អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃស៍ វ៉ច្ឆ(Human Rights Watch) ស្នើអោយរដ្ឋមន្រ្តីការបរទេសជប៉ុន លោក ម៉ូតេហ្គី តូស៊ីមីត្សឹ(Motegi Toshimitsu) អោយលើកឡើងពីបញ្ហារំលោភសិទ្ធិមនុស្សនៅក្នុងប្រទេសមួយចំនួន ដែលលោកនឹងបំពេញទស្សនកិច្ចក្នុងនោះក៏មានកម្ពុជាដែរ។
ក្នុងលិខិតមួយកាលពីថ្ងៃទី២០ ខែសីហាម្សិលម៉ិញ ដែលផ្ញើទៅរដ្ឋមន្រ្តីការបរទេសជប៉ុន អង្គការ យូមែន រ៉ៃស៍ វ៉ច្ឆ បញ្ជាក់ថានៅពេលដែល លោក ម៉ូតេហ្គី តូស៊ីមីត្សឹនៅក្នុងប្រទេសកម្ពុជានៅថ្ងៃទី២២ នោះលោកគួរតែលើកឡើងពីក្ដីបារម្ភចំពោះការយាយី ការបំភិតបំភ័យ ការធ្វើទុកបុកម្នេញ ការវាយដំរាងកាយ និងការចាប់ខ្លួនតាមទំនើងចិត្តមេដឹកនាំសហជីព សកម្មជនដីធ្លី អ្នកការកាពារសិទ្ធិមនុស្ស អ្នកសារព័ត៌មាន និងអ្នកនយោបាយប្រឆាំង។
នាយកប្រចាំតំបន់អាស៊ីនៃអង្គការ យូមែន រ៉ៃស៍ វ៉ច្ឆ លោក ប្រេដ អាដាំស៍(Brad Adams)បានលើកឡើងថា ទំនុកចិត្តទៅលើប្រទេសជប៉ុនពីបញ្ហាសិទ្ធិមនុស្សនឹងបង្ហាញអោយឃើញនៅពេលនេះហើយ ដូច្នេះរដ្ឋមន្រ្តីការបរទេសជប៉ុនគួរតែបានលើកឡើងជាសាធារណៈពីបញ្ហាសិទ្ធិមនុស្សនៅតាមបណ្ដាប្រទេស ដែលលោកធ្វើទស្សនកិច្ច។ លោកបន្តថា រដ្ឋមន្រ្តីការបរទេសជប៉ុនគួរតែប្រើដំណើរនេះបង្ហាញអោយរដ្ឋាភិបាលនៃប្រទេសនីមួយៗបានយល់ដឹងថាជំនួយហិរញ្ញវត្ថុ និងអភិវឌ្ឍន៍របស់ប្រទេសជប៉ុនចាំបាច់ត្រូវតែដើរទន្ទឹមជាមួយការប្តេជ្ញាចិត្ត និងសកម្មភាពការពារសិទ្ធិមនុស្ស។ លោកបន្តទៀតថាការធានាទាំងនេះមាននៅក្នុងបទដ្ឋានសិទ្ធិមនុស្សរបស់ប្រទេសជប៉ុន ដែលបានបង្កើតកាលពីឆ្នាំ២០១៩។
សេចក្ដីប្រកាសព័ត៌មានរបស់ក្រសួងការបរទេសជប៉ុនអោយដឹងថា លោក ម៉ូតេហ្គី តូស៊ីមីត្សឹ នឹងបំពេញទស្សនកិច្ចទៅប្រទេសមួយចំនួនចាប់ពីថ្ងៃទី២០ដល់ថ្ងៃទី២៥ ខែសីហា។ ក្នុងនោះលោកនឹងទៅប្រទេស ប៉ាពួ ញូវហ្គីណេ(Papua New Guinea) ឡាវ(Laos) មីយ៉ាន់ម៉ា ឬភូមា(Myanmar) និងកម្ពុជា។ លោក ម៉ូតេហ្គី តូស៊ីមីត្សឹនឹងមកដល់កម្ពុជានៅថ្ងៃទី២១ ខែសីហានេះ។ តាមគម្រោងលោកនឹងជួបប្រជុំជាមួយមន្រ្តីជាន់ខ្ពស់កម្ពុជានៅថ្ងៃទី២២ ស្អែកនេះ បន្ទាប់មកនឹងបញ្ចប់ទស្សនកិច្ច ដោយចាកចេញបន្តទៅប្រទេសឡាវនៅថ្ងៃទី២៣ ខែសីហា។ ក្នុងដំណើរទស្សនកិច្ចនេះរដ្ឋមន្រ្តីការបរទេសជប៉ុនគ្រោងនឹងជជែកពីកង្វល់ និងផលប្រយោជន៍រួមទៅលើកិច្ចសហប្រតិបត្តិការឥណ្ឌូ-ប៉ាស៊ីហ្វិកសេរី និងបើកចំហ និងបញ្ហាក្នុងតំបន់ទាក់ទងនឹងសមុទ្រចិនខាងត្បូង។ ចំពោះប្រទេសទាំង៣ ដែលស្ថិតក្នុងតំបន់ទន្លេមេគង្គ លោករដ្ឋមន្រ្តីនឹងផ្លាស់ប្ដូរទស្សនៈទៅលើកិច្ចសហប្រតិបត្តិការសម្រាប់បន្តការធ្វើដំណើរឆ្លងកាត់ព្រំដែន និងវិស័យផ្សេងៗទៀតរួមទាំងវិធានការឆ្លើយតបនឹងវិបត្តិជំងឺកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។