ព្រះភិក្ខុ លួន សុវ៉ាត ចោទ​អាជ្ញាធរ​ថា ប្រឌិត​បទល្មើស​ដើម្បី​ចាប់​ព្រះអង្គ​ផ្សឹក

ដោយ អាស៊ីសេរី
2020-06-11
អ៊ីម៉ែល
មតិ
Share
បោះពុម្ព
ព្រះតេជព្រះគុណ លួន សុវ៉ាត (ពាក់​កម្រង​ផ្កា) ផ្ដល់​បទសម្ភាសន៍​ដល់​អ្នក​កាសែត បន្ទាប់​ពី​និមន្ត​ចេញ​ពី​បន្ទប់​សវនាការ​នៃ​សាលា​ដំបូង​រាជធានី​ភ្នំពេញ ឆ្ពោះ​ទៅ​វត្ត​សាមគ្គីរង្ស៊ី នៅ​ថ្ងៃ​ទី​២៥ ខែ​វិច្ឆិកា ឆ្នាំ​២០១៤។
ព្រះតេជព្រះគុណ លួន សុវ៉ាត (ពាក់​កម្រង​ផ្កា) ផ្ដល់​បទសម្ភាសន៍​ដល់​អ្នក​កាសែត បន្ទាប់​ពី​និមន្ត​ចេញ​ពី​បន្ទប់​សវនាការ​នៃ​សាលា​ដំបូង​រាជធានី​ភ្នំពេញ ឆ្ពោះ​ទៅ​វត្ត​សាមគ្គីរង្ស៊ី នៅ​ថ្ងៃ​ទី​២៥ ខែ​វិច្ឆិកា ឆ្នាំ​២០១៤។
RFA

សកម្មជន​សិទ្ធិមនុស្ស ព្រះសង្ឃ លួន សុវ៉ាត អះអាង​ថា អាជ្ញាធរ​បាន​ប្រឌិត​បទល្មើស​ដោយ​កាត់ត​រូបភាព និង​ធ្វើ​ត្រាប់​តាម​សំឡេង​ព្រះអង្គ​ដើម្បី​ធ្វើទុក្ខបុកម្នេញ​ផ្នែក​នយោបាយ ក្នុង​ចេតនា​ចង់​ចាប់​ព្រះអង្គ​ផ្សឹក ប៉ុន្តែ​តំណាង​ក្រសួង​ធម្មការ និង​សាសនា អះអាង​ថា ព្រះ​ភិក្ខុ លួន សុវ៉ាត មាន​កំហុស​ផ្នែក​វិន័យ​សង្ឃ មិន​ពាក់ព័ន្ធ​រឿង​នយោបាយ​ឡើយ។

សង្ឃ​សកម្មជន​សិទ្ធិមនុស្ស ព្រះអង្គ លួន សុវ៉ាត បដិសេធ​ជា​សាធារណៈ ចំពោះ​រឿងរ៉ាវ​ដែល​អង្គ​ចាត់​ទុក​ករណី​នេះ​ថា ជា​ការ​មួលបង្កាច់ និង​ប្រឌិត​ព័ត៌មាន ដោយ​យក​រូបភាព​និង សំឡេង​អ្នកដទៃ មក​កាត់ត​បញ្ចូល​គ្នា បង្កើត​ជា​សាច់រឿង រួច​បង្ហោះ​លើ​ហ្វេ​ស​ប៊ុ​ក​ដើម្បី​ចាប់​ព្រះអង្គ​ផ្សឹក។

ទោះ​យ៉ាង​ណា​ព្រះអង្គ​សរសេរ​នៅ​ក្នុង​ហ្វេសប៊ុក​នៅ​ថ្ងៃទី​១០​មិថុនា ថា ព្រះអង្គ​បាន​ភៀស​​​ទៅ​ទី​ឆ្ងាយ​ហើយ ដើម្បី​បញ្ចៀស​ការ​ចាប់​ផ្សឹក​ទាំង​បង្ខំ។ ព្រះអង្គ​ទាមទារ​ឱ្យ​អាជ្ញាធរ​ផ្ដល់​ភាព​ស្អាតស្អំ​និង​បញ្ឈប់​ការ​ស្វែងរក​ចាប់​ព្រះអង្គ។ ព្រះអង្គ​បន្ត​ថា អំឡុង​ពេល​ព្រះអង្គ ភៀស​ព្រះ​កាយ​នេះ អាជ្ញាធរ​ខេត្ត​សៀមរាប បាន​ដកហូត​ឡាន​ម៉ាក Lexus 470 ១​គ្រឿង និង​កាមេរ៉ា​ជិត ១០​គ្រឿង​របស់​ព្រះអង្គ ពី​ក្មួយ​របស់​ព្រះអង្គ​នៅ​ស្រុក​ជីក្រែង ខេត្ត​សៀមរាប​។ ព្រះអង្គ លួន សុវ៉ាត ទាមទារ​ឱ្យ​អាជ្ញាធរ​ប្រគល់​សម្ភារៈ​ទាំងអស់ ឱ្យ​ក្រុម​គ្រួសារ​ព្រះអង្គ​វិញ។

កាល​ពី​ថ្ងៃ​ទី៣ មិថុនា គណៈសង្ឃ​ខេត្ត​សៀមរាប បាន​ប្រកាស​ឱ្យ​ចាប់​ផ្សឹក​ព្រះអង្គ លួន សុវ៉ាត ដែល​គង់​មិន​អចិន្ត្រៃយ៍​នៅ​វត្ត​ស្លែង ភូមិ​ព្រីង ឃុំ​ជីក្រែង ស្រុក​ជីក្រែង​ចេញពី​បព្វជិត ក្រោម​ហេតុផល​ថា ព្រះអង្គ​បាន​ប្រព្រឹត្តិ​ខុស​វិន័យ​សង្ឃ​ដោយ​សេព​មេថុនធម្ម ឬ ការរួម​ភេទ​។​សេចក្ដីសម្រេច​នេះ ធ្វើឡើង​ក្រោយពេល​ថេរ​សភា​សង្ឃ​ខេត្ត​សៀមរាប បាន​ពិនិត្យមើល​វីដេអូ​និង​សារ​សំឡេង ដែល​បង្ហាញ ពី​កិច្ច​សន្ទនា​ស្នេហា​រវាង​ព្រះសង្ឃ លួន សុវ៉ាត ជាមួយ​ស្ត្រី​២​នាក់​ជា​ម្ដាយ​និង​កូនស្រី​។​

គណៈសង្ឃ​ខេត្ត​សៀមរាប ប្រកាស​ថា ក្នុង​ករណី ព្រះអង្គ លួន សុវ៉ាត នៅតែ​បន្ត​គ្រង​ស្បង់​ចីវរ​ជា​បព្វជិត​ក្រោយ​ថ្ងៃ​ទី៣ មិថុនា​ទៀត​ត្រូវ​ចាត់ទុកថា​ព្រះអង្គ​ប្រព្រឹត្ត​ក្លែងភេទ​ជា​ព្រះសង្ឃ ហើយ​គណៈសង្ឃ​ខេត្ត​សៀមរាប ស្នើសុំ​សមត្ថកិច្ច​ចាត់វិធានការ​តាមច្បាប់ លើ​ព្រះអង្គ លួន សុវ៉ាត។

ចំណែក គណៈសង្ឃ​នាយក​នៃ​ព្រះរាជាណាចក្រ​កម្ពុជា បាន​ប្រគេន​ដំណឹង​ឱ្យ​ព្រះ​មេគណ​រាជធានី​ខេត្ត​ទាំងអស់​សហការ​ជាមួយ​សមត្ថកិច្ច ដើម្បី​ចាប់​ព្រះសង្ឃ លួន សុវ៉ាត ផ្សឹក ព្រោះ​អះអាងថា ការ​ជំនុំជម្រះ​របស់​ថេរ​សភា​ខេត្ត​សៀមរាប កាល​ពី​ថ្ងៃ​ទី៣ មិថុនា ជា​រឿង​ត្រឹមត្រូវ​តាម​ពុទ្ធ​វិន័យ។អ្នកនាំពាក្យ​ក្រសួង​ធម្មការ និង​សាសនា លោក សេង សុមុនី ប្រាប់​អាស៊ីសេរី​ថា គណៈសង្ឃ​មាន​ភស្តុតាង និង​សាក្សី ពិតប្រាកដ ដែល​បញ្ជាក់​ថា ព្រះសង្ឃ លួន សុវ៉ាត ប្រព្រឹត្តិ​ខុស​វិន័យ​សង្ឃ ហើយ​ករណី​នេះ គ្មាន​ការ​ពាក់ព័ន្ធ​នឹង​រឿង​នយោបាយ​ឡើយ។

លោក សេង សុមុនី អំពាវនាវ​ឱ្យ​ព្រះសង្ឃ លួន សុវ៉ាត ចូល​តវ៉ា​រក​យុត្តិធម៌ ក្នុង​ថេរសភា​សង្ឃ តាម​ក្រឹត្យក្រម​ក្នុង​វិន័យ​សាសនា។ មន្ត្រី​ក្រសួង​ធម្មការ​រូប​នេះ អះអាង​ថា ក្នុង​ករណី​ស្អាតស្អំ ក្រុម​ជំនុំ​ថេរ​សភា ដែល​មាន​មន្ត្រី​សង្ឃ សុទ្ធ​តែ​ជា​អ្នកចេះដឹង ធម៌​វិន័យ នឹង​រក​យុត្តិធម៌​ជូន តែ​បើ​ក្នុង​ករណី​បាន​ប្រព្រឹត្តិ​កំហុស លោក ជំរុញ​ឱ្យ​ព្រះសង្ឃ លួន សុវ៉ាត រក​ព្រះ​ឧបជ្ឈា លាចាក​សិក្ខាបទ​ឱ្យ​បាន​ត្រឹមត្រូវ​តាម​ផ្លូវ​ព្រះពុទ្ធសាសនា៖ «ទាក់ទិន​នឹង​រឿង​នយោបាយ មិន​មាន​ទេ ចំណុច​នេះ មិន​មាន​ទេ​។ ខ្ញុំ​មើល​ឃើញ​រហូត​ហូរហែ មិន​មាន​ទេ ព្រោះ​មួយ​រយៈ​កន្លងមក​ហ្នឹង បុគ្គល លួន សុវ៉ាត ក៏​មិន​បាន​ធ្វើ​នយោបាយ​អ្វី​ទេ មិន​មាន​ធ្វើ​នយោបាយ​អ្វី​ទេ ហើយក៏​មិន​ប៉ះពាល់​ជាមួយ​ខាង​ណា​។ ខាង​ប្រឆាំង​ក៏​អត់ ខាង​ស្រប​ក៏​អត់ លោក​ក៏​មិន​មាន​ការ​តវ៉ា​ទេ អត់​មាន​ទេ​ណា ដូច្នេះ​ណា»

អាស៊ីសេរី​បាន​ព្យាយាម​សុំ​ការ​បញ្ជាក់​ពី ស្នងការ​នគរបាល​ខេត្ត​សៀមរាប លោក ទិត្យ ណារ៉ុង ករណី​ដកហូត​ឡាន ការ​ឆែកឆេរ​ផ្ទះ​ញោម​របស់​ព្រះ​ភិក្ខុ លួន សុវ៉ាត និង​ការ​តាម​ចាប់​ព្រះ​កាយ ព្រះអង្គ​នៅ​ថ្ងៃ​ទី​១០ និង​ទី​១១ មិថុនា តែ​មន្ត្រី​ប៉ូលិស​រូប​នេះ មិន​ទទួល​ទូរស័ព្ទ។

អ្នកនាំពាក្យ​តំណាង​អយ្យការ​អម​សាលាដំបូង​ខេត្ត​សៀមរាប លោក ជូន សុបញ្ញា ប្រាប់​អាស៊ីសេរី​នៅ​ថ្ងៃ​ទី​១១ មិថុនា ថា ព្រះរាជអាជ្ញា​បាន​ចេញ​ដីកា​ឱ្យ​ប៉ូលិស​ធ្វើ​សកម្មភាព​ទាំងឡាយ​តែ​លោក​ថា មិនទាន់​អាច​បញ្ជាក់​ប្រភេទ​បទល្មើស​ទេ ដោយ​ប្រាប់​ថា រង់ចាំ​ទទួល​របាយការណ៍​ឆែកឆេរ​ពី​ប៉ូលិស​សិន៖ «ចាំ​មើល​ប៉ូលិស​បញ្ជូន​មក​សិន ព្រោះ​មាន​ហើយ គឺ​មាន​បទល្មើស​ច្រើន​ក្នុង​ហ្នឹង ប៉ុន្តែ​យើង​ត្រូវ​ច្បាស់​បាន​អាច​ឆ្លើយ​តប​បាន​។ អាច​មាន​បទល្មើស​ច្រើន»

នាយករង​អង្គការ​លីកាដូ (Licadho) ទទួល​បន្ទុក​ឃ្លាំមើល​សិទ្ធិមនុស្ស លោក អំ សំអាត ឱ្យ​ដឹង​ថា ប៉ូលិស​ពិតជា​បាន​ចុះ​ឆែកឆេរ​ផ្ទះ​របស់​ញោម​ព្រះអង្គ លួន សុវ៉ាត នៅ​ខេត្ត​សៀមរាប​ពិតមែន។ លោក អំ សំអាត ថា ការ​ឆែកឆេរ​ផ្ទះ​សាច់ញាតិ​និង​រឹបអូស​ទ្រព្យសម្បត្តិ របស់​ព្រះអង្គ​លួ​ន សុ​វ៉ាត ជាការ​រំលោភ​សិទ្ធិមនុស្ស​ព្រោះ​ការ​រឹបអូស និង​ឆែកឆេរ ត្រូវ​ធ្វើ​ឡើង​តែ​ក្នុង​ករណី​បទល្មើស​ព្រហ្មទណ្ឌ​ប៉ុណ្ណោះ​។ មន្ត្រី​សិទ្ធិមនុស្ស​រូប​នេះ​ស្នើ​ឱ្យ​អាជ្ញាធរ​ស៊ើបអង្កេត​ករណី​នេះ ឱ្យ​បាន​ច្បាស់លាស់​សិន​មុននឹង​ចេញ​វិធានការ​ណាមួយ​លើ​ព្រះ​ភិក្ខុ លួន សុវ៉ាត៖ «ការអនុវត្ត​កន្លងមក មាន​ចំណុច​មន្ទិលសង្ស័យ​ច្រើន​ណា​។ ពីព្រោះ រឿង​នេះ វា​ដូច​មិន​មាន​ការបែងចែក​ឲ្យ​ដាច់​ថា វា​ជា​រឿង​វិន័យ​ធម៌ ឬក៏​ជា​រឿង​ទាក់ទង​នឹង​បញ្ហា​រឿង​ព្រហ្មទណ្ឌ​។ អត់​មានការ​បែងចែក​ទេ សូម្បីតែ​រឿង​ទាក់ទង​នឹង​វិន័យ​សង្ឃ​នេះ យើង​អត់​ទាន់​ឃើញ​មានការ​ស៊ើបអង្កេត​ឲ្យ​បាន​ច្បាស់​លាស់​ទេ ហើយ​មានការ​សម្រេច​ចាប់​ផ្សឹក​អ៊ីចឹង​ទៅ​។ ប៉ុន្តែ​បើ​វិន័យ​សង្ឃ វា​អត់​មាន​ទាក់ទង​អ្វី​នឹង​ការ​រឹបអូស​ទ្រព្យសម្បត្តិ​ឬក៏​វត្ថុ​តាង​ហ្នឹង​ទេ»

ព្រះសង្ឃ បូ បេត ដែល​ជា​សកម្មជន​ព្រៃឈើ បាន​ឲ្យ​ដឹង​ថា ព្រះអង្គ លួន សុវ៉ាត បាន​ទូរស័ព្ទ​ប្រាប់​ព្រះអង្គ​នៅ​ថ្ងៃ​មានការ​ចោទ​កាន់​នោះ​ថា​ឲ្យ​សកម្មជន​សង្ឃ​ទាំងអស់​ការពារ​ខ្លួន​ព្រោះ​មានការ​តាម​យាយី​ធ្វើទុក្ខបុកម្នេញ ព្រះសង្ឃ ដែល​តែង​ជួយ​ឈឺឆ្អាល​ក្នុង​សង្គម​។ ព្រះអង្គ បូ បេត ជឿ​ថា ព្រះ​ភិក្ខុ លួន សុវ៉ាត មិន​ប្រព្រឹត្តិ​កំហុស​ទេ និង​ត្រូវ​គេ​ធ្វើបាប​ដូច​ករណី​មន្ត្រី​បក្ស​ប្រឆាំង​ដែរ៖ «អាត្មា នៅតែ​តាំង​ខ្លួនឯង​ថា មាន​គេ​ធ្វើបាប​លោក ដោយសារ​លោក ជា​ព្រះសង្ឃ​សកម្ម ដូច​ចង់​សកម្ម​ជាង​ក្រុម​អាត្មា​ផង ព្រោះ​លោក​ធ្វើ​ការងារ​សង្គម​មុន​យើង ហើយ​លោក​ធ្វើ​ល្បីល្បាញ​នៅ​លើ​ពិភពលោក ផង​ដែរ»

ព្រះសង្ឃ លួន សុវ៉ាត គឺជា​សកម្មជន​សង្ឃ​ការពារ​សិទ្ធិមនុស្ស និង​ដីធ្លី​។ នៅ​ឆ្នាំ​២០១២ ព្រះអង្គ​ទទួល​ពានរង្វាន់​អ្នកការពារ​សិទ្ធិមនុស្ស​អន្តរជាតិ ឈ្មោះ Martin Ennels Award ពី​ប្រទេស​ស្វីស។ព្រះអង្គ​ធ្លាប់​ត្រូវ​បាន​សមត្ថកិច្ច​រុញច្រាន ចាប់​ក្រៀក និង​ជេរប្រមាថ ដោយសារ​ការចូលរួម​ឃ្លាំមើល​ការពារ​សិទ្ធិមនុស្ស ការ​តវ៉ា​ដីធ្លី និង​តែង​រិះគន់​ភាព​អវិជ្ជមាន​ក្នុង​សង្គម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល