សាសនិក​ឥស្លាម​ថា​ការ​វាយ​របង​ធ្វើ​ផ្លូវ​កាត់​វិហារ​ឥស្លាម​មិន​ពាក់ព័ន្ធ​បក្ស​ប្រឆាំង

ដោយ ថា កិត្យា
2016.12.25
ចាម​វាយ​របង​នៅ​បឹងកក់ ៨៥៥ សាសនិក​ឥស្លាម​មួយ​ក្រុម​វាយ​កម្ទេច​របង​ពុះ​ផ្លូវ​នៅ​វិហារ​ក្នុង​តំបន់​បឹងកក់ នៅ​ថ្ងៃ​ទី​២៣ ខែ​ធ្នូ ឆ្នាំ​២០១៦។ RFA/Tin Zakariya
RFA/Tin Zakariya

សាសនិក​ឥស្លាម អះអាង​ថា ការ​វាយ​កម្ទេច​របង​បាំង​ធ្វើ​ផ្លូវ​កាត់​វិហារ​បឹងកក់ កាល​ពី​ថ្ងៃ​ទី​២៣ ធ្នូ នោះ មិន​មាន​ការ​ញុះញង់​របស់​គណបក្ស​នយោបាយ​ណា​មួយ​នៅ​ពី​ក្រោយ​ឡើយ ប៉ុន្តែ​ដោយសារ​ពួក​គេ​មិន​ពេញ​ចិត្ត​នឹង​គម្រោង​របស់​សាលា​ក្រុង​ភ្នំពេញ ដែល​មិន​ព្រម​វាង​តាម​របង។ ការ​ឆ្លើយតប​នេះ បន្ទាប់​ពី​មាន​ការ​ចោទ​ប្រកាន់​តាម​បណ្ដាញ​សង្គម​ហ្វេសប៊ុក​ថា ទង្វើ​របស់​ជនជាតិ​ចាម នោះ គឺ​មាន​បក្ស​ប្រឆាំង​នៅ​ពី​ក្រោយ។

ការ​វាយ​កម្ទេច​របង​បាំង​ធ្វើ​ផ្លូវ​កាត់​វិហារ​បឹងកក់ ឬ​វិហារ​អាល់សាកាល់ ស្ថិត​នៅ​ក្រោយ​សណ្ឋាគារ​ភ្នំពេញ ដែល​មាន​ភាព​ចម្រូងចម្រាស​រវាង​អាជ្ញាធរ​សាលា​រាជធានី​ភ្នំពេញ និង​សាសនិក​ខ្មែរ​ឥស្លាម​មួយ​ក្រុម​នោះ ត្រូវ​បាន​មនុស្ស​មួយ​ចំនួន​ទៀត​ទាញ​ចូល​ពាក់ព័ន្ធ​នឹង​រឿង​នយោបាយ​ទៅ​វិញ។

យ៉ាង​នេះ​ក្តី សាសនិក​ខ្មែរ​ឥស្លាម​មួយ​ចំនួន​អះអាង​ថា ការ​វាយ​កម្ទេច​របង​បាំង​សម្រាប់​គ្រឿងចក្រ​ឈូស​ឆាយ​ធ្វើ​ផ្លូវ​កាត់​ក្នុង​បរិវេណ​វិហារ​បឹងកក់ កាល​ពី​ថ្ងៃ​សុក្រ ទី​២៣ ខែ​ធ្នូ នោះ មិន​មាន​ពាក់ព័ន្ធ​នឹង​រឿង​នយោបាយ​ឡើយ។ ផ្ទុយ​ទៅ​វិញ ពួក​គាត់​អះអាង​ថា ដោយសារ​សាសនិក​ឥស្លាម​ភាគច្រើន មិន​យល់ស្រប​ចំពោះ​គម្រោង​របស់​សាលា​រាជធានី​ភ្នំពេញ ដែល​មិន​ព្រម​បង្ខិត​ទៅ​តាម​របង។

ប្រធាន​ចលនា​ខ្មែរ​ឥស្លាម​នៅ​ក្នុង​គណបក្ស​សង្គ្រោះ​ជាតិ លោក អ៊ីសា អូស្មាន បាន​ច្រាន​ចោល​ទាំង​ស្រុង​ចំពោះ​ការ​ចោទ​ប្រកាន់​នៅ​តាម​បណ្ដាញ​សង្គម​ហ្វេសប៊ុក​ឈ្មោះ ផែង វណ្ណៈ ថា​ការ​វាយ​របង​ដែល​ខាង​សាលា​រាជធានី​ភ្នំពេញ​បាន​ធ្វើ​កាល​ពី​ថ្ងៃ​ទី​១៩ ខែ​ធ្នូ នោះ គឺ​មាន​គណបក្ស​សង្គ្រោះ​ជាតិ ជា​អ្នក​ញុះញង់​នៅ​ពី​ក្រោយ​ខ្នង៖ «ការ​រុះរើ​របង​នេះ​មិន​មែន​ជា​គំនិត​របស់​គណបក្ស​ណា​មួយ​ទេ ឬ​គណបក្ស​សង្គ្រោះ​ជាតិ ទេ ប៉ុន្តែ​ប្រជាពលរដ្ឋ​មិន​សប្បាយ​ចិត្ត​ចំពោះ​ផែនការ​ធ្វើ​ផ្លូវ​កាត់​ដី​វិហារ។ ដូច្នេះ​នរណា​ក៏​ចូលរួម​ដែរ ព្រោះ​ដី​វិហារ​ជា​ទ្រព្យ​សម្បត្តិ​រួម​របស់​សហគមន៍។ គណបក្ស​ប្រជាជន ក៏​ចូលរួម ហើយ​គណបក្ស​ផ្សេងៗ​ទៀត​ក៏​ចូលរួម»

ចំណែក​ឯ​សាសនិក​ខ្មែរ​ឥស្លាម​ម្នាក់​ទៀត​ដែល​គាំទ្រ​គណបក្ស​ប្រជាជន​កម្ពុជា ក៏​បាន​លើក​ឡើង​ថា ពួក​គេ​នៅ​តែ​រក្សា​ជំហរ​ប្រឆាំង​ដាច់ខាត​ចំពោះ​គម្រោង​ធ្វើ​ផ្លូវ​កាត់​ដី​វិហារ​បឹងកក់​នោះ ហើយ​ពួក​គេ​ទាមទារ​ឲ្យ​សាលា​ក្រុង​ធ្វើ​ផ្លូវ​វាង​តាម​របង​វិហារ​វិញ ដែល​មិន​សូវ​ជិត​វិហារ ហើយ​មិន​រំខាន​ដល់​ការ​ប្រតិបត្តិ​របស់​សាសនា​ឥស្លាម។ លោក​បញ្ជាក់​ថា សំណុំ​រឿង​ធ្វើ​ផ្លូវ​នេះ មិន​ជាប់​ពាក់ព័ន្ធ​នឹង​រឿង​នយោបាយ ឬ​មាន​បក្ស​ប្រឆាំង​នៅ​ពី​ក្រោយ​ឡើយ៖ «ជា​ការ​ចោទ​ប្រកាន់​មួយ​ខុស​ឆ្គង ហើយ​ជា​ការ​លាប​ពណ៌ ព្រោះ​ថា​ការ​វាយ​នោះ គឺ​ការ​វាយ​របង​នោះ គឺ​ចេញ​ពី​កំហឹង​របស់​បង​ប្អូន​ឥស្លាម ដែល​អត់​មាន​នរណា​ទៅ​ឃាត់​គាត់​បាន បន្ទាប់​ពី​ចេញ​ពី​ថ្វាយ​បង្គំ»

ការ​ឆ្លើយតប​នេះ បន្ទាប់​ពី​មាន​គណនី​ហ្វេសប៊ុក​មួយ​ឈ្មោះ ផែង វណ្ណៈ ដែល​ធ្លាប់​គំរាម​បាញ់​សម្លាប់​លោក កឹម សុខា ប្រធាន​ស្តីទី​គណបក្ស​សង្គ្រោះ​ជាតិ កន្លង​មក បាន​សរសេរ​ថា សកម្មជន​គណបក្ស​សង្គ្រោះ​ជាតិ ជា​ជនជាតិ​ចាម បាន​ដឹកនាំ​ធ្វើ​បាតុកម្ម​ហិង្សា​វាយ​បំផ្លិចបំផ្លាញ​ទ្រព្យ​សម្បត្តិ​រដ្ឋ និង​ឯកជន​នៅ​បឹងកក់​កាល​ពី​ថ្ងៃ​ទី​២៣ ធ្នូ។ សំណេរ​នោះ​បន្ត​ថា ជាទូទៅ គណបក្ស​សង្គ្រោះ​ជាតិ តែងតែ​ញុះញង់​ដឹកនាំ​ធ្វើ​បាតុកម្ម​ប្រឆាំង​ការ​អភិវឌ្ឍ​គ្រប់​ពេល​គ្រប់​ទីកន្លែង។ ប៉ុន្តែ​សារ​ដែល​ផ្សព្វផ្សាយ​នេះ ត្រូវ​បាន​ហ្វេសប៊ុក​ឈ្មោះ ផែង វណ្ណៈ លុប​ចោល​វិញ។

អភិបាល​រង និង​ជា​អ្នក​នាំ​ពាក្យ​សាលា​រាជធានី​ភ្នំពេញ លោក មាន ចាន់យ៉ាដា ពុំ​បាន​បញ្ជាក់​អំពី​វិធានការ​ច្បាប់​យ៉ាង​ណា​នោះ​ទេ ចំពោះ​អ្នក​ដែល​វាយ​កម្ទេច​របង​នោះ ប៉ុន្តែ​លោក​បញ្ជាក់​ថា សាលា​ក្រុង​សម្រេច​ផ្អាក​ការ​សាងសង់​ផ្លូវ​កាត់​វិហារ​ឥស្លាម​ជា​បណ្ដោះអាសន្ន​សិន ដើម្បី​ទុក​ពេលវេលា​ឲ្យ​ក្រុម​សាសនិក​ឥស្លាម​ទាំង​ពីរ​ក្រុម ព្រមព្រៀង​គ្នា​សិន មុន​ពេល​ជជែក​ជាមួយ​នឹង​សាលា​រាជធានី​ភ្នំពេញ​ជា​ថ្មី​ម្តង​ទៀត។

រីឯ​រដ្ឋលេខាធិការ​ក្រសួង​ការងារ និង​បណ្ដុះបណ្ដាល​វិជ្ជាជីវៈ លោក អូស្មាន ហាស្សាន់ ដែល​គាំទ្រ​គម្រោង​របស់​សាលា​ក្រុង សម្ដែង​ការ​សោកស្ដាយ​ដែល​សាសនិក​ខ្មែរ​ឥស្លាម​មួយ​ចំនួន មិន​បាន​ដឹង​ច្បាស់​អំពី​គម្រោង​សាងសង់​ផ្លូវ​របស់​សាលា​ក្រុង ហើយ​នាំ​គ្នា​បញ្ចេញ​ហិង្សា​វាយ​កម្ទេច​របង​ដែក​ដូច្នេះ។

លោក អូស្មាន ហាស្សាន់ បញ្ជាក់​ថា លោក​នៅ​តែ​គាំទ្រ​គម្រោង​របស់​សាលា​ក្រុង​ដដែល ព្រោះ​លោក​មើល​ឃើញ​ថា គម្រោង​ធ្វើ​ផ្លូវ​របស់​សាលា​ក្រុង ផ្តល់​ផលប្រយោជន៍​រួម ដូចជា​បញ្ចៀស​ការ​កកស្ទះ​ចរាចរណ៍ និង​ដាក់​លូ​រំដោះ​ទឹក​ស្អុយ ជាដើម ជាពិសេស​លោក​យល់​ថា វា​ក៏​នាំ​ឲ្យ​មនុស្សម្នា​កាន់​តែ​ងាយ​បាន​ឃើញ និង​បាន​ស្គាល់​វិហារ​សាសនា​ឥស្លាម​ដ៏​ធំ​មួយ​នេះ​ផង​ដែរ«ឥឡូវ​នេះ​វា​មាន​ចម្ងាយ​ពី​វិហារ ៦០​ម៉ែត្រ។ ដូច្នេះ​វា​រំខាន​ដល់​ការ​គោរព​សក្ការៈ ឬ​ក៏​យ៉ាង​ម៉េច? តែ​បង​ប្អូន​ខ្លះ​គាត់​លើក​ឡើង​ថា គាត់​ថ្វាយ​បង្គំ​ក្នុង​វិហារ​ពី​ផ្លូវ​តែ ១០​ម៉ែត្រ​ផង វា​មិន​អី​ផង​ហ្នឹង។ អ្នក​ខ្លះ​ថា​វិហារ​គាត់​តែ ២០​ម៉ែត្រ​ទេ។ អ្នក​ខ្លះ​ទៀត​ថា​តែ ៣​ម៉ែត្រ​ខ្លះ​ទេ ដូចជា​នៅ​ព្រែកប្រា»

ដើម្បី​ដោះស្រាយ​បញ្ហា​នេះ លោក អូស្មាន ហាស្សាន់ ឲ្យ​ដឹង​ថា សាលា​ក្រុង​ភ្នំពេញ នឹង​រៀបចំ​ជួប​ប្រជុំ​ជាមួយ​ថ្នាក់​ដឹកនាំ​ឥស្លាម​ទូទាំង​ប្រទេស​នៅ​វិហារ​បឹងកក់ នៅ​ព្រឹក​ថ្ងៃ​ទី​២៦ ខែ​ធ្នូ ដើម្បី​ពន្យល់​អំពី​ផល​ប្រយោជន៍​នៃ​ការ​ធ្វើ​ផ្លូវ​កាត់​ដី​វិហារ​បឹងកក់ ដែល​ខាង​សាលា​ក្រុង​បាន​ធ្វើ​របង​បាំង​កាល​ពី​ថ្ងៃ​ទី​១៩ ខែ​ធ្នូ មក។

ទោះ​បី​ជា​បែប​នេះ​ក្ដី កន្លង​មក សាសនិក​ឥស្លាម​បញ្ជាក់​ថា លោក អូស្មាន ហាស្សាន់ មិន​ដែល​ពន្យល់​ច្បាស់លាស់​អំពី​គម្រោង​ធ្វើ​ផ្លូវ​នេះ​ដល់​សាសនិក​ឥស្លាម ដែល​ទៅ​ថ្វាយ​បង្គំ​រាល់​ថ្ងៃ​នៅ​វិហារ​បឹងកក់​នោះ​ទេ តែ​ពេល​នេះ​បែរ​ជា​កៀរគរ ហាកឹម តួន មក​ពន្យល់​បែប​នេះ​ទៅ​វិញ។ ក្នុង​ចំណោម​ហាកឹម តួន ទាំងនោះ អ្នក​ខ្លះ​ដែល​ដឹង​ពី​គម្រោង​ឲ្យ​មក​គាំទ្រ​ធ្វើ​ផ្លូវ​កាត់​វិហារ​នេះ ពួក​គេ​មិន​បាន​មក​ចូលរួម​នោះ​ទេ។ រីឯ​អ្នក​ខ្លះ​ទៀត ត្រូវ​បាន​គេ​សម្ភាស និង​ចែកចាយ​តាម​ហ្វេសប៊ុក​ថា ពួក​គាត់​ត្រូវ​បាន​គេ​កោះ​ហៅ​មក​ភ្នំពេញ មិន​បាន​ពន្យល់​ប្រាប់​ពី​មូលហេតុ​ច្បាស់លាស់​នោះ​ទេ

ប្រធាន​គ្រប់គ្រង​ស៊ើប​អង្កេត​អង្គការ​សិទ្ធិ​មនុស្ស​លីកាដូ (LICADHO) លោក អំ សំអាត មាន​ប្រសាសន៍​ថា បើ​សិន​ជា​សាលា​រាជធានី​ភ្នំពេញ​មាន​គម្រោង​ធ្វើ​ផ្លូវ​កាត់​វិហារ​ឥស្លាម​បឹងកក់​នេះ ក្នុង​គោល​បំណង​ដើម្បី​ចង់​កាត់​បន្ថយ​ស្ទះ​ចរាចរណ៍​នេះ​មែន គម្រោង​អភិវឌ្ឍន៍​បឹងកក់​នេះ​ចាប់​ផ្ដើម​តាំង​ពី​ឆ្នាំ​២០០៦ មក ហើយ​វិហារ​នេះ​ទើប​សាងសង់​ក្រោយ​ទេ ហេតុ​អ្វី​បាន​ជា​សាលា​ក្រុង​មិន​បង្ខិត​វិហារ​នេះ​មុន​ពេល​សាងសង់? លោក​បញ្ជាក់​ថា គម្រោង​ចង់​ពុះ​ផ្លូវ​កាត់​វិហារ​បឹងកក់​នេះ អាច​មាន​អាថ៌កំបាំង​អ្វី​មួយ​នៅ​ពី​ក្រោយ​ខ្នង។ ក្រៅ​ពី​នេះ​ទៀត លោក​បន្ថែម​ថា ក្រុម​អ្នក​មិន​គាំទ្រ​ចង់​ឲ្យ​ធ្វើ​កាត់​របង ហេតុ​អ្វី​សាលា​រាជធានី​ធ្វើ​កាត់​របង​មិន​បាន? លោ អំ សំអាត បញ្ជាក់​ថា សកម្មភាព​ធ្វើ​របាំង​កាល​ពី​ថ្ងៃ​ទី​១៩ ធ្នូ របស់​សាលា​ក្រុង គឺ​ជា​ការ​រំលោភ​សិទ្ធិ​របស់​សាសនិក​ឥស្លាម និង​ខុស​ពី​ច្បាប់​ភូមិបាល និង​ច្បាប់​អាស្សាមិករណ៍។

គម្រោង​បើក​ផ្លូវ​កាត់​ដី​វិហារ​បឹងកក់​ថ្មី​នេះ គឺ​មាន​ទទឹង ២០​ម៉ែត្រ ទ្រូង​ផ្លូវ ១៦​ម៉ែត្រ ចិញ្ចើម​ផ្លូវ​ម្ខាងៗ ២​ម៉ែត្រ និង​បណ្តោយ​ជាង ២០០​ម៉ែត្រ​ហើយ។ គម្រោង​សាងសង់​ផ្លូវ​ឆ្លង​កាត់​របង​វិហារ​ឥស្លាម គឺ​ដើម្បី​ត​ភ្ជាប់​ទៅ​នឹង​ដី​របស់​ក្រុមហ៊ុន​ស៊ូកាគូ (Shukaku)

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។