កូដករក្រុមហ៊ុនបនល្បែងកាស៊ីណូណាហ្គាវើលដ៍ (NAGAWORLD) ម្នាក់ បានចូលបំភ្លឺនៅសាលាដំបូងរាជធានីភ្នំពេញ នៅថ្ងៃទី១៥ វិច្ឆិកា តាមបណ្ដឹងរបស់ក្រុមហ៊ុន ដែលបានប្ដឹងកញ្ញាថា បានរំលោភលំនៅឋាន និងបង្ខាំងដោយខុសច្បាប់។ កូដករណាហ្គាវើលដ៍ និងមន្ត្រីសង្គមស៊ីវិល ទទូចឲ្យតុលាការ ទម្លាក់ចោលការចោទប្រកាន់លើពួកគាត់ ហើយជំរុញឲ្យក្រុមហ៊ុន និងស្ថាប័នពាក់ព័ន្ធគួរពន្លឿនដោះស្រាយបញ្ចប់វិវាទការងារក្រៅប្រព័ន្ធតុលាការវិញ។
កូដករណាហ្គាវើលដ៍កញ្ញា ជួប សោភ័ណ្ឌ បានចូលបំភ្លឺនៅតុលាការក្រុងភ្នំពេញ នៅថ្ងៃទី១៥ ខែវិច្ឆិកា តាមបណ្ដឹងរបស់ក្រុមហ៊ុនណាហ្គាវើលដ៍ (Nagaworld) ដែលប្ដឹងកញ្ញាពីបទ «រំលោភលើលំនៅឋាន ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់»។ ក្រុមកូដករណាហ្គាវើលដ៍ប្រមាណជិត ៦០នាក់ទៀត ក៏បានប្រមូលផ្ដុំគ្នាមុខតុលាការ ដើម្បីចូលរួមឃ្លាំមើល និងលើកទឹកចិត្តដល់កញ្ញា ជួប សោភ័ណ្ឌ។ កូដករទាំងនោះ បានឈរនៅផ្នែកម្ខាងផ្លូវមុខសាលាដំបូងរាជធានីភ្នំពេញ ដោយលើកបដាសរសេរថា ខ្ញុំមកធ្វើជាសាក្សី ក្រោមការរៀបចំសណ្ដាប់ធ្នាប់យ៉ាងតឹងរឹងពីអាជ្ញាធរ។
កូដករណាហ្គាវើលដ៍ ដែលចូលបំភ្លឺកញ្ញា ជួប សោភ័ណ្ឌ ប្រាប់វិទ្យុអាស៊ីសេរីនៅថ្ងៃទី១៥ វិច្ឆិកា ថា កញ្ញាបានឆ្លើយបំភ្លឺ និងបដិសេធការចោទរបស់ក្រុមហ៊ុន ដោយថា ពួកគាត់មិនបានរំលោភលំនៅឋាន ឬបំពានច្បាប់ណាមួយដូចជាការចោទប្រកាន់របស់ក្រុមហ៊ុននោះទេ។ កញ្ញាថា ខាងក្រុមហ៊ុន ចោទកូដករទាំងបំពាន ព្រោះកូដករគ្រាន់តែនៅក្រៅរបង ហើយការរៀបចំសន្តិសុខ សណ្ដាប់ធ្នាប់ក្នុងការចេញចូលជាការងាររបស់សន្តិសុខ។ កញ្ញា ជួប សោភ័ណ្ឌ បញ្ជាក់ថា កញ្ញាមិនព្រួយបារម្ភនោះទេ ព្រោះកញ្ញា និងកូដករដទៃទៀតធ្វើត្រឹមត្រូវតាមច្បាប់កំណត់។ កញ្ញា ជួប សោភ័ណ្ឌ បន្ថែមថា ព្រះរាជអាជ្ញាសាកសួរមិនខុសពីកូដករដទៃនោះទេ ដោយព្រះរាជអាជ្ញាចង់ដឹងអ្នកនៅពីក្រោយក្នុងការធ្វើកូដកម្មកន្លងមក៖
«និយាយទៅពួកខ្ញុំវាអត់បានធ្វើដូចគាត់និយាយទាំង ៣ហ្នឹង គឺពួកគាត់ ខ្ញុំអត់បានធ្វើទាំង ៣ករណីហ្នឹង គឺអត់ត្រូវតែម្ដងបង។ អ៊ីចឹងខ្ញុំស្នើទៅគាត់វិញ ដូចថា ពួកខ្ញុំអត់បានធ្វើអ៊ីចឹងឱ្យគាត់ជួយស្រាយឱ្យពួកខ្ញុំអ៊ីចឹងហាស។ សម្រាប់ការដោះស្រាយ គឺចង់និយាយថាឱ្យគាត់ច្រានចោលបទចោទ ហើយឱ្យលោកថៅកែណាហ្គាវើលដ៍ហ្នឹង គាត់ទទួលយកថ្នាក់ដឹកនាំសហជីពចូលធ្វើការវិញ។ មានអារម្មណ៍ថា រំភើប ព្រោះជាលើកទី១ បានន័យថា ជាលើកទី១ ក្នុងឆាកជីវិតយើងហាស ព្រោះអីយើងវាធ្វើស្របច្បាប់ ហើយគេហៅយើងមកកន្លែងហ្នឹង។ បានន័យថា ទាល់ តែកន្លែងដូចថា យើងធ្វើខុសច្បាប់បានគេហៅយើងមកដោះស្រាយ ឬមួយក៏ខុស ដែលគេចោទចាប់អីអ៊ីចឹងហាស តែខ្ញុំអត់មានបានធ្វើអីខុសសោះហាស ដល់ពេលនៅសុខៗ គេហៅមកអ៊ីចឹង»។
អយ្យការអមសាលាដំបូងរាជធានីភ្នំពេញកាលពីថ្ងៃទី៣១ តុលា បានចេញដីកាឱ្យកូដករណាហ្គាវើលដ៍ជាស្ត្រីគឺកញ្ញា ជួប សោភ័ណ្ឌ ឱ្យចូលខ្លួនទៅឆ្លើយបំភ្លឺតាមដីកាកោះហៅលើកទី២ របស់ព្រះរាជអាជ្ញារង លោក ឆាយហុង នៅថ្ងៃទី១៥ វិច្ឆិកា តាមបណ្ដឹងរបស់ក្រុមហ៊ុនដែលប្ដឹងពួកគាត់ពីបទ «រំលោភលើលំនៅឋាន ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់»។
មកទល់ពេលនេះ មានក្រុមកូដករចំនួន ៨នាក់ ហើយដែលទទួលបានដីកាកោះហៅពីតុលាការ ហើយក្នុងនោះ មាន ៥នាក់ ដែលទទួលបានដីកាលើកទី២ តាមបណ្ដឹងរបស់ក្រុមហ៊ុនណាហ្គាវើលដ៍ ដោយសារការតវ៉ាអហិង្សារបស់ពួកគាត់ស្វែងរកដំណោះស្រាយបញ្ចប់វិវាទការងារ ដែលអូសបន្លាយពេលជិតមួយឆ្នាំនោះ។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ (LICADHO) លោក អំ សំអាត យល់ឃើញថា ការធ្វើកូដកម្មទាមទារឱ្យក្រុមហ៊ុនគោរពសិទ្ធិការងាររបស់បុគ្គលិកណាហ្គាវើលដ៏ ជារឿងស្របទៅតាមនីតិវិធីច្បាប់។ លោកថា បណ្ដឹងរបស់ក្រុមហ៊ុនជាដាក់គំរាមកំហែង ដាក់សម្ពាធ និងបំភិតបំភ័យដល់កូដករ។ លោកបន្តថា ករណីប្ដឹងកូដករណាហ្គាវើលដ៍ទៅតុលាការ ជាយុទ្ធសាស្ត្រតាមសកម្មជនដីធ្លី ដែលប្រើប្រាស់ប្រព័ន្ធតុលាការ ដើម្បីគាបសង្កត់ និងគំរាមកំហែង។ លោក អំ សំអាត បន្ថែមថា ក្រុមហ៊ុនណាហ្គាវើលដ៍ គួរមានឆន្ទៈដោះស្រាយបញ្ហាដោយសន្តិវិធី និងទទួលនូវការរិះគន់មជ្ឈដ្ឋានជាតិ និងអន្តរជាតិ ពាក់ព័ន្ធការរំលោភសិទ្ធិការងារ៖
«ជម្រើសដែលប្រើប្រាស់ប្រព័ន្ធតុលាការនេះ វាមិនមែនជាជម្រើសល្អ ហើយនាំឱ្យគេរិះគន់ថាការប្រើប្រាស់ប្រព័ន្ធតុលាការ ដើម្បីធ្វើការគំរាមកំហែងបំភិតបំភ័យ ឬក៏រំលោភទៅលើសិទ្ធិក្នុងការធ្វើកូដកម្មរបស់ពួកគាត់ទេ។ អ៊ីចឹងអ្វីដែលជាជម្រើសល្អ ទាំងក្រុមហ៊ុនណាហ្គាវើលដ៍ អាជ្ញាធរពាក់ព័ន្ធ ក៏ដូចជាក្រុមកូដករហ្នឹង យើងរកវិធី ដើម្បីចរចាដោយសន្តិវិធី ដោះស្រាយ ដើម្បីបញ្ចប់នូវវិវាទការងាររវាងក្រុមហ៊ុនណាហ្គាវើលដ៍ និងក្រុមកូដករដែលជាអតីតនិងបុគ្គលិកណាហ្គាវើលដ៍ហ្នឹង វាជារឿងដែលល្អ។ អ៊ីចឹងបញ្ហានៅត្រង់ថា តើមានឆន្ទៈប៉ុណ្ណា ក្នុងការជំរុញ និងការដោះស្រាយ ដើម្បីបញ្ចប់វិវាទការងារ»។
កន្លងមកសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ និងអង្គការជាតិពាក់ព័ន្ធសិទ្ធិមនុស្ស សិទ្ធិការងារ តែងចេញសេចក្ដីថ្លែងការណ៍ចាត់ទុកថា ការប្រើប្រាស់ប្រព័ន្ធតុលាការ មិនមែនជាដំណោះស្រាយពិតប្រាកដ ដែលធ្វើឲ្យកូដករបោះបង់ការទាមទារសិទ្ធិការងារ និងយុត្តិធម៌នៅកន្លែងការងារឡើយ។ អង្គការទាំងនោះយល់ឃើញថា ការប្រើប្រព័ន្ធតុលាការ ដោះស្រាយបញ្ហានេះ កាន់តែបង្ហាញពីការរំលោភសិទ្ធិការងារធ្ងន់ធ្ងរនៅក្នុងប្រទេសកម្ពុជា។
ក្រុមកូដករ និងអង្គការសង្គមស៊ីវិល អំពាវនាវដល់ក្រុមហ៊ុនណាហ្គាវើលដ៏ឱ្យងាកមកដោះស្រាយដោយសន្តិវិធី និងគោរពសេរីភាពសហជីព និងសិទ្ធិការងាររបស់កម្មករ ដែលបានរួមចំណែកធ្វើឲ្យក្រុមហ៊ុនរីកចម្រើនរហូតមកដល់សព្វថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។