សមាជិក​សភាអាមេរិក​ ថាការ​ពិតដែល​លោក​ដឹង​ច្បាស់​ គឺរបប​លោក​ហ៊ុន​សែន​រំលោភ​សិទ្ធិមនុស្ស​ និង​បំផ្លាញ​ប្រជាធិបតេយ្យ​ធ្ងន់​ធ្ងរ​

អ្នកស្រី ម៉ៅ សុធានី/លោក មួង ណារ៉េត
2020-09-19
អ៊ីម៉ែល
មតិ
Share
បោះពុម្ព
សមាជិក​សភាអាមេរិក​លោក​ អាឡែន ឡូវ៉ិនស្សល (Alan Lowenthal)
សមាជិក​សភាអាមេរិក​លោក​ អាឡែន ឡូវ៉ិនស្សល (Alan Lowenthal)
Congressman Lowenthal's Facebook

សមាជិក​សភា​អាមេរិកបញ្ជាក់​ជំហរជាថ្មី តបទៅ​នឹងការចោទ​ប្រកាន់​របស់​របប​ក្រុងភ្នំពេញ​ ដែល​ចោទ​លោក​​ថា ​មិន​ដឹងបញ្ហា​កម្ពុជា។ លោកថា​ការចាប់​ខ្លួន​យុវជន​ជា​ច្រើន​នាក់​ ដែល​បានចូលរួម​យ៉ាង​សកម្ម​ក្នុងការងារ​នយោបាយ​និងសង្គម​ នាពេល​ថ្មីៗ​ ចុងក្រោយ​នេះ​ គឺបង្ហាញ​យ៉ាង​ច្បាស់​ក្រឡែត​ថា​ របប​លោក​ហ៊ុន​ សែន​ធ្វើអ្វី​គ្រប់​បែប​យ៉ាង​ ដើម្បី​បន្តកាន់​អំណាច​ផ្តាច់​ការ​របស់​ខ្លួន​តែ​ប៉ុណ្ណោះ​។

ប្រតិកម្ម​របស់​សមាជិក​សភាអាមេរិក​ លោក​ អាឡែន ឡូវ៉ិនស្សល​ (Alan Lowenthal)​ ធ្វើឡើង​ភ្លាមៗ ក្រោយ​ដែល​ក្រសួងការបរទេស​កម្ពុជា កាលពី​ថ្ងៃទី​១៨ ខែកញ្ញា​ បាន​ចោទ​សមាជិក​សភា​ និង​មន្រ្តីការបរទេស​អាមេរិក ថាមិន​យល់ពី​សភាពការណ៍​ពិត និង​ការ​អនុវត្ត​ច្បាប់​នៅកម្ពុជា​ ករណីឃាត់​ខ្លួនសកម្មជន​បរិស្ថាន​ ព្រំដែន​ និង​នយោបាយ​។

លោក អាឡែន ឡូវ៉ិនស្សល (Alan Lowenthal) ប្រាប់អាស៊ីសេរី នៅរ​សៀល​ថ្ងៃទី១៨​ ខែ​កញ្ញា​ តបទៅ​នឹង​ការចោទ​ប្រកាន់​របស់របប​ក្រុងភ្នំពេញ​នេះ​ថា ​លោកបានយល់​ច្បាស់​អំពីការ​ពិត​ទាំងឡាយ ជុំវិញ​​ការរំលោភ​សិទ្ធិមនុស្ស​ និង​បំផ្លាញ​ប្រជាធិបតេយ្យ​ធ្ងន់​ធ្ងរ​នៅកម្ពុជា។

លោកបន្ត​​ថា ការពិតនោះ គឺ​ដោយសារ​តែ​ដើម្បី​រក្សា​អំណាច​របស់​ខ្លួន​ របប​លោក​ ហ៊ុន សែន​ ធ្វើតាម​តែអំពើ​ចិត្ត​ ដោយ​បំពាន​ច្បាប់​រដ្ឋធម្មនុញ្ញ​កម្ពុជា​ តាម​រយៈ​ការគំរាម​កំហែង​ ការចាប់​ខ្លួន និងការប្រើ​អំពើហិង្សា​បំពានច្បាប់​។​

សមាជិក​សភាអាមេរិករូប​នេះ ក៏បាន​សង្កត់ធ្ងន់ថា លោក ហ៊ុន សែន និង​របបដឹកនាំ​របស់​លោក​ បានប្រើអំណាចតុលាការ​ លុបបំបាត់គណបក្ស​នយោបាយ​សង្គ្រោះជាតិ​ តាម​គ្រប់មធ្យោបាយ​ តាម​រយៈ​​ការ​បោះឆ្នោត​ដោយខុសច្បាប់​ និង​ដ៏គួរ​ឲ្យ​ភ្ញាក់​ផ្អើល​ ដើម្បី​បន្តដឹកនាំ​ផ្តាច់ការ​របស់ខ្លួន​។ លោកហ៊ុន សែន​ បាន​រំលោភ​បំពាន​ និង​ហាម​ប្រព័ន្ធ​ផ្សព្វផ្សាយ​ឯករាជ្យ​ មិន​ឲ្យ​ផ្សព្វផ្សាយ​ពត៌មានពិត​ ត្រឹមត្រូវ​ និងទាន់ពេល​វេលា​ ដល់​ប្រជាពលរដ្ឋ​ខ្មែរ​។ បន្ថែម​ពីនេះ​ របបដឹកនាំ​របស់លោក​ ហ៊ុន សែន គ្រប់គ្រង​ប្រព័ន្ធ​តុលាការ​ និងនិតីរដ្ឋ​ ដោយ​អនុម័ត​ច្បាប់​មួយ​ចំនួន​ ដើម្បី​គាប​សង្កត់​គ្រប់​សកម្មភាព​របស់ប្រជាពលរដ្ឋ​ និងអង្គការក្រៅរដ្ឋាភិបាល នៅតាម​មូល​ដ្ឋាន​។​

តំណាងរាស្រ្ត​អាមេរិក​ ដែល​គាំទ្រ​ច្បាប់​ដាក់ទណ្ឌកម្ម​របប​លោក ហ៊ុន សែន និង​មន្រ្តី នៃ​របបនេះ​ បាន​បញ្ជាក់ផងដែរ​ថា លោកនឹងនៅតែ​បន្តគាំទ្រ​រាល់​គោលបំណង​របស់​ប្រជាពលរដ្ឋ​ខ្មែរ ដើម្បី​ការបោះឆ្នោត​ដោយ​សេរី​ ត្រឹមត្រូវ​ និង​យុត្តិធម៌ ហើយ​លោក​ នៅតែបន្តគាំទ្រ​ឲ្យ​មាន​ការគោរព​សិទ្ធិមនុស្ស​ និង​លទ្ធិប្រជាធិបតេយ្យ​នៅកម្ពុជា និង​នៅ​ទូទាំង​ពិភពលោក​។

កាលពី​ថ្ងៃទី១៥ ខែកញ្ញា ​លោក អាឡែន ឡូវ៉ិនស្សល (Alan Lowenthal) បាន​ចេញ​សេចក្តី​ថ្លែងការណ៍​ថ្កោលទោស​របប​លោក ហ៊ុន​ សែន​ ដែលបាន​ចាប់យុវជន​ជាច្រើន​នាក់​ ដាក់ពន្ធនាគារ​។ លោក​​ថា សកម្មភាព​តវ៉ាដោយ​សន្តិវិធី​ ក្នុងការរិះគន់​រដ្ឋាភិបាល​ គឺជា​ការ​ប្រើ​ប្រាស់​សិទ្ធិ​សេរីភាព និង​សិទ្ធិបញ្ចេញមតិ​ ដែលជាសិទ្ធិ​មូលដ្ឋាន​ និង​ចាំបាច់​សម្រាប់​ដំណើរ​ការប្រជាធិបតេយ្យ​ត្រឹមត្រូវ។

ក៏ប៉ុន្តែ​ក្រសួង​ការបរទេសកម្ពុជា​ អះអាងថា​ សកម្មជនដែលត្រូវ​បាន​ចាប់ខ្លួនទាំងនោះ គឺបាន​ប្រើប្រាស់​សិទ្ធិហួស​ព្រំដែន​កំណត់​ដោយ​ច្បាប់ ព្រោះ​ក្រសួង​ចោទ​ថា​ បាន​ផ្សព្វផ្សាយ​ព័ត៌មាន​ឲ្យមាន​ការស្អប់​ខ្ពើម​ ​ការរើស​អើង​​ពូជសាសន៍ និង​អំពើ​ហិង្សា​ជាដើម​។

ទោះបី​ជា​យ៉ាងណា​ ចំណាត់ការ​របស់អាជ្ញាធរ​នៃរបបក្រុង​ភ្នំពេញ​នេះ រងការរិះគន់​ជុំទិស​ពីអង្គការសង្គម​ស៊ីវិលជាតិ​ និង​អន្តរជាតិ រួមទាំងអ្នករាយការណ៍ពិសេស​របស់​អង្គការ​សហ​ប្រជាជាតិ​ ទទួលបន្ទុក​ផ្នែកសិទ្ធិមនុស្ស​នៅកម្ពុជា និង​ការិ​យាល័យឧត្ដម​ស្នង​ការ​សហ​ប្រជាជាតិ​ទ​ទួលបន្ទុក​សិទ្ធិ​ម​នុស្ស​នៅកម្ពុជាផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល