សហគមន៍​ដីធ្លី​នៅ​ភ្នំពេញ​ស្នើ​លោក ហ៊ុន សែន អន្តរាគមន៍​សំណុំ​រឿង លោក រ៉ាត់ រត្នមុនី

ដោយ សេក បណ្ឌិត
2019-12-19
អ៊ីម៉ែល
មតិ
Share
បោះពុម្ព
តំណាង​សហគមន៍​បឹង​កក់ អតីត​បឹង​កក់ និង​តំណាង​សហគមន៍​បុរី​កីឡា កាន់​បដា​ទាមទារ​​​ឱ្យ​​​ដោះ​លែង​លោក រ៉ាត់ រត្នមុនី ដែល​ជាប់​ពន្ធនាគារ ដោយ​សារ​ជួយ​ផលិត​វីឌីអូ​ឯកសារ​រឿង "ម្ដាយ​ខ្ញុំ​លក់​ខ្ញុំ"។
តំណាង​សហគមន៍​បឹង​កក់ អតីត​បឹង​កក់ និង​តំណាង​សហគមន៍​បុរី​កីឡា កាន់​បដា​ទាមទារ​​​ឱ្យ​​​ដោះ​លែង​លោក រ៉ាត់ រត្នមុនី ដែល​ជាប់​ពន្ធនាគារ ដោយ​សារ​ជួយ​ផលិត​វីឌីអូ​ឯកសារ​រឿង "ម្ដាយ​ខ្ញុំ​លក់​ខ្ញុំ"។
រូប៖ ពលរដ្ឋ​ផ្ដល់​​ឱ្យ

សហគមន៍​ដីធ្លី​នៅ​តំបន់​បឹងកក់ និង​បុរីកីឡា នៅ​ថ្ងៃ​ទី​១៨ ខែ​ធ្នូ នាំគ្នា​ទៅ​ដាក់​ញត្តិ​នៅ​ខុទ្ទកាល័យ​លោកនាយក​រដ្ឋមន្ត្រី ហ៊ុន សែន ដើម្បី​សុំ​កិច្ច​អន្តរាគមន៍​ដោះលែង អ្នកបកប្រែ​ភាសា​ឱ្យ​សារព័ត៌មាន​រុស្ស៊ី​ដែល​ផលិត​ខ្សែភាពយន្ត "​ម្ដាយ​ខ្ញុំ​លក់​ខ្ញុំ​" ឱ្យ​មាន​សេរីភាព​ឡើងវិញ​។ ក្រុម​ស្ត្រី​មាន​ជម្លោះដីធ្លី​ថា មន្ត្រី​ខុទ្ទកាល័យ បដិសេធ​ទទួល​ញត្តិ​ពួកគាត់ ដោយ​លើក​ហេតុផល​ថា លិខិតស្នាម​សរសេរ​ខុស និង​គ្មាន​ដីកា​តុលាការ​ភ្ជាប់​មក​ជាដើម។

តំណាង​បណ្ដាញ​អតីត​ស្ត្រី​នៅ​តំបន់​បឹងកក់ កញ្ញា អ៊ីម ស្រីទូច រៀបរាប់​ថា លោក គង់ ចំរើន ដែល​ជា​មន្ត្រី​ខុទ្ទកាល័យ​លោក ហ៊ុន សែន ហាក់​បង្ហាញ​អាកប្បកិរិយា​រើសអើង ដោយ​មិន​ព្រម​ទទួល​ញត្តិ​ពួកគាត់ ដែល​ដាក់​ស្នើសុំ​លោកនាយក​រដ្ឋមន្ត្រី ហ៊ុន សែន ជួយ​អន្តរាគមន៍​ដោះលែង​លោក លោក រ៉ាត់ រត្ន​មុនី នោះ​ឡើយ។

កញ្ញា​បន្ត​ថា ទោះបីជា​ពួកគាត់​ខិតខំ​ពន្យល់​និង​ស្នើ​ដល់​មន្ត្រី​ខុទ្ទកាល័យ​រូប​នេះ​ឱ្យ​ទទួលយក​ញត្តិ​ក៏ដោយ ក៏​លោក គង់ ចំរើន នៅតែ​មិន​ទទួលយក​ដែរ ដោយ​លើកឡើង​ថា សំណើ​នោះ​មាន​កំហុស​រដ្ឋបាល និង​គ្មាន​លិខិតស្នាម​ភ្ជាប់​មក​ជា​មួយ​។ ស្ត្រី​សកម្មជន​ដីធ្លី​រូប​នេះ នៅតែ​ទទូច​ស្នើ​ដល់​លោក​នាយក​រដ្ឋមន្ត្រី ហ៊ុន សែន ជួយ​លោក រ៉ាត់ រត្នមុនី ឱ្យ​មាន​សេរីភាព ដើម្បី​បាន​ជួបជុំ​ក្រុម​គ្រួសារ​វិញ ព្រោះ​លោក​ជា​មនុស្ស​ល្អ ដែល​តែងតែ​ជួយ​ជា​គំនិត​តស៊ូ​មតិ​ដោយ​អហិង្សា ដល់​សហគមន៍​ដីធ្លី ក្នុង​ពេល​ចេញ​តវ៉ា​រក​ដំណោះស្រាយ​ដីធ្លី៖ «យើង​សូម​សំណូមពរ​សម្ដេច​តេជោ ហ៊ុន សែន នាយករដ្ឋមន្ត្រី សូម​លោក​មេត្តា​ជួយ​អន្តរាគមន៍​ដោះលែង​លោក រ៉ាត់ រត្នមុនី ឱ្យ​មាន​សេរីភាព​ឆាប់ៗ​នេះ​មក​។ ទោះបីជា​ពួក​យើង​មិន​បាន​ដាក់​ញត្តិ​ទៅ​ខុទ្ទកាល័យ សម្ដេច​មិនបាន​ទទួល​ញត្តិ​ពួក​យើង ប៉ុន្តែ​យើង​សូម​ផ្ញើ​សំឡេង​ពួក​យើង ឱ្យ​គាត់​បាន​ឮ​បាន​ដឹង​ហើយ សូម​ឱ្យ​គាត់​បាន​យល់​អំពី​ទឹកចិត្ត​របស់​ប្រជាពលរដ្ឋ ដែល​ត្រូវការ​គាត់​ឱ្យ​គាត់​ជួយ​។ ពួក​យើង​ទាំង​គ្នា ជា​ប្រជាពលរដ្ឋ​រងគ្រោះ​ដីធ្លី ទាំង​បឹងកក់ ទាំង​បុរីកីឡា​ហ្នឹង សូម​សំណូមពរ សូម​ឱ្យ​សម្ដេច​ជួយ​អន្តរាគមន៍​ដោះលែង លោក រត្នមុនី ក្នុង​ពេល​ឆាប់ៗ​នេះ​ផង»

ចំណែក តំណាង​សហគមន៍​បុរីកីឡា លោកស្រី ភោគ សុ​ភិន ឱ្យ​ដឹង​ថា លោក រ៉ាត់ រត្នមុនី គឺជា​មនុស្ស​ស្លូតត្រង់ និង​បំពេញការងារ​តាម​វិជ្ជាជីវៈ ពោល​គឺ​គាត់​មិន​បាន​ប្រព្រឹត្ត​កំហុស​ដូច​ការ​ចោទប្រកាន់​របស់​តុលាការ​នោះ​ទេ។ លោកស្រី បញ្ជាក់​ថា រឿង​ខ្សែភាពយន្ត "​ម្ដាយ​ខ្ញុំ​លក់​ខ្ញុំ​" គឺជា​រឿង​ពិត​របស់​គ្រួសារ​មួយ​នៅ​តំបន់​បឹងកក់ ហេតុនេះ តុលាការ​គួរ​ទម្លាក់​ចោល​ការ​ចោទប្រកាន់​លើ​លោក រ៉ាត់ រត្នមុនី ដើម្បី​ឱ្យ​គាត់​មាន​សេរីភាព​វិញ៖ «លោក រ៉ាត់ រត្នមុនី គាត់​មិន​ត្រូវការ​ជាប់​ពន្ធនាគារ​អី​ដល់​ទៅ ២​ឆ្នាំ ហើយ​ពិន័យ​លុយ​រាប់​ម៉ឺន​ដុល្លារ​ទៀត។ គាត់​មិនមែន​ជា​ជន​ក្បត់ជាតិ គាត់​គ្រាន់តែ​ជួយ​សកម្មជន​ដីធ្លី​ដែល​តវ៉ា​ដីធ្លី​ហ្នឹង គាត់​ជួយ​ឱ្យ​យោបល់​តស៊ូ​មតិ ដោយ​អហិង្សា។ ហើយ​រឿង ម្ដាយ​ខ្ញុំ​លក់​ខ្ញុំ ហ្នឹង គឺជា​រឿង​ពិត​សម្រាប់​អ្នកស្រី កែវ ម៉ាល័យ គាត់​ជា​អ្នករងគ្រោះ​ការ​បណ្ដេញ​ចេញពី​តំបន់​បឹងកក់​។ គាត់​មិនទាន់​បាន​ដំណោះស្រាយ​ទេ ហើយ​គាត់​ក៏​ធ្លាក់ខ្លួន​ក្រីក្រ។ គាត់​មិន​ហ៊ាន​ឆ្លើយ​នៅ​ក្រសួង​មហាផ្ទៃ​ថា គាត់​លក់​កូនក្រមុំ ព្រោះ​អី តែ​គាត់​ឆ្លើយ​រឿង​ពិត​អ៊ីចឹង​ទៅ គឺ​គេ​ឃុំ​ដោយ​ទាំង​គាត់​ទៀត​។ ម្ល៉ោះហើយ គាត់​ក្រឡាស់​សាច់រឿង​ហ្នឹងហើយ​។ លោក រ៉ាត់ រត្នមុនី ជា​មនុស្ស​ស្លូតត្រង់​ម្នាក់ នេះ​ជា​រឿង​ពិត​សម្រាប់​គាត់ ហើយ​គាត់​ជាប់ពន្ធនាគារ​ដោយ​អយុត្តិធម៌»

ក្រុម​ស្ត្រី​សកម្មជន​ដីធ្លី ថា​ពួកគាត់​នឹង​ដាក់​ញត្តិ​ជា​ថ្មី​ទៀត នៅ​ខុទ្ទកាល័យ​លោកនាយក​រដ្ឋមន្ត្រី ហ៊ុន សែន នៅ​សប្ដាហ៍​ក្រោយ។

អាស៊ីសេរី​មិន​អាច​សុំ​ការ​ឆ្លើយ​បំភ្លឺ​រឿង​នេះ​ពី​លោក គង់ ចំរើន មន្ត្រី​ទទួល​ញត្តិ​នៃ​ខុទ្ទកាល័យ​លោកនាយក​រដ្ឋមន្ត្រី ហ៊ុន សែន នៅ​ថ្ងៃ​ទី​១៨ ខែ​ធ្នូ បាន​នៅ​ឡើយ​ទេ ដោយ​គ្មាន​អ្នក​ទទួល​ទូរស័ព្ទ។សកម្មជន​សិទ្ធិ​ការងារ​លោក រ៉ាត់ រត្នមុនី ត្រូវ​តុលាការ​ក្រុងភ្នំពេញ​ផ្ដន្ទាទោស​ដាក់​ពន្ធនាគារ​រយៈពេល​២ ឆ្នាំ ពី​បទ “​ញុះញង់​ឱ្យ​មាន​ការរើសអើង​” ដោយសារ​លោក​ជួយ​ផលិតភាព​យន្ត​ឯកសារ​ស្ដីពី​ការ​ជួញដូរ​ផ្លូវ​ភេទ​នៅ​កម្ពុជា ក្រោម​ចំណងជើង​ថា “​ម្ដាយ​ខ្ញុំ លក់​ខ្ញុំ​” ឱ្យ​សារព័ត៌មាន​រុស្ស៊ី RT (Russia Today)​។ អាជ្ញាធរ​កម្ពុជា​បាន​ចាត់​ទុក​ភាពយន្ត​ឯកសារ​នោះ​ថា ជា​រឿងប្រឌិត ប៉ះពាល់​ដល់​កិត្តិយស​ស្ត្រី​ខ្មែរ និង​បំផ្លាញ​កេរ្តិ៍ឈ្មោះ​កម្ពុជា។

គិត​មក​ដល់​ពេល​នេះ ប្រធាន​សហព័ន្ធ​សហជីព​កម្មករ​សំណង់​កម្ពុជា លោក រ៉ាត់ រត្ន​មុនី បាន​ជាប់ឃុំ​ក្នុង​ពន្ធនាគារ​ព្រៃ​អស់​រយៈពេល ១​ឆ្នាំ​មក​ហើយ​។ សហគមន៍​ជាតិ និង​អន្តរជាតិ​នៅតែ​ទទូច​ឱ្យ​អាជ្ញាធរ​ទម្លាក់​ចោល​បទ​ចោទប្រកាន់ និង​ដោះលែង​សកម្មជន​សិទ្ធិ​ការងារ​រូប​នេះ​ឱ្យ​មាន​សេរីភាព​វិញ ព្រោះ​លោក​មិន​ទទួល​បាន​សវនាការ​ប្រកប​ដោយ​យុត្តិធម៌​ឡើយ​។ ជាពិសេស​ក្នុង​សវនាការ​សាលាឧទ្ធរណ៍​នា​ពេល​កន្លងទៅ ភាគី​ដើមបណ្ដឹង និង​អ្នក​ពាក់ព័ន្ធ​ផ្សេងទៀត មិនបាន​ចូលរួម​ក្នុង​អង្គ​សវនាការ​នោះ​ឡើយ ប៉ុន្តែ​សាលាឧទ្ធរណ៍​នៅតែ​សម្រេច​តម្កល់​សាលក្រម​ផ្ដន្ទាទោស​លោក រ៉ាត់ រត្ន​មុនី ទុក​ជា​បាន​ការ​ដដែល៕

 

(លោកស្រី ង៉ែត ឃុន ហៅ​យាយ ម៉ាំមី ជា​សកម្មជន​ដីធ្លី​នៅ​តំបន់​បឹង​កក់ លើក​បដា​ទាមទារ​អាជ្ញាធរ​ដោះលែង​លោក រ៉ាត់ រត្នមុនី សកម្មជន​សិទ្ធិ​ការងារ​ ដែល​កំពុង​ជាប់​ឃុំ​នៅ​ពន្ធនាគារ)