ភរិយាលោក ចៅ វាសនា ចៅសង្កាត់ប៉ោយប៉ែតជាប់ឆ្នោត នៃគណបក្សសង្គ្រោះជាតិ លើកឡើងថា មួយរយៈនេះ សុខភាពរបស់ស្វាមីទ្រុឌទ្រោមខុសប្រក្រតី បណ្ដាលមកពីគ្មានថ្នាំព្យាបាល និងហូបចំណីមិនគ្រប់គ្រាន់នៅពន្ធនាគារព្រៃស។ លោកស្រីអះអាងថា លោក ចៅ វាសនា កំពុងមានបញ្ហាផ្លូវចិត្ត ត្រូវការព្យាបាលនិងមានសាច់ញាតិនៅមើលថែ។ មន្ត្រីអង្គការសង្គមស៊ីវិល លើកឡើងថា មន្ត្រីគណបក្សប្រឆាំងរូបនេះ ជាប់ទោសដោយគ្មានកំហុស។
ភរិយាលោក ចៅ វាសនា លោកស្រី វង្ស គឹមហុង ប្រាប់អាស៊ីសេរីនៅព្រឹកថ្ងៃទី១៦ កក្កដាថា តាំងពីសមត្ថកិច្ចបញ្ជូនលោក ចៅ វាសនា ទៅឃុំនៅពន្ធនាគារព្រៃស កាលពីខែតុលា ឆ្នាំ២០១៨ មក គឺអ្នកស្រីមិនដែលបានទៅសួរសុខទុក្ខស្វាមីម្ដងនៅឡើយទេ ដោយសារខ្វះខាតថវិកាធ្វើដំណើរទៅភ្នំពេញ និងជាប់រវល់ការងាររកប្រាក់សម្រាប់បញ្ជូនទៅឱ្យប្ដីផង និងសម្រាប់ដោះស្រាយជីវភាពគ្រួសារនៅផ្ទះផង។
លោក ចៅ វាសនា ជាចៅសង្កាត់ប៉ោយប៉ែតជាប់ឆ្នោតគណបក្សសង្គ្រោះជាតិ ដើមកំណើតខ្មែរក្រោម។ ចៅសង្កាត់រូបនេះត្រូវបានចៅក្រមស៊ើបសួរនៃសាលាដំបូងខេត្តបន្ទាយមានជ័យ បញ្ជូនទៅឃុំខ្លួននៅពន្ធនាគារខេត្តនេះ កាលពីថ្ងៃទី១៦ ខែកុម្ភៈ គឺនៅមុនពេលបោះឆ្នោតក្រុមប្រឹក្សា ឃុំសង្កាត់ កាលពីថ្ងៃទី៤ ខែមិថុនា ឆ្នាំ២០១៧ ដោយចោទប្រកាន់ពីបទញុះញង់ឱ្យប្រើអំពើហិង្សាមានស្ថានទម្ងន់ទោស ដែលប្រព្រឹត្តនៅមុខទីស្នាក់ការគយ និងរដ្ឋាករក្រុងប៉ោយប៉ែត កាលពីខែឧសភា ឆ្នាំ២០១៥។
លោកស្រីមានប្រសាសន៍ថាយូរៗ ម្ដង ស្វាមីបានទូរស័ព្ទមកលេងអ្នកស្រីនៅផ្ទះ គឺលោកតែងត្អូញត្អែរពីទុក្ខលំបាកនៅក្នុងពន្ធនាគារប្រាប់អ្នកស្រីជាប្រចាំ។ នៅពេលនិយាយទូរស័ព្ទម្ដងៗ លោកស្រីអាណិតស្វាមីស្ទើរខ្លោចចិត្ត ដោយមិនគួរណាជាប់ឃុំក្នុងពន្ធនាគារបែកពីប្រពន្ធ និងកូនបែបនេះទេ៖ «គាត់ត្អូញត្អែររហូត គាត់ឈឺផងអីផងគាត់សូវបាននិយាយមកខ្ញុំម៉ានទេ ហើយក៏មិនដែលបានជួបទេ។គាត់ពិបាកចិត្តរឿងគ្រួសារផង ដែលអស់ពីគាត់ទៅពិបាក។ ខ្ញុំចង់ឱ្យគេជួយថវិកាដល់គាត់ សម្រាប់ប្រើប្រាស់ក្នុងពន្ធនាគារ ខ្ញុំមិនចង់បានអី ខ្ញុំអាណិតស្រណោះប្ដីត្រង់ថាគាត់ឈឺភ្នែកផង និងឈឺជំងឺផ្សេងៗផង និងគេធ្វើទុក្ខបុកម្នេញដល់គាត់នៅក្នុងពន្ធនាគារទៀត»។
លោកស្រីបន្ថែមទៀតថា លោក ចៅ វាសនា ត្អូញត្អែរញឹកញាប់ថា នៅបន្ទាប់ស្នាក់នៅក្នុងពន្ធនាគារព្រៃសចង្អៀតណែន ហើយមន្ត្រីពន្ធនាគារបានដាក់ស្វាមីឱ្យនៅជាមួយអ្នកទោសកោងកាច និងចេះជក់បារី ធ្វើឱ្យលោកសម្រាន្តមិនលក់ ព្រោះពួកគេតែងឈ្លោះប្រកែកគ្នាជារៀងរាល់យប់ និងនាំគ្នាជក់បារីបង្ហុយផ្សែងប៉ះពាល់ដល់សុខភាពរបស់ស្វាមី។ អ្នកស្រីថា ភ្នែករបស់លោក ចៅ វាសនា មើលមិនច្បាស់ ហើយចេះតែហូរទឹកភ្នែកមិនឈប់ដោយសារត្រូវផ្សែងបារីនៅក្នុងបន្ទប់ឃុំឃាំង៖ «ថ្នាំមានអីក្នុងពន្ធនាគារមានតែថ្នាំប៉ារ៉ាៗ (Paracetamol) ហើយគាត់ឈឺមិនមានពេទ្យព្យាបាលគាត់ហើយ ប្រពន្ធកូនក៏អត់បានទៅជិត ហើយរបស់ក៏ថ្លៃ ហើយផ្ញើពីផ្ទះទៅទម្រាំដល់បែកបាក់ខូចរបស់អស់។ អីចឹងខ្ញុំចង់ស្នើឱ្យគាត់មកខេត្តបន្ទាយមានជ័យ ដើម្បីបានជិតគ្រួសារធ្លាប់ខ្វះខាតមានគ្រួសារ និងអ្នកស្រុកបានយកទៅជួយគាត់ដល់ដៃ។ ដល់តែគាត់នៅភ្នំពេញមិនមានអ្នកណាយករបស់របរទៅផ្ញើគាត់ទេ បើនៅឆ្ងាយបែបនេះ»។
លោកស្រីបន្ថែមថា សព្វថ្ងៃលោកស្រីមិនមានលទ្ធភាពផ្ដល់ថវិកាជួយស្វាមីសម្រាប់ទិញអាហារហូបចុកនោះទេ ព្រោះតាំងពីលោក ចៅ វាសនា ជាប់ពន្ធនាគារមក ពុំមានអ្នកជួយប្រាក់ ដើម្បីរកចំណូលដោះស្រាយជីវភាពគ្រួសារ ហើយបន្ទុកនេះបានធ្លាក់មកលើលោកស្រីម្នាក់ឯង ត្រូវរកប្រាក់ចិញ្ចឹមកូននិងស្វាមីនៅក្នុងពន្ធនាគារ។
លោកស្រីព្រួយបារម្ភថា លោក ចៅ វាសនា មានជំងឺជាច្រើនយ៉ាង រួមមាន រមាស់ពេញខ្លួន ជំងឺក្រពះ គ្រុនរងាពិបាកក្នុងខ្លួន ធ្វើឱ្យលោកសម្រាន្តមិនលក់ជាច្រើនថ្ងៃហើយ ដោយពុំមានថ្នាំព្យាបាលនោះទេ។ លោកស្រីបន្តថា លោក ចៅ វាសនា បានទាមទារជាច្រើនលើកសុំឱ្យមន្ត្រីពន្ធនាគារព្រៃស បញ្ជូនលោកទៅពន្ធនាគារខេត្តបន្ទាយមានជ័យវិញ។ ប៉ុន្តែមន្ត្រីពន្ធនាគារធ្វើមិនដឹងមិនឮ ធ្វើឱ្យលោកលំបាកវេទនានៅក្នុងពន្ធនាគារព្រៃសរហូតមក។
អាស៊ីសេរីមិនអាចទាក់ទងអ្នកនាំពាក្យអគ្គនាយកដ្ឋានពន្ធនាគារ លោក នុត សាវនា និងប្រធានពន្ធនាគារព្រៃស លោក ក្លូត ដារ៉ា ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១៦ មិថុនា ដោយទូរស័ព្ទចូលជាច្រើនដងពុំមានអ្នកទទួល។
មេធាវីការពារក្ដីឱ្យជនជាប់ឃុំ លោក ជួង ជូងី ថ្លែងថា កូនក្ដីរបស់លោកពិតជាជួបការលំបាកខ្លាំងនៅក្នុងពន្ធនាគារព្រៃសប្រាកដមែន។ លោកបន្ថែមថា រឿងនេះលោកក៏បានដាក់ពាក្យស្នើសុំទៅអគ្គនាយកដ្ឋានពន្ធនាគារប្រមាណ ១ខែហើយ ដើម្បីឱ្យបញ្ជូនលោក ចៅ វាសនា ទៅពន្ធនាគារខេត្តបន្ទាយមានជ័យវិញ ប៉ុន្តែរហូតមកទល់ម៉ោងផ្សាយនេះ មិនទាន់មានការឆ្លើយតបមកវិញនៅឡើយទេ។ ទោះជាយ៉ាងណា លោកអះអាងថា នឹងសាកសួររឿងនេះទៅអគ្គនាយកដ្ឋានពន្ធនាគារបន្តទៀត៖ «គេយកគាត់មកភ្នំពេញដោយហេតុថារឿងគាត់ ពេលតវ៉ាតាមផ្លូវច្បាប់ យើងប្រើសិទ្ធិប្ដឹងឧទ្ធរណ៍ប្ដឹងមកសាលាកំពូលទៀត។ អីចឹងដើម្បីធានាអាចដឹកគាត់ទៅតុលាការបានអីចឹងហើយទើបក្រសួងមហាផ្ទៃត្រូវដឹងគាត់ពីបន្ទាយមានជ័យមកភ្នំពេញ។ ហើយឥឡូវនេះសំណុំរឿងគាត់ត្រូវរង់ចាំកាត់អង្គសេចក្ដីនៅតុលាការកំពូល ប៉ុន្តែគាត់ទាមទារទទូចចង់ទៅបន្ទាយមានជ័យវិញ គឺគាត់ជ្រើសរើសថាពេលសវនាការនៅសាលាកំពូល គាត់សុំមិនចូលរួម ឱ្យតែមេធាវីទៅការពារទៅបានហើយ។ អីចឹងការដែលគាត់សុំមិនចូលរួមដូច្នេះអាចមិនចាំបាច់ថា សវនាការនៅកំពូលសមត្ថកិច្ចដឹកគាត់ទៅគឺ មិនចាំបាច់ទេ»។
មន្ត្រីពន្ធនាគារខេត្តបន្ទាយមានជ័យបានបញ្ជូនលោក ចៅ វាសនា ទៅឃុំឃាំងនៅពន្ធនាគារព្រៃស តាំងពីថ្ងៃទី១៤ ខែតុលាឆ្នាំ២០១៨ មក មិនទាន់បញ្ជូនត្រឡប់ទៅវិញនៅឡើយទេ។ មន្ត្រីពន្ធនាគារខេត្តបន្ទាយមានជ័យប្រាប់ភរិយាលោក ចៅ វាសនា ថា ការប្ដូរទីតាំងឃុំខ្លួននេះ ដើម្បីងាយស្រួលក្នុងការធ្វើនីតិវិធីនៅសាលាឧទ្ធរណ៍។
មន្ត្រីសម្របសម្រួលសមាគមសិទ្ធិមនុស្ស អាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា លើកឡើងថា ការឃុំខ្លួនមន្ត្រីគណបក្សប្រឆាំងរូបនេះមានភាពអយុត្តិធម៌ ២យ៉ាង គឺទី១ លោកជាប់ឃុំដោយគ្មានកំហុស ព្រោះកាលណោះលោកជាចៅសង្កាត់រងទី២ សង្កាត់ប៉ោយប៉ែត ដែលបានទៅពិនិត្យប្រជាពលរដ្ឋតវ៉ានៅក្រុងប៉ោយប៉ែត ក្នុងនាមជាអាជ្ញាធរដែនដី ហើយត្រូវតុលាការចោទប្រកាន់ពីបទញុះញង់ទៅវិញ និងទី២ មន្ត្រីពន្ធនាគារខេត្តបន្ទាយមានជ័យបានបញ្ជូនលោកទៅឃុំនៅពន្ធនាគារព្រៃស ហើយស្នាក់នៅក្នុងបន្ទប់ចង្អៀតណែនអស់ជាច្រើនខែ ដែលលំបាកដល់ក្រុមគ្រួសារមិនអាចទៅសួរសុខទុក្ខបានដូចពេលមុនៗ៖ «សូម្បីតែជាប់ពន្ធនាគារហើយនៅជាប់ការរើសអើងមកជាមួយទៀត អីចឹងវាមិនសូវល្អហើយគួរតែបំបាត់អំពើទាំងនេះចោល បើមិនអីចឹងទេ គេមើលមកថា តុលាការ ឬរចនាសម្ព័ន្ធការគ្រប់គ្រងគណបក្សតែមួយនឹងវាជាការប្រើប្រាស់ទៅលើអ្នកដែលខ្លួនមិនពេញចិត្តអី គាត់ច្រើនតែប្រើយន្តការមួយមិនអើពើមិនយកចិត្តទុកដាក់អ្នកសុំក៏ដោយ ប៉ុន្តែបើអ្នកមានលុយមានកាក់ដែលជាបណ្ដាញជាក្រុមរបស់ខ្លួនតែងតែយកចិត្តទុកដាក់»។
កាលពីថ្ងៃទី៧ ខែមិថុនា ឆ្នាំ២០១៨ ចៅក្រមជំនុំជម្រះនៃសាលាដំបូងខេត្តបន្ទាយមានជ័យ បានប្រកាសសាលក្រមផ្ដន្ទាទោសលោក ចៅ វាសនា និងកម្មករអូសរទេះចំនួន ៧នាក់ផ្សេងទៀត ដាក់ពន្ធនាគារម្នាក់ៗ ៥ឆ្នាំ។ ភ្លាមៗ ក្រោយពីប្រកាសសាលក្រមមេធាវីការពារក្ដីលើសំណុំរឿងនេះបានដាក់ពាក្យប្ដឹងទាស់ទៅសាលាឧទ្ធរណ៍ ដើម្បីតុលាការទម្លាក់ការចោទប្រកាន់នេះ និងស្នើសុំឱ្យលោក ចៅ វាសនា បាននៅក្រៅឃុំបណ្ដោះអាសន្ន ប៉ុន្តែរហូតដល់ថ្ងៃទី១៦ កក្កដា សាលាឧទ្ធរណ៍មិនទាន់ជម្រះក្ដីរឿងនេះចប់នៅឡើយ។ លោក ស៊ុំ ច័ន្ទគា យល់ថា ការចាប់នេះជារឿងអយុត្តិធម៌ លើជនជាប់ឃុំ ព្រោះប្រសិនបើចោទប្រកាន់អភិបាលរងខេត្តបន្ទាយមានជ័យ គឺលោក ង៉ោ ម៉េងជ្រួន ក៏មានកំហុសដែរ ដោយសារកាលណោះលោកបានចុះទៅពិនិត្យមើលក្រុមអ្នកតវ៉ានៅមុខទីស្នាក់ការគយក្រុងប៉ោយប៉ែតដូចលោក ចៅ វាសនា ដែរ មិនមែនដាក់ទោសតែម្នាក់បែបនេះទេ។ ភរិយាជនជនចាប់ចោទទទូចឱ្យរបបក្រុងភ្នំពេញ បញ្ជូនលោកទៅឃុំនៅពន្ធនាគារខេត្តបន្ទាយមានជ័យ និងស្នើឱ្យដោះលែងស្វាមីរបស់អ្នកស្រីឱ្យបានឆាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។