សមត្ថកិច្ច​ខេត្ត​បាត់ដំបង​ដោះលែង​ព្រះអង្គ សយ សាត វិញ នៅ​ល្ងាច​ថ្ងៃ​ទី១០ ខែ​មីនា

ដោយ យ៉ង ចាន់តារា
2023.03.10
សមត្ថកិច្ច​ខេត្ត​បាត់ដំបង​ដោះលែង​ព្រះអង្គ សយ សាត វិញ នៅ​ល្ងាច​ថ្ងៃ​ទី១០ ខែ​មីនា ​ព្រះតេជព្រះគុណ សយ សាត នៅ​ពេល​និមន្ត​ធ្វើ​ធម្មយាត្រា​ផ្សាយ​មេត្តា​ធម៌​ដល់​ខេត្ត​ពផធិ៍សាត់ ហើយ​អាជ្ញាធរ​សាកសួរ កាល​ពី​ថ្ងៃ​ទី៧ ខែមីនា ឆ្នាំ២០២៣ មុន​នឹង​ទៅដល់​ស្រុក​មោងឫស្សី ខេត្ត​បាត់ដំបង ហើយ​ត្រូវសមត្ថកិច្ច មន្ត្រី​សង្ឃ និង​អភិបាល​ស្រុក​ចាប់ផ្សឹក និង​ឱ្យ​ធ្វើ​កិច្ចសន្យាឈប់​បន្ត​ធម្មយាត្រា នៅ​ថ្ងៃ​ទី១០ មីនា។ណបក្ស​នយោបាយ។
រូបពីពលរដ្ឋ

សមត្ថកិច្ច​ខេត្ត​បាត់ដំបង​បាន​សម្រេច​ដោះ​លែង ព្រះតេជព្រះគុណ សយ សាត វិញ​ហើយ នៅ​ល្ងាច​ថ្ងៃ​ទី១០ ខែ​មីនា ក្រោយ​ឃុំ​ព្រះ​កាយ​ព្រះ​អង្គ​អស់​រយៈ​ពេល​ជាង ២៤ម៉ោង។ មន្ត្រី​សិទ្ធិមនុស្ស​ស្វាគមន៍​ការ​ដោះលែង​នេះ ​ប៉ុន្តែ​ពួកគេ​ រិះគន់​ថា ការ​ចាប់​ផ្សឹក និង​ការ​ឃុំ​ព្រះ​កាយ​ព្រះ​អង្គ​នេះ​ថា ជា​ការ​ធ្វើ​ទុក្ខ​បុក​ម្នេញ​លើ​ព្រះសង្ឃ ដែល​ធ្វើ​ការងារ​សង្គម។

មន្ត្រី​សិទ្ធិមនុស្ស និង​ពលរដ្ឋ​ចូលរួម​ធ្វើ​ធម្មយាត្រា​ជាមួយ​ព្រះតេជព្រះគុណ សយ សាត ឱ្យ​ដឹង​ដូចៗ គ្នា​ថា សមត្ថកិច្ច​ខេត្ត​បាត់ដំបង​បាន​ដោះលែង​ព្រះអង្គ សយ សាត ហើយ តែ​សមត្ថកិច្ច​ហាម​ឃាត់​មិន​ឱ្យ​ធ្វើ​ធម្មយាត្រា​ទៀត​ទេ។ នៅមុន​ដោះលែង ព្រះរាជអាជ្ញា​បាន​ទាមទារ​ឱ្យ​ព្រះ​អង្គ​ធ្វើ​កិច្ចសន្យា​ឈប់​ធ្វើ​ធម្មយាត្រា។

អ្នក​សម្របសម្រួល​អង្គការ​លីកាដូ (Licadho) ខែត្រ​បាត់ដំបង លោក អ៊ិន គង់ជិត ឱ្យ​វិទ្យុ​អាស៊ីសេរី​ដឹង នៅ​ល្ងាច​ថ្ងៃ​ទី១០ មីនា​ថា សមត្ថកិច្ច​ដោះលែង​ព្រះអង្គ សយ សាត ពេល​នេះ ព្រោះ​សមត្ថកិច្ច​រក​មិន​ឃើញ​ធាតុ​ផ្សំ​នៃ​បទ​ល្មើស។ មន្ត្រី​ស៊ីវិល​រូប​នេះ​ស្វាគមន៍​សម្រេច​របស់​សមត្ថកិច្ច​ខេត្ត​បាត់ដំបង ប៉ុន្តែ​លោក​សោកស្ដាយ​ដែល សមត្ថកិច្ច​បំបិទ​សិទ្ធិ​​សេរីភាព ​នៃ​ការ​ធ្វើ​ធម្មយាត្រា​របស់​ព្រះតេជព្រះគុណ សយ សត។

លោក អ៊ិន គង់ជិត៖ «ខ្ញុំ​ទទួល​ព័ត៌មាន​ពី​ខាង​ការិយាល័យ​ព្រហ្មទណ្ឌ​កម្រិត​ធ្ងន់​ហ្មង អ្នក​ដែល​ធ្វើ​សំណុំរឿង​ដោយសារ​អត់​ធាតុ​ផ្សំ​នៃ​បទ​ល្មើស ដោយសារ​លោក​និមន្ត​តែ​មួយ​អង្គ​ឯង​ធ្វើ​កិច្ចការ​ការងារ​សង្គម ដើម្បី​ឱ្យ​មាន​សីលធម៌​សង្គម​ឱ្យ​មាន​ការ​បង្រួបបង្រួម​ផ្សះផ្សា​អ្នក​នយោបាយ​អ៊ីចឹង​ណា​លោក​មាន​បំណង​អ៊ីចឹង អត់​មាន​ចូល​ទៅ​ធាតុ​ផ្សំ​បទល្មើស​អី»

សមត្ថកិច្ច​ខេត្ត​បាត់ដំបង បាន​ឃាត់​ព្រះ​កាយ និង​ចាប់​ផ្សឹក​ព្រះតេជព្រះគុណ សយ សាត នៅ​ស្រុក​មោងឫស្សី នៅ​ពេល​ព្រះ​អង្គ​និមន្ត​ធ្វើ​ធម្មយាត្រា​ផ្សាយ​មេត្តា​ធម៌​ដល់​ខេត្ត​នេះ កាល​ពី​ថ្ងៃ​ទី៩ ខែមីនា។ សមត្ថកិច្ច មន្ត្រី​សង្ឃ អភិបាល​ស្រុក​មោងឫស្សី ចោទ​ប្រកាន់​ព្រះតេជព្រះគុណ ថា ធ្វើ​ធម្មយាត្រា​គ្មាន​ការ​អនុញ្ញាត និង​មាន​ពាក់ព័ន្ធ​ជាមួយ​គណបក្ស​នយោបាយ។

វិទ្យុ​អាស៊ី​សេរី​មិន​អាច​ទាក់ទង​អ្នកនាំពាក្យ​ស្នងការដ្ឋាន​នគរបាល​ខេត្ត​បាត់ដំបង លោក ឯម កុសល្យ ដើម្បី​សាកសួរ​រឿង​នេះ​បាន​ទេ គិត​ត្រឹម​ល្ងាច​ថ្ងៃ​ទី១០ មីនា។ ចំណែក​ព្រះតេជព្រះគុណ សយ សាត ក៏​វិទ្យុ​អាស៊ី​សេរី​មិន​ទាន់​អាច​ទាក់ទង​បាន​នៅឡើយ​ដែរ។

ពលរដ្ឋ​រស់នៅ​ខេត្ត​បាត់ដំបង លោកស្រី សេង រ័ត្នមុនី ដែល​ត្រូវ​បាន​អធិការ​នគរបាល​ស្រុក​មោងឫស្សី បាន​កោះហៅ​នោះ ឱ្យ​វិទ្យុ​អាស៊ី​សេរី​ដឹង​ថា សមត្ថកិច្ច​បាន​សួរ​លោកស្រី​​ពីរ​ម៉ោង​ទើប​អនុញ្ញាត​ឱ្យ​លោកស្រី​ត្រឡប់​ទៅ​ផ្ទះ​វិញ។ លោកស្រី​ឱ្យ​ដឹង​ថា សមត្ថកិច្ច​បាន​សួរនាំ​លោក​ស្រី​ពី​មូលហេតុ​នៃ​ការ​ចូលរួម​ធម្មយាត្រា​នេះ​ និង​ចង់​ដឹង​ថា តើ​​អ្នក​ណា​នៅ​ពី​ក្រោយ​នៃ​ការ​ធ្វើ​សកម្មភាព​នេះ? លោកស្រី​បាន​ប្រាប់​សមត្ថកិច្ច​វិញ​ថា ការ​ចូលរួម​នេះ​ជា​ការ​ស្ម័គ្រ​ចិត្ត និង​គ្មាន​អ្នកណា​នៅ​ពី​ក្រោយ​ទេ។ លោកស្រី​ឱ្យ​ដឹង​ទៀត​ថា នៅ​ទីបំផុត​សមត្ថកិច្ច​ទាមទារ​ឱ្យ​ធ្វើ​កិច្ចសន្យា​ថា មុន​ធ្វើ​សកម្មភាព​អ្វី​មួយ ត្រូវ​សុំ​ការ​អនុញ្ញាត​ពី​អាជ្ញាធរ​ជាមុន​សិន និង​ហាម​ធ្វើ​សកម្មភាព​ប៉ះពាល់​ដល់​សង្គម។ លោក​ស្រី​យល់​ថា កិច្ចសន្យា​នេះ​ជា​ការ​រំលោភ​សិទ្ធិ​លោកស្រី ហើយ​លោក​ស្រី​មិន​ពេញ​ចិត្ត​នឹង​ធ្វើ​ទេ តែ​ដោយសារ​សមត្ថកិច្ច​​ទាមទារ លោកស្រី​ត្រូវ​បង្ខំ​ចិត្ត​ផ្ដិតមេដៃ​លើ​​កិច្ចសន្យា​នោះ។

លោកស្រី សេង រ័ត្នមុនី៖ «ទាក់ទង​នឹង​ការ​ធ្វើ​កិច្ចសន្យា សម្រាប់​ខ្លួន​ខ្ញុំ​ផ្ទាល់ ខ្ញុំ​មិន​សូវ​សប្បាយ​ចិត្ត​អី​ប៉ុន្មាន ព្រោះ​ខ្ញុំ​អត់​មាន​កំហុស​អី​ផង​បង។ យើង​អត់​មាន​កំហុស​ផង គ្រាន់តែ​យើង​ធ្វើ​ចង្ហាន់​លោក ហើយ​ជូន​ដំណើរ​លោក​ឱ្យ​ផុត​ព្រំប្រទល់ ដែល​យើង​រស់នៅ គ្រាន់តែ​ប៉ុណ្ណឹង បំណង​ជ្រះថ្លា​របស់​យើង​ក្លាយ​ជា​ជន​សង្ស័យ ឱ្យ​យើង​ធ្វើ​កិច្ចសន្យា ប្រៀប​ដូច​យើង​អ្នក​មាន​ពិរុទ្ធជន​អី​មួយ​អ៊ីចឹង​ណា។ ចង់​និយាយ​ថា ខ្ញុំ​មិន​សប្បាយ​ទេ តែ​ធ្វើ​ម៉េច​បើ​គេ (សមត្ថកិច្ច) ឱ្យ​យើង​ធ្វើ​ហើយ យើង​ធ្វើ​ទៅ។ បើ​យើង​មិន​ធ្វើ រឿង​វែងឆ្ងាយ​ទៅ​ទៀត»

ជុំវិញ​រឿង​នេះ មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​បាត់ដំបង លោក យិន ម៉េងលី យល់​ថា អាជ្ញាធរ​ខេត្ត​បាត់ដំបង​ឃាត់​ព្រះ​កាយ​ព្រះតេជព្រះគុណ សយ សាត និង​កោះ​ហៅ​ពលរដ្ឋ​ឱ្យ​ធ្វើ​កិច្ចសន្យា ហាក់​គ្មាន​មូលដ្ឋាន​ច្បាប់​ត្រឹមត្រូវ​នោះ​ទេ។ លោក​សង្កេត​ឃើញ​ទៀត​ថា សមត្ថកិច្ច​បាន​ចោទ​ព្រះសង្ឃ និង​ពលរដ្ឋ​ថា ការ​ធ្វើ​ធម្មយាត្រា​នេះ​ខុស​ច្បាប់ តែ​សមត្ថកិច្ច​មិន​បាន​បង្ហាញ​ថា ​តើ​ខុស​ទៅ​នឹង​ច្បាប់​អ្វី​ឡើយ។

លោក យិន ម៉េងលី៖ «និមន្ត​តាម​ថ្នល់​ប្រជាពលរដ្ឋ​ចូលរួម​ជា​សេរីភាព​របស់​ប្រជាពលរដ្ឋ​ទេ​តើ! ព្រះអង្គ​មាន​បាន​កៀរគរ​ប្រជាពលរដ្ឋ​ណា​ឱ្យ​ចូលរួម ហើយ​ម៉េច​ក៏​ថា ខុស​ច្បាប់។ ដូច​ខ្ញុំ​ប្រាប់​អ៊ីចឹង​ថា ឱ្យ​បង្ហាញ​មក​ច្បាប់​អី ដែល​អស់​លោក​ថា​ខុស​ហ្នឹង ម៉េច? ប៉ះពាល់​សណ្ដាប់ធ្នាប់​សាធារណៈ វា​ប៉ះ​យ៉ាងម៉េច? ប្រាប់​ឱ្យ​ច្បាស់​មក ច្បាប់​នេះ​មាត្រា​ប៉ុណ្ណេះ​និយាយ​ថា អ៊ីចេះ ដើម្បី​ឱ្យ​ប្រជាពលរដ្ឋ​លោក​បាន​យល់​លោក​ឈប់​ប្រព្រឹត្ត​ទៅ​នេះ បាន​ជា​ការ​ល្អ»

ព្រះតេជព្រះគុណ សយ សាយ បាន​ធ្វើ​ធម្មយាត្រា ដោយ​ចាប់​ផ្ដើម​ពី​រាជធានី​ភ្នំពេញ ឆ្ពោះ​ទៅ​ព្រំដែន​ថៃ កាល​ពី​ថ្ងៃ​ទី១ ខែមីនា ដើម្បី​ផ្សាយ​មេត្តាធម៌ សុំ​សុខ​សន្តិភាព​ក្នុង​ប្រទេស និង​ទាមទារ​ដំណោះស្រាយ​ជាតិ។

ដំបូង​ឡើយ ព្រះអង្គ​ធ្វើ​ធម្មយាត្រា​តែ​មួយ​អង្គ​ឯង​ប៉ុណ្ណោះ តែ​ចាប់​តាំង​ពី​ព្រះ​អង្គ​បាន​និមន្ត​ដល់​ខេត្ត​ពោធិ៍សាត់ និង​ខេត្ត​បាត់ដំបង ពលរដ្ឋ​មួយ​ចំនួន​រស់​នៅ​តាម​បណ្ដោយ​ផ្លូវ​ជាតិ​លេខ ៥ ដែល​ជា​ទីកន្លែង​ព្រះ​អង្គ​និមន្ត​ឆ្លង​កាត់​នោះ ពួក​គាត់​បាន​ចូលរួម​អម​ធម្មយាត្រា​នេះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។