អាកាសធាតុ​កើន​កំដៅ​ខ្លាំង​អ្នកស្រុក​អង្គរ​នាំគ្នា​ប្រារព្ធ​ពិធី​សុំ​ទឹកភ្លៀង​ជា​ទំនៀមទម្លាប់​កេរ​ដូនតា

ដោយ សេក បណ្ឌិត
2024.05.04
អាកាសធាតុ​កើន​កំដៅ​ខ្លាំង​អ្នកស្រុក​អង្គរ​នាំគ្នា​ប្រារព្ធ​ពិធី​សុំ​ទឹកភ្លៀង​ជា​ទំនៀមទម្លាប់​កេរ​ដូនតា ទិដ្ឋភាព​អ្នកស្រុក​អង្គរ​រាំហែ​នាងម៉េវ (សត្វ​ឆ្មារ) ក្នុង​បរិវេណ​ប្រាសាទ​នាគព័ន្ធ ខេត្ត​សៀមរាប កាល​ពី​​ថ្ងៃ​ទី៣ ឧសភា ២០២៤។
រូប៖ ពលរដ្ឋផ្ដល់ឱ្យ

អាកាសធាតុ​កើន​កំដៅ​ខ្លាំង​នាំ​ឱ្យ​កើតមាន​គ្រោះ​រាំងស្ងួត​អូស​បន្លាយ​ពេល បណ្តាល​ឱ្យ​អ្នកស្រុក​អង្គរ​មួយចំនួន​ភិតភ័យ បាន​នាំគ្នា​ប្រារព្ធ​ពិធីបុណ្យ​សុំ​ទឹកភ្លៀង រយៈពេល​ពីរ​ថ្ងៃ​ជាប់​គ្នា ដើម្បី​សុំ​ទឹកភ្លៀង​ក្នុង​តំបន់​ឧទ្យាន​អង្គរ​ខេត្តសៀមរាប។

អ្នកស្រុក​អង្គរ​បាន​ចាត់ទុក​ពិធីបុណ្យ​នេះ​ជា​ប្រពៃណី​ទំនៀមទម្លាប់​មរកត​ដូនតា ហើយ​ពួកគាត់​ជឿ​ថា ក្រោយពី​រៀបចំ​ពិធីបុណ្យ​នេះ​រួច នឹង​មាន​ភ្លៀង​ធ្លាក់។

នេះ​ជា​ភ្លេង​របាំ​ត្រុដិ​នាងម៉េវ (ដង្ហែ​សត្វ​ឆ្មារ​) ដែល​អ្នកស្រុក​អង្គរ​រាំ​ដង្ហែ​នាងម៉េវ ក្នុង​ពិធីបុណ្យ​សុំ​ទឹកភ្លៀង​ក្នុង​បរិវេណ​ប្រាសាទ​នាគព័ន្ធ​។ ពិធី​នេះ​អ្នកភូមិ​ជឿ​ថា ការ​ដង្ហែ​សត្វ​ឆ្មារ​តំណាង​ឱ្យ ស្តេច​រាហ៊ូ​ខ្ជាក់​ទឹកភ្លៀង ស្រោចស្រព​ដំណាំ​ភោគផល​របស់​ពួកគាត់ ដែល​កំពុង​ប្រឈម​គ្រោះ​រាំងស្ងួត។

ពិធីបុណ្យ​នេះ ប្រារព្ធ​ឡើង​រយៈពេល​ពីរ​ថ្ងៃ ចាប់​ថ្ងៃទី​២ ដល់​ថ្ងៃទី​៣ ខែ​ឧសភា ដោយមាន​មនុស្ស​ចូលរួម​រាប់​រយ​នាក់ ភាគច្រើន​ជា​ពលរដ្ឋ​រស់នៅ​តំបន់​អង្គរ។

ពួកគាត់​សាមគ្គី​គ្នា​រៀបចំ​ពិធីបុណ្យ​សុំ​ទឹកភ្លៀង ដោយ​រៃអង្គាស​ប្រាក់​គ្នា កំណត់​ថ្ងៃបុណ្យ​អម​ដោយ​កិច្ច​របស់​ព្រហ្ម​សាសនា រៀបចំ​គ្រឿង​សក្ការបូជា ក្រុង​ពាលី សែន​អារក្ស និង​កិច្ច​របស់​ព្រះពុទ្ធសាសនា​ដោយ​ប្រគេន​ចង្ហាន់​ព្រះសង្ឃ និង​សូត្រ​មន្ត​ជាដើម។

បន្ថែម​ពី​នេះ​ទៀត នៅពេល​រសៀល​ថ្ងៃ​បន្ទាប់ ពួកគាត់​បាន​ប្រារព្ធ​ពិធីសែនព្រេន​ជាន់អារក្ស រាំ​ដង្ហែ​ជុំវិញ​ប្រាសាទនាគព័ន្ធ ស្រោច​ទឹក​តាម​ជញ្ជាំង​ប្រាសាទ​ដែល​មាន​រូបចម្លាក់​រាហ៊ូ និង ពិធី​ដង្ហែ​សត្វ​ឆ្មារ ឬ​ហៅថា នាង​ម៉េវ។

ចាស់ព្រឹទ្ធាចារ្យ​ចូល​ពិធីបុណ្យ​រស់នៅ​ស្រុក​អង្គរធំ លោក ណាប់ ឡាញ់ វ័យ ៧០ ឆ្នាំ មាន​ប្រសាសន៍​ថា ពិធីបុណ្យ​នេះ​មិនអាច​ប្រារព្ធ​ឡើង​ជា​រៀងរាល់​ឆ្នាំ​បាន​ទេ លុះត្រាតែ​ឆ្នាំ​ណាមួយ​មិន​សូវ​មាន​ភ្លៀង ជួប​គ្រោះ​រាំងស្ងួត ទើប​អ្នកស្រុក​មូលមតិ​គ្នា​រៀបចំឡើង។

លោក​ថា បុណ្យ​សុំ​ទឹកភ្លៀង​មាន​សារៈសំខាន់​ណាស់ បន្សល់​ពី​ដូនតា ប្រៀប​ដូចជា​ប្រាសាទនាគព័ន្ធ​មានព្រលឹង​រស់នៅ​ដោយសារតែ​វប្បធម៌​របស់​មនុស្ស​រស់​បង្កើត​ព្រឹត្តិការណ៍​ត្រឹមត្រូវ​តាម​ក្បូន​ខ្នាត និង​ទំនៀម​ទម្លាប់​ដូនតា។

លោក ណាប់ ឡាញ់៖ «បទពិសោធន៍​ធ្វើ​ទៅ​បាន​ផល​ដែរ រួច​មួយថ្ងៃ​ពីរ ក៏​ភ្លៀង​ទៅ លេង​ភ្លេង​នាង​ម៉េវ ហើយ​គេ​សែង​ឆ្មារ​ផង»

អ្នកស្រុក​អង្គរ​បាន​កំណត់​យក​ទីតាំង​បរិវេណ​ប្រាសាទនាគព័ន្ធ​ប្រារព្ធ​ពិធីបុណ្យ​សុំ​ទឹកភ្លៀង​ឆ្នាំនេះ ដោយ​គេ​ជឿ​ថា រូប​ចំណាក់​រាហ៊ូ​នៅ​ផ្នែក​ខាងកើត​នៃ​ប្រាសាទនាគព័ន្ធ​ជា​ចំណុច​សំខាន់​ដែល​ពួកគាត់​ធ្វើ​ពិធីសែនព្រេន ស្រោច​ទឹក និង ជាន់អារក្ស​។ ប្រាសាទ​នេះ ឋិត​នៅ​ទិស​ខាងជើង ពី​ទី​រួម​ខេត្តសៀមរាប មាន​ចម្ងាយ​ជាង ១០ គីឡូម៉ែត្រ ពី​ប្រាសាទអង្គរវត្ត ដោយមាន​បារាយ​ព័ទ្ធជុំវិញ​។

សិល្បករ​ភ្លេងបុរាណ លោក ចៅ ភេត្រា ប្រាប់​វិទ្យុ​អាស៊ីសេរី​ថា បច្ចុប្បន្ន​ខេត្ត​សៀមរាប​កំពុង​ជួប​គ្រោះ​រាំងស្ងួត​អាកាសធាតុ​កើន​កំដៅ​ខ្លាំង ធ្វើ​ឱ្យ​អ្នកស្រុក​ខ្លះ​ភិតភ័យ ខ្លាចក្រែង​មុខរបរ​ធ្វើស្រែ​ចម្ការ​មិនសូវ​បាន​ផល​ដោយ​សារ​ខ្វះ​ទឹកភ្លៀង។

លោក​ថា អ្នកភូមិ​ពឹងផ្អែក​លើទឹក​ភ្លៀង ប្រសិនបើ​គ្មាន​ភ្លៀង​ពួកគាត់​នឹង​ជួប​ការ​លំបាក ខ្វះ​ទឹក​ធ្វើ​កសិកម្ម បណ្តាល​ឱ្យ​ការងារ​ធ្វើស្រែ​ចម្ការ​ត្រូវ​រអាក់រអួល ប៉ះពាល់​ជីវភាព​គ្រួសារ​។ ប្រការ​នេះ​ហើយ ទើប​អ្នកស្រុក​អង្គរ​ប្រារព្ធ​ពិធី​បុណ្យ​ឡើង។

លោក ចៅ ភេត្រា៖ «ផ្តាំ​ដល់​បងប្អូន​ខ្មែរ​យើង​ទាំងអស់ គាំទ្រ​និង​ស្វែង​យល់​ពី​មរកត​វប្បធម៌​ខ្មែរ​យើង​។ ចូល​ទៅ​ប្រាសាទ​ហាក់​មាន​ព្រលឹង វិញ្ញាណ​ដោយសារ​វប្បធម៌​មនុស្ស​រស់នៅ គាត់​បាន​បង្កើត​ឡើង»

អាជ្ញាធរ​ជាតិ​អប្សរា​បាន​ផ្សព្វផ្សាយ​តាម​បណ្ដាញ​សង្គម​ហ្វេសប៊ុក (Facebook)​ប្រាប់​ឱ្យ​មហាជន​ចូលរួម​ស្វែងយល់ ពី​ជំនឿ​របស់​អ្នកស្រុក​អង្គរ​ដែល​គោរព​ប្រតិបត្តិ​ប្រពៃណី ជា​យូរលង់​ណាស់​មក​ហើយ​។ បន្ថែម​ពី​នេះ​ទៀត អ្នកភូមិ​រស់នៅ​ក្នុង​ឃុំ​លាងដៃ ស្រុក​អង្គរធំ បាន​ប្រារព្ធ​ពិធីបុណ្យ​សុំ​ទឹកភ្លៀង​តាម​ទំនៀមទម្លាប់​ប្រពៃណី​របស់​អ្នកភូមិ។

អាជ្ញាធរ​ថា ពិធី​នេះ​ធ្វើ​ឡើង ក្នុង​បរិវេណ​ប្រាសាទ​នាគព័ន្ធ​កណ្តាល​បារាយណ៍​ជ័យតដាក ឬ​បារាយណ៍​ខាងជើង។

វិទ្យុ​អាស៊ីសេរី​មិនទាន់​អាច​ទាក់ទង​សុំ​ការអធិប្បាយ​ជុំវិញ​រឿង​នេះ ពី​អ្នកនាំពាក្យ​អាជ្ញាធរ​ជាតិ​អប្សរា លោក ឡុង កុសល បាន​នៅ​ឡើយ​ទេ នៅ​ថ្ងៃទី៣ ឧសភា។

អ្នក​សិក្សា​ផ្នែក​ព្រហ្ម​សាសនា និង​ជា​អាចារ្យវត្ត​ព្រះឥន្ទកោសា លោក ម៉ាលី សានី ពន្យល់​ថា ពិធីបុណ្យ​នេះ​មាន​សារសំខាន់​ណាស់​ឆ្លុះ​បញ្ចាំង ពី​កេរដំណែល​ដូនតា និង​ស្នាដៃ​របស់​បុព្វបុរស​ដែល​កូនចៅ​ជំនាន់​ក្រោយ ត្រូវ​រួមគ្នា​ថែរក្សា និង​អភិរក្ស ដែល​ជា​ផ្នែក​មួយ​ទាក់ទាញ​ភ្ញៀវ​ទេសចរ។លោក​ថា បំណង​របស់​ដូនតា​ចង់ឱ្យ​កូនចៅ​ជំនាន់​ក្រោយ​បន្ត​ប្រារព្ធ​ពិធី​នេះ​ដែល​ជា​អត្តសញ្ញាណ​ប្រវត្តិសាស្ត្រ ភូមិ​កំណើត​របស់​អ្នកស្រុក​អង្គរ។

លោក ម៉ាលី សានី៖ «ការ​ហែ​នាងម៉េវ ដោយ​យក​សត្វ​ឆ្មារ​ដាក់​ក្នុង​ទ្រុង ដើម្បី​ហែ​ឱ្យ​អ្នកភូមិ​ជះ​ទឹក​លើ​ស្មារ​ហ្នឹង ឆ្មារ​តំណាង​ឱ្យ​រាហ៊ូ ដើម្បី​ឱ្យ​រាហ៊ូ​ស្រោចស្រព​ដំណាំ នៅ​ជុំវិញ​អង្គរ​ឱ្យ​លួត​លាស់​ល្អ»

ជុំវិញ​រឿង​នេះ​ប្រធាន​កម្មវិធី​បណ្ដាញ និង​តស៊ូ​មតិ​នៃ​អង្គការ​ភាពជា​ដៃគូ​ដើម្បី​បរិស្ថាន និង​ការ​អភិវឌ្ឍ លោក សាន់ ម៉ាឡា យល់​ថា ពលរដ្ឋ​ប្រារព្ធ​ពិធី​នេះ ទំនង​ពួកគាត់​អស់​ជំនឿ​លើ​មនុស្ស ក្នុង​ការ​ដោះស្រាយ​ការប្រែប្រួល​អាកាសធាតុ​ទើប​ងាក​ទៅ​ពឹង​បារមី និង​អារក្ស​អ្នកតា។

លោក​ថា បច្ចុប្បន្ន​អាកាសធាតុ​ឡើង​កំដៅ​ជាង ៤០​អង្សា ធ្វើ​ឱ្យ​ពលរដ្ឋ​ជួប​ការ​លំបាក​ច្រើន​រស់នៅ​ប្រចាំថ្ងៃ ប៉ះពាល់​អាយុជីវិត​មនុស្ស សត្វ និង​មុខរបរ​ស្រែចម្ការ​របស់​ពលរដ្ឋ​។ លោក​ថា បញ្ហា​នេះ​ជា​ការ​ប្រែប្រួល​អាកាសធាតុ ដែល​ទាមទារ​ឱ្យ​បញ្ឈប់​សកម្មភាព​កាប់​ឈើ ហើយ​ងាក​មក​ថែរក្សា​ព្រៃឈើ​ដែល​មាន​ស្រាប់ និង​ដាំ​ដើម​ឈើ​ឡើង​វិញ។

លោក សាន់ ម៉ាឡា៖ «វា​អាច​ជា​ផ្នែក​មួយ នៅពេល​មនុស្ស​អស់ជំនឿ​លើ​មនុស្ស​គ្នាឯង ឬ​មនុស្ស​គ្មាន​សមត្ថភាព​ដោះស្រាយ​បញ្ហា​ណាមួយ មនុស្ស​ងាក​ទៅ​ពឹងពាក់​បារមី និង​អ្នកតា​ដើម្បី​ថែរក្សា និង​ផ្តល់​ដំណោះស្រាយ​ណាមួយ ដល់​ពួកគាត់»

ឯកសារ​ស្រាវជ្រាវ​អ្នក​សិក្សា​អរិយធម៌​ខ្មែរ​បង្ហាញថា មូលហេតុ​ដែល​ភ្លៀង​មិន​ទៀងទាត់​អ្នកស្រុក​អង្គរ​ជឿ​ថា មាន​កត្តា​ពីរ​យ៉ាង ទី​០១ ដោយសារ អារក្សអ្នកតា​ខឹង​សម្បារ ដែល​អ្នកភូមិ​មិន​អើពើ​សែនព្រេន​ឱ្យ​ពួកគាត់ និង​ទី២ មាន​ករណី​លួច​មាន​សហាយស្មន់ នៅ​រដូវវស្សា ដែល​អ្នកស្រុក​ហៅថា ជំទាវ​ហិនហោច នាំ​ឱ្យ​កើតមាន​គ្រោះ​រាំងស្ងួត។

ប្រការ​នេះ​ហើយ ដែល​អ្នកស្រុក​អង្គ​រតែង​នាំគ្នា អុច​ធូប បួងសួង​ទេវតា រុក្ខ​ទេព្តា និង​អារក្សអ្នកតា មេត្តា​បង្អុរ​ភ្លៀង​ឱ្យ​បាន​គ្រប់គ្រាន់​ដើម្បី​ប្រកប​កិច្ចការ​ធ្វើ​កសិកម្ម និង​សូម​ឱ្យ​ដំណាំ​ដុះ​លូតលាស់​ល្អ ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។