រដ្ឋាភិបាលប្រទេសអូស្ត្រាលី (Australia) ប្រកាសតាមដានដោយយកចិត្តទុកដាក់ ចំពោះករណីឃាតកម្មលើអតីតតំណាងរាស្ត្រគណបក្សសង្គ្រោះជាតិលោក លិម គិមយ៉ា។ តំណាងសហគមន៍ខ្មែរ យល់ថា នេះគឺជាការឆ្លើយតបវិជ្ជមានមួយដែលអាចជាសម្ពាធទៅរដ្ឋាភិបាលថៃ និងកម្ពុជា ឲ្យស៊ើបអង្កេតករណីនេះឲ្យបាន ហ្មត់ចត់ និងឆាប់រហ័ស។
រដ្ឋាភិបាលអូស្ត្រាលី ប្រកាសជំរុញឲ្យមានការស៊ើបអង្កេតឲ្យមានតម្លាភាព ចំពោះករណីបាញ់សម្លាប់អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា នៅចំថ្ងៃដែលក្រុមគ្រួសារជនរងគ្រោះ បានរៀបចំពិធីបញ្ចុះសពលោក លិម គិមយ៉ា ក្នុងទីក្រុងប៉ារីស (Paris) ប្រទេសបារាំង (France)។
ឧបការីរដ្ឋមន្ត្រីក្រសួងការបរទេសអូស្ត្រាលី អ្នកស្រី ខារ៉ូលីន លីង (Caroline Linke) លើកឡើងក្នុងលិខិតចុះថ្ងៃទី៣ ខែកុម្ភៈថា រដ្ឋាភិបាលអូស្ត្រាលី ពិតជាព្រួយបារម្ភ ចំពោះអំពើឃាតកម្មលើលោក លិម គិមយ៉ាង នៅក្នុងទីក្រុងបាងកក (Bangkok ) ប្រទេសថៃ (Thailand)។ រដ្ឋាភិបាលអូស្ត្រាលី គាំទ្រឲ្យមានការស៊ើបអង្កេត ដោយតម្លាភាព និងទាន់ពេលវេលាករណីឃាតកម្មនេះ។ ឧបការីរដ្ឋមន្ត្រីក្រសួងការបរទេសអូស្ត្រាលីរូបនេះ បន្តថា រដ្ឋាភិបាលអូស្ត្រាលី កំពុងបន្តតាមដានការវិវត្តន៍យ៉ាងដិតដល់ រួមទាំងបទចោទប្រកាន់ និងដីកាតាមចាប់ខ្លួនជនសង្ស័យពាក់ព័ន្ធក្នុងអំពើឃាតកម្មលើលោក លិម គិមយ៉ា ដែលចេញដោយអាជ្ញាធរថៃ។
ការចេញលិខិតរបស់ឧបការីរដ្ឋមន្ត្រីក្រសួងការបរទេសអូស្ត្រាលីនេះ គឺជាការឆ្លើយតប ទៅនឹងលិខិតរួមមួយ របស់តំណាងសហគមន៍ខ្មែរ ក្នុងនោះដូចជា ប្រធានសហព័ន្ធខ្មែរអូស្ត្រាលីសាជីវកម្ម លោក ហុង លីម ប្រធានសមាគមខ្មែរលោក ជា យូហ៊ន សមាជិកសភាអូស្ត្រាលីដើមកំណើតខ្មែរ លោក តាក់ ម៉េងហ៊ាង តំណាងគណបក្ស សង្គ្រោះជាតិប្រចាំអូស្ត្រាលី និងអតីតសមាជិកសភារបស់គណបក្សសង្គ្រោះជាតិមួយចំនួន រួមទាំងតំណាងអង្គការមួយចំនួនទៀតផងដែរ។
ក្នុងលិខិតរួមគ្នាដែលបានផ្ញើទៅកាន់ក្រសួងការបទេសអូស្ត្រាលីនោះ តំណាងសហគមន៍ខ្មែរ បានលើកឡើងថា ការបាញ់ប្រហារយ៉ាងសាហាវឃោរឃៅលើលោក លិម គិមយ៉ា នេះ មានសញ្ញាគ្រប់គ្រាន់ថា ជាឃាតកម្មនយោបាយ ហើយជាភស្តុតាងបន្ថែមថា រដ្ឋាភិបាលកម្ពុជាកំពុងព្យាយាមត្រួតត្រា និងបង្កហិង្សាលើអ្នករិះគន់ និងអ្នកប្រឆាំងនៅក្រៅប្រទេស។ ពួកគាត់ទាមទាររដ្ឋាភិបាលអូស្ត្រាលី និងសហគមន៍អន្តរជាតិ ឱ្យរួមគ្នាឆ្លើយតបចំពោះឧក្រិដ្ឋកម្មឆ្លងដែន និងការគំរាមកំហែងចំពោះលទ្ធិប្រជាធិបតេយ្យនិងសិទ្ធិមនុស្ស ដែលប្រព្រឹត្តដោយរដ្ឋាភិបាលកម្ពុជា។ លើសពីនេះ តំណាងសហគមន៍ខ្មែរ ក៏ទាមទារឲ្យក្រសួងការបរទេស និងស្ថានទូតអូស្ត្រាលី ត្រូវចាត់វិធានការឲ្យបានខ្លាំងក្លា ដើម្បីធានាសន្តិសុខសុវត្ថិភាព និងសេរីភាពបញ្ចេញមតិរបស់ពលរដ្ឋកម្ពុជា។
ប្រធានសហព័ន្ធខ្មែរអូស្ត្រាលីសាជីវកម្ម លោក ហុង លីម ថ្លែងថា ការឆ្លើយតបរបស់ក្រសួងការបរទេសអូស្ត្រាលីនេះ គឺជាសញ្ញាវិជ្ជមានមួយក្នុងការផ្តល់ភាពកក់ក្ដៅដល់សហគមន៍ខ្មែរនិងបង្ហាញថា អន្តរជាតិ កំពុងយកចិត្តទុកដាក់តាមដានករណីឃាតកម្មលើលោក លិម គិមយ៉ា។ទន្ទឹមគ្នានេះ លោក ហុង លីម បន្តចោទថា ក្នុងករណី រដ្ឋាភិបាលរបស់លោក ហ៊ុន ម៉ាណែត នៅតែរក្សាភាពស្ងៀមស្ងាត់មិនតាមចាប់ខ្លួនទីប្រឹក្សាលោក ហ៊ុន សែន គឺលោក លី រតនរស្មី និងប្អូនប្រុសរបស់ប្រធានគណបក្សយុវជនកម្ពុជា លោក ពេជ្រ ស្រស់ ឈ្មោះ ពេជ្រ គឹមស្រ៊ិន ដើម្បីបញ្ជូនឲ្យអាជ្ញាធរថៃនោះ គឺបង្ហាញថា ជាការស៊ុមគ្រលុំគ្នា។
លោក ហុង លីម៖«ដូច្នេះយើងសង្ឃឹមថា រឿងនេះ មិនមែនពួកក្រុងភ្នំពេញចង់ទម្លាក់ចោល ឬគ្មានអ្នកណារវល់ទេបាទ។ បានន័យថា អន្តរជាតិ គេយកចិត្តទុកដាក់គិតគូរពីភាពកាចសាហាវឃោរឃៅយង់ឃ្នង ដូចដែលខ្ញុំធ្លាប់បាននិយាយអ៊ីចឹង គឺថា គាត់ចាស់ជរាទៅហើយ។ គាត់អាយុ ៧៤ឆ្នាំទៅហើយ នៅតាមចងកម្មចងពៀរ គាត់បានទៀត ដូច្នេះ រដ្ឋាភិបាលនេះ អ្នកដែលរៀបចំស្លាប់គាត់នេះ គឺបានបង្ហាញនូវភាពឃោឃៅ សាហាវយង់ឃ្នងព្រៃផ្សៃខ្លាំងមែនទែន។ វាហួសហេតុពេក ទាំង ហ៊ុន សែន ខ្លួនឯង អាយុជាង ៧០ឆ្នាំដែរហើយ។ ដូច្នេះ ការដែលកាប់សម្លាប់មនុស្ស ចាស់ជរានេះ បានន័យថា ក្រុមនេះ របបនេះ ជារបបឃោរឃៅព្រៃផ្សៃខ្លាំងសម្បើមណាស់បាទ»។
ទាក់ទងរឿងនេះ វិទ្យុអាស៊ីសេរីបានព្យាយាមទាក់ទងសុំការឆ្លើយតបពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន និងអគ្គស្នងការនគរបាលជាតិលោក ស ថេត ជាច្រើនលើក ប៉ុន្តែពុំមានអ្នកទទួលទូរស័ព្ទនោះទេ។
អត្ថបទដែលទាក់ទង៖
ក្រុមគ្រួសាររៀបចំពិធីបញ្ចុះសពលោក លិម គិមយ៉ា នៅជាយទីក្រុងប៉ារីស
ប្រវត្តិលោក លិម គិមយ៉ា អតីតតំណាងរាស្ត្រ ដែលគេធ្វើឃាតនៅប្រទេសថៃ
លោក សម រង្សី ចោទថា លោក ឃ្លាំង ហួត ជាអ្នកសម្លាប់លោក លិម គិមយ៉ា
ទោះជាយ៉ាងណាក្ដី មិនខុសពីតំណាងសហគមន៍ខ្មែរនៅអូស្ត្រាលីនោះទេ ក្រុម អង្គការសិទ្ធិមនុស្សអន្តរជាតិ មេបក្សប្រឆាំងលោក សម រង្ស៊ី រួមទាំងក្រុមគ្រួសាររបស់លោក លិម គិមយ៉ា នៅតែបន្តចោទចំៗ ថា រដ្ឋាភិបាលត្រកូល ហ៊ុន គឺជាអ្នកនៅពីក្រោយអំពើឃាតកម្មនេះ ទោះបីជាលោកនាយករដ្ឋមន្ត្រី ហ៊ុន ម៉ាណែត ចេញមុខបដិសេធក្ដី។ ក្នុងពិធីបញ្ចុះសពលោក លិម គិមយ៉ា កាលពីថ្ងៃទី៣ ខែកុម្ភៈ លោក សម រង្ស៊ី លើកឡើងថា រូបលោក និងពលរដ្ឋខ្មែរជុំវិញសកលលោក នឹងនៅតែចងចាំនូវរាល់សកម្មភាពរបស់លោក លិម គិមយ៉ា ជានិច្ច ព្រោះលោកបានផ្តល់កម្លាំងចិត្តនិងភាពក្លាហានសម្រាប់ពលរដ្ឋខ្មែរក្នុងការតស៊ូ ដើម្បីយុត្តិធម៌ សេរីភាព និងលទ្ធិប្រជាធិបតេយ្យ។ មេបក្សប្រឆាំងរូបនេះប្ដេជ្ញាថា លោកនឹងបន្តការតស៊ូ ក្នុងសមរភូមិដែលលិម គិមយ៉ា បានចូលរួមរហូតដល់ប្រជាពលរដ្ឋខ្មែរទទួលបាន សេរីភាព និងយុត្តិធម៌ពេញលេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។