គណបក្ស​សង្គ្រោះ​ជាតិ​អំពាវនាវ​ឱ្យ​ពលរដ្ឋ​និង​កម្មករ ស្វែង​រក​ដំណោះស្រាយ​នយោបាយ​ដោយ​សន្តិវិធី

ដោយ ទីន ហ្សាការីយ៉ា
2020-02-14
អ៊ីម៉ែល
មតិ
Share
បោះពុម្ព
ទីស្នាក់ការ​គណបក្ស​សង្គ្រោះ​ជាតិ។ រូបថត​ថ្ងៃ​ទី​៣ ខែ​សីហា ឆ្នាំ​២០១៧។
ទីស្នាក់ការ​គណបក្ស​សង្គ្រោះ​ជាតិ។ រូបថត​ថ្ងៃ​ទី​៣ ខែ​សីហា ឆ្នាំ​២០១៧។
RFA/Brach Chev

គណបក្ស​សង្គ្រោះជាតិ​អំពាវនាវ​ឱ្យ​ពលរដ្ឋ កម្មករ កម្មការិនី ទាំងអស់​ចូលរួម​ជាមួយ​គណបក្ស​សង្គ្រោះ​ជាតិ ក្នុង​ការ​ស្វែងរក​ដំណោះស្រាយ​ដោយ​សន្តិវិធី និង​តាម​បែប​ប្រជាធិបតេយ្យ ដើម្បី​សង្គ្រោះ​ជីវភាព​ប្រជាពលរដ្ឋ នៅ​ក្នុង​រយៈពេល​៦​ខែ​ខាងមុខនេះ ដោយ​ជំរុញ​ឱ្យ​របប​លោក ហ៊ុន សែន ត្រូវ​តម្កល់​ផលប្រយោជន៍​ជាតិ​ជាធំ។

សេចក្ដីថ្លែងការណ៍​របស់​គណបក្ស​សង្គ្រោះ​ជាតិ​នេះ ធ្វើឡើង​ភ្លាមៗ ក្រោយពី​គណៈកម្មាធិការ​អឺរ៉ុប សម្រេច​ព្យួរ​ប្រព័ន្ធ​អនុគ្រោះ​ពន្ធ EBA ២០% ពី​កម្ពុជា​។ គណបក្ស​សង្គ្រោះ​ជាតិ ចាត់​ទុក​សេចក្ដី​សម្រេច​របស់​គណៈកម្មការ​អឺរ៉ុប​នេះ គឺជា​លទ្ធផល​ដ៏​សោកសង្រេង នៃ​វិបត្តិ​នយោបាយ​នៅ​កម្ពុជា ដែល​បង្កឡើង​ដោយ​របប​លោក ហ៊ុន សែន ចាប់​តាំង​ពី​របប​នេះ ចាប់ផ្ដើម​យុទ្ធនាការ​បង្ក្រាប​គណបក្ស​ប្រឆាំង អង្គការ​សង្គម​ស៊ីវិល សហជីព និង​បណ្ដាញ​សារព័ត៌មាន​ឯករាជ្យ​កាលពី​ខែ​កញ្ញា​ឆ្នាំ​២០១៧ និង​ចំ​ការ​បោះឆ្នោត​ក្លែងក្លាយ​នៅ​ក្នុង​ឆ្នាំ​២០១៨។

សហភាព​អឺរ៉ុប​គឺជា​មិត្ត​ដ៏​ល្អ​របស់​កម្ពុជា ដែល​បាន​វិនិយោគ​ក្នុង​ទំហំ​ទឹកប្រាក់​រាប់ពាន់​លាន​ដុល្លារ ដើម្បី​ជួយ​លើកស្ទួយ​សេដ្ឋកិច្ច និង​ជួយ​កាត់បន្ថយ​ក្រីក្រ​នៅ​កម្ពុជា ពិសេស​ការ​ផ្ដល់​ប្រព័ន្ធ​អនុគ្រោះ​ពន្ធ​EBA​នេះ​។ សហភាព​អឺរ៉ុប​បាន​បង្ហាញ​ជំហរ​យ៉ាង​ម៉ឺងម៉ាត់​របស់​ខ្លួន តាមរយៈ​សម្រេច​កាលពី​ថ្ងៃ​ទី​១២​កុម្ភៈ ដែល​ទុក​ពេល​ឱ្យ​របប​ក្រុងភ្នំពេញ​រយៈពេល​៦​ខែ​ទៀត ដើម្បី​ឱ្យ​កែប្រែ​ស្ថានភាព​នយោបាយ​ឱ្យ​ប្រសើរ​ឡើងវិញ ដើម្បី​បញ្ចៀស​លទ្ធផល​អាក្រក់ ដែល​នឹង​ប៉ះពាល់​សេដ្ឋកិច្ច​កម្ពុជា​ទាំងមូល។

សេចក្ដីថ្លែងការណ៍​របស់​គណបក្សប្រឆាំង​ដដែល​នេះ សម្ដែង​នូវ​ការ​គាំទ្រ​ចំពោះ​អនុសាសន៍​ចំពោះ​អនុសាសន៍​របស់​សហភាព​អឺរ៉ុប​ដល់​អាជ្ញាធរ​របប​ក្រុងភ្នំពេញ ក្នុង​ការ​ផ្ដួចផ្ដើម​នូវ​ដំណើរការ​នៃ​ការផ្សះផ្សា​ជាតិខ្មែរ​ឡើងវិញ តាម​បែបបទ​ប្រជាធិបតេយ្យ តាមរយៈ​កិច្ច​សន្ទនា​ដោយ​ស្មោះ​ត្រង់ និង​ទូលំទូលាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល