ក្រុម​ពលរដ្ឋ​ថ្កោលទោស ចំណាត់​ការ​បង្ក្រាប​ចុងក្រោយ​របស់​រដ្ឋាភិបាល​លើ​សិទ្ធិ​ពលរដ្ឋ និង​ការ​ធ្វើ​ឲ្យ​បាត់បង់ EBA ២០%

ដោយ ខែ សុណង
2020-08-16
អ៊ីម៉ែល
មតិ
Share
បោះពុម្ព
លោក ហ៊ុន សែន ថ្លែង​ក្នុង​ពិធី "ទិវា​ជាតិ​ទីក្រុង​ស្អាត" នៅ​រាជធានី​ភ្នំពេញ ព្រឹក​ថ្ងៃ​ទី២៥ កុម្ភៈ។
លោក ហ៊ុន សែន ថ្លែង​ក្នុង​ពិធី "ទិវា​ជាតិ​ទីក្រុង​ស្អាត" នៅ​រាជធានី​ភ្នំពេញ ព្រឹក​ថ្ងៃ​ទី២៥ កុម្ភៈ។
ហ្វេសប៊ុក Samdech Hun Sen, Cambodian Prime Minister

សកម្មជន ពលករ និង​ប្រជាពលរដ្ឋ​រិះគន់​ចំណាត់ការ​ចុងក្រោយ​របស់​រដ្ឋាភិបាល​ក្រុងភ្នំពេញ​ដែល​ធ្វើ​ឲ្យ​បាត់បង់ EBA ២០% និង​ការ​រឹតត្បឹត​សេរីភាព​ប្រជាពលរដ្ឋ​ក្នុង​ការ​បញ្ចេញមតិ គំរាមកំហែង ដោយ​ប្រើ​អំពើ​ហិង្សា និង​ចាប់​ដាក់​ពន្ធនាគារ​ថា បាន​បំពាន​ច្បាប់ និង​រំលោភ​សិទ្ធិមនុស្ស​ធ្ងន់ធ្ងរ​។ ពួកគេ​ស្នើ​ឲ្យ​រដ្ឋាភិបាល​គោរព​សិទ្ធិមនុស្ស និង​ស្តារ​លទ្ធិប្រជាធិបតេយ្យ ហើយ​យក EBA ២០% មកវិញ ដើម្បី​សង្គ្រោះ​ដល់​ប្រជាពលរដ្ឋ​កម្ពុជា។

ពលរដ្ឋ​ខ្មែរ ជាជាង​ជួល​ជុល​កុំព្យូទ័រ និង​កាមេរ៉ា​សុវត្ថិភាព នៅ​ខេត្ត​សៀមរាប លោក នង ធារ៉ា លើកឡើង​ថា លោក​សោកសង្រេង​ដែល​រដ្ឋាភិបាល​កម្ពុជា​បាន​ធ្វើ​ឲ្យ​បាត់បង់​ប្រព័ន្ធ​អនុគ្រោះ EBA២០% ដែល​ធ្វើ​ឲ្យ​ពលរដ្ឋ​មួយ​ចំនួន​រង​ទុក្ខ បាត់បង់​ការងារ និង​ធ្វើទុក្ខបុកម្នេញ​តាម​គ្រប់​រូបភាព​លើ​ប្រជាពលរដ្ឋ នៅ​ពេល​ពួកគេ​ងើប​តវ៉ា​ទាមទារ សិទ្ធ​សេរីភាព លទ្ធិ​ប​ប្រជាធិបតេយ្យ​ឡើងវិញ​៖ «យើង​មិន​គួរណា​ធ្វើ​បែប​នេះ​ទេ ដោយសារ​យើង​រងគ្រោះ​ដោយសារ​កូវីដ​មួយ​ជាន់​ហើយ ហើយ​យើង​រងគ្រោះ​ដោយសារ EBA២០% ទៀត ហើយ​បើ​រដ្ឋាភិបាល​មិន​ស្តារ​លទ្ធិប្រជាធិបតេយ្យ​ឡើងវិញ​ទេ តើ​កម្ពុជា​អាច​ធ្លាក់​ទៅដល់​ណាមួយ​ទៀត​ដែរ​ឬ​អត់ អ៊ីចឹង​សូម​រដ្ឋាភិបាល​គិត​សាជាថ្មី​។ ទាក់ទង​នឹង​បាត់បង់ EBA២០% អ្នក​ដែល​រងគ្រោះ​ពិតប្រាកដ​គឺ​ប្រជាពលរដ្ឋ​ក្រីក្រ ដែល​មាន​ជីវភាព​លំបាក​វេទនា​ទៅវិញ ជា​ពិសេស​បងប្អូន​កម្ម​ករ កម្មការិនី​រោងចក្រ ហើយ​យើង​មិន​ព្រម​ស្ដារ​លទ្ធិប្រជាធិបតេយ្យ នៃ​ប្រទេស​កម្ពុជា​យើង​ទៀត​វា​អាច​នឹង​រង​គ្រោះ​ខ្លាំង​ជាង​ហ្នឹង»

ចំណែក ពលករ​ខ្មែរ​នៅ​ប្រទេស​ថៃ លោកស្រី ដាំ ស្រីធាន ថ្លែង​ថា លោកស្រី​សោកស្ដាយ​ចំពោះ​ស្ថានភាព​អាក្រក់​ដែល​កើត​មាននៅ​ប្រទេស​កម្ពុជា​រយៈពេល​ចុងក្រោយ​នេះ ក្រោម​ការដឹកនាំ​របស់ លោក ហ៊ុន សែន ដែល​មិនបាន​គិតគូរ​ដល់​ជីវភាព​ប្រជាពលរដ្ឋ និង​បង្កើន​ការ​បង្ក្រាប​កាន់តែ​ខ្លាំង លើ​ពលរដ្ឋ​៖ «​ខ្ញុំ​នៅតែ​ស្នើសុំ​ដល់​រាជរដ្ឋាភិបាល គួរតែ​ងាក​ក្រ​ឡែក​មក​មើល​ជីវភាព ក៏ដូចជា​ប្រជាពលរដ្ឋ​យើង​ដែល​ពួកគាត់​កំពុងតែ​រង​ការពិបាក គួរតែ​ដោះស្រាយ​បញ្ហា EBA ឲ្យ​បាន​ដាច់ស្រេច​ដែល​គេ​ទុក​ឱកាស​មក​ជិត​កន្លះ​ឆ្នាំ​មកនេះ​។ ខ្ញុំ​នៅតែ​ស្នើសុំ​ដល់​រាជរដ្ឋាភិបាល​ក៏ដូចជា​កម្លាំង​កង​អាវុធ សមត្ថកិច្ច​ទាំងអស់ គួរតែ​យោគយល់​ក្នុងនាម​យើង​ខ្មែរ​ជា​ខ្មែរ​ដូចគ្នា មិន​គួរ​ធ្វើបាប​គ្នា​រហូតដល់​ការ​វ៉ៃ​ដំ​ច្រំ​ធាក់​មក​លើ​យុវជន ក៏ដូចជា​ស្ត្រី​ចាស់ទុំ​ដែល​គាត់​ទាមទារ ព្រោះ​គាត់​ធ្វើ​ហ្នឹង ធ្វើ​ដើម្បី​ទាមទារ​យុត្តិធម៌ ហើយ​ធ្វើ​ដោយ​ចិត្ត​ស្អាតស្អំ ដោយ​បាត​ដៃទទេ គ្មាន​អាវុធ គ្មាន​អ្វី​ទេ ប៉ុន្តែ​ខ្ញុំ​មើល​ឃើញ​ថា សមត្ថកិច្ច​ទាំងអស់​បាន​ប្រើ​អំពើ​ហិង្សា​មក​លើ​ពួកគាត់»

រីឯ ពលករ​ខ្មែរ​នៅ​ប្រទេស​ជប៉ុន លោក ណុល វណ្ណៈ រិះគន់​ថា ទង្វើ​របស់​រដ្ឋាភិបាល​ដែល​ចាប់ចង​ប្រជាពលរដ្ឋ គឺជា​ការ​ផ្គើន​ទៅ​នឹង​សហភាព​អឺរ៉ុប និង​ប្រជាពលរដ្ឋ​ខ្លួនឯង បន្ទាប់ពី​សហភាព​អឺរ៉ុប​បាន​ផ្ដាច់​ប្រព័ន្ធ​អនុគ្រោះ​ពន្ធ EBA២០%​។ លោក​បន្ត​ថា លោក ហ៊ុន សែន មិន​ខ្វល់ខ្វាយ​ចំពោះ​សុខទុក្ខ​ប្រជាពលរដ្ឋ​ដែល​រង​ផល​ប៉ះពាល់​ខ្លាំង​នោះ​ទេ ដោយ​សំងំ​យកសុខ​តែ​ខ្លួនឯង​៖ «ខ្ញុំ​មើល​ឃើញ​ថា លោក ហ៊ុន សែន អត់​បាន​ខ្វល់​ពី​ឆ្នាំងបាយ​របស់​ប្រជាពលរដ្ឋ​ទេ​។ ហ៊ុន សែន គាត់​ខ្វល់​តែ​ពី​អំណាច​របស់​ខ្លួន​តែ​ប៉ុណ្ណោះ​ទេ ហើយ​គាត់​បែរជា​ទៅ​ចាប់​ប្រជាពលរដ្ឋ អ្នក​ដែល​ហ៊ាន​ទាមទារ​តវ៉ា​ពី​រឿង​ប្រាក់ខែ រឿង​ព្រំដែន ចាប់​ពួកគាត់​ដាក់គុក​ទៀត​។ ប្រព័ន្ធ EBA​នេះ គឺ​យើង​ដឹង​ស្រាប់​ហើយ​ថា ជា​ឆ្នាំ​បាយ​របស់​ប្រជាពលរដ្ឋ ១៦​លាន​នាក់ អ៊ីចឹង​បើសិនជា​កាត់​ប្រព័ន្ធ EBA នេះ​ទៅ ប្រជាពលរដ្ឋ​គឺ​គាត់​នឹង​បាត់បង់​ការងារ​ធ្វើ បាត់បង់​អ្វី​ដែល​ជា​កំណើន​ប្រាក់​ចំណូល​របស់​គាត់​ប្រចាំខែ»

ស្រដៀង​គ្នា​នេះ ពលរដ្ឋ​ខ្មែរ​មួយ​រូប​ទៀត​រស់នៅ​ប្រទេស​កូរ៉េ លោកស្រី ផាន់នី ធារី លើកឡើង​ថា រដ្ឋាភិបាល​លោក ហ៊ុន សែន មិន​បាន​គោរព​សិទ្ធិមនុស្ស និង​មិនបាន​គិតគូរ​ដល់​ប្រជាពលរដ្ឋ​នៅ​ពេល​បាត់បង់ EBA២០% ដែល​ធ្វើ​ឲ្យ​កម្មករ​ជាច្រើន​បាត់បង់​ការងារ និង​ជំពាក់​បំណុល​ធនាគារ​ជាដើម​។ លោកស្រី​រិះគន់​ថា រដ្ឋាភិបាល​ជា​អ្នកបង្កើត​ច្បាប់ តែ​មិន​បាន​អនុវត្ត​តាម​ច្បាប់​ឡើយ ហើយ​ថែមទាំង​បំពាន​ច្បាប់​ទៀត​ផង​៖ «ខ្ញុំ​ថា បើសិនជា​មើល​ព្រឹត្តិការណ៍​ទាំងអស់​ហ្នឹង គឺ​ខ្ញុំ​មើល​ឃើញ​ថា គាត់​ធ្វើ​ហ្នឹង គឺ​ធ្វើជា​ទម្លាប់​របស់​គាត់​ហើយ​ក្នុង​ការ​ទប់ស្កាត់​ហ្នឹង មិនមែន​យក​ច្បាប់​យក​មក​គ្រប់គ្រង​ប្រជាពលរដ្ឋ​ទេ​ណា៎​! ហើយ​ប្រជាពលរដ្ឋ​គាត់​បាន​ដឹង​ច្បាស់​អំពី​សិទ្ធ​នៃ​ការ​តវ៉ា​ទាមទារ​របស់​ពួកគាត់ អ៊ីចឹង​ខ្ញុំ​មើល​ឃើញ​ថា កន្លែង​នេះ វា​ពិត​ណាស់​ថា វា​ជា​ការ​រឹតត្បិត​មួយ​ដ៏​ធ្ងន់ធ្ងរ​សម្រាប់​ប្រជាពលរដ្ឋ ព្រោះ​អី​យើង​បាន​ដឹង​ថា ប្រទេស​កម្ពុជា​យើង​កាន់​លទ្ធិប្រជាធិបតេយ្យ ត្រូវតែ​ឲ្យ​ប្រជាពលរដ្ឋ​គាត់​ទាមទារ​អ្វី​ដែល​ជា​សិទ្ធិ​របស់​គាត់ ប៉ុន្តែ​រដ្ឋាភិបាល​កំពុង​អនុវត្ត​ទៅ​តាម​បទបញ្ជា អនុវត្ត​ទៅតាម​ទម្លាប់​ក្នុង​ការ​ទប់ស្កាត់​របស់​គាត់​ទេ»

ដោយឡែក សកម្មជន​គណបក្ស​សង្គ្រោះជាតិ​ខេត្ត​ត្បូងឃ្មុំ លោកស្រី ទ្រី ស៊ាងអ៊ី ថ្កោលទោស​ការ​ដឹកនាំ​របស់​លោក ហ៊ុន សែន ថា អសមត្ថភាព និង​គ្មាន​ការ​ទំនួល​ខុសត្រូវ ដែល​ធ្វើ​ឲ្យ​បាត់បង់ EBA២០% ប៉ះពាល់​ដល់​ជីវភាព​កម្មករ​។ លោកស្រី​ថ្កោលទោស​ទង្វើ​រំលោភ​សិទ្ធិមនុស្ស ការ​ប្រើ​អំពើ​ហិង្សា និង​ការ​គំរាមកំហែង​ដែល​ប្រព្រឹត្ត​ដោយ​អាជ្ញាធរ​របប​ក្រុងភ្នំពេញ​៖ «នាង​ខ្ញុំ​មានតែ​ការ​ទទូច និង​សុំ​ការចូលរួម​ពី​បងប្អូន​ជនរួមជាតិ តស៊ូ ដើម្បី​ឲ្យ​លោក ហ៊ុន សែន ហ្នឹង​ផ្លាស់ប្ដូរ​គំនិត​បែរ​ត្រលប់​មក​គិត​ពី​ផលប្រយោជន៍​ជាតិ ហើយ​និង​សង្គម​ទាំងមូល​ដែល​កំពុងតែ​រង​ការ​ប៉ះពាល់​យ៉ាង​ធ្ងន់ធ្ងរ ពលរដ្ឋ​អត់ឃ្លាន ពលរដ្ឋ​គ្មាន​ការងារ​ធ្វើ ហើយ​ចំណុច​ទាំងអស់​នេះ គឺ​លោក ហ៊ុន សែន គាត់​គ្រាន់តែ​ស្បថ​ការពារ​តំណែង​របស់​គាត់​ទេ។ គាត់​មិនបាន​បង្កើន​ការអនុវត្ត​សន្តិភាព រាជាធិបតេយ្យ ឬក៏​ប្រជាធិបតេយ្យ​ពិតប្រាកដ​ទេ។ គាត់​គ្រាន់តែ​បំបិទ​បំបាំង​យក​លទ្ធិប្រជាធិបតេយ្យ​មក​បិទបាំង ហើយ​គាត់​អនុវត្ត​បែប​កុម្មុយនិស្ត។ គាត់​ចង់​បាន​តែ​អំណាច​របស់​ខ្លួន»

ប្រតិកម្ម​ធ្ងន់ៗ​ពី​ក្រុម​ប្រជាពលរដ្ឋ និង​ពលករ​នេះ ធ្វើ​ឡើង​បន្ទាប់ពី​គណៈកម្មការ​អឺរ៉ុប​បាន​ប្រកាស​ជា​ផ្លូវការ​អំពី​ការ​ចូល​ជា​ធរមាន​នៃ​ការ​ចាប់ផ្តើម​គិត​ពន្ធ​លើ​ទំនិញ​មួយ​ចំនួន​ពី​កម្ពុជា ចាប់ពី​ថ្ងៃ​ទី​១២ សីហា តទៅ​។ គណៈកម្មការ​អឺរ៉ុប បញ្ជាក់​ជំហរ​ថា ការ​ដក​ជា​បណ្ដោះអាសន្ន​នេះ គឺ​ដោយសារតែ​មានការ​រំលោភ​បំពាន​សិទ្ធិមនុស្ស​ធ្ងន់ធ្ងរ​ជា​ប្រព័ន្ធ​យ៉ាង​ជាក់ច្បាស់​នៅ​ក្នុង​ប្រទេស​កម្ពុជា​។ របប​លោក ហ៊ុន សែន រង​ការ​ស្តី​បន្ទោស ដោយសារតែ​មិន​ព្រម​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ តាម​សំណើ​របស់​សហភាព​អឺរ៉ុប ដើម្បី​បន្ត​ទទួល​បាន EBA ទាំងស្រុង​។ ជាង​នេះ​ទៅ​ទៀត របប​ប​នេះ​បាន​បង្កើន​ការ​ចាប់​ចង​មេ​សហជីព អ្នកនយោបាយ សកម្មជន និង​យុវជន ដាក់​ពន្ធនាគារ​បន្តបន្ទាប់ ដោយសារ​ពួកគេ​បញ្ចេញមតិ​រិះគន់ និង​ទាមទារ​ឱ្យ​អាជ្ញាធរ​អនុវត្ត​វិធានការ​ទាំងឡាយ​ឱ្យ​ត្រឹមត្រូវ​តាមច្បាប់។

ទោះជា​យ៉ាងណា របប​លោក ហ៊ុន សែន បកស្រាយ​ថា វិធានការ​ទាំងនេះ​ជា​ការ​អនុវត្ត​ច្បាប់ មិនមែន​ជា​ការ​បង្ក្រាប​លើ​សិទ្ធិ​សេរីភាព​បញ្ចេញមតិ និង​ការ​ជួប​ប្រជុំ​នោះ​ឡើយ​។ ចំណែក រឿង​បាត់បង់ EBA ចំនួន​២០% វិញ របប​នេះ​អះអាង​ថា ជា​សិទ្ធិ​សម្រេច​របស់​សហភាព​អឺរ៉ុប។

ក្រុម​សកម្មជន ពលករ និង​ប្រជាពលរដ្ឋ ទទូច​ឲ្យ​រដ្ឋាភិបាល​បញ្ឈប់​ការរំលោភ​សិទ្ធិមនុស្ស និង​អំពើ​រំលោភច្បាប់​តទៅទៀត ហើយ​ត្រូវ​ប្រញាប់​ស្តារ​ប្រជាធិបតេយ្យ ដើម្បី​ទទួល​បាន​ប្រព័ន្ធ​អនុគ្រោះ​ពន្ធ EBA ទាំងស្រុង​មកវិញ​។ ពួកគេ​ព្រមាន​ថា បើ​របប​ក្រុងភ្នំពេញ​នៅតែ​បង្ក្រាប​លើ​ពលរដ្ឋ និង​បំបិទ​សិទ្ធិ​សេរីភាព​ដោយ​បំពាន​បែបនេះ​ត​ទៀត នោះ​នឹង​មាន​បាតុកម្ម​ទ្រង់ទ្រាយ​ធំ​ប្រឆាំង​តបត​នឹង​របប​នេះ​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល