លោក សួង នាគព័ន្ធ សកម្មជនគណបក្សប្រឆាំង និងជាអ្នកបណ្ឌិត កែម ឡី និយម បានទៅដល់ប្រទេសស្វីស (Switzerland ) ហើយកាលពីថ្ងៃទី៦ ខែកុម្ភៈ ក្រោយពីលោកបានភៀសខ្លួនទៅកាន់ប្រទេសថៃ កាលពីជាងពីរខែមក។ នេះបើតាមការអះអាងរបស់ប្រធានប្រតិបត្តិគណបក្សសង្គ្រោះជាតិរាជធានីភ្នំពេញ លោក ម៉ន ផល្លា ដែលកំពុងភៀសខ្លួននៅប្រទេសថៃ។
តុលាការកំពូល កាលពីថ្ងៃទី១៥ ខែវិច្ឆិកា បានសម្រេចដោះលែង លោក សួង នាគព័ន្ធ បណ្ដោះអាសន្នអោយនៅក្រៅឃុំក្រោយពីបានជាប់ពន្ធនាគារជាង ៤ខែ។
សមត្ថកិច្ចរបបក្រុងភ្នំពេញចាប់ខ្លួនលោក សួង នាគព័ន្ធ កាលពីថ្ងៃទី១០ ខែកក្កដា ខណៈលោកកំពុងចូលរួមដាក់កម្រងផ្កាគោរពវិញ្ញាណក្ខន្ធបណ្ឌិត កែម ឡី នៅបរិវេណស្ថានីយប្រេងឥន្ធនៈ កាល់តិច នៅស្តុប បូកគោ ដែលជាទីតាំងឃាតកម្មបណ្ឌិត កែម ឡី កើតឡើង និងបានចែកខិត្តប័ណ្ណសារអំពាវនាវកុំឱ្យមានការសម្លាប់មនុស្សក្រៅប្រព័ន្ធច្បាប់។ តុលាការបានចោទប្រកាន់លោក សួង នាគព័ន្ធ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។