ពលរដ្ឋ​មាន​ទំនាស់​ដីធ្លី ៦៩​គ្រួសារ​នៅ​ខេត្តបាត់ដំបង​បន្ត​ទាមទារ​រដ្ឋាភិបាល​ដោះស្រាយ​បញ្ហា​ដីធ្លី​ឱ្យ​ពួកគាត់

ដោយ សុជីវី
2024.04.23
ពលរដ្ឋ​មាន​ទំនាស់​ដីធ្លី ៦៩​គ្រួសារ​នៅ​ខេត្តបាត់ដំបង​បន្ត​ទាមទារ​រដ្ឋាភិបាល​ដោះស្រាយ​បញ្ហា​ដីធ្លី​ឱ្យ​ពួកគាត់ លោក ស្វាយ សុភាព (ពាក់វែនតា) លោក ឌុច ស្ដើង (កាន់សាមី) យកលិខិតឈប់ប្រើប្រើប្រាស់ដីធ្លី នៅក្នុងស្រុកគាស់ក្រឡ ទៅកាន់សាលាដំបូងខេត្តបាត់ដំបង កាលពីខែកុម្ភៈ ឆ្នាំ២០២៤។
រូប​៖ ហ្វេសប៊ុកលោក ស្វាយ សុភាព

ពលរដ្ឋ​មាន​ទំនាស់​ដីធ្លី ៦៩​គ្រួសារ​នៅ​ខេត្តបាត់ដំបង បន្ត​ទាមទារ​រដ្ឋាភិបាល​ដោះស្រាយ​បញ្ហា​ដីធ្លី​ឱ្យ​ពួកគាត់​។ មន្ត្រី​អង្គការ​សង្គម​ស៊ីវិល ទទូច​ដល់​អាជ្ញាធរ​ឲ្យ​ចុះ​វាស់វែង និង​ចេញ​ប្លង់​កម្មសិទ្ធិ​ដីធ្លី​ដល់​ពលរដ្ឋ ៦៩​គ្រួសារ​នោះ ដើម្បី​បង្កបង្កើនផល​ចិញ្ចឹមជីវិត។

ពលរដ្ឋ​មាន​ទំនាស់​ដីធ្លី ៦៩​គ្រួសារ​នៅ​ស្រុក​គាស់ក្រឡ ខេត្ត​បាត់ដំបង កំពុង​ប្រឈម​នឹង​បញ្ហា​ជីវភាព​ធ្ងន់ធ្ងរ ក្រោយពី​អាជ្ញាធរ​ហាមឃាត់​ពួកគេ មិន​ឲ្យ​ចូល​ទៅ​អាស្រ័យ​ផល​លើ​ផ្ទៃដី​កសិកម្ម​។​

តំណាង​ពលរដ្ឋ​ម្នាក់ គឺ​លោក ស្វាយ សុភាព ប្រាប់​វិទ្យុ​អាស៊ីសេរី កាលពី​ថ្ងៃទី​២១ មេសា​ថា អាជ្ញាធរ​ខេត្ត​បាត់ដំបង​បាន​កោះហៅ​ពលរដ្ឋ នៅ​ចំណុច​ភ្នំ​ស្នរ ភូមិ​សំរោង ឃុំ​ឆ្នាល់មាន់ ស្រុក​គាស់ក្រឡ ចូលរួម​ប្រជុំ​ជាមួយ​អាជ្ញាធរ ហើយ​អាជ្ញាធរ​បាន​ហាមប្រាម​មិន​ឲ្យ​ពលរដ្ឋ ចូល​ទៅ​អាស្រ័យ​ផល​លើ​ផ្ទៃដី ដែល​អាជ្ញាធរ​ថា ជា​ដី​កម្មសិទ្ធិ​របស់​រដ្ឋ​។ តំណាង​ពលរដ្ឋ​រូប​នេះ ទទូច​ដល់​អាជ្ញាធរ​ខេត្ត​បាត់ដំបង ឲ្យ​ដោះស្រាយ​វិវាទ​ដីធ្លី​នេះ ជូន​ពលរដ្ឋ ដោយ​លោក​អះអាង​ថា ពួកគាត់​បាន​រស់នៅ និង​អាស្រ័យ​ផល​លើ​ផ្ទៃដី​កសិកម្ម​ទាំងនោះ មុន​ពេល​អាជ្ញាធរ​ខេត្ត​បាត់ដំបង ចុះបញ្ជី​ដី​នៅ​តំបន់​នោះ ជា​ដី​កម្មសិទ្ធិ​របស់​រដ្ឋ។

លោក ស្វាយ សុភាព៖ «ខ្ញុំ​សុំ​ឲ្យ​អាជ្ញាធរ​ជួយ​កាត់​ឆ្វៀល​ដី​ឲ្យ​ប្រជាពលរដ្ឋ​៦៩​គ្រួសារ​ហ្នឹង ហើយ​ចេញ​ជា​ប្លង់​កម្មសិទ្ធិ​ជូន​បងប្អូន​ប្រជាពលរដ្ឋ​ទាំង​៦៩​គ្រួសារ ប៉ះពាល់​ខ្លាំង​ណាស់ ក្មួយ​បើ​នៅតែ​មិន​បន្ត​ដោះស្រាយ​នេះ​ទេ គឺ​គាត់​ហាម​អាជ្ញាធរ​ហាម​មិន​បាច់​ចាំ​ធ្វើ​ទេ គ្រាន់តែ​ជាន់ ក៏​មិន​ឲ្យ​ជាន់​ដី​ហ្នឹង​ផង»

វិទ្យុ​អាស៊ីសេរី នៅ​មិនទាន់​អាច​ទាក់ទង​អភិបាល​ខេត្ត​បាត់ដំបង​លោក សុខ លូ ដើម្បី​សុំ​ការ​ឆ្លើយតប​បញ្ហា​នេះ បាន​នៅ​ឡើយ​ទេ នៅ​ថ្ងៃទី​២២ មេសា។

ពលរដ្ឋ​៦៩​គ្រួសារ នៅ​ភូមិ​សំរោង ឃុំ​ឆ្នាល់មាន់ ស្រុក​គាស់ក្រឡ ធ្លាប់​ស្នើសុំ​អាជ្ញាធរ​ភូមិ​ឃុំ ស្រុក ខេត្ត​តំណាងរាស្ត្រ និង​ក្រសួង​ដែនដី​ជាដើម ដើម្បី​វាស់វែង និង​ចេញ​ប្លង់​កម្មសិទ្ធិ​ដីធ្លី ក៏ប៉ុន្តែ​ពួកគាត់​នៅ​ពុំ​ទាន់​ទទួល​បាន​ការ​ដោះស្រាយ​ពី​អាជ្ញាធរ​នោះ​ទេ​។ ផ្ទុយ​ទៅវិញ តំណាង​ពលរដ្ឋ​៣​នាក់ រួមមាន​លោក ស្វាយ សុភាព លោក ឌុច ស្ដើង និង​លោក មាស ស៊ន បែរ​ជា​ទទួល​រង​ការ​ចោទ​ប្រកាន់​ពី​អាជ្ញាធរ​ជាច្រើនលើក​ថា ធ្វើ​ឲ្យ​ប៉ះពាល់​ដល់​កម្មសិទ្ធិ​ទ្រព្យសម្បត្តិ​សាធារណៈ​ទៅវិញ។

ជុំវិញ​រឿង​នេះ អ្នកសម្របសម្រួល​អង្គការ​សិទ្ធិមនុស្ស​លីកាដូ (LICADHO) ប្រចាំ​ខេត្ត​បន្ទាយមានជ័យ លោក អ៊ិន គង់ជិត ដែល​ធ្លាប់​ចុះ​ជួប​ពលរដ្ឋ​ដល់​មូលដ្ឋាន​នៅ​ស្រុក​គាស់ក្រឡ សង្កេត​ឃើញ​ថា ពលរដ្ឋ​នៅ​តំបន់​នោះ ភាគច្រើន​រស់​នៅ​អាស្រ័យ​នឹង​មុខរបរ​កសិកម្ម​មួយ​មុខ​គត់​។ មន្ត្រី​អង្គការ​សិទ្ធិមនុស្ស​រូប​នេះ លើកឡើង​ថា អាជ្ញាធរ​ពាក់ព័ន្ធ​គួរតែ​យោគយល់ និង​ធ្វើ​ប្រទានកម្ម នូវ​ដីធ្លី​កសិកម្ម​សម្រាប់​ពលរដ្ឋ​ដែល​មាន​ជីវភាព​ក្រីក្រ​ពិតប្រាកដ ដើម្បី​កុំ​ឲ្យ​ពួកគាត់​ទល់​ច្រក​គ្មាន​ចំណូល​ប្រចាំថ្ងៃ និង​ធ្លាក់ខ្លួន​ក្លាយជា​ពលរដ្ឋ​ចំណាកស្រុក​ទៅ​ប្រទេស​ថៃ។

លោក អ៊ិន គង់ជិត៖ «គួរតែ​យោគយល់ គួរតែ​ធ្វើ​សម្បទាន ឬក៏​ធ្វើ​ប្រទានកម្ម​ដល់​ប្រជាពលរដ្ឋ​ដែល​គាត់​ក្រីក្រ​ខ្វះខាត​ដី​សម្រាប់​ធ្វើ​កសិកម្ម ហើយ​កន្លងមក​ក៏​ពួកគាត់​រំពឹង​លើ​ការ​អាស្រ័យ​ផល​នៃ​ដី​កសិកម្ម​ដាំដំឡូង​មី ដើម្បី​រក​ប្រាក់​ចំណូល​បង្កើន​ជីវភាព​ក្នុង​គ្រួសារ»

តំណាង​ពលរដ្ឋ និង​មន្ត្រី​អង្គការ​សង្គម​ស៊ីវិល នៅតែ​ស្នើ​យ៉ាង​ទទូច​ដល់​អាជ្ញាធរ​ពាក់ព័ន្ធ​ជួយ​ដោះស្រាយ​បញ្ហា​ដីធ្លី​ដោយ​ចុះ​វាស់វែង និង​ចេញ​ប្លង់​កម្មសិទ្ធិ​ដីធ្លី ជូន​ពលរដ្ឋ​៦៩​គ្រួសារ​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។