"សារ​ព្រមាន​ហាម​ស្ត្រី​ស្លៀក​ស៊ិចស៊ី​លក់​ផលិតផល​លើ​បណ្ដាញ​សង្គម ជា​ការ​រើសអើង និង​បង្ក​ឱ្យ​កើតមាន​ហិង្សា​ប្រឆាំង​ស្ត្រី"

ដោយ មាន ឫទ្ធិ
2020-02-19
អ៊ីម៉ែល
មតិ
Share
បោះពុម្ព
លោក ហ៊ុន សែន ថ្លែង​ក្នុង​ពិធី "ទិវា​ជាតិ​ទីក្រុង​ស្អាត" នៅ​រាជធានី​ភ្នំពេញ ព្រឹក​ថ្ងៃ​ទី២៥ កុម្ភៈ។
លោក ហ៊ុន សែន ថ្លែង​ក្នុង​ពិធី "ទិវា​ជាតិ​ទីក្រុង​ស្អាត" នៅ​រាជធានី​ភ្នំពេញ ព្រឹក​ថ្ងៃ​ទី២៥ កុម្ភៈ។
ហ្វេសប៊ុក Samdech Hun Sen, Cambodian Prime Minister

អង្គការ​លើកលែងទោស​អន្តរជាតិ Amnesty International ថា សារ​ព្រមាន​របស់ លោក ហ៊ុន សែន ចំពោះ​ស្ត្រី​ដែល​ស្លៀក​សំលៀកបំពាក់​ស៊ិចស៊ី​ផ្សព្វផ្សាយ​ពាណិជ្ជកម្ម​លក់​ផលិតផល​នានា​លើ​បណ្ដាញ​សង្គម គឺជា​ការ​មិន​ទទួលខុសត្រូវ និង​ជា​រឿង​ប្រកប​ដោយ​គ្រោះថ្នាក់។

កាល​ពី​ថ្ងៃ​ទី​១៧ កុម្ភៈ ថ្លែង​ក្នុង​កិច្ចប្រជុំ «​ក្រុមប្រឹក្សា​ជាតិ​កម្ពុជា​ដើម្បី​ស្ត្រី​» លោក ហ៊ុន សែន បាន​បញ្ជា​ឱ្យ​សមត្ថកិច្ច ចាត់វិធានការ និង​ប្លុក​រាល់​ការ​ផ្សព្វផ្សាយ Live ការ​លក់​ផលិតផល​តាម​អនឡាញ​របស់​ស្ត្រី ដែល​លោក​ថា «​បង្ហាញ​ភាព​ស៊ិចស៊ី​ជ្រុល​ហួសហេតុ​» ធ្វើ​ឱ្យ​ប៉ះពាល់​ខ្លាំង​ដល់​កិត្តិយស និង​សីលធម៌​របស់​ស្ត្រី​ខ្មែរ។

ពីរ​ថ្ងៃក្រោយ​ការព្រមាន និង​បញ្ជា​របស់​លោក ហ៊ុន សែន នេះ នៅ​ថ្ងៃ​ទី​១៩ កុម្ភៈ ស្នងការ​នគរបាល​រាជធានី​ភ្នំពេញ បាន​បង្ហោះ​វីដេអូ​សុំទោស​របស់​ស្ត្រី​ប្រើប្រាស់​បណ្ដាញ​សង្គម​ម្នាក់​ឈ្មោះ វ៉ាន់ រចនា ហៅ ថៃ ស្រីនាង ដោយសារតែ​នាង​ធ្លាប់​ផុស​រូបភាព និង​វីដេអូ​លក់​សំលៀកបំពាក់​បែប​ស៊ិចស៊ី តាម​បណ្ដា​សង្គម​ហ្វេសប៊ុក។ អង្គការ​លើកលែងទោស​អន្តរជាតិ​ថា ការ​បង្ហោះ​វីដេអូ​សុំទោស​នេះ ទំនងជា​ត្រូវ​បាន​ធ្វើឡើង ដោយ «​ការ​បង្ខិត​បង្ខំ»

នាយក​ប្រចាំ​តំបន់​អាស៊ីបូព៌ា អាស៊ី​អាគ្នេយ៍ និង​ប៉ាស៊ីហ្វិក នៃ​អង្គការ​លើកលែងទោស​អន្តរជាតិ លោក នីកូឡា បេខឺលីន (Nicholas Bequelin) ថ្លែង​ក្នុង​សេចក្តី​ថ្លែងការណ៍​ផ្សាយ​ថ្ងៃ​ទី​១៩ ខែ​កុម្ភៈ ថា វោហារ​សព្ទ​របស់​លោក ហ៊ុន សែន បែបនេះ រឹតតែ​ជា​ការ​បង្ក​ឱ្យ​បន្ត​កើតមាន​អំពើ​ហិង្សា​ប្រឆាំង​នឹង​ស្ត្រី និង​បង្ក​ស្លាកស្នាម​ទុរយស​ដល់​ជនរងគ្រោះ​ពី​អំពើ​ហិង្សា​ដោយសារ​យេនឌ័រ។

នាយក​ប្រចាំ​តំបន់​របស់​អង្គការ​អន្តរជាតិ​ដដែល​នេះ ថា បទបញ្ជា​របស់​លោក​នាយករដ្ឋមន្ត្រី ហ៊ុន សែន ឱ្យ​តាមដាន​អ្នក​ប្រើប្រាស់​ជា​ស្ត្រី​តាម​បណ្ដាញ​សង្គម និង “​អប់រំ​ស្ត្រី​” បែបនេះ តំណាង​ឱ្យ​ការ​អនុវត្ត​ការ​ឈ្លប​យកការណ៍​របស់​រដ្ឋ ដើម្បី​ជំរុញ​របៀបវារៈ​បែប​រើសអើង និង​បុរស​និយម។ លោក​ស្នើ​ឱ្យ​ក្រុមហ៊ុន ហ្វេសប៊ុក ត្រូវតែ​បដិសេធ មិន​សហការ​ជាមួយ​សំណើ​រើសអើង​ណាមួយ ពី​សំណាក់​អាជ្ញាធរ​កម្ពុជា ដើម្បី​ប្លុក​គណនី​របស់​ស្ត្រី​ទាំងនោះ។នាយក​ប្រចាំ​តំបន់​របស់​អង្គការ​អន្តរជាតិ​ដដែល​នេះ ថា «​ការអប់រំ​“ សីលធម៌ បែប​បង្ខិតបង្ខំ​ទៅលើ​ស្ត្រី​ដោយ​ប៉ូលិស​បែបនេះ មាន​លក្ខណៈ​ជា​ការ​បំពារបំពាន​។ លោក​ថា គ្មាន​ស្ត្រី​ណា​ម្នាក់ ត្រូវ​បាន​ចោទប្រកាន់​ពី​បទ​រំលោភច្បាប់​ណាមួយ​ឡើយ ហើយ​ប៉ូលិស​ហាក់​ដូចជា​ធ្វើ​សកម្មភាព ដោយ​ផ្អែកលើ​ហេតុផល​ផ្ទាល់ខ្លួន​របស់​លោក ហ៊ុន សែន។

អង្គការ​លើកលែងទោស​អន្តរជាតិ ថា ការ​វិវឌ្ឍន៍​ចុងក្រោយ​នេះ បង្ហាញ​ឱ្យ​ឃើញ​យ៉ាង​ច្បាស់​ពី​ស្ថានភាព​ធ្ងន់ធ្ងរ​នៃ​ការរំលោភ​សេរីភាព​នៃ​បញ្ចេញមតិ​នៅ​កម្ពុជា ដែល​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ អាជ្ញាធរ​កម្ពុជា​បាន​បង្កើន​យុទ្ធនាការ​ឈ្លប​យកការណ៍​តាម​អ៊ីនធឺណិត កាន់តែ​ខ្លាំង​ឡើងៗ ប្រឆាំង​នឹង​ក្រុម​អ្នក​ការពារ​សិទ្ធិមនុស្ស និង​ក្រុម​អ្នកគាំទ្រ​គណបក្សប្រឆាំង ដោយសារ​ការ​បង្ហោះ និង​ការ​ទំនាក់ទំនង​តាម​ហ្វេសប៊ុក​របស់​ពួកគេ​។ មន្ត្រី​រដ្ឋាភិបាល​កម្ពុជា​មិនទាន់​ឆ្លើយតប​នឹង​សេចក្ដី​ថ្លែងការណ៍​អង្គការ​សិទ្ធិមនុស្ស Amnesty International នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល