សមត្ថកិច្ច​រក​ឃើញ​ជនបរទេស​១៥​នាក់ ដែល​ប្តឹង​តាម​ហ្វេសប៊ុក​លោក ស ខេង ប៉ុន្តែ​ពុំ​មែន​​ជា​ករណី​បង្ខាំង​ទេ

ដៅយ អាស៊ីសេរី
2022.10.02
Share on WhatsApp
Share on WhatsApp
សមត្ថកិច្ច​រក​ឃើញ​ជនបរទេស​១៥​នាក់ ដែល​ប្តឹង​តាម​ហ្វេសប៊ុក​លោក ស ខេង ប៉ុន្តែ​ពុំ​មែន​​ជា​ករណី​បង្ខាំង​ទេ អ្នកនាំពាក្យ​ក្រសួង​មហាផ្ទៃ លោក ខៀវ សុភគ៌។
RFA

សមត្ថកិច្ច បាន​ចុះ​ត្រួតពិនិត្យ​ទីតាំង​២​កន្លែង​នៅ​ខេត្ត​ព្រះសីហនុ កាលពី​ថ្ងៃទី ៣០ ខែកញ្ញា បន្ទាប់ពី​មាន​បណ្តឹង​ចំនួន​២ តាមរយៈ​ទំព័រ​ហ្វេសប៊ុក (Facebook) របស់​លោក ស ខេង ក៏ប៉ុន្តែ​សមត្ថកិច្ច​រក​ឃើញ​ថា ពុំ​មែន​ជា​ករណី​ចាប់​បង្ខាំង​នោះ​ទេ។

អ្នកនាំពាក្យ​ក្រសួងមហាផ្ទៃ លោក ខៀវ សុភ័គ បាន​ប្រាប់​កាសែត​ក្នុងស្រុក​ថា សមត្ថកិច្ច​រក​ឃើញ និង​នាំ​ខ្លួន​ជនរងគ្រោះ ម្នាក់​ជា​ជនជាតិ​ចិន និង​ជនបរទេស​៩​នាក់​ផ្សេងទៀត​មក ស្នងការដ្ឋាន​នគរបាល​ខេត្ត ដើម្បី​បន្ត​នីតិវិធី តាម​បណ្តឹង​ទី​១ នៅ​កាស៊ីណូ ស៊ីង ធាន ឌី ស្ថិតនៅ​ក្រុម​ទី​៨ សង្កាត់​លេខ​៤ ក្រុងព្រះសីហនុ​។ ចំណែក​បណ្តឹង​ទី​២ វិញ គឺ​ស្ថិតនៅ​អគារ​ស្នាក់នៅ​បុគ្គលិក របស់​ក្រុមហ៊ុន ហ័ង ឡឺ នៅ​សង្កាត់​លេខ​៣ ក្រុងព្រះសីហនុ ដោយ​សមត្ថកិច្ច រក​ឃើញ​ជនរងគ្រោះ​សរុប​ចំនួន ៥​នាក់ ក្នុង​នោះ​ស្រី ៤​នាក់ ជា​ជនជាតិ​ម៉ាឡេស៊ី ដែល​៣​នាក់ មានឈ្មោះ​ក្នុង​បណ្តឹង និង​ម្នាក់ទៀត ស្នើសុំ​ចេញ​ដោយ​ខ្លួនឯង។

ពាក់ព័ន្ធ​នឹង​ជនអន្តោប្រវេសន៍​ខុសច្បាប់​នៅ​កម្ពុជា​នេះ​ដែរ កាលពី​ថ្ងៃទី៣០ ខែកញ្ញា អគ្គនាយកដ្ឋាន​អន្តោប្រវេសន៍ បាន​បណ្តេញ​ជនបរទេស​ចំនួន​៣៧​នាក់ ក្នុង​នោះ​មាន​ស្រី​៦​នាក់ ចេញពី​កម្ពុជា តាម​អាកាសយានដ្ឋាន​អន្តរជាតិ​ភ្នំពេញ និង​ប៉ុស្តិ៍​នគរបាល​ច្រកទ្វារ​ព្រំដែន អន្តរជាតិ​ត្រពាំង​ផ្លុង។

សេចក្តី​ប្រកាស​ព័ត៌មាន​របស់​អ្នកនាំពាក្យ​អគ្គនាយកដ្ឋាន​អន្តោប្រវេសន៍ នៅ​ថ្ងៃទី ១ ខែតុលា ឲ្យ​ដឹងថា ជនបរទេស​ទាំង​៣៧​នាក់​នោះ មាន​៣​សញ្ជាតិ ក្នុង​នោះ​ជនជាតិ​ម៉ាឡេស៊ី​ចំនួន​១៣​នាក់ ជនជាតិ​វៀតណាម​ចំនួន​២៣​នាក់ និង​ជនជាតិ​តង់ហ្សានី​ម្នាក់ ត្រូវ​បាន​សមត្ថកិច្ច​ឃាត់ខ្លួន ពាក់ព័ន្ធ​នឹង​បទល្មើស​លួច​ឆ្លងដែន​ខុសច្បាប់ លួច​ស្នាក់នៅ​និង​ធ្វើការ​ខុសច្បាប់ ដែល​ល្មើស​នឹង​ច្បាប់​អន្តោប្រវេសន៍​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។