កូន​ប្រុស​សកម្ម​ជន​បក្ស​ភ្លើង​ទៀន​ខេត្ត​ត្បូង​ឃ្មុំ​ត្រូវជន​មិន​ស្គាល់​មុខ​យក​កាំបិត​គប់​បណ្ដាល​ឱ្យ​រង​របួស​

ដោយ នៅ វណ្ណារិន
2023.01.09
កូន​ប្រុស​សកម្ម​ជន​បក្ស​ភ្លើង​ទៀន​ខេត្ត​ត្បូង​ឃ្មុំ​ត្រូវជន​មិន​ស្គាល់​មុខ​យក​កាំបិត​គប់​បណ្ដាល​ឱ្យ​រង​របួស​ កូនប្រុសរបស់លោក ម៉ក់ សំអាន ជំទប់ទី២ ឃុំជាំក្រវៀន ស្រុកមេមត់ ខេត្តត្បូងឃ្មុំ មកពី​គណបក្ស​ភ្លើងទៀន ត្រូវ​ជន​ដៃដល់​យក​កាំបិត​គប់ចំដៃ​បណ្ដាល​ឱ្យ​រងរបួសធ្ងន់ កាលពីថ្ងៃព្រឹកថ្ងៃទី៩ ខែមករា ឆ្នាំ២០២៣។
រូប៖ លោក ម៉ក់ សំអាន

កូន​ប្រុស​របស់​សកម្មជន​គណ​បក្ស​ភ្លើង​ទៀន​ម្នាក់​នៅ​ខេត្ត​ត្បូង​ឃ្មុំ​ត្រូវ​បាន​ជន​មិន​ស្គាល់​មុខ​ យកកាំបិតគប់​ចំ​ដៃ​ខាង​ឆ្វេង​បណ្ដាល​ឱ្យរង​របួស​ធ្ងន់ សាច់ញាតិ​ជន​រង​គ្រោះ​ចាត់​ទុក​ទង្វើ​នេះថា ​ជា​ការ​គំរាម​កំហែង​ផ្នែក​នយោបាយ ​និង​អំពាវនាវ​ដល់​អាជ្ញាធរ​ស្វែង​រកជន​ដៃ​ដល់​យក​មក​ផ្ដន្ទាទោស​ទោស​តាម​ផ្លូវ​ច្បាប់

ជំទប់​ទី២ ​ឃុំជាំក្រវៀន ស្រុក​មេមត់​ ខេត្ត​ត្បូងឃ្មុំ ​មក​ពី​គណ​បក្ស​ភ្លើងទៀន​ លោក ម៉ក់ សំអាន អះ​អាង​ថា ​កូនប្រុស​របស់​លោក​ពុំ​ដែល​មាន​ប្រវត្តិ​បង្កជម្លោះ​ជាមួយ​អ្នក​ណា​ឡើយ​ ហើយ​ការណ៍​ដែល​ជន​មិន​ស្គាល់​មុខ​លប​វាយ​ធ្វើ​បាប​កូន​ប្រុស​របស់​លោក​បែប​នេះ​អាច​ជា​ការ​គំរាម​កំហែង​ដល់​គ្រួសារ​លោក។

លោក ម៉ក់ សំអាន ប្រាប់វិទ្យុអាស៊ីសេរី ​លោក​បាន​ដាក់​ពាក្យ​ប្តឹង​ទៅ​កាន់​អធិការ​ដ្ឋាន​ស្រុក​មេមត់​រួចរាល់​ហើយ​នៅរសៀល​ ថ្ងៃទី៩ ខែមករា ដើម្បី​ឱ្យ​តាម​ឱ្យ​ស្វែង​រក​ជន​ល្មើស​ដែល​ប្រើ​កាំបិត​គប់​កូន​ប្រុស​របស់​លោក​លោក​បញ្ជាក់​ថា​ មក​ទល់ពេលនេះ កូន​ប្រុស​របស់​លោក​មិន​ទាន់​ធូរ​ស្រាល​នៅ​ឡើយ​ និង​មាន​ទឹក​មុខ​ស្លេក​ស្លាំង​ អស់​កម្លាំង​ដោយ​សារ​តែ​ហូរ​ឈាម​ច្រើន៖ 

«ខ្ញុំ​មិន​ទាន់​សន្និដ្ឋាន​ថា​យ៉ាង​ណា ​យ៉ាង​ណី​ទេ!​ ខ្ញុំ​ទុក​ ផ្តល់​ឱកាស​ឱ្យ​សមត្ថកិច្ច​ គាត់​ធ្វើការ​តាម​ជំនាញ​របស់​គាត់​សិន។​ បាទ! ​កាំបិត​ហ្នឹង​ ​គប់​ទៅ​ជាប់​ហ្នឹង​ដៃ​ ទៅ​ដល់​មន្ទីរ​ពេទ្យ​ស្រុក​មេមត់​ បាន​​គេ​ដក​ចេញ។​ ពេល​ដក​ហើយ​ គេ​រុំ​ដៃ​ រុំ​អី​ហើយបញ្ជូន​ទៅ​ខេត្ត​ ​ទៅ​មន្ទីរ​ពេទ្យ​បង្អែក​ខេត្ត​ត្បូង​ឃ្មុំ។​ ខ្ញុំ​ព្រួយ​បារម្ភ ​ព្រួយ​គិត ខ្ញុំ​អាច​ថា​ ជា​ផ្នែក​មួយ​ ​នៃ​ការ​បំភិត​បំភ័យ​ឬ​ការ​គំរាម​កំហែង​ទៅ​ដល់​​រូប​ខ្ញុំ​ ​ក៏​ដូច​ជា​ក្រុម​គ្រួសារ​ខ្ញុំ​ផង​ដែរ​បាទ!»​។

លោក ម៉ក់ សំអាន រាប់​រៀប​ថា​កាល​ពី​យប់​ថ្ងៃទី៨​ ខែមករា កូន​ប្រុស​របស់​លោក​ឈ្មោះ​ អាន មេត្តា ​បាន​ជួបជុំ​មិត្ត​ពួក​គេ​នៅ​ហាង​កាត់សក់។​ មួយ​សន្ទុះ​ក្រោយ​មក​ ក៏​មាន​មនុស្ស​ក្រុម​ទៀត​មាន​គ្នា​ប្រមាណ​ ១០នាក់​ចង់​មក​បង្ក​បញ្ហា​នៅ​ហាងកាត់សក់​កូន​របស់​លោក។ លោក ម៉ក់ សំអាន អះអាង​ថា​ កូន​របស់​លោក​ហាក់​ដឹង​ថា ​មាន​ស្ថាន​ការណ៍​មិន​ស្រួល​ក៏​បបួល​មិត្ត​ភក្តិ​ត្រឡប់​ទៅ​ផ្ទះ​វិញ។ លោក ម៉ក់ សំអាន ​បញ្ជាក់​ថា កូន​របស់​លោក​ចេញ​ពី​ហាង​កាត់សក់​មិន​ទាន់​ឆ្ងាយ​ប៉ុន្មាន​ផង​ ក៏​លេច​មុខ​ក្រុម​ជន​ល្មើស​ប្រើ​កាំបិត​គប់​កូន​របស់​លោក​ជាប់​ដៃ​ខាង​ឆ្វេង​ និង​បណ្ដាល​ហូរ​ឈាម​ស្រោច​ពេញ​ខ្លួន។ ចំណែកក្រុម​ជន​បង្ក​ក៏​បាន​ជិះ​ម៉ូតូ​រត់​គេចខ្លួន

ទាក់ទង​នឹង​រឿង​នេះ​ អធិការ​នគរបាល​ស្រុក​មេមត់​លោក ហុង គឹមហឿន ​ប្រាប់​វិទ្យុ​អាស៊ី​សេរី​យ៉ាង​ខ្លី​ថា​ សមត្ថកិច្ច​កំពុង​ស៊ើប​អង្កេត​រក​ជន​ល្មើស​តាម​ពាក្យ​បណ្ដឹង​របស់​ជន​រង​គ្រោះ​ហើយ៖

«ហ្អូ! ​យើង​បាន​ចំណាត់​ការណ៍​ហើយ​ បង!​ ​យើង​បាន​ចំណាត់​ការណ៍​ហើយ​! បើក​ការ​ស៊ើប​អង្កេត​ហើយ​ ​ព្រោះ​ការ​ដាក់​បណ្តឹង​របស់​បង​ប្អូន​ហ្នឹង​គាត់​អត់​ស្គាល់​ច្បាស់​អ៊ី​ចឹង​ ក៏​ប៉ុន្តែ​ឥឡូវ​ហ្នឹង​ ​យើង​បាន​បើក​ការ​ស៊ើប​អង្កេត​ហើយ»

លោក ម៉ក់ សំអាន បញ្ជាក់ថា ក្រោយ​កូន​ប្រុស​របស់​លោក​ជួប​គ្រោះ​ថ្នាក់​បែប​នេះ​លោក​ និង​ក្រុម​គ្រួសារ​នឹង​បង្កើន​ការ​ប្រុង​ប្រយ័ត្ន​បន្ថែម​ទៀត​ ប៉ុន្តែ លោក​នឹង​មិន​បោះ​បង់​ការ​ចូល​រួម​ក្នុង​ជីវភាព​នយោបាយ​ជាមួយ​គណបក្ស​ប្រឆាំង​នោះ​ទេ

លោក ម៉ក់ សំអាន​ ​ក៏​ធ្លាប់​ត្រូវ​បាន​តុលាការ​ខេត្ត​ត្បូង​ឃ្មុំ​កាត់​ទោស​ឱ្យ​ជាប់​គុក ​១ឆ្នាំ​ដែរ​ ដោយ​សារ​លោក​ទៅ​ឃ្លាំ​មើល​សវនាការ​ជំនុំជម្រះ​ក្ដី​ទ្រង់ទ្រាយ​ធំ​លើ​មន្ត្រី​បក្ស​ប្រឆាំង​នៅ​តុលាការ​រាជធានី​ភ្នំពេញ​កាល​ពី​ខែ​មករា​ ឆ្នាំ​២០២១ លោក​ត្រូវបាន​ដោះ​លែង​កាល​ពី​ខែ​មករា​ ឆ្នាំ២០២២ បន្ទាប់​ពី​លោក​បាន​អនុវត្ត​ទោស​គ្រប់​ចំនួន​កំណត់​រយៈពេល​​១ឆ្នាំ។

ជុំវិញ​រឿង​នេះ​ដែរ មន្រ្តី​ឃ្លាំមើល​ការ​រំលោភ​សិទ្ធិ​មនុស្ស ​និង​ដីធ្លី​នៃ​សមាគម​ការពារ​សិទ្ធិ​មនុស្ស​អាដហុក​ (Adhoc)​ ប្រចាំខេត្តត្បូងឃ្មុំ លោក ឡេង សេងហាន សង្កេត​ឃើញ​ថា​ ​ជនរង​គ្រោះ​ដែល​ជា​សាច់ញាតិ​ និង​ជា​សម្មជន​បក្ស​ប្រឆាំង​ត្រូវ​ជន​ល្មើស​លប​វាយ​ធ្វើ​បាប​នោះ​ កម្រ​ឃើញ​មាន​អាជ្ញាធរ​ចាប់​បាន​ជន​ដៃដល់​យក​មក​អនុវត្ត​ទោស​ណាស់ លោក​ស្នើ​ដល់​អាជ្ញាធរ​ត្រូវ​តែ​ស៊ើប​អង្កេត​ជន​ដៃ​ដល់​បង្ករ​របួស​ស្នាម​កូន​លោក​ ម៉ក់ សំអាន ​ដើម្បី​កុំ​ឱ្យ​មាន​អំពើ​និទណ្ឌភាព​នៅ​កម្ពុជា​តទៅ​ទៀត៖ 

«សាច់​ញាតិ​របស់​គណបក្ស​ផ្សេងៗ​ទៀត​ដែល​មិន​មែន​ជា​គណបក្ស​ប្រឆំាង​ ​ដែល​មាន​ឥទ្ធិ​ពល​ គឺ​មិន​ឃើញ​មាន​អំពើ​ហិង្សា​ណាមួយ​ទៅ​លើ​ពួក​គាត់​ទេ ។​ ប៉ុន្តែ​ចំពោះ​គណបក្ស​ប្រឆាំង​វិញ​ ​ឧទាហរណ៍​ដូច​ជា​គណ​បក្ស​ភ្លើង​ជា​ដើម​អ៊ីចឹង​ គឺ​យើង​មើល​ឃើញ​ ​នៅ​តែ​មាន​បញ្ហា​កើត​ឡើង​ ​ដូច​ជា​ករណី​ហ្នឹង​ជា​ដើម​ បើ​សិន​ជា​ដូច​ហ្នឹង​អ្វី​ដែល​សាម៊ី​ខ្លួន​​ ក៏​ដូចជា​ឪពុក​របស់​ជន​រង​គ្រោះ​នោះ​គាត់​លើក​ឡើង​មែន​ ទោះ​យ៉ាង​ណា​ក៏​ប៉ះពាល់​ទៅ​ដល់​ដំណើរ​នៃ​បោះឆ្នោត​នៅ​ពេល​ខាង​មុខ​ដែរ​ ​ជាពិសេស​ស្ថានភាព​នយោបាយ​ហ្នឹង​វា​មិន​ប្រសើរ​ដូច​មុន​ទេ»

កន្លង​ទៅ​សកម្មជន​បក្ស​ភ្លើងទៀន​តែងតែ​រង​ធ្វើ​ទុក្ខ​បុក​ម្នេញ​គ្រប់​រូបភាព។​ ​ដោយ​អ្នក​ខ្លះ​ត្រូវ​បាន​ជន​មិន​ស្គាល់​មុខ​យក​ដុំ​ថ្ម​គប់​ដំបូលផ្ទះ​ ចំណែក​អ្នកខ្លះ​ត្រូវ​បាន​ជន​មិន​ស្គាល់​មុខ​លប​វាយ​ធ្វើ​បាប​ម្ដង​ហើយ​ម្ដង​ស្ទើរ​បាត់​បង់​ជីវិត​និង​អ្នក​ខ្លះ​ទៀត​បាន​ស្លាប់​ក្នុង​ហេតុការណ៍​គ្រោះថ្នាក់​ចរាចរណ៍​ក្រោយ​ពី​ពួក​គាត់​បាន​បង្កើន​សកម្ម​ភាព​នយោបាយ​ជាមួយ​គណ​បក្ស​ប្រឆាំង៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។