សកម្មជន​បរិស្ថាន​ថា ការ​អនុញ្ញាត​របស់​ក្រសួង​ឱ្យ​ក្រុមហ៊ុន​ធ្វើ​អាជីវកម្ម​ឈើ​ខ្នាត​ធំ​​ស្មើ​នឹង​ឃុបឃិត​បំផ្លាញ​ព្រៃឡង់

ដោយ វ៉ែន សុមេធ
2020-02-05
អ៊ីម៉ែល
មតិ
Share
បោះពុម្ព
ទិដ្ឋភាព​ឈើ​ឋិត​ក្នុង​ដី​សម្បទាន​សេដ្ឋកិច្ច​ធីង៉ា អភិវឌ្ឍន៍ និង​វិនិយោគ ខេត្ត​ព្រះវិហារ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។
ទិដ្ឋភាព​ឈើ​ឋិត​ក្នុង​ដី​សម្បទាន​សេដ្ឋកិច្ច​ធីង៉ា អភិវឌ្ឍន៍ និង​វិនិយោគ ខេត្ត​ព្រះវិហារ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។
រូប​សហគមន៍

សហគមន៍​ព្រៃ​ឡង់ និង​សកម្មជន​បរិស្ថាន​ប្រតិកម្ម​ខ្លាំងៗ ដោយ​ចោទ​ក្រសួង​កសិកម្ម​ថា មាន​ចេតនា​បើកដៃ​ឱ្យ​ក្រុមហ៊ុន​សម្បទាន​សេដ្ឋកិច្ច​ធ្វើ​អាជីវកម្ម​ខ្នាត​ធំ នៅ​ឈើ​ជាប់​ព្រៃ​ឡង់ ខេត្ត​ព្រះវិហារ​ជា​ថ្មី​ទៀត ដែល​ពួកគេ​ចាត់ទុកថា ជា​ការ​សមគំនិត​រួមចំណែក​បំផ្លាញ​ទំហំ​ព្រៃ​បន្សល់​ចុងក្រោយ ក្នុង​ព្រៃ​អភិរក្ស និង​ព្រៃ​សាធារណៈ​របស់​រដ្ឋ​។ សកម្មជន​បរិស្ថាន​អះអាង​ថា ក្រុមហ៊ុន និង​ឈ្មួញ នៅតែ​ប្រើ​រូបមន្ត​ដដែលៗ ឃុបឃិត​ជាមួយ​មន្ត្រី​ជំនាញ ធ្វើ​អាជីវកម្ម​ឈើ​ខ្នាត​ធំ​ជាប់​ព្រៃ​ឡង់។

សហគមន៍​ព្រៃ​ឡង់ ខេត្ត​ព្រះវិហារ និង​សកម្មជន​បរិស្ថាន បង្ហាញ​ក្តី​ព្រួយបារម្ភ​ជា​ថ្មី​ទៀត ពី​អនាគត​ព្រៃ​ឡង់​ដែល​នៅតែ​ទទួលរង​ការ​កាប់​ចោះ​យក​ឈើ​ធំៗ ដោយ​គ្មាន​ការទប់ស្កាត់​។ ពួកគេ​សង្កេត​ឃើញ​ថា បន្ទាប់ពី​មាន​វត្តមាន​ក្រុមហ៊ុន ធីង៉ា អភិវឌ្ឍន៍ និង​វិនិយោគ (THY NGA CO., LTD. DEVELOPMENT AND INVESTMENT ) បាន​បោះ​ទីតាំង​អារ​ច្រៀក​ឈើ និង​ប្រមូល​ឈើ​ខ្នាត​ធំ ជាប់​ព្រៃ​ឡង់​ជាង ១​មួយ​ខែ​មក មាន​ក្រុម​កម្មករ​ជាច្រើន​ក្រុម​​កំពុង​សម្រុកចូល​អារ​ផ្ដួល​ឈើ​មូល​ធំៗ ក្នុង​ព្រៃឡង់ នៅ​ចំណុច​ជាំរាម ចំណុច​ក្បាល​អូរតួក ចំណុច​វាល​ពពាល និង​ចំណុច​ជាំ​ប្រវឹក។

ប្រធាន​សហគមន៍​ព្រៃឡង់ ខេត្ត​ព្រះវិហារ លោក ស្រី ថី ឱ្យ​ដឹង​នៅ​ថ្ងៃ​ទី៥ កុម្ភៈ ថា ក្រុម​ល្បាត​របស់​សហគមន៍​ព្រៃ​ឡង់ ប្រទះឃើញ​គល់ឈើ​មានមុខ​កាត់ ៥​តឹក​ឡើង​ទៅ ឋិត​ក្នុង​តំបន់​ព្រៃ​ឡង់ ប្រមាណ​ជាង ២០០ ដើម ត្រូវ​គេ​អារ​រំលំ​ធ្វើ​អាជីវកម្ម​នៅ​ពេល​ថ្មីៗ​នេះ​។ លោក​ថា ក្រុម​ឈ្មួញ​កំពុង​សម្រុក​កាប់​ឈើ​ក្នុង​តំបន់​ព្រៃ​ពាក់​កណ្ដាល​ស្រោង ដែល​ជា​ឈើ​បន្សល់​ចុងក្រោយ​ក្នុង​ព្រៃ​ការពារ​ធម្មជាតិ​មួយ​នេះ ហើយ​ដឹកជញ្ជូន​ចូល​បរិវេណ​ក្រុមហ៊ុន​ធី​ង៉ា អភិវឌ្ឍន៍ និង​វិនិយោគ​៖ «ក្រុមហ៊ុន​ហ្នឹង​មុន រដ្ឋបាល​ស្រុក​គេ​ដុត​បំផ្លាញ​ចោល​មួយ​សារ​ហើយ អាប៉ា​កុង​ហ្នឹង ដល់​ពេល​នេះ​ចាប់ផ្ដើម​ធ្វើ​សាជាថ្មី​ទៀតហើយ​។ ការ​ព្រួយ​បារម្ភ​របស់​ខ្ញុំ ប្រសិន​ថា អាជ្ញាធរ និង​ក្រសួង​ឬ​ពាក់ព័ន្ធ​មិន​ចាត់ការ​ទេ វា​អាច​នឹង​វិនាស​ចុងក្រោយ​បំផុត​ហើយ ព្រៃ​ហ្នឹង​។ ហើយ​ព្រៃ​ដែល​ខ្ញុំ​មើល​ឃើញ គឺ​ព្រៃ​ឡង់​ដែល​ស្អាត និង​ល្អ​ជាងគេ ដែល​នៅសល់​ចុងក្រោយ​។ ប៉ុន្មាន​ថ្ងៃមុន​ហ្នឹង​ឈើ​ដែល​ខ្ញុំ​រាប់​មើល​គល់​វា ប្រហែល ២០០​ដើម​ដែល​គេ​កាប់​អស់»

លោក ស្រី ថី បន្ថែម​ថា ក្រុមហ៊ុន​បាន​ឈូស​ឆាយ​ផ្លូវ​តម្រង់​ឆ្ពោះ​ទៅ ព្រៃ​ពាក់​កណ្តាល​ស្រោង​ដែល​សំបូរ​ដោយ​ឈើ​ធំៗ ដូចជា គគីរ ផ្ចឹក កកោះ ពពេល និង ឈើ​ប៉ាដៀក​ឋិត​ក្នុង​តំបន់​ព្រៃ​ឡង់ ហើយ​ក្រុម​កម្មករ​ជាច្រើន​ក្រុម​ប្រដាប់​ដោយ​ម៉ាស៊ីន​អារ​ឈើ​ស្វ័យប្រវត្តិ និង​វិទ្យុ​ទាក់ទង​គ្រប់​ដៃ កំពុង​ធ្វើ​សកម្មភាព​អារ​ច្រៀក​ឈើ​ក្នុង​ព្រៃ​។ លោក​បន្ថែម​ថា ឈើ​មូល​ធំៗ ត្រូវ​បាន​ក្រុម​ជនល្មើស ដឹកជញ្ជូន​លក់​ឱ្យ​ថៅកែ​ចាំ​ទទួល​ទិញ ក្នុង​ដី​សម្បទាន​សេដ្ឋកិច្ច ធី​ង៉ា អភិវឌ្ឍន៍ និង​វិនិយោគ​(THY NGA CO., LTD. DEVELOPMENT AND INVESTMENT ) នៅ​ជាប់​តំបន់​ព្រៃ​ឡង់ ដើម្បី​អា​ច្រៀក​ធ្វើ​អាជីវកម្ម៖ «វា​ទៅ​អែបអប​ជាមួយ​ក្រុមហ៊ុន​ធីង៉ា ហ្នឹងហើយ ដើម្បី​យក​ផ្លូវ​ដឹក​ជញ្ជូន​ជាមួយគ្នា​ហ្នឹង។ ព្រៃ​ហ្នឹង​ប្រសិនបើ​យើង​មិន​ទប់ស្កាត់ អាជ្ញាធរ​មិន​អនុវត្ត​ច្បាប់ អាជ្ញាធរ​មិន​អនុវត្ត​ច្បាប់ មិន​អាច​នៅ​បាន​ទេ ព្រៃ​ច្បោះ​ហ្នឹង​។ អឺ ! លោកគ្រូ​អើយ សង្ឃឹម​ពួក​ហ្នឹង​ចប់​ហើយ (​មន្ត្រី​បរិស្ថាន​) ខ្ញុំ​មើល​ទៅ​ដូច​មិន​អើពើ​សោះ បើ​គិត​ទៅ​បើ​យក​តែ​លុយ​ហើយ​ចប់​ហើយ​។ ទៅ​មើល​កាលពី​ម្សិល​នេះ គេ​ចាប់​គោយន្ត​ដឹក​ឈើ​គេ​ពិន័យ​ក្នុង​ព្រៃ​យក ២​លាន​គោយន្ត​មួយ គោយន្ត​ពីរ យក​២​លាន​ដែរ ហើយ​ប្រលែង​ទៅវិញ​ទៅ​មាន​ស្អី»

ឆ្លើយតប​រឿង​នេះ តំណាង​ក្រុមហ៊ុន ធីង៉ា អភិវឌ្ឍន៍ និង​វិនិយោគ​លោក មេធាវី ហេង សុទ្ធារ៉ា បាន​សរសេរ​លិខិត​បដិសេធ​ចំពោះ​ប្រព័ន្ធ​ផ្សព្វផ្សាយ​ក្នុងស្រុក​មួយ​ចំនួន ចោទ​ក្រុមហ៊ុន​ថា ឈូស​ឆាយ និង​កាប់​ឈើ លក់​យ៉ាង​អនាធិបតេយ្យ​ក្នុង​ខេត្ត​ព្រះវិហារ​។ មេធាវី​រូប​នេះ បកស្រាយ​ថា ក្រុមហ៊ុន​ធ្វើ​សកម្មភាព​ឈូស​ឆាយ​ប្រមូល​ផល អនុផល​ព្រៃឈើ​ក្នុង​រង្វង់​ដែនដី​សម្បទាន​សេដ្ឋកិច្ច ដែល​ក្រសួង​កសិកម្ម​អនុញ្ញាត​ប៉ុណ្ណោះ​។ លោក​បន្ថែម​ថា ក្រុមហ៊ុន​មិន​បាន​ធ្វើ​សកម្មភាព កាប់​ឈើ​ពី​ខាងក្រៅ ឬ​ឈូស​ឆាយ​ហួស​ដែន​កំណត់​នោះ​ឡើយ​។ ទន្ទឹម​នឹង​នេះ ក្រុមហ៊ុន​មិនបាន​លក់​ឈើ​ទាំង​នោះ​ទេ គឺ​ប្រមូល​ចូល​រោងចក្រ​របស់​ក្រុមហ៊ុន​ផលិត​គ្រឿង​សង្ហា​រឹម និង​ក្ដារ​កុងផ្លាកេ​លក់ ដើម្បី​យក​លុយ​បើកប្រាក់​ខែ​ឱ្យ​បុគ្គលិក​កម្មករ។

ទិដ្ឋភាព​ឈើ​ឋិត​ក្នុង​ដី​សម្បទាន​សេដ្ឋកិច្ច​ធីង៉ា អភិវឌ្ឍន៍ និង​វិនិយោគ ខេត្ត​ព្រះវិហារ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។
ទិដ្ឋភាព​ឈើ​ឋិត​ក្នុង​ដី​សម្បទាន​សេដ្ឋកិច្ច​ធីង៉ា អភិវឌ្ឍន៍ និង​វិនិយោគ ខេត្ត​ព្រះវិហារ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។ រូប​សហគមន៍

របាយការណ៍​ស្រាវជ្រាវ​របស់​សកម្មជន​បរិស្ថាន​បង្ហាញ​ថា ក្រុមហ៊ុន ធី ង៉ា អភិវឌ្ឍន៍ និង​វិនិយោគ (THY NGA CO., LTD. DEVELOPMENT AND INVESTMENT ) ទទួល​បាន​សិទ្ធិ​វិនិយោគ​បន្ត​ពី​ក្រុមហ៊ុន​ដួង ស្រួច គ្រុប (DOUNG SROUCH GROUP) ដែល​ជា​របស់​លោកជំទាវ សេង គាង។ ក្រុមហ៊ុន​ដួង​ស្រួច​គ្រុប ធ្លាប់​មាន​រឿងអាស្រូវ ប្រមូល​ឈើ​ជុំវិញ​ព្រៃ​ឡង់ និង​ក្នុង​តំបន់​ព្រៃ​ឡង់​នៅ​ឆ្នាំ ២០១៣ រហូតដល់​ឆ្នាំ ២០១៧ ក្រោយមក​បាន​ផ្ទេរសិទ្ធិ​ទៅ​ឱ្យ​ក្រុមហ៊ុន​ធី​ង៉ា អភិវឌ្ឍន៍​កាលពី​ឆ្នាំ ២០១៨​។ ក្រុមហ៊ុន​ទាំងនោះ គ្រប់គ្រង​ដោយ លោកជំទាវ សេង គាង និង​លោក ជា ពៅ ជា​ម្ចាស់​ក្រុមហ៊ុន​អង្គរ​ផ្លាយហ្វូដ (Angkor plywood) ទទួល​ការ​អនុញ្ញាត​ពី​ក្រសួង​កសិកម្ម។

អាស៊ីសេរី​នៅ​មិនទាន់​អាច​ទាក់ទង លោកជំទាវ សេង គាង ម្ចាស់​ក្រុមហ៊ុន​ធីង៉ា អភិវឌ្ឍន៍ ដើម្បី​សុំ​ការ​បំភ្លឺ​ករណី​នេះ​បាន​ទេ នៅ​ថ្ងៃ​ទី៥ កុម្ភៈ។

ចំណែក​រដ្ឋមន្ត្រី​ក្រសួង​កសិកម្ម លោក វេង សាខុន និង​អ្នកនាំពាក្យ​ក្រសួងកសិកម្ម លោក ស្រី វុ​ឌ្ឍី និង​លោក ឡោ រស្មី ក៏​មិន​អាច​ទាក់ទង​បាន​ដែរ ដោយសារ​ពួក​លោក​មិន​ទទួល​ទូរស័ព្ទ នៅ​ថ្ងៃ​ដដែល​នេះ​។​

ចំណែក​អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី មិន​អធិប្បាយ​លើ​បញ្ហា​នេះ​ទេ ដោយ​លើក​ហេតុផល​ថា ទាក់ទិន​ដី​សម្បទាន​សេដ្ឋកិច្ច​ជា​សមត្ថកិច្ច​របស់​ក្រសួង​កសិកម្ម​។ តែ​យ៉ាងណា​លោក​ថា ឱ្យ​តែ​មាន​បទល្មើស​ព្រៃឈើ គណៈកម្មការ​ជាតិ​នឹង​បង្ក្រាប​៖ «ខ្ញុំ​បាន​ជម្រាប​ជូន​ហើយ ឱ្យ​តែ​ល្មើសច្បាប់​គឺ​យើង​បង្ក្រាប​ហើយ តែ​ចំពោះ​របស់​គេ គេ​ចេញ​មក​មាន​ច្បាប់​ត្រឹមត្រូវ ខ្ញុំ​បង្ក្រាប​របៀប​ម៉េច​? សូម​ឱ្យ​សួរ​ទៅ​ក្រសួង​កសិកម្ម ដែល​គាត់​ជា សមត្ថកិច្ច​របស់​គាត់ គ្រប់គ្រង​ខាង​ដី​សម្បទាន​ហ្នឹង»

លិខិត​មួយ​សន្លឹក ដែល​អាស៊ីសេរី​ទទួល​បាន មាន​ហត្ថលេខា​អ្នកនាំពាក្យ​ក្រសួង​កសិកម្ម លោក ស្រី វុឌ្ឍី ចុះ​ថ្ងៃទី​៣ មករា ឆ្នាំ​២០២០ ជម្រាប​ទៅ​នាយក​ក្រុមហ៊ុន ធី ង៉ា អភិវឌ្ឍន៍ បាន​បង្ហាញ​ពី​កម្មវត្ថុ​ដែល​ក្រុមហ៊ុន​សុំ​ការ​អនុញ្ញាត​ឈូស​ឆាយ​ក្នុង​អនុតំបន់ ៤ និង​អនុតំបន់ ៥ ដោយ​យោង​លើ​របាយការណ៍ របស់​គណៈកម្មការ​ចរចា លក់​ផល អនុផល​ព្រៃឈើ ដែល​ទទួល​បាន​ពី​ការ​ឈូស​ឆាយ ក្នុង​តំបន់​ដី​សម្បទាន​សេដ្ឋកិច្ច​។ លិខិត​នោះ មិនបាន​កំណត់​ទីតាំង​ដែល​ត្រូវ​ឈូស​ឆាយ ត្រឹមណា​ឱ្យ​ជាក់លាក់​នោះ​ទេ​។​

ទិដ្ឋភាព​ឈើ​ឋិត​ក្នុង​ដី​សម្បទាន​សេដ្ឋកិច្ច​ធីង៉ា អភិវឌ្ឍន៍ និង​វិនិយោគ ខេត្ត​ព្រះវិហារ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។
ទិដ្ឋភាព​ឈើ​ឋិត​ក្នុង​ដី​សម្បទាន​សេដ្ឋកិច្ច​ធីង៉ា អភិវឌ្ឍន៍ និង​វិនិយោគ ខេត្ត​ព្រះវិហារ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។ រូប​សហគមន៍

សហគមន៍​ព្រៃ​ឡង់​កាល​ពី​ពេល​ថ្មីៗ​នេះ ប្រទះឃើញ​គំនរ​ឈើ​មូល​មានមុខ​កាត់ ជិត ២​តឹក​ឡើង​ទៅ ប្រវែង​ប្រហែល​ជិត ២​ម៉ែត្រ​ឡើង​ទៅ ត្រូវ​គេ​ដឹក​មក​គរ​ទុក​រាប់រយ​ម៉ែត្រ​គូប ឋិត​ក្នុង​បរិវេណ​ក្រុមហ៊ុន ធីង៉ា អភិវឌ្ឍន៍ ក្នុង​ឃុំ​រៀបរយ ស្រុក​រវៀង ខេត្ត​ព្រះវិហារ​។ លើស​ពី​នេះ ពួកគេ​សង្ស័យ​ថា ឈើ​ដែល​ទើបតែ​កាប់​រំលំ​ថ្មីៗ ដឹកជញ្ជូន​ចេញពី​ព្រៃ​ឡង់​ទំនង ជា​លាក់​ទុក នៅ​ទីតាំង​ផ្សេងគ្នា​ក្នុង​បរិវេណ​ក្រុមហ៊ុន ដោយ​មានការ​យាមល្បាត​យ៉ាង​ប្រុងប្រយ័ត្ន ខណៈ​ក្រុមហ៊ុន​មាន​ម៉ាស៊ីន​អារ​ច្រៀក​ឈើ​ខ្នាត​ធំ ឋិត​ក្នុង​ដី​សម្បទាន​សេដ្ឋកិច្ច​របស់​ខ្លួន។

ចំណែក សកម្មជន​បរិស្ថាន លោក ហេង ស្រស់ មើល​ឃើញ​ថា រូបភាព​អាជីវកម្ម​ឈើ​របស់​ក្រុមហ៊ុន ធី​ង៉ា​អភិវឌ្ឍន៍ និង​វិនិយោគ ដូចគ្នា​និង​ក្រុមហ៊ុន​សម្បទាន​សេដ្ឋកិច្ច​ចំនួន ៧ នៅ​ខេត្ត​មណ្ឌលគិរី​ដែល​គណៈកម្មការ​ជាតិ​ចុះ​អនុវត្ត​ច្បាប់​កន្លង​ទៅ។ លោក​គិត​ថា រដ្ឋាភិបាល​ត្រូវតែ​បិទ​ក្រុមហ៊ុន​សម្បទាន​សេដ្ឋកិច្ច​នេះ ព្រោះ​មិនបាន​ផ្ដល់​ប្រយោជន៍​អ្វី​ដល់​ពលរដ្ឋ​នោះទេ ក្រៅពី​ធ្វើ​អាជីវកម្ម​ឈើ​ប៉ះពាល់​បរិស្ថាន និង​ធនធានធម្មជាតិ​។ លោក​បារម្ភ​ថា ប្រសិនបើ​រដ្ឋាភិបាល​នៅតែ​បណ្ដោយ​ឱ្យ​ក្រុមហ៊ុន​នេះ ដំណើរការ​អាជីវកម្ម​ទៀត ព្រៃឈើ​ក្នុង​ប្រទេស​កម្ពុជា​ដែល​នៅ​សេសសល់​ខ្លះ​នោះ​នឹង​រលាយ​សាប​សូន​ពេល​ឆាប់ៗ៖ «បើ​យើង​មើល​ពី​ចំណាក់​ការ​របស់​រដ្ឋាភិបាល គាត់​បាន​បិទ​ទាំង​ពី​ឆ្នាំ ២០១៥​ម្ល៉េះ​ថា មិន​ឱ្យ​មាន​ធ្វើការ​ដី​សម្បទាន​សេដ្ឋកិច្ច​តទៅទៀត​ទេ ប៉ុន្តែ​ថ្មីៗ​នេះ​គឺ លិខិត​ចេញ​ដោយ​ក្រសួង​កសិកម្ម ស៊ីញ៉េ​ដោយ​លោក ស្រី វុឌ្ឍី អនុញ្ញាត​ឱ្យ​មាន​ដី​សម្បទាន​សេដ្ឋកិច្ច​ហ្នឹង​បន្ត​ទៀត​។ នេះ​ជា​ភាព​មួយ​មិន​ប្រក្រតី​ធ្វើ​ឱ្យ​សកម្មជន​ព្រៃឈើ គាត់​មាន​មន្ទិល​សង្ស័យ​ថា អ្នក​ទាំង​អស់ហ្នឹង កំពុងតែ​រួមគ្នា​ចូល​ដៃជើង​ប្រព្រឹត្ត​បទល្មើស​ព្រៃឈើ បំផ្លាញ​ក្នុង​ប្រទេស​កម្ពុជា»

រថយន្ត​ប៉ាកុង​ច្នៃ​ដែល​ក្រុមហ៊ុន​ធីង៉ា អភិវឌ្ឍន៍ និង​វិនិយោគ ធ្វើ​ជា​មធ្យោបាយ​ដឹកជញ្ជូន​ឈើ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។
រថយន្ត​ប៉ាកុង​ច្នៃ​ដែល​ក្រុមហ៊ុន​ធីង៉ា អភិវឌ្ឍន៍ និង​វិនិយោគ ធ្វើ​ជា​មធ្យោបាយ​ដឹកជញ្ជូន​ឈើ ដែល​សហគមន៍​ប្រទះ​ឃើញ កាល​ពី​ថ្ងៃ​ទី៤ ខែ​កុម្ភៈ ឆ្នាំ​២០២០។ រូប​សហគមន៍

សហគមន៍​ព្រៃ​ឡង់​បន្ថែម​ថា បច្ចុប្បន្ន​ក្រុមហ៊ុន​ធីង៉ា អភិវឌ្ឍន៍ និង​វិនិយោគ មាន​រថយន្ត​ប៉ាកុង ៧​គ្រឿង សម្រាប់​ដឹកជញ្ជូន​ឈើ​មូល ធ្វើ​អាជីវកម្ម​នៅ​ជាប់​ព្រៃ​ឡង់ ដែល​ពួកគេ​ដាក់​ការ​សង្ស័យ​ថា រថយន្ត​ទាំងនោះ​នឹង​ធ្វើ​សកម្មភាព​ដឹក​ឈើ​ពី​ព្រៃ​ឡង់ បន្លំ​ចូល​បរិវេណ​ក្រុមហ៊ុន ប្រសិនបើ​អាជ្ញាធរ​ធ្វេសប្រហែស និង​គ្មាន​ឆន្ទៈ​ការពារ​ព្រៃឡង់។

របាយការណ៍​របស់​គណៈកម្មការ​ជាតិ​ដើម្បី​ទប់ស្កាត់ និង​បង្ក្រាប​បទល្មើស​ព្រៃឈើ​បង្ហាញ​ថា អំឡុង​ឆ្នាំ​២០១៩ គណៈកម្មការ​ជាតិ បាន​ចាប់ និង​បញ្ជូន​ខ្លួន​ជន​ប្រព្រឹត្ត​បទល្មើស​ព្រៃឈើ ចំនួន ៥៩ នាក់ ទៅ​តុលាការ​។ គណៈកម្មការ​ជាតិ បាន​រឹបអូស​ឈើ​ជាង ៩​លាន​ម៉ែត្រ​គូប​( ,២១៥,៨៧៦) រឹបអូស​រថយន្ត និង​មធ្យោបាយ​ដឹកជញ្ជូន​ឈើ​ជិត ៥០០ គ្រឿង (៤៩១​គ្រឿង​) រឹបអូស​រថយន្ត​បា​កុង និង​មធ្យោបាយ​កែច្នៃ​ជាង ២០០​គ្រឿង (២១២) ត្រូវ​បាន​ដុត​បំផ្លាញ​ចោល​នៅ​ហ្នឹង​កន្លែង។

ប្រសិនបើ​លោកអ្នក​នាង​ចង់​ឃើញ​រូបថត​នៃ​គំនរ​ឈើ​មូល​ដ៏​សន្ធឹកសន្ធាប់ នៅ​ក្នុង​បរិវេណ​ក្រុមហ៊ុន ធី​ង៉ា​អភិវឌ្ឍន៍ ក្នុងស្រុក​រវៀង ខេត្ត​ព្រះវិហារ សូម​ចូល​ទៅ​ក្នុង​គេហទំព័រ​​របស់​អាស៊ីសេរី www.rfa.org/khmer

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល