"របប​ក្រុង​ភ្នំពេញ​រំលោភ​ច្បាប់​ទាក់ទិន ​នឹង​ការ​មិន​អនុញ្ញាត​ក្រុម​កម្មករ​ធ្វើ​បាតុកម្មករណីលោក កឹម សុខា"

ដោយ ហេង រស្មី
2019-08-01
អ៊ីម៉ែល
មតិ
Share
បោះពុម្ព
លោក សម រង្ស៊ី និង​លោក កឹម សុខា ថតរូប​ជាមួយ​ប្រជាពលរដ្ឋ និង​អាជីវករ​ផ្សារលើ ​ខេត្ត​សៀមរាប កាល​ពី​អំឡុង​​ឆ្នាំ​២០១៤។
លោក សម រង្ស៊ី និង​លោក កឹម សុខា ថតរូប​ជាមួយ​ប្រជាពលរដ្ឋ និង​អាជីវករ​ផ្សារលើ ​ខេត្ត​សៀមរាប កាល​ពី​អំឡុង​​ឆ្នាំ​២០១៤។
Photo: RFA

មន្ត្រី​សង្គម​ស៊ីវិល​ចោទប្រកាន់​របប​ក្រុងភ្នំពេញ​កំពុង​រឹតត្បិត​បន្ថែម ទៀត​ចំពោះ​សេរីភាព​ជួប​ប្រជុំ​របស់​ក្រុម​កម្មករ​ប្រមាណ​ជិត ១០០​នាក់​ដែល​គ្រោង​នឹង​ដឹកនាំ​ធ្វើ​បាតុកម្ម​ទាមទារ​ដោះលែង​មេដឹកនាំ​គណបក្សប្រឆាំង​។ ប៉ុន្តែ​សាលាក្រុង​ភ្នំពេញ​បកស្រាយ​ថា សកម្មភាព​នេះ​គឺជា​ការរំលោភ​ទៅ​លើ​សាលដីកា​តុលាការ​កំពូល​ដែល​បាន​រំលាយ​គណបក្ស​សង្គ្រោះ​ជាតិ​តាំងពី​ខែ​វិច្ឆិកា ឆ្នាំ​២០១៧។

អ្នកឃ្លាំមើល​ការរំលោភ​សិទ្ធិមនុស្ស​បាន​សំដែង​ការ​ខកចិត្ត​ចំពោះ​របប​ក្រុងភ្នំពេញ​ដឹកនាំ​ដោយ​លោក ហ៊ុន សែន ដែល​បាន​បដិសេធ​មិន​ឱ្យ​ក្រុម​កម្មករ​ដឹកនាំ​ធ្វើ​បាតុកម្ម​ទ្រង់ទ្រាយ​ធំ​នៅ​ពីមុខ​តុលាការ​ក្រុងភ្នំពេញ​ថា ជា​ការ​រំលោភច្បាប់​រដ្ឋធម្មនុញ្ញ​របស់​កម្ពុជា និង​ប៉ះពាល់​យ៉ាង ធ្ងន់ធ្ងរ​ដល់​សេរីភាព​បញ្ចេញមតិ។

អនុប្រធាន​អង្គការ​លីកាដូ ទទួលបន្ទុក​ឃ្លាំមើល​សិទ្ធិមនុស្ស លោក អំ សំអាត បញ្ជាក់​ប្រាប់​អាស៊ីសេរី​នៅ​ថ្ងៃ​ទី១ សីហា នេះ ថា លោក​មានការ​សោកស្ដាយ​ចំពោះ​ការ​បដិសេធ​នេះ ដែល​ធ្វើ​ឱ្យ​មាន​ការរិះគន់​បន្ថែម​ទៀត​ទាក់ទិន​នឹង​សេរីភាព​ប្រមូល​ផ្តុំ​ដោយ​សន្តិវិធី​ក៏ដូចជា​សេរីភាព​បញ្ចេញមតិ​។ លោក​បញ្ជាក់​ថា ប្រសិនបើ​សាលាក្រុង​ភ្នំពេញ​មិន​អនុញ្ញាត​ឱ្យ​មានការ​ប្រមូល​ផ្តុំ​នៅ​ពី​មុខ​តុលាការ​គេ​គួរតែ​ជ្រើសរើស​ទីតាំង​ណាមួយ​ផ្សេងទៀត ដើម្បី​ឱ្យ​មានការ​តវ៉ា​ដោយ​សន្តិវិធី​របស់​ក្រុម​កម្មករ៖ «បាទ​ខ្ញុំ​មានការ​សោកស្ដាយ​នូវ​ការ​បដិសេធ​នេះ វា​អាច​បង្កើន​នូវ​ការរិះគន់​បន្ថែម​ទៀត​ដែរ​ទាក់ទង​នឹង​សេរីភាព​ការ​ជួបជុំ ការ​ប្រមូល​ផ្តុំ​ដោយ​សន្តិវិធី​ក៏ដូចជា​ការ​បញ្ចេញមតិ​ដែល​យើង​ចេះតែ​បារម្ភ​ពី​សហគមន៍​អឺរ៉ុប ក៏ដូចជា​សហរដ្ឋអាមេរិក​ដែល​គេ​សុំ​ឱ​កម្ពុជា​ផ្ដល់​ឡើងវិញ​នូ​វលទ្ធិ​ប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា»

សមាគម​គ្រូបង្រៀន​ឯករាជ្យ​កម្ពុជា ដែល​មាន​លោក រ៉ុង ឈុន ជាទីប្រឹក្សាសមាគម កាលពី​ថ្ងៃ​ទី​៣០​កក្កដា បាន​ដាក់​លិខិត​ជូនដំណឹង​ទៅ​សាលាក្រុង​ភ្នំពេញ​អំពី​ការ​ប្រមូលផ្តុំ​សំដែង​មតិ​មួយ​នៅ​ថ្ងៃ​ទី ១៥ ខែ​សីហា ខាងមុខនេះ ដើម្បី​ទាមទារ​ឱ្យ​តុលាការ​របប​ក្រុងភ្នំពេញ​ដោះលែង​លោក កឹម សុខា និង លើកលែងទោស​លោក សម រង្ស៊ី ប្រធាន​ស្ដីទី​គណបក្សប្រឆាំង​ដែល​កំពុង​ភៀសខ្លួន​នៅ​ក្រៅ​ប្រទេស មាន​សិទ្ធិ​ចូលរួម​សកម្មភាព​នយោបាយ​ឡើងវិញ។

រយៈពេល​ពី​ថ្ងៃ​ក្រោយពី​ទទួល​បាន​លិខិត សាលាក្រុង​ភ្នំពេញ​បាន​ចេញ​លិខិត​បដិសេធ​ភ្លាមៗ​មិន​ឱ្យ​សមាគម​គ្រូបង្រៀន​ឯករាជ្យ​កម្ពុជា​ដឹកនាំ​ក្រុម​កម្មករ​ដឹកនាំ​ការ​ធ្វើ​បាតុកម្ម​នេះ​ទេ។

នៅ​ក្នុង​លិខិត​របស់​សាលាក្រុង​ភ្នំពេញ​ដែល​មាន​ចុះហត្ថលេខា​ដោយ​លោក ឃួង ស្រេង អភិបាលក្រុង​ភ្នំពេញ​ដែល​អាស៊ីសេរី​បាន​ទទួល បញ្ជាក់​ថា ការ​មិន​អនុញ្ញាត​នេះ​ដោយ​សកម្មភាព​នេះ​ប្រឆាំង​នឹង​សាលដីកា​របស់​តុលាការ​កំពូល និង​រំលោភ​សមត្ថកិច្ច​របស់​ស្ថាប័ន​តុលាការ​។​

លោក ឃួង ស្រេង បាន​បញ្ជាក់​នៅ​ក្នុង​លិខិត​នោះ​ថា ក្នុង​ករណី​មានការ​ជួប​ប្រជុំ អាជ្ញាធរ​មាន​សមត្ថកិច្ច និង​ចាត់វិធានការ​តាម​ផ្លូវ​ច្បាប់ ហើយ​អ្នកដឹកនាំ​ត្រូវ​ទទួលខុសត្រូវ​ចំពោះ​មុខ​ច្បាប់​ជា​ធរមាន។

ប្រធាន​សហភាព​សហជីព​កម្ពុជា​លោក រ៉ុង ឈុន បញ្ជាក់​ថា ជំហរ​របស់​លោក​មិន​ផ្លាស់ប្ដូរ​ទេ​នៅតែ​ដឹកនាំ​ក្រុម​កម្មករ​ដើម្បី​ទាមទារ​រក​យុត្តិធម៌​ដល់​មេដឹកនាំ​គណបក្សប្រឆាំង​ទោះបីជា​ក្នុង​ស្ថានភាព​នេះ​របប​ក្រុងភ្នំពេញ​បាន​រឹត​បន្តឹង​សេរីភាព​ដើម្បី​សំដែង​មតិ​មិន​ឱ​មានការ​ប្រមូល​ផ្តុំ​ក៏ដោយ៖ «ក្នុង​ស្ថានភាព​បែបណា​ក៏ដោយ​ជំហរ​នូវ​តែ​ប្រកាន់​ជំហរ​ធ្វើ​យ៉ាងណា​ដើម្បី​ស្វែងរក​ឱ្យ​មាន​ដំណោះស្រាយ​ដើម្បី​រក្សា​EBA​ឱ្យ​មានការ​ដក​EBAយើង​ដឹង​ហើយ​នៅ​ពេល​ដែល​ការ​ដក​ប្រព័ន្ធ អនុគ្រោះ​ពន្ធ EBAក៏ដូចជា​GSP​ដែល​ធ្វើ​ឲ្យ​ប៉ះពាល់​ដល់​ក្រុម​កម្មករ កម្មការិនី ហើយ​មិនមែន​តែ​ប៉ុណ្ណឹង​ទេ គឺ​ប៉ះពាល់​ដល់​ប្រជាពលរដ្ឋ​ច្រើន​ចូល​លាន​នាក់»

របប​លោក ហ៊ុន សែន រង​នូវ​ការរិះគន់ និង ថ្កោលទោស ថា​បាន​រំលោភច្បាប់ បំផ្លាញ​ប្រជាធិបតេយ្យ និង​រំលោភ​សិទ្ធិមនុស្ស​ធ្ងន់ធ្ងរ​នៅ​កម្ពុជា ក្រោយពី​របប​នេះ​បាន​ចាប់​មេ​គណបក្ស​សង្គ្រោះជាតិ លោក កឹម សុខា ដាក់គុក និង​រំលាយ​គណបក្សប្រឆាំង​មួយ​នេះ​កាលពី​ឆ្នាំ​២០១៧៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល