នីតិវិធី​ដក​ហូត​តំណែង​ថ្នាក់​ដឹក​នាំ​រដ្ឋសភា ដែល​បាន​សម្ដែង​មតិ ដែល​មតិ​នោះ​ជា​ការ​ផ្តល់​ផល​ប្រយោជន៍​ដល់​ជាតិ​ឡើយ។ ប៉ុន្តែ មាត្រា​៨០ នៃ​រដ្ឋធម្មនុញ្ញ ចែង​ថា តំណាង​រាស្ត្រ​មាន​អភ័យ​ឯក​សិទ្ធិ។ តំណាង​រាស្ត្រ​ណា​ក៏ដោយ មិន​អាច​ត្រូវ​បាន​ចោទ​ប្រកាន់ ចាប់​ខ្លួន ឃាត់​ខ្លួន ឃុំ​ខ្លួន ដោយ​ហេតុ​ពី​បាន​សម្ដែង​យោបល់ ឬ​បញ្ចេញ​មតិ​ក្នុង​ការ​បំពេញ​មុខងារ​របស់​ខ្លួន​បាន​ឡើយ។

ទោះ​ជា​យ៉ាង​ណា ការ​ប្រកាស​ចាត់​វិធានការ​កម្ចាត់​អំពើ​ពុក​រលួយ គឺ​ជា​សេចក្តី​ប្រាថ្នា​របស់​ពលរដ្ឋ​ខ្មែរ​គ្រប់​គ្នា។ សូម្បី​តែ​អង្គភាព​ប្រឆាំង​អំពើ​ពុក​រលួយ ក៏​បាន​លើក​ទឹក​ចិត្ត​អោយ​ពលរដ្ឋ​ខ្មែរ​គ្រប់​រូប ជួយ​គ្នា​បំបាត់​អំពើ​ពុក​រលួយ ដោយ​រាយការណ៍​អំពី​មន្ត្រី​ពុក​រលួយ​ដែរ។ ចុះ​ទម្រាំ លោក កឹម សុខា ប្រើប្រាស់​តួនាទី​ជា​តំណាង​រាស្ត្រ ផ្ដួចផ្ដើម​គំនិត​បំបាត់​អំពើ​ពុក​រលួយ បែរ​ជា​ត្រូវ​ទទួល​ទណ្ឌកម្ម​ទៅ​វិញ។ សួរ​ថា តើ​ប្រជារាស្ត្រ​ខ្មែរ​នឹង​អត់​ក្តៅ​ក្រហាយ​បាន​ទេ?

ភ្លាមៗ​ក្រោយ​ពី​លោក​នាយក​រដ្ឋមន្ត្រី ហ៊ុន សែន គំរាម​បោះ​ឆ្នោត​ទម្លាក់​តំណែង លោក កឹម សុខា ដែល​មាន​បំណង​ប្រយុទ្ធ​ប្រឆាំង​នឹង​អំពើ​ពុក​រលួយ​នោះ អ្នក​លេង​បណ្ដាញ​សង្គម​ហ្វេសប៊ុក (facebook) ជាច្រើន បាន​ជេរ​ប្រទេច​លោក​នាយក​រដ្ឋមន្ត្រី ហ៊ុន សែន យ៉ាង​ចាស់​ដៃ។

ទោះ​ជា​យ៉ាង​ណា មើល​ទៅ​លោក​នាយក​រដ្ឋមន្ត្រី ហ៊ុន សែន ប្រហែល​ជា​ព្រួយ​បារម្ភ​អំពី​សុវត្ថិភាព​របស់​លោក​ផ្ទាល់​ខ្លាំង​ជាង ទើប​ប្រញាប់​វាយ​បក​ទៅ លោក កឹម សុខា ភ្លាមៗ ដោយ​មិន​ទុក​ឱកាស​អោយ លោក កឹម សុខា បញ្ចេញ​សកម្មភាព​មុន។ ការ​បារម្ភ​នោះ គឺ​ថា ប្រសិន​បើ​តំណាង​រាស្ត្រ​គណបក្ស​សង្គ្រោះ​ជាតិ អាច​កៀរគរ​រក​សំឡេង​គាំទ្រ​ពី​តំណាង​រាស្ត្រ​គណបក្ស​ប្រជាជន​កម្ពុជា បាន​ចំនួន ៧​សំឡេង​ទៀត បង្គ្រប់​អោយ​បាន ៥០​ភាគរយ​បូក​១ ដើម្បី​អាច​បោះ​ឆ្នោត​ទម្លាក់​រដ្ឋមន្ត្រី​ពុក​រលួយ​ណា​មួយ​មែន​នោះ ថ្ងៃ​ណា​មួយ ពួក​គេ​អាច​នឹង​បោះ​ឆ្នោត​ទម្លាក់​រូប​លោក​បាន​ដែរ។

អង្គការ​តម្លាភាព​អន្តរជាតិ បាន​ចាត់​ប្រទេស​កម្ពុជា ចូល​ក្នុង​ចំណោម​ប្រទេស​ដែល​មាន​អំពើ​ពុក​រលួយ​ខ្ពស់​បំផុត​មួយ​លើ​លោក។ អំពើ​ពុក​រលួយ​នៅ​កម្ពុជា កើត​មាន​ជា​ប្រព័ន្ធ និង​វេញ​ចាក់ស្រេះ​យ៉ាង​ជ្រៅ​ក្នុង​សង្គម​កម្ពុជា ដែល​មិន​អាច​បំបែក​បាន​ដោយ​ងាយៗ។

ពុក​រលួយ​ចាក់ស្រេះ កប់​ជ្រៅ មិន​អាច​បំបែក​បាន​ដោយ​ងាយៗ​នេះ គឺ​ដោយសារ​តែ​នយោបាយ “ឯង​ជួយ​អញ អញ​ជួយ​ឯង» របស់​គណបក្ស​កាន់​អំណាច​នេះ​ហើយ។

ទោះ​ជា​យ៉ាង​ណា​ក៏ដោយ​ចុះ ក្រុម​អ្នក​ឃ្លាំ​មើល​នយោបាយ​កម្ពុជា យល់​ឃើញ​ថា វា​ល្មម​ដល់​ពេល​ហើយ​ដែល​លោក​នាយក​រដ្ឋមន្ត្រី ហ៊ុន សែន គួរ​បោះ​បង់​ចោល​នយោបាយ “ឯង​ជួយ​អញ អញ​ជួយ​ឯង” ហើយ​ងាក​មក​សហការ​ជាមួយ​គណបក្ស​ប្រឆាំង ដើម្បី​បោស​សម្អាត​អំពើ​ពុក​រលួយ ដូច​ដែល​លោក​បាន​សន្យា​ដ៏​ឧឡារិក​ច្រើន​ដង​ហើយ​នោះ។ ប្រសិន​បើ​លោក​ចេះ​តែ​សន្យា​ខ្យល់​ច្រើន​ពេក ការ​បោះ​ឆ្នោត​អាណត្តិ​ទី​៦ គណបក្ស​ប្រជាជន​កម្ពុជា អាច​នឹង​បាត់​បង់​កៅអី​ច្រើន​ថែម​ទៀត ហើយ​វិបត្តិ​សង្គម​អាច​នឹង​ផ្ទុះ​ឡើង​ដូច​គ្រាប់​បែក​កំណត់​ពេល ដែល​រង់ចាំ​តែ​ឱកាស​ប៉ុណ្ណោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (32)
Share

អ្នក​អាន​អនាមិក

វិភាគបានម៉ាត្រឹមវិភាគតើហ៊ុនសែនមានឈឺក្បាលទេ ើធ្វើលើសដើម

Nov 21, 2014 08:44 PM

អ្នក​អាន​អនាមិក

Look at those smarmy meek sitting on the back. They are nothing but "kbal Yuon kluon chker," waiting for their master commands. When their master says bark, they bark. When their master says chase, they chase. When their master says bite, they bite. When their master says eat, they eat. This is what a obedient dog does.

Sep 21, 2014 08:10 AM

អ្នក​អាន​អនាមិក

a coterie of cronies, bloodsuckers

Sep 25, 2014 06:28 AM

អ្នក​អាន​អនាមិក

this puppet pm forgot the suffering of the poor he endured during his young age.

Sep 20, 2014 05:54 AM

អ្នក​អាន​អនាមិក

អំណាចពីយួនដែលត្រូវផ្តល់ផល់ទៅយួនវិញ ការសម្លាប់តាមវិធីនាៗ ពុករលួយខ្លួនឯងនិងបរិវា ។ អំណាចមួយនេះមិនអាចបាត់បង់ពេលហ៊ុនសែននៅរសបានទេ។ ខ្មែរមិនមានច្បប់ប្រហារជីវិតទេ!។ ការបំពាន កេងបន្លំទាំងឡាយ ហ៊ុនសែនអាចយកច្បាប់ ការពាររដ្ឋធម្មនុញ្ញ ច្បាប់ប៉ះពាល់សន្តាប់ធ្នាប់ និង ច្បាប់ប៉ះទង្គិចមកសម្លាប់អ្នកតវាបានដោយមិនកំណត់ពេលនិងទីកន្លែង។នយោបាយអញ់ឲ្យអែងអែងឲ្យអញ់ ហ៊ុុនសែនទទួលបានជំនៀនៃអំណាចនិងទទួលជំនៀបន្តិចបន្ទួចពីបរិវាដែលជាថ្នូរជាមួយហ៊ុនសែនជួយកាងការពារផល់ប្រយោជន៍ដែលរាប់មិនអស់របស់ពួកគេ។

Sep 17, 2014 09:36 PM

knock dictator out

if u want cambodia to be strong leadership and strong country ,stable , prosperity and peace everybody must clean up the bad leader, criminal leader...assasi...or execution by the way u can .So next leaderships will scare to commit a bad crime or scare to lead u and the country .U are the rightful ownership of your country ,right to defend and right to eliminate the bad leader by forces and not let one-man-lead and force u or the whole country fall into enemy hands control .if u don do it u still die...but if u do it u still die too...but u still get a chance to knock it out .

Sep 17, 2014 05:11 PM

មើល​មតិ​ទាំង​អស់.

គេហទំព័រ​ទាំងមូល