អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាបារម្ភពីការរឹតត្បិតសិទ្ធិសេរីភាពបញ្ចេញមតិ និងការជួបជុំតវ៉ា ព្រមទាំងស្នើអោយរដ្ឋាភិបាលធ្វើវិសោធនកម្មច្បាប់សំខាន់ៗពាក់ព័ន្ធនឹងសិទ្ធិសេរីភាពនេះ ដែលរួមមានក្រមព្រហ្មទណ្ឌ ច្បាប់ស្ដីពីសមាគម និងអង្គការមិនមែនរដ្ឋាភិបាល និងសេចក្ដីព្រាងច្បាប់ថ្មីស្ដីពីសណ្ដាប់ធ្នាប់សាធារណៈ ជាដើម។
សេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជា កាលពីថ្ងៃទី២៥ ខែសីហាម្សិលម៉ិញអោយដឹងថាអ្នកស្រី រ៉ូណា ស្មីត(Rhona Smith) បានជួបប្រជុំតាមប្រព័ន្ធវីដេអូ ជាមួយប្រធានគៈណកម្មាធិការនេះលោក កែវ រ៉េមី។
អ្នករាយការណ៍ពិសេសរូបនេះបានលើកឡើងនូវអនុសាសន៍ក្នុងការទប់ស្កាត់ព័ត៌មានមិនពិត និងក្លែងក្លាយពាក់ព័ន្ធនឹងជំងឺកូវីដ-១៩ ការរៀបចំវិសោធនកម្ម ឬកែប្រែច្បាប់មួយចំនួន ដោយមានការចូលរួមពីភាគីពាក់ព័ន្ធ និងស្របតាមគោលការណ៍សិទ្ធិមនុស្សអន្តរជាតិ។ ច្បាប់ទាំងនោះរួមមាន ក្រមព្រហ្មទណ្ឌ ច្បាប់ស្ដីពីសមាគម និងអង្គការមិនមែនរដ្ឋាភិបាល សេចក្ដីព្រាងច្បាប់ស្ដីពីសណ្ដាប់ធ្នាប់សាធារណៈ និងសេចក្ដីព្រាងច្បាប់ស្ដីពីការបង្កើតស្ថាប័នសិទ្ធិមនុស្សជាតិជាដើម។
ជាមួយគ្នានេះអ្នកស្រីបារម្ភពីការរឹតត្បិតសិទ្ធិសេរីភាពបញ្ចេញមតិ និងការជួបជុំតវ៉ា និងការកើនឡើងនៃការឃុំខ្លួនបណ្ដោះអាសន្ន និងភាពចង្អៀតណែនក្នុងពន្ធនាគារស្របពេលមានការរីករាលដាលនៃជំងឺកូវីដ-១៩។ តែយ៉ាងណាអ្នកស្រីថាមិនគាំទ្រចំពោះការជួបជុំបញ្ចេញមតិដែលបំពានច្បាប់ បំពានសិទ្ធិសេរីភាពអ្នកដទៃ បង្កអោយមានការរើសអើងពូជសាសន៍ អំពើហិង្សា និងភាពចលាចលប៉ះពាល់ដល់សណ្ដាប់ធ្នាប់សាធារណៈ និងសន្តិសុខសង្គម។
ឆ្លើយតបនឹងបញ្ហានេះតំណាងរដ្ឋាភិបាលបញ្ជាក់ថានឹងពិចារណាលើអ្វីដែលអ្នកស្រីបានលើកឡើងនេះ និងបន្តកិច្ចសហប្រតិបត្តិការជាមួយគ្នាទៀត ដើម្បីធ្វើអោយស្ថានភាពសិទ្ធិមនុស្សនៅកម្ពុជាកាន់តែល្អប្រសើឡើង។
កិច្ចប្រជុំរវាងអ្នករាយការណ៍ពិសេសអង្គការសហប្រជាជាតិ ជាមួយប្រធានគណៈកម្មាធិការសិទ្ធិមនុស្សនៅពេលនេះជាការពិនិត្យមើលស្ថានភាពសិទ្ធិមនុស្ស និងចំណុចពាក់ព័ន្ធមួយចំនួននៅមុនពេលអ្នកស្រី រ៉ូណា ស្មីត ឡើងថ្លែងការណ៍ពីរបាយការណ៍សិទ្ធិមនុស្សនៅកម្ពុជារបស់អ្នកស្រីនៅក្រុមប្រឹក្សាសិទ្ធិមនុស្សអន្តរជាតិ នៅក្នុងខែតុលាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។