ឪពុករបស់បុរសនៅខេត្តបន្ទាយមានជ័យ ដែលត្រូវមន្រ្តីនគរបាលបាញ់អោយរបួស ទាមទាររកយុត្តិធម៌

ដោយ សុជីវី
2020-08-31
អ៊ីម៉ែល
មតិ
Share
បោះពុម្ព
របួស​ធ្លុះខ្នង លោក នាង មករា ដោយសារគ្រាប់កាំភ្លើងរបស់​ប៉ូលីសសង្កាត់និមត្តិ កាលពីថ្ងៃទី២៧ ខែ​សីហា ​ឆ្នាំ២០២០។
របួស​ធ្លុះខ្នង លោក នាង មករា ដោយសារគ្រាប់កាំភ្លើងរបស់​ប៉ូលីសសង្កាត់និមត្តិ កាលពីថ្ងៃទី២៧ ខែ​សីហា ​ឆ្នាំ២០២០។
រូបថតផ្ដល់ដោយសមាគម​ADHOC

ឪពុក​ជនរងគ្រោះ និងអ្នកការពារ​សិទ្ធិមនុស្ស​រំពឹងថា​តុលាការ​ក្នុង​ខេត្តបន្ទាយមានជ័យ​នឹង​ផ្ដល់​យុត្តិធម៌​ពិតប្រាកដ​ក្នុងសំណុំរឿង មន្រ្តីនគរបាល​ក្នុង​សង្កាត់និមិត្ត​បាញ់​បុរស​មាន​វ័យ២២ម្នាក់ អោយ​របួសធ្ងន់។ ការលើកឡើងនេះ​បន្ទាប់​ពី​អាជ្ញាធរ​ក្នុង​ខេត្តបន្ទាយមានជ័យ​បាន​​ឃាត់​ខ្លួន​នាយរងប៉ុស្ដិ៍នគរបាល​និមិត្ត លោក ឫទ្ធី ពិសិដ្ឋ និង​បញ្ចូន​ទៅតុលាការ​កាល​ពីរសៀលថ្ងៃទី៣១ ខែ​សីហា។

ឪពុក​របស់​ជនរងគ្រោះ​គឺ​លោក នួន វ័រ ប្រាប់​អាស៊ីសេរីថា លោក​ចង់​អោយ​អាជ្ញាធរ​ពាក់ព័ន្ធ​ដាក់​ទោសទណ្ឌ​មន្រ្តីនគរបាល ដែល​បាន​បាញ់​កូនប្រុស​លោក​អោយ​របួសធ្ងន់​នោះ​អោយ​សក្ដិសម​នឹង​ទង្វើ​ដែល​មន្រ្តី​រូបនោះ​បានធ្វើ​លើ​ពលរដ្ឋ​ស្លូតត្រង់ ដែល​គ្មាន​អាវុធ​នៅក្នុង​ដៃ។

លោក នួន វ័រ បន្ត​ថា​លោក​បាន​បដិសេធ​ការរចរចារ​សម្របសម្រួល​បញ្ចប់​រឿងក្ដីនេះ ដ្បិត​លោក​ចង់​បាន​យុត្តិធម៌​ពិតប្រាកដ។ បើទោះជាយ៉ាងណា​លោក​នឹង​ដាក់បណ្ដឹង​ទាមទារ​សំណង​ក្នុង​រឿងក្ដី​នេះ៖ «ខ្ញុំ​សុំ​អោយ​ច្បាប់​ដោះស្រាយ​កុំអោយ​លោក​ហ្នុង​មាន​តំណែង​តទៅមុខ។ សូម​កុំអោយ​រួចទោស​អោយ​សោះ អោយ​ច្បាប់​ធ្វើតាម​ច្បាប់​ទៅ លោកហ្នឹង​សាហាវណាស់ បាញ់​សម្លាប់​មនុស្ស ដែល​គ្នាគ្មាន​ទោសកំហុស​អីទាំងអស់។»

អ្នកសម្របសម្រួល​សមាគម​ការពារសិទ្ធិមនុស្ស​អាដហុក​ប្រចាំ​នៅ​ខេត្តបន្ទាយមានជ័យ លោក ស៊ុំ ច័ន្ទគា ប្រាប់​អាស៊ីសេរី​ថា​នាយរងប៉ិស្ដិ៍នគរបាល​សង្កាត់​និមិត្ត លោក​ ឫទ្ធី ពិសិដ្ឋ ត្រូវ​សមត្ថកិច្ច​ឃាត់ខ្លួន និង​បញ្ជូន​ទៅ​តុលាការ​កាលពី​ល្ងាច​ថ្ងៃទី៣១ ខែសីហា។ តែលោកថា​នៅមិនទាន់ដឹង​ច្បាស់​ពីចំណាត់ការ​របស់​អាជ្ញាធរពាក់ព័ន្ធ​នៅ​ក្នុង​ករណីនេះ​នៅឡើយទេ​គឺដឹងត្រឹម​ថា លោក ឫទ្ធី ពិសិដ្ឋ ត្រូវ​បាន​បញ្ជូន​ទៅ​សាកសួរ ហើយ​ក៏​ត្រូវ​បញ្ជូន​ទៅ​ស្នងការនគរបាលខេត្ត​វិញ។ លោកថា​បើតាម​ព័ត៌មាន​ពី​អាជ្ញាធរ ការសាកសួរ លោក ឫទ្ធី ពិសិដ្ឋ នឹង​បន្ត​នៅ​តុលាការខេត្ត​នៅ​ព្រឹកថ្ងៃទី១ ខែ​កញ្ញានេះ។

នាយរងប៉ុស្តិ៍​នគរបាល​សង្កាត់​និមិត្ត លោក ឫទ្ធី ពិសិដ្ឋ ត្រូវ​ចោទប្រកាន់ថា ​បាន​បាញ់​បុរស ឈ្មោះ នាង មករា ដែល​គ្មាន​អាវុធ​ក្នុងដៃ​អោយ​របួសធ្ងន់​គឺ​ធ្លុះពី​ខ្នងចេញទៅ​ក្រោម​ក្លៀកស្ដាំ កាល​ពី​យប់​ថ្ងៃ​ទី២៧ ខែសីហា។ ឪពុក​របស់​ជនរងគ្រោះ​ប្រាប់​​អាស៊ីសេរី​ដោយ​អះអាងថា នៅ​ថ្ងៃ​កើត​ហេតុ​កូន​របស់​លោក​បាន​ជិះ​ម៉ូតូ​តាម​ផ្លូវ​នៅ​សង្កាត់​និមិត្ត​ជា​មួយ​មិត្តភក្ដិ ហើយ​មន្ត្រី​ប៉ូលិស​​បាន​ឃាត់​ម៉ូតូ​របស់​មិត្តភក្ដិ​​កូន​របស់​លោក​​។​ នៅ​ពេល​នោះ​​កូន​របស់​លោក​ធ្វើ​ដំណើរ​ទៅ​ហួស​ហើយ​ក៏​ប៉ុន្តែ​បាន​ត្រឡប់​មក​វិញ ហើយ​បាន​សួរ​មន្ត្រី​ប៉ូលិស​ថា មាន​រឿង​អ្វី​បាន​ជា​ឃាត់​ម៉ូតូ​មិត្រភក្ដិ​ខ្លួន​ក៏​ស្រាប់​តែ​មន្ត្រី​ប៉ូលិស​ឈ្មោះ លោក​ ឫទ្ធី ពិសិដ្ឋ បាន​ដក​កាំ​ភ្លើង​ខ្លី​បាញ់​ចំ​ពី​ក្រោយ​ខ្នង​កូន​​របស់​លោក​ធ្លាយ​ពោះ​តែ​ម្ដង។

មន្ត្រី​សិទ្ធិមនុស្ស​ចាត់ទុក​រឿង​នេះ​ថា ជាអំពើ​មនុស្សឃាត​ដោយ​ចេតនា ដែល​ជនល្មើស​ត្រូវ​តែបាននាំទៅ​ផ្ដន្ទាទោស​តាម​ច្បាប់។

លោក ស៊ុំ ច័ន្ទគា ដែល​សាទរ​ការឃាត់ខ្លួន​នេះ​ថាលោក​រំពឹងដែរថា​តុលាការ​នឹង​ផ្ដល់​យុត្តិធម៌ ដល់​អ្នករងគ្រោះ​បន្ទាប់ពី​ព្រះរាជអាជ្ញា​បាន​ចាត់វិធានការ​ទាន់ពេលវេលា​ក្នុង​សំណុំរឿង​នេះ។ លោកថា​លោក​មិនបោះបង់​ទេ​គឺ​នឹង​បន្ត​តាមដាន​រឿងនេះ ដើម្បី​ធានាថា​អាជ្ញាធរ​នឹង​ផ្ដល់យុត្តិធម៌​ដល់​ជនរងគ្រោះ៖​ «យើង​សង្ឃឹម​ថា​តុលាការ​នៅ​ខេត្តបន្ទាយមានជ័យ​ក៏​ជា​តុលាការ​គំរូ​មួយ​ដែរ បើសិន​គាត់​មាន​ការលម្អៀង ដោយអគតិ​ធម៌​ទាំង៤​ណាមួយ​នឹង​ធ្វើអោយ​គាត់​ហ្នឹង​បាត់បង់​នូវ​ការជឿជាក់​ពី​ប្រជាពលរដ្ឋ។ ពេល​កន្លង​មក​គេតែងតែ​រិះគន់​តុលាការថា​អយុត្តិធម៌ តុលាការ​ស៊ីលុយ តុលាការ​ពុករលួយ ប៉ុន្តែ​យើង​សង្ឃឹម​ថា​តុលាការ​គំរូ ក្រោយ​ពី​ការកំណែ​ទម្រង់​ប្រព័ន្ធយុត្តិធម៌​នៅ​កម្ពុជា នៅ​ខេត្តបន្ទាយមានជ័យ​សង្ឃឹម​ថា​នឹង​បាន​យុត្តិធម៌ ហើយនឹង​រឿងក្ដី​ទាំងឡាយ​នៅក្នុង​ខេត្តបន្ទាយមានជ័យ គឺ​អ្នកប្រព្រឹត្តល្មើស​ទាំងអស់​ហ្នឹង​នឹង​ត្រូវ​ទទួលខុសត្រូវ​តាម​ច្បាប់។»

អាស៊ីសេរី​នៅមិនទាន់​អាច​សុំការឆ្លើយតប​ពី​តំណាង​តុលាការ​ខេត្តបន្ទាយមានជ័យ​នៅឡើយទេ​កាលពីយប់​ថ្ងៃទី៣១​ ខែសីហា ជុំវិញ​ការស្នើ​អោយ​តុលាការ​ដំណើការ​រឿងក្ដី ដោយ​យុត្តិធម៌​នេះ។

ក្នុងក្រមព្រហ្មទណ្ឌ​មាត្រា១៩៩​ចែង​ថា​អំពើ​មនុស្សឃាត​ដោយ​ចេតនា​ត្រូវ​ផ្ដន្ទាទោស​ដាក់​ពន្ធនាគារ​ពី​១០ឆ្នាំ​ទៅ​១៥ឆ្នាំ។

មន្ត្រី​សិទ្ធិមនុស្ស លោក ស៊ុំ ច័ន្ទគា ឱ្យ​ដឹង​ថា​នៅ​ក្នុង​ឆ្នាំ២០២០ យ៉ាងហោច​ណាស់​មាន​២ករណី​ហើយ​ដែល​ប៉ូលិស​នៅ​ក្នុង​ខេត្តបន្ទាយមានជ័យ​បាញ់​ពលរដ្ឋ​ឱ្យ​រងរបួស និង​ស្លាប់។ កាលពី​ដើម​ឆ្នាំ២០២០ មាន​ពលរដ្ឋ​ម្នាក់​នៅ​ក្រុងប៉ោយប៉ែត​ត្រូវ​បាន​ប៉ូលិស​ក្រុងនេះ​បាញ់​ស្លាប់​ក្នុង​រឿងជម្លោះ​ផ្ទាល់ខ្លួន​ទាំង​កណ្ដាល​យប់ និង​ចុង​ក្រោយ​កើត​ឡើង​នៅ​សង្កាត់​និមិត្តនេះ។ លោក​អះអាងថា​ករណី​នេះ​អាជ្ញាធរ​មិន​ទាន់​ចាប់​ជនដៃដល់​​មក​ផ្ដន្ទាទោស​បាន​នៅ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល