អង្គការសង្គមស៊ីវិលខ្មែរនៅក្រៅប្រទេសចំនួន ២០ បានរួមគ្នាសរសេរលិខិតមួយច្បាប់ ទៅសមាជិកព្រឹទ្ធសភាអាមេរិកអ្នកស្រី ដាយអាន់ ហ្វាញស្តាញ (Dianne Feinstein) ដោយស្នើសុំឱ្យអ្នកស្រី ជួយអន្តរាគមន៍ ដោះលែងលោក រ៉ុង ឈុន ជាបន្ទាន់ និងដោយគ្មានលក្ខខណ្ឌ។
នៅក្នុងលិខិតរួមគ្នាមួយ ដែលតំណាងដោយអង្គការមូលនិធិខ្មែរសាមគ្គី ចុះថ្ងៃទី៤ ខែសីហា ដែលអាស៊ីសេរី ទើបទទួលបាន កាលពីថ្ងៃទី៧ ខែសីហា អង្គការទាំង ២០ ដែលភាគច្រើនមានទីតាំងនៅក្នុងសហរដ្ឋអាមេរិក និងមួយចំនួននៅប្រទេសកាណាដា និងអូស្ត្រាលី ថា លោក រ៉ុង ឈុន ត្រូវបានអាជ្ញាធរនៃរបបក្រុងភ្នំពេញ ចាប់ខ្លួនដោយសារតែលោកឈឺឆ្អាលបញ្ហាជាតិ ជាពិសេសបញ្ហាដែលវៀតណាមរំលោភចូលដីខ្មែរ។ អង្គការទាំងនេះ ចាត់ទុកការចាប់ខ្លួននេះ ថាជារឿងនយោបាយ និងជាការរំលោភរដ្ឋធម្មនុញ្ញកម្ពុជា និងច្បាប់អន្តរជាតិ។ ពួកគេទាមទារឱ្យរបបក្រុងភ្នំពេញ គោរពសិទ្ធិមនុស្ស និងប្រជាធិបតេយ្យ និងបញ្ឈប់ការចាប់ខ្លួនតាមតែអំពើចិត្តបែបនេះ។
ជុំវិញបញ្ហារំលោភសិទ្ធិមនុស្ស និងបំផ្លាញប្រជាធិបតេយ្យធ្ងន់ធ្ងរនៅកម្ពុជានេះ កន្លងមកសមាជិកសភាសហរដ្ឋអាមេរិក បានអនុម័តច្បាប់ស្ដីពីប្រជាធិបតេយ្យកម្ពុជាឆ្នាំ ២០២០ ដែលសព្វថ្ងៃកំពុងស្ថិតក្នុងដៃគណៈកម្មាធិការព្រឹទ្ធសភា ដើម្បីពិនិត្យ និងអនុម័ត។ រដ្ឋាភិបាលសហរដ្ឋអាមេរិក ក៏បានចាត់វិធានការទណ្ឌកម្មមួយចំនួន រួមមានការដកជំនួយទាំងស្រុងពីកម្ពុជា លើកលែងតែជំនួយមនុស្សធម៌ និងទណ្ឌកម្មបុគ្គល លើមន្ត្រីគ្រាក់ៗនៃរបបក្រុងភ្នំពេញ ដោយអនុវត្តច្បាប់ដាក់ទណ្ឌកម្មសាកល ឬ the Global Magnitsky Act៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។