ក្រសួង​រតនាគារ​អាមេរិក​សម្រេច​ដាក់​ទណ្ឌកម្ម​បង្កក​ទ្រព្យសម្បត្តិ​លោក ទ្រី ភាព និង​លោក គន់ គីម

ដោយ មាន ឫទ្ធិ
2019.12.10
ទ្រី ភាព  គន់ គីម ៦២២ លោក ទ្រី ភាព (ស្ដាំ) និង​លោក គន់ គីម (ឆ្វេង)។
RFA

ក្រសួង​រតនាគារ​អាមេរិក សម្រេច​ដាក់ទណ្ឌកម្ម​បង្កក ឬ​រាំង​ខ្ទប់​ទ្រព្យសម្បត្តិ របស់​មន្ត្រី​គ្រាក់ៗ​ពីរ​ (២) ​រូប ដែល​សុទ្ធសឹងតែ​ជា​មនុស្ស​ជំនិត​របស់​លោកនាយក​រដ្ឋមន្រី្ត ហ៊ុន សែន ដោយសារតែ​ពួកគេ​មាន​ជាប់​ពាក់ព័ន្ធ​នឹង​ការប្រព្រឹត្តិ​អំពើពុករលួយ និង​ការរំលោភ​សិទ្ធិមនុស្ស​ធ្ងន់ធ្ងរ​នៅ​កម្ពុជា​។ មន្ត្រី​គ្រាក់ៗ ​ទាំងពីរ​រូប​នេះ រួមមាន​ឧកញ៉ា ទ្រី ភាព ព្រមទាំង​ក្រុមហ៊ុន​ដែល​លោក​គ្រប់គ្រង​សរុប ១១ក្រុមហ៊ុន និង​លោក គន់ គីម ព្រមទាំង​សមាជិក​ក្រុម​គ្រួសារ​បី (៣) រូប​ទៀត​របស់​លោក រួមមាន​អ្នកស្រី គីង ចាន់ឌី លោក គីម ផារា និង​អ្នកស្រី គីម សុផារី។ ការ​សម្រេច​ដាក់ទណ្ឌកម្ម​បង្កក​​ទ្រព្យសម្បត្តិ​នេះ ធ្វើឡើង​ចំ​ថ្ងៃ​ប្រារព្ធ​ទិវា​ប្រយុទ្ធ​ប្រឆាំង​នឹង​អំពើពុករលួយ​អន្តរជាតិ កាលពី​ថ្ងៃ​ទី៩ ធ្នូ និង​ផ្អែក​តាមច្បាប់​ដាក់​ទណ្ឌកម្ម​ដ៏​មាន​ឥទ្ធិពល​របស់​អាមេរិក ហៅថា​ច្បាប់ Global Magnitsky Act។

ផ្អែក​តាម​ក្រសួង​រតនា​គារ​ជាតិ​អាមេរិក លោក ទ្រី ភាព និង​លោក គន់ គីម គឺជា​បុគ្គល​ទទួលខុសត្រូវ និង​ប្រព្រឹត្តិ​ដោយ​ផ្ទាល់ ឬ​ដោយ​ប្រយោល​ក្នុង​អំពើពុករលួយ រួមមាន​អំពើ​កិបកេង​ទ្រព្យ​សម្បត្តិ​​រដ្ឋ ការ​រឹបអូស​យក​ទ្រព្យសម្បត្តិ​ឯកជន​មក​ធ្វើជា​ទ្រព្យសម្បត្តិ​ផ្ទាល់ខ្លួន ការប្រព្រឹត្តិ​អំពើពុករលួយ​ទាក់ទង​នឹង​ការអនុវត្ត​កិច្ចសន្យា​ជាមួយ​រដ្ឋាភិបាល អំពើ​កេង​ប្រ​វញ្ច​លើ​ធនធានធម្មជាតិ ឬ​អំពើ​សូកប៉ាន់​ជាដើម។

ក្រសួង​រតនាគារជាតិ​អាមេរិក សរសេរ​ថា លោក ទ្រី ភាព បាន​ប្រើប្រាស់​ខ្សែ​បណ្តាញ​ដ៏​សម្បើម របស់​លោក​នៅ​កម្ពុជា ដើម្បី​បង្កើត​អាជីវកម្ម​កាប់​ឈើ​ទ្រង់ទ្រាយ​ធំ ដោយ​បាន​ពឹងផ្អែក​ទៅលើ​អំពើ​ស៊ុមគ្រលុំ​ជាមួយ​មន្ត្រី​រដ្ឋាភិបាល និង​ទទួល​បាន​កិច្ច​គាំពារ​ពី​រដ្ឋាភិបាល និង​មន្ត្រី​យោធា ដើម្បី​ដឹកជញ្ជូន​ទំនិញ​ខុសច្បាប់​របស់​លោក​។ លោក ទ្រី ភាព ក៏បាន​ប្រើប្រាស់​បណ្ដាញ​យោធា ដើម្បី​ឲ្យ​លោក​អាច​ធ្វើ​សកម្មភាព​ដឹកជញ្ជូន​ឈើ ហ៊ុប យក​ទៅ​លក់​ឲ្យ​ប្រទេស​វៀតណាម ចិន អឺរ៉ុប និង​រុស្ស៊ី ជាដើម។

ដោយឡែក​ចំពោះ​លោក គន់ គីម វិញ ក្រសួង​រតនាគារ​អាមេរិក លាតត្រដាង​ថា លោក​គឺជា​ឧត្តមសេនីយ៍​ជាន់ខ្ពស់​នៃ​កង​យោធពល​ខេមរភូមិន្ទ ហើយ​គឺ​បុគ្គល​ចម្បង​ដែល​ជំរុញ​ឲ្យ​ការ​អភិវឌ្ឍ​នៅ​ខេត្ត​កោះកុង ហើយ​បាន​ទទួល​ផលប្រយោជន៍​ហិរញ្ញវត្ថុ​យ៉ាង​សម្បើម​ពី​ទំនាក់ទំនង​ជាមួយ​ក្រុមហ៊ុន​គ្រប់គ្រង​ដោយ​រដ្ឋអំណាច​នៃ​ប្រទេស​ចិន​។ លោក គន់ គីម បាន​ប្រើប្រាស់​ទាហាន​កង​យោធពល​ខេមរភូមិន្ទ ដើម្បី​បំភិតបំភ័យ រឹបអូស ឬ​ឆ្ការ​ដី ដែល​ក្រុមហ៊ុន​ចិន​ចង់​បាន។ សេចក្ដី​ប្រកាស​ព័ត៌មាន​បន្ត​ថា លោក គន់ គីម ត្រូវ​បាន​ផ្លាស់ប្ដូរ​តួនាទី​ពី​នាយ​សេនាធិកា​ចម្រុះ​នៃ​កង​យោធពល​ខេមរភូមិន្ទ ដោយសារតែ​លោក​មិន​បាន​ចែក​រំលែក​ផល​ចំណេញ​ពី​អាជីវកម្ម​ខុសច្បាប់​របស់​លោក ទៅ​ឲ្យ​មន្ត្រី​ជាន់ខ្ពស់​នៃ​រដ្ឋាភិបាល​របស់​លោក ហ៊ុន សែន។

កាល​ពី​ចុង​ខែ​មិថុនា ឆ្នាំ​២០១៨ លោក ហ៊ីង ប៊ុនហៀង មេ​អង្គរក្ស​លោក ហ៊ុន សែន គឺជា​មនុស្ស​ខ្មែរ​ដំបូង​ដែល​រង​ការ​ដាក់​ទណ្ឌកម្ម​បង្កក​ទ្រព្យសម្បត្តិ​ពី​ក្រសួង​រតនាគារជាតិ​អាមេរិក ដោយសារ​ប្រវត្តិ​រំលោភ​សិទ្ធិ​មនុស្ស​របស់​លោក។

គិត​មក​ត្រឹម​ម៉ោង​ផ្សាយ​នេះ អាស៊ីសេរី​នៅ​មិនទាន់​អាច​សុំ​ប្រតិកម្ម​តប​ទៅ​សេចក្ដី​ព័ត៌មាន​នេះ ពី​លោក គន់ គីម និង​លោក ទ្រី ភាព បាន​នៅ​ឡើយ​ទេ​។

កន្លងមក សមាជិកសភា​អាមេរិក ក៏​ធ្លាប់​បាន ស្នើ​ឈ្មោះ​មន្ត្រី​ជាន់ខ្ពស់​ក្នុង​ជួរ​របប​លោក ហ៊ុន សែន មួយ​ចំនួនទៀត សរុប ១៧​នាក់ ដើម្បី​ដាក់ទណ្ឌកម្ម​ផង​ដែរ​។ មន្ត្រី​ទាំងនោះ រួមមាន​ប្រធាន​គណបក្ស​ប្រជាជន​កម្ពុជា និង​ជា​នាយករដ្ឋមន្ត្រី គឺ​លោក ហ៊ុន សែន អនុប្រធាន​បក្ស​កាន់អំណាច និង​ជា​រដ្ឋមន្ត្រី​ក្រសួងមហាផ្ទៃ​លោក ស ខេង រដ្ឋមន្ត្រី​ក្រសួង​ការពារជាតិ លោក ទៀ បាញ់ និង​រដ្ឋមន្ត្រី ជាច្រើន​រូប​ផ្សេងទៀត រួម​ទាំង កូនប្រុស​ច្បង​លោក ហ៊ុន សែន គឺ​លោក ហ៊ុន ម៉ាណែត និង កូនស្រី​លោក ហ៊ុន សែន គឺ​លោកស្រី ហ៊ុន ម៉ាណា និង​កូន​ប្រសារ​លោក ហ៊ុន សែន លោក សុខ ពុទ្ធិវុធ ម្នាក់​ផង។ ក៏ប៉ុន្តែ ច្បាប់​ដាក់​ទណ្ឌកម្ម​លើ​មន្ត្រី​ទាំងនេះ បច្ចុប្បន្ន កំពុង​ស្ថិត​ក្នុង​ដៃ​ព្រឹទ្ធសភា​អាមេរិក ហើយ​ពុំ​ទាន់​ចូល​ជា​ធរមាន​នៅឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។