ពលរដ្ឋខ្មែរក្រោមនឹងធ្វើពិធីរំឭកខួបបារាំងកាត់ទឹកដីឱ្យវៀតណាមនៅវត្តសាមគ្គីរង្សី

ដោយ យន់ សាមៀន
2024.05.19
ពលរដ្ឋខ្មែរក្រោមនឹងធ្វើពិធីរំឭកខួបបារាំងកាត់ទឹកដីឱ្យវៀតណាមនៅវត្តសាមគ្គីរង្សី កញ្ញា ឆន ស្រីណែត ពលរដ្ឋខ្មែរកម្ពុជាក្រោម និងជាបវរកញ្ញាឯករងទី១នៃបរវកញ្ញាចក្រវាលកម្ពុជា២០២១ ចូលរួមប្រារព្ធខួបលើកទី៧៣ឆ្នាំថ្ងៃចងចាំនៃការបាត់បង់ទឹកដីកម្ពុជាក្រោមទៅប្រទេសវៀតណាម កាលពីថ្ងៃទី០៣ ខែកក្កដា ឆ្នាំ២០២២។
រូប៖ ពលរដ្ឋ

ពលរដ្ឋ​ខ្មែរ​កម្ពុជា​ក្រោម​នៅ​កម្ពុជា​និង​ប្រទេស​មួយ​ចំនួន​ទៀត​នឹង​ប្រារព្ធ​ទិវា​លើក​ទី ៧៥ឆ្នាំ​នៃ​ថ្ងៃ​អាណានិគម​បារាំង​កាត់​ទឹកដី​កម្ពុជា​ក្រោម​ទាំង​ខុស​ច្បាប់​ឲ្យ​វៀតណាម​ត្រួតត្រា​។ ​រយៈ​ពេល ​៧៥ឆ្នាំ​នេះ ​វៀតណាម​ធ្វើ​ទុក្ខបុកម្នេញ​ផ្នែក​សិទ្ធិ​មនុស្ស​និង​សាសនា​លើ​ពលរដ្ឋ​និង​ព្រះ​សង្ឃ​ខ្មែរ​ក្រោម​ឥត​មាន​ពេល​ស្រាកស្រាន្ត​។

ពលរដ្ឋ​ខ្មែរ​ក្រោម​រំលឹក​ព្រឹត្តិការណ៍​នេះ​ ដើម្បី​ឲ្យ​កូន​ខ្មែរ​គ្រប់​ជំនាន់​ចង​ចាំ​នូវ​ប្រវត្តិសាស្ត្រ​ដ៏​ជូរ​ចត់​នេះ និង​ដើម្បី​សំដែង​ការ​ដឹង​គុណ​ដល់​វីរភាព​និង​ពលីកម្ម​របស់​បុព្វបុរស​ខ្មែរ​ដែល​បាន​តស៊ូ​ថែរក្សា​ពូជសាសន៍​ខ្មែរ ​សាសនា ​វប្បធម៌ ទំនៀមទម្លាប់​ប្រពៃណី​ជាតិ​ខ្មែរ ​ឲ្យ​បាន​គង់វង្ស​រហូត​មក​ដល់​សព្វ​ថ្ងៃ​នេះ។

បារាំង​បាន​កាត់​ទឹក​ដី​កម្ពុជា​ទៅ​ឲ្យ​វៀតណាម​ត្រួតត្រា​ទាំង​ខុស​ច្បាប់​ដោយ​គ្មាន​យល់ព្រម​ពី​កម្ពុជា​កាលពីថ្ងៃទី៤ ខែមិថុនាឆ្នាំ១៩៤៩ រហូត​មក​ទល់​ពេល​នេះ មាន​រយៈ​ពេល​៧៥ឆ្នាំ​ហើយ។

នៅ​កម្ពុជា សមាគម​ខ្មែរ​កម្ពុជា​ក្រោម​ដើម្បី​សិទ្ធិ​មនុស្ស​និង​អភិវឌ្ឍន៍​នឹង​ប្រារព្ធ​ទិវា​បាត់បង់​ទឹកដី​នៅ​ឯ​វត្ត​ សាមគ្គី​រង្សី ​ឋិត​នៅ​ខណ្ឌ ​មានជ័យ រាជធានី ភ្នំពេញ។កម្មវិធីនេះនឹងចាប់ផ្ដើមពីម៉ោង៨ព្រឹក ដល់ម៉ោង ១១និង៣០ថ្ងៃត្រង់ ថ្ងៃអាទិត្យ ទី៩ មិថុនា។ ក្នុង​ពិធី​នេះ នឹងមានពិធីបុណ្យសង្ឃទានប្រគេនព្រះសង្ឃចំនួន៧៥អង្គ ឧទ្ទិស​មហា​កុសល​ប្រគេន​គោរពវិញ្ញាណក្ខន្ធ ព្រះ​វីរ​សមណ ​និង​ជូន​ដួង​វិញ្ញាណក្ខន្ធ​វីរបុរស​ខ្មែរ​ស្នេហាជាតិ។​ សមាគម​ក៏​បាន​អញ្ជើញ​តំណាង​ព្រះរាជ​តំណាង​របស់​ព្រះមហាក្សត្រ ព្រះបាទ​ នរោត្តម​ សីហមុនី​ ជា​ព្រះ​អធិបតីភាព​ផង​ដែរ។

ដោយ​ឡែក​នៅ​សហរដ្ឋអាមេរិក​វិញ ​សហព័ន្ធ​ខ្មែរ​កម្ពុជាក្រោម​នឹង​ប្រារព្ធ​ទិវា​​បាត់បង់​ទឹក​ដី​នេះ​ជា​លក្ខណៈ​ទ្រង់ទ្រាយ​ធំ ​នៅ​រដ្ឋ ( California) និង (Washington State)

សហព័ន្ធ​នឹង​ធ្វើ​ពិធី​នេះ​នៅ​ទីក្រុង​ សានហូហ្ស៊េ (San Jose)​នៅ​ថ្ងៃ​ទី​ ១ មិថុនា រីឯ​នៅ​ទីក្រុង (Tacoma, Washington State) វិញ​ធ្វើ​នៅ​ថ្ងៃ​ទី​ ៩​ មិថុនា​។​ ប្រធាន​ប្រតិបត្តិ​សហព័ន្ធ​ខ្មែរ​កម្ពុជា​ក្រោម​ លោក​ ប្រាក់ ​សេរីវុឌ្ឍ ​មាន​ប្រសាសន៍​ថា ​ខ្មែរ​ក្រោម​ធ្វើ​ពិធី​នេះ​ឡើង ដើម្បីពញ្ញាក់​ស្មារតី​ខ្មែរ​កុំ​ភ្លេច​​ពី​ការ​បាត់បង់​ទឹក​ដី​ និង​ការ​ឈឺចាប់​របស់​ពលរដ្ឋ​ខ្មែរ​ក្រោម​ដែល​រស់​នៅ​ក្រោម​ការ​ត្រួតត្រា​របស់​វៀតណាម។ ​​​

លោក​ ប្រាក់ ​សេរីវុឌ្ឍ៖ «ក្នុង​ខួប​៧៥ឆ្នាំ​នេះ​មាន​សារៈសំខាន់​មួយ​ចំនួន​ដើម្បី​រំលឹក​ឲ្យ​ពលរដ្ឋ​ខ្មែរ​ទូទៅ​ទឹក​ដី​មួយ​ភាគ​បី​នៃ​ព្រះ​រាជាណាចក្រ​កម្ពុជា​បាន​បាត់បង់​ទៅ​កណ្ដាប់​ដៃ​វៀតណាម​ដោយសារ​តែ​បារាំង​កាត់​ទឹកដី​ដោយ​គ្មាន​ការ​អនុញ្ញាត​ពី​រដ្ឋាភិបាល​កម្ពុជា​ពេល​នោះ​។​ក្រៅ​ពី​បាត់បង់​ទឹក​ដី​ក៏​មាន​ការ​គាប​សង្កត់​លើ​យើង​រហូត​ជា​ពិសេស​របប​កុម្មុយនិស្ត​»។

លោក​ ប្រាក់ ​សេរីវុឌ្ឍ​ ក៏​រំលឹក​ដល់​រដ្ឋាភិបាល​ខ្មែរ​ កុំ​ឲ្យ​ភ្លេច​ខ្លួន​ ព្រោះ​ខ្លាច​បន្ត​បាត់បង់​ទឹក​ដី​ខ្មែរ​បន្ថែម​ទៀត។

លោក​ ប្រាក់ ​សេរីវុឌ្ឍ៖ «រាជ​រដ្ឋាភិបាល​និង​ពលរដ្ឋ​ខ្មែរ​ត្រូវ​ដឹង​ថា​បើ​យើង​មិន​ប្រុង​ប្រយ័ត្ន កម្ពុជា​យើង​នឹង​ក្លាយ​ជា​កម្ពុជាក្រោម​ទី​ពីរ​ហើយ​»។

លោក​បន្ត​ថា ​ក្នុង​រយៈ​ពេល​៧៥ឆ្នាំនេះ វៀតណាម​ប្រើប្រាស់​គ្រប់​មធ្យោបាយ​ដើម្បី​បំបាត់ ​អត្តសញ្ញាណ ​វប្បធម៌​ ប្រពៃណី ​និង​សាសនា​ខ្មែរ​។ ​សព្វថ្ងៃ​ មាន​ព្រះ​សង្ឃ​ខ្មែរ​ក្រោម ៥អង្គ ​និង​សកម្មជន​ខ្មែរ​ក្រោម ​៨នាក់​ កំពុង​ជាប់​ឃុំ​ដោយសារ​តែ​សកម្មភាព​ទាមទារ​សិទ្ធ​ស្វ័យ​សម្រេច​។ ​វៀតណាម​បាន​ចោទ​ព្រះសង្ឃ​និង​សកម្មជន​ខ្មែរ​ក្រោម​ពី​បទ​បំបែក​បំបាក់​សាមគ្គី​វៀតណាម ​និង​កេងប្រវ័ញ្ច​លទ្ធិប្រជាធិបតេយ្យ ហើយ​មន្ត្រី​វៀតណាម​នៅ​អង្គការសហប្រជាជាតិ​នៅ​តែ​អះអាង​វៀតណាម​គោរព​សិទ្ធិ​មនុស្ស ទោះបីជា​មន្ត្រី​សិទ្ធិ​មនុស្ស​ជាតិ​ និង​អន្តរជាតិ​អះអាង​ផ្ទុយ​វិញ​ថា ​ការ​ចោទ​ប្រកាន់​លើ​ព្រះអង្គ​និង​ពលរដ្ឋ​ខ្មែរ​ក្រោម​គ្រាន់​តែ​ជា​លេស​របស់​វៀតណាម​ដើម្បី​ធ្វើ​ទុក្ខបុកម្នេញ​ខ្មែរ​ក្រោម ​ជា​ជនជាតិ​ដើម។​

ជុំវិញ​រឿង​នេះ​លោក ប្រាក់ សេរីវុឌ្ឍ ​បញ្ជាក់​ថា ​ខ្មែរ​ក្រោម​កំពុង​ធ្វើ​យុទ្ធនាការ​អន្តរជាតិ ដើម្បី​ជំរុញ​ឲ្យ​វៀតណាម​គោរព​សិទ្ធិ​មនុស្ស​និង​ដោះលែង​ព្រះសង្ឃ​និង​សកម្មជន​ខ្មែរ​ក្រោម។

ប្រាក់ សេរីវុឌ្ឍ៖ «ធ្វើ​ការ​ពន្យល់​ឲ្យ​បងប្អូន​យើង​យល់​ពី​សិទ្ធិ​របស់​ខ្លួន​ ហើយ​សិទ្ធិ​ជា​សិទ្ធិ​ស្រប​ច្បាប់​របស់​អន្តរជាតិ​​។ សិទ្ធិ​ទាំង​នោះ​មាន​សិទ្ធិ​បញ្ចេញ​មតិ​ គ្រប់គ្រង​ដី​ស្រែ​ខ្លួន​ សិទ្ធិ​ពលករ ស្ត្រី និង​កុមារ​។​យើង​កំពុង​ពន្យល់​ឲ្យ​ពួក​គាត់​យល់​ហើយ​»។

បច្ចុប្បន្ន​ខ្មែរ​នៅ​ទូទាំង​ពិភព​លោក ​កំពុង​ធ្វើ​យុទ្ធនាការ​បាតុកម្ម​នៅមុខ​ស្ថានទូត​វៀតណាម​ដើម្បី​អន្តរជាតិ​បាន​ដឹង​លឺ​ការ​រំលោភ​សិទ្ធិ​មនុស្ស​របស់​វៀតណាម​ទៅ​លើ​ពលរដ្ឋ​ខ្មែរ​ក្រោម ​និង​ដោះលែង​ព្រះសង្ឃ​និង​សកម្មជន​ខ្មែរ​ក្រោម​៕​​​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។