សេចក្ដី​ព្រាងច្បាប់​ស្ដីពី​សិទ្ធិ​ទទួល​ព័ត៌មាន រង់ចាំ​ភ្លើង​ខៀវ​ពី​ក្រ​សួង​យុត្តិធម៌

មន្ត្រី​ជាន់ខ្ពស់​ក្រសួងព័ត៌មាន ឲ្យ​ដឹង​ថា សេចក្ដី​ព្រាងច្បាប់​​ស្ដីពី​សិទ្ធិ​ទទួល​ព័ត៌មាន រង់ចាំ​ការ​សម្រេច​ពី​ក្រ​សួង​យុត្តិធម៌ មុន​នឹង​បញ្ជូន​ទៅ​ទីស្ដីការ​គណៈរដ្ឋ​មន្ត្រី។

អ្នកនាំពាក្យ​ក្រសួងព័ត៌មាន លោក មាស សុភ័ណ្ឌ បាន​ប្រាប់​វិទ្យុ VOD ថា ទាំង​រដ្ឋាភិបាល និង​ក្រសួង​យុត្តិធម៌ ប្ដេជ្ញា​ថា សេចក្ដី​ព្រាងច្បាប់​នេះ គ្រោង​អនុម័ត​នៅ​ចុង​ឆ្នាំ២០២០ នេះ។

អាស៊ីសេរី​មិន​អាច​សុំ​ការ​ឆ្លើយ​តប​ពី​អ្នក​នាំ​ពាក្យ​ក្រសួងយុត្តិធម៌ លោក ជិន ម៉ាលីន នៅ​ថ្ងៃ​ទី២៦​ខែកញ្ញា​នេះ​បាន​ទេ ក៏ប៉ុន្តែ​លោក​បាន​ប្រាប់ VOD ថ្មីៗ នេះ​ថា ក្រុមការងារ​ក្រសួង​យុត្តិធម៌ និង​ក្រសួងព័ត៌មាន កំពុង​ពិនិត្យមើល​ពី​ទោស​បញ្ញត្តិ​ក្នុង​សេចក្ដី​ព្រាង​ច្បាប់​នេះ។

សេចក្ដីព្រាង​ច្បាប់​ស្ដីពី​សិទ្ធិ​ទទួល​បាន​ព័ត៌មាន ត្រូវ​បាន​ផ្ដួចផ្ដើម និង​ឆ្លង​កាត់​ការ​ពិភាក្សា​ពិគ្រោះ​យោបល់​អស់​រយៈ​ពេល ១៥ឆ្នាំ​មក​ហើយ។

ក្រុម​សង្គម​ស៊ីវិល​ធ្លាប់​លើក​ឡើង​ថា កម្ពុជា​នៅតែ​មិនទាន់​មាន​ច្បាប់​បញ្ញត្តិ​សម្រាប់​ការ​ស្នើសុំ​ព័ត៌មាន​សាធារណៈ​នៅឡើយ ដែល​ជា​មូលហេតុ​ធ្វើ​ឱ្យ​មន្ត្រី​រដ្ឋាភិបាល​អាច​បដិសេធ​នូវ​ការ​ផ្តល់​ព័ត៌មាន​សាធារណៈ​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។