សហព័ន្ធ​ខ្មែរ​​កម្ពុជា​​ក្រោម​ធ្វើយុទ្ធនាការ​ឲ្យ​សហគមន៍​អន្តរជាតិ​អន្តរាគមន៍​​រដ្ឋាភិបាល​វៀតណាម​​ដោះលែង​​កសិករ​​ខ្មែរ​ក្រោម​​

ដោយ យន់ សាមៀន
2021-06-17
Share
សហព័ន្ធ​ខ្មែរ​​កម្ពុជា​​ក្រោម​ធ្វើយុទ្ធនាការ​ឲ្យ​សហគមន៍​អន្តរជាតិ​អន្តរាគមន៍​​រដ្ឋាភិបាល​វៀតណាម​​ដោះលែង​​កសិករ​​ខ្មែរ​ក្រោម​​ កសិករខ្មែរក្រោម លោក​ ហ្វិ​ន​ វ៉ាំ​ង​ឌែ​ប នៅពេលខ្មែរក្រោមតវ៉ាប្រឆាំងនឹងអាជ្ញាធរវៀតណាម កាលពីឆ្នាំ ២០២០។​
រូប៖ កសិករ​ខ្មែរក្រោម​

មន្រ្តី​​សហព័ន្ធ​ខ្មែរ​កម្ពុជា​ក្រោម​ដែលមាន​មូលដ្ឋាន​នៅ​សហរដ្ឋអាមេរិក ​បាន​សុំ​អន្តរាគមន៍​ពី​សហរដ្ឋអាមេរិក​ អង្គការ​សហប្រជាជាតិ ​និងអង្គការសិទ្ធិ​មនុស្ស​អន្តរ​ជាតិ​ មួយ​ចំនួន​ឲ្យ​ដាក់​គំនាប​ទៅ​រដ្ឋាភិបាល​វៀតណាម​ឲ្យគោរព​​សិទ្ធិ​ជន​ជាតិ​ដើមកំណើត ដោះលែង​កសិករ​ខ្មែរក្រោម ​និង​ឈប់​ធ្វើ​ទុក្ខបុកម្នេញ​លើ​កសិករ ​និង​យុវជន​​ខ្មែរ​​ក្រោម​​ផ្សេង​ទៀត​។

សំណើ​សុំអន្តរាគមន៍​ពី​ប្រទេស​លោក​ខាង​លិច​និង​ស្ថាប័ន​អន្តរជាតិនេះ ​ធ្វើ​ឡើង​ដោយសារ​តែ​ អាជ្ញាធរ​វៀតណាម​នៅខេត្ត​ ក្រមួនស ​កាល​ពីថ្ងៃ​ទី៨​​ ខែមិថុនា​បាន​ចាប់ខ្លួនលោក​ ហ្វិ​ន​ វ៉ាំ​ង​ឌែ​ប ជា​កសិករ​ខ្មែរ​ក្រោម​ពីបទ ​«​ប្រើ​អំពើ​ហិង្សា​មក​លើ​កងកម្លាំង​សមត្ថកិច្ច​ ​និង​បទ​ប្រឆាំង​នឹង​អាជ្ញាធរ​សាធារណៈ​»​។ ​តុលាការ​ខេត្ត​នេះ​ បាន​កាត់​​ទោសលោក​​ឲ្យ​ជាប់​ពន្ធនាគារ​​ពីរឆ្នាំ បន្ទាប់ពី​​អាជ្ញាធរ​វៀតណាម ប្រមាណជាង​ ​១​០​០​ ​នាក់​ ​បាន​ចុះទៅ​រឹបអូស​យក​ដីកសិករខ្មែរក្រោម​ជាង​ ​៣​.​០​០​០​ ​ហិកតារ​ ​ប៉ុន្តែ​​ប្រជាពលរដ្ឋ​ខ្មែរក្រោម​មិន​ព្រម​រហូត​ដល់​​ផ្ទុះ​​អំពើ​ហិង្សា​ ​បណ្ដាលឲ្យ​ពលរដ្ឋ​ខ្មែរ​ក្រោម​ជាង​ ​១​០​ ​នាក់​រង​បួស​​​។​ ​បន្ទាប់​ពីការ​បង្ក្រាបនោះ​មក​ ខ្មែរក្រោម​​បួននាក់ រួមទាំងលោក ហ្វិ​ន​ វ៉ាំ​ង​ឌែ​បផង ត្រូវបាន​តុលាការ​កាត់ឲ្យ​ជាប់ពន្ធនាគារម្នាក់ៗ​ចាប់ពី ​៦ ខែ ​ទៅ ២ ឆ្នាំ​ ប៉ុន្តែកសិករ​ខ្មែរក្រោមបីនាក់ទៀត​ត្រូវសាលាឧទ្ធរណ៍​​វៀតណាមអនុញ្ញាត​ឲ្យនៅ​ក្រៅ​​ឃុំ ៦ ខែ ​តែតុលាការ​មិន​អនុញ្ញាតឲ្យ​លោក ហ្វិ​ន​ វ៉ាំ​ង​ឌែ​ប នៅក្រៅ​ឃុំនៅ​ទេ។

ប្រធាន​នាយកដ្ឋាន​ព័ត៌មាន​សហព័ន្ធ​ខ្មែរ​កម្ពុជា​ក្រោម​ ព្រះភិក្ខុ ​សឺង​ យ៉ឹងរតនា មានថេរ​ដីកាថា​ ការឃាត់​កសិករខ្មែរក្រោមដាក់ពន្ធនាគារនេះ គឺវៀតណាម​មាន​ចេតនា​បំបាក់​ស្មារតី​ខ្មែរ​ក្រោម ​មិនឲ្យហ៊ាន​ងើប​​ឡើង​តវ៉ារឿង​ដីធ្លី​ និង​ទាមទារសិទ្ធិ​ជាជន​ជាតិ​ដើម​កំណើត​៖ «អាជ្ញាធរ​វៀតណាម​ហ្នឹង​ប្លន់យកដីស្រែ​ចំការនៅខេត្តក្រមួនស​ហើយនៅពេលដែល​កសិករ​ខ្មែរ​ក្រោម​ទាមទារ​ដីស្រែ​ចំការ​មក​វិញ​ហ្នឹង គឺត្រូវបានអាជ្ញាធរវៀតណាម​រារាំងហាមឃាត់​ ហើយនៅ​ពេលកសិករខ្មែរក្រោម​​ក្រោក​ឡើង​តវ៉ាទាមទារមកវិញ​ ត្រូវបានគេចោទប្រកាន់ថា ​ខ្មែរក្រោមទៅ​យកដី របស់រដ្ឋវិញ។ ចំណុចរួមដែល​អាជ្ញាធរ​វៀតណាម​ចោទប្រកាន់​កសិករ​ខ្មែរក្រោម​ហើយ​ចាប់ដាក់ពន្ធនាគារ​ដើម្បី​សំឡុតបំភ័យ​មិន​ឲ្យខ្មែរក្រោម​ហ្នឹងទាមទារ ​នៅដីធ្លីរបស់​ខ្លួន និងដើម្បីកុំឲ្យខ្មែរក្រោមងើបតវ៉ារឿងសិទ្ធិមនុស្ស»។ 

ទោះបីជាលោក ហ្វិ​ន​ វ៉ាំ​ង​ឌែ​ប ត្រូវតុលាការកាត់ឲ្យជាប់ពន្ធនាគារ​ ប៉ុន្តែតុលាការកាល​ពីខែឧសភា មិនទាន់​ចាប់​ខ្លួនលោកនោះទេ ប៉ុន្តែ​​សមត្ថកិច្ច​វៀតណាម ​ចាប់ខ្លួនលោក​ជាបន្ទាន់​ បន្ទាប់​ពីលោក​បាន​ចូល​រួម​ប្រារព្ធខួប​ ៧២ ឆ្នាំនៃថ្ងៃ​បាត់បង់​ទឹកដី​ខ្មែរក្រោម។ ​ ​​លោក ហ្វិ​ន​ វ៉ាំ​ង​ឌែ​ប បាន​ចូល​រួមទេវិកា​ជជែក​តាម​បណ្តាញ​សង្គម ​ពីបញ្ហា​បាត់បង់ទឹកដី ​និងរឿង​សាល​ក្រម​តុលាកា​កាត់ទោស​កសិករខ្មែរទាំង​អយុត្តិធម៌​ជាដើម​។ ​​មុនពេល​ចាប់ខ្លួន​ លោក ហ្វិ​ន​ វ៉ាំ​ង​ឌែ​ប ក៏​ទើប​បង្កើត​ទំព័រ ​(Facebook) ដោយដាក់រូប ​(Profile) ​លោក​មាន​ភ្ជាប់​នឹង​សញ្ញា​ ៧២ ឆ្នាំ ​នៃបាត់​បង់​ទឹក​ដី​របស់​ខ្មែរ​ក្រោម​។ ​លោក​ក៏​បាន​ផ្សព្ធផ្សាយ​បន្តព័ត៌មាន​របស់​សហព័ន្ធខ្មែរក្រោម ​និងការប្រារព្ធខួបប​បាត់បងទឹកដី។ លោកក៏ធ្លាប់ប្រាប់អាស៊ីសេរីថា លោកមិនបានប​ង្កអំពើហិង្សា និងស្នើឲ្យវៀតណាមកុំ​ធ្វើទុក្ខបុកម្នេញលោក។​

ពាក់ព័ន្ធរឿងនេះ ព្រះ​​​​​​ ភិក្ខុ ​សឺង​ យ៉ឹងរតនា ​សង្ស័យ​ថា ​អាជ្ញាធរ​វៀតណាម​ចាប់ខ្លួន​​លោក ហ្វិ​ន​ វ៉ាំ​ង​ឌែ​ប ​​ដើម្បីសង​សឹក​ចំពោះ​លោក​ដែល​ហ៊ានធ្វើ​ការតស៊ូមតិ ​និង​ផ្សព្ធផ្សាយ​ព័ត៌មាន​ស្តីពីការ​បាត់​បងទឹក​ដីខ្មែរ​កម្ពុជា​ក្រោម​៖ «ហ្នឹង​មូលហេតុ​ដែលចាប់ខ្លួន​លោក ហ្វិ​ន​ វ៉ាំ​ង​ឌែ​ប ​ដោយសារតែគាត់​ហ៊ាន​ផ្សព្វផ្សាយរឿង​ពិត គាត់ហ៊ាន មិនទទួល​ស្គាល់អាជ្ញាធរវៀតណាមហ្នឹងចោទប្រកាន់ចំពោះ​គាត់រឿងដីធ្លី​ ហើយគាត់ហ៊ានដាក់ ប្រ៊ូហ្វាល (Profile) សញ្ញាខួប៧២ឆ្នាំខ្មែរក្រោម​នៅក្រោមអាណានិគមយួនហ្នឹង»។

ព្រះ​​​​​​ភិក្ខុ ​សឺង​ យ៉ឹងរតនា ឲ្យដឹងថា​ សមត្ថកិច្ច​វៀតណាម​បានបញ្ជាឲ្យសាច់ញាតិ លោក ហ្វិ​ន​ វ៉ាំ​ង​ឌែ​ប លុបចោល​ព័ត៌មាន​ទាំងអស់​នៅក្នុងទំព័រ (Facebook)​ របស់លោក។ អាស៊ី​សេរីបានពិនិត្យ ទំព័រ (Facebook)​ របស់​លោក ​ ហ្វិ​ន​ វ៉ាំ​ង​ឌែ​ប ឃើញថា ព័ត៌មាន​ទាំងអស់ ​ដែលលោក​បានផ្សព្វផ្សាយ​មុនពេល​ចាប់ខ្លួន​ត្រូវបានគេ​ លុបចោលទាំងអស់​។

អាជ្ញាធរវៀតណាម ក៏បានសំឡុតបំភ័យ យុវជនខ្មែរក្រោមម្នាក់ទៀត ដោយសារតែ​លោកបង្ហោះព័ត៌មានតាមបណ្តាញសង្គមជុំវិញរឿងបាត់បង់ទឹកដី។​ ​យុវជនខ្មែរក្រោ​​មលោក ថាច់​ កឿង ​ដែល​កំពុង​នៅ​ក្រោម​ការ​ត្រួតត្រា​របស់​វៀត​ណាម​ នៅ​ខេត្ត​ព្រះត្រពាំង​ថា ក្នុង​ថ្ងៃ​រំលឹក​ខួប​បាត់​បង់​ទឹក​ដី​ខ្មែរ​ក្រោម ​ លោក​បាន​បង្ហោះ​រូប​ទង់ជាតិ និង​ផែន​ទី​ខ្មែរ​ក្រោម តាម​បណ្ដាញ​សង្គម​ហ្វេសប៊ុក​ ប៉ុន្តែ ត្រូវ​បាន​អាជ្ញាធរ​វៀតណាម​បញ្ជា​ឱ្យ​លុប​រូប​នោះ​ចោល និង​ព្រមាន​ថា ពួក​គេ​នឹង​ទៅ​សួរ​នាំ​លោក​ដល់​កន្លែង​ស្នាក់​នៅ។​ លោកថា​ ទោះបី​មាន​ការ​គំរាម​គំហែង​ដូច្នោះ​ក្តី​ លោក​នៅ​តែ​រក្សា​ស្មារតី​រក្សា​ការ​ទាមទារ​សិទ្ធិ​ជា​ជនជាតិ​ដើម​កំណើត​។

ខ្មែរ​កម្ពុជា​ក្រោម​ទើប​បានប្រារព្ធខួប​បាត់បង់​ទឹកដីលើកទី ៧២ ឆ្នាំ ​កាលពីថ្ងៃទី៤ ខែមិថុនា។​ សហព័ន្ធខ្មែរកម្ពុជាក្រោម ​បានជ្រើសរើសយកសារឲ្យ​ខ្មែរក្រោម​ទាំងអស់​ងើប​ឡើង​ដើម្បី​ទាមទារ​សិទ្ធិ​ជា​ជនជាតិដើម​កំណើត​។ សារនេះ ក៏ដើម្បី​រំលឹក​រដ្ឋាភិបាល​វៀតណាមឲ្យគោរពសិទ្ធិមនុស្សជនជាតិដើមកំណើត។​​​​​​​

​​​​​​​​​របាយការណ៍​សហព័ន្ធ​ខ្មែរ​ក្រោម​ប្រចាំ​ឆ្នាំ​ឲ្យ​​ដឹង​ថា កាល​ពី​ឆ្នាំ២០២០ ​និង​ដើម​ឆ្នាំ២០២១​ អាជ្ញាធរ​វៀតណាម ​បាន​បន្ត​រឹតត្បិត​សិទ្ធិ​សេរីភាព​ពលរដ្ឋ និង​យុវជន​ខ្មែរ​ក្រោម មិន​ឲ្យ​ផ្សព្វ​ផ្សាយ​ប្រវត្តិសាស្ត្រ​ពិត​នៃ​ការ​បាត់បង់​ទឹក​ដី និង​សិទ្ធិ​ចែកចាយ​ព័ត៌មាន​តាម​បណ្ដាញ​សង្គម។​ យុវជន​ខ្មែរ​ក្រោម​មួយ​ចំនួន ត្រូវ​បាន​អាជ្ញាធរ​វៀតណាម​ចាប់​ផាក​ពិន័យ​រាប់​រយ​ដុល្លារ ​​និង​បាន​រឹបអូស​សៀវភៅ​ ស្ដីពី​សិទ្ធិ​ជន​ជាតិ​ដើមកំណើត​ជា​ដើម។ ​ចំណែក​កសិករ​ខ្មែរ​ក្រោម​ដែល​ត្រូវ​អាជ្ញាធរ​រឹបអូស​យក​ដី​ស្រែ​កេរ្តិ៍​ដូនតា ​ក៏​ត្រូវ​តុលាការ​វៀតណាម​កាត់​ទោស​ឲ្យ​ជាប់​ពន្ធនាគារ​រាប់​ឆ្នាំ​ទាំង​អយុត្តិធម៌​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល