តំណាង​សហភាព​អឺរ៉ុប៖ របប​លោក ហ៊ុន សែន ខ្លួនឯង​ជា​អ្នក​​ធ្វើ​ឱ្យ​ស្ថានការណ៍​ធ្លាក់​ចុះ​​ដូច​សព្វថ្ងៃ

ដោយ មួង ណារ៉េត
2019-08-03
អ៊ីម៉ែល
មតិ
Share
បោះពុម្ព
តំណាងជាន់ខ្ពស់ទទួលបន្ទុកកិច្ចការបរទេស និង គោលនយោបាយសន្តិសុខ និង ជាអនុប្រធានស្នងការអឺរ៉ុប អ្នកស្រី ហ្វេដេរីកា ម៉ូហ្គែរីនី (Federica Mogherini) ក្នុងជំនួបដាច់ដោយឡែកជាមួយលោក ហ៊ុន សែន កាលពីថ្ងៃទី ១៨ ខែ តុលា ឆ្នាំ ២០១៨ នាឱកាសជំនួបកំពូលអាស៊ី-អឺរ៉ុប (ASEM)។
តំណាងជាន់ខ្ពស់ទទួលបន្ទុកកិច្ចការបរទេស និង គោលនយោបាយសន្តិសុខ និង ជាអនុប្រធានស្នងការអឺរ៉ុប អ្នកស្រី ហ្វេដេរីកា ម៉ូហ្គែរីនី (Federica Mogherini) ក្នុងជំនួបដាច់ដោយឡែកជាមួយលោក ហ៊ុន សែន កាលពីថ្ងៃទី ១៨ ខែ តុលា ឆ្នាំ ២០១៨ នាឱកាសជំនួបកំពូលអាស៊ី-អឺរ៉ុប (ASEM)។
រូបភាពពីគេហទំព័រស្នងការអឺរ៉ុប

តំណាង​ជាន់ខ្ពស់​ទទួលបន្ទុក​កិច្ចការ​បរទេស និង​គោលនយោបាយ​សន្តិសុខ និង​ជា​អនុប្រធាន​ស្នងការ​អឺរ៉ុប អ្នកស្រី ហ្វេដេរីកា ម៉ូហ្គែរីនី (Federica Mogherini) ត្រូវ​បាន​សារព័ត៌មាន​ជប៉ុន Nikkei Asian Review ដកស្រង់​ប្រសាសន៍​កាល​ពី​ពេល​ថ្មីៗ​នេះ ថា លក្ខខណ្ឌ​នៃ​ការ​បន្ត​ទទួល​បាន​ការ​អនុគ្រោះ​ពន្ធ EBA គឺ​ទាល់តែ​កម្ពុជា​គោរព​លទ្ធិប្រជាធិបតេយ្យ និង​សិទ្ធិមនុស្ស រួម​ទាំង​សិទ្ធិ​ការងារ​ផង។

អ្នកស្រី​បន្ថែម​ថា លក្ខខណ្ឌ​នេះ មិន​ផ្លាស់ប្ដូរ​នោះ​ឡើយ។ អ្នកស្រី​ដាក់​ការ​ទទួលខុសត្រូវ​ទៅលើ​របប​លោក ហ៊ុន សែន ដែល​បាន​ធ្វើ​ឱ្យ​សហភាព​អឺរ៉ុប ត្រូវ​អនុវត្ត​នីតិវិធី​ព្យួរ​ការ​អនុគ្រោះ​ពន្ធ EBA ពី​កម្ពុជា។ របប​លោក ហ៊ុន សែន នាំ​សហភាព​អឺរ៉ុប ទៅ​រក​ស្ថានភាព​បច្ចុប្បន្ន​នេះ​។ ទោះជា​យ៉ាង​នេះ​ក្តី អ្នកស្រី​ថា របប​លោក ហ៊ុន សែន នៅ​មាន​ឱកាស​កែខ្លួន​បាន បើ​ចង់​បញ្ចៀស​ការ​ព្យួរ​អនុគ្រោះ​ពន្ធ​នេះ។

ឱកាស​សម្រាប់​របប​លោក ហ៊ុន សែន កែខ្លួន​នោះ អ្នកស្រី​សំដៅ​លើ​ការ​ស្ដារ​សិទ្ធិមនុស្ស និង ប្រជាធិបតេយ្យ​ឡើងវិញ ដើម្បី​បើក​លំហ​នយោបាយ និង​អនុញ្ញាត​ឱ្យ​មាន​គណបក្ស​ប្រឆាំង​បើក​ដំណើរការ​ឡើងវិញ ស្របតាម​គោល​ការ​ប្រជាធិបតេយ្យ។

ការ​បញ្ជាក់​ជំហរ​ដដែល សាជាថ្មី​របស់​មន្ត្រី​សហភាព​អឺរ៉ុប​នេះ ធ្វើឡើង​នៅ​ក្នុង​ព្រឹត្តិការណ៍​ជំនួប​រវាង​តំណាង​ប្រទេស​អាស៊ី​អាគ្នេយ៍ និង​មន្ត្រី​ជាន់ខ្ពស់​ផ្នែក​ការទូត​សហភាព​អឺរ៉ុប អាមេរិក និង​ប្រទេស​ដទៃ នៅ​ទីក្រុង​បាងកក ប្រទេស​ថៃ ក្នុង​សប្ដាហ៍​នេះ។

គិត​មក​ត្រឹម​ពេល​នេះ គឺ​នៅ​សល់​តែ ៨ ថ្ងៃ​ទៀត​តែប៉ុណ្ណោះ ដែល​សហភាព​អឺរ៉ុប​នឹង​បិទ​បញ្ចប់​នីតិវិធី ៦​ខែ​ដំបូង ក្នុង​ការ​ត្រួតពិនិត្យ និង​វាយតម្លៃ​ស្ថានភាព​រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​នៅ​កម្ពុជា មុននឹង​ឈាន​ទៅ​ព្យួរ​ការ​អនុគ្រោះ​ពន្ធ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល