គ្រួសារ និង​មេធាវី​ទាមទារ​តុលាការ​ដោះលែង​លោក ថាច់ សេដ្ឋា ឱ្យ​មាន​សេរីភាព​វិញ

ដោយ ទីន ហ្សាការីយ៉ា
2023.01.25
Share on WhatsApp
Share on WhatsApp
គ្រួសារ និង​មេធាវី​ទាមទារ​តុលាការ​ដោះលែង​លោក ថាច់ សេដ្ឋា ឱ្យ​មាន​សេរីភាព​វិញ អនុប្រធាន​គណបក្ស​ភ្លើងទៀន លោក ថាច់ សេដ្ឋា។
Photo Courtesy

គ្រួសារ និង​មេធាវី​ទាមទារ​តុលាការ​ដោះលែង​អនុប្រធាន​គណបក្ស​ភ្លើងទៀន​លោក ថាច់ សេដ្ឋា ឱ្យ​មាន​សេរីភាព​ដើម្បី​វិល​ឡប់​ទៅ​ធ្វើ​នយោបាយ​ឡើងវិញ​។ មេធាវី​កត់​សម្គាល់​ថា ការ​លើក​សំអាង​អំពី​សែក​ស្អុយ​របស់​តុលាការ​មក​ដាក់បន្ទុក​កូន​ក្តី​មាន​ភាព​មិន​ប្រក្រតី ខណៈ​លោក ថាច់ សេដ្ឋា អះអាង​ថា លោក​មិន​ប្រព្រឹត្ត​បទល្មើស​ដូច​ការ​ចោទ​ប្រកាន់​នោះ​ទេ។ មន្ត្រី​សង្គម​ស៊ីវិល​រិះគន់​ថា ចំណាត់ការ​របស់​តុលាការ​លើ​មន្ត្រី​បក្ស​ភ្លើងទៀន​នេះ​ធ្វើ​ឱ្យ​ស្ថានភាព​នយោបាយ​កាន់តែ​អាក្រក់​មុន​ការ​បោះឆ្នោត​ជ្រើសតាំង​តំណាងរាស្ត្រ អាណត្តិ​ទី៧។

ប្រពន្ធ​លោក ថាច់ សេដ្ឋា គឺ​លោកស្រី ថាច់ សុខបូរ៉ានី ប្រាប់​វិទ្យុ​អាស៊ីសេរី​ថា លោកស្រី​បាន​ទៅ​សួរសុខទុក្ខ និង​បាន​យក​ថ្នាំពេទ្យ ម្ហូបអាហារ​ឱ្យ​ប្តី​នៅ​ពន្ធនាគារ​ព្រៃ​ស នៅ​រសៀល​ថ្ងៃទី​២៤ ខែ​មករា។ លោកស្រី​ឱ្យ​ដឹង​ថា លោក ថាច់ សេដ្ឋា នៅ​តែ​មាន​ឆន្ទៈ​មោះមុត ស្មារតី​រឹងមាំ​ជា​ធម្មតា​ដដែល ប៉ុន្តែ​លោកស្រី​និង​កូនៗ​ខ្លោចចិត្ត​ពេល​ឃើញ​ប្តី​ជា​អ្នកតស៊ូ​លះបង់​ដើម្បី​ជាតិ និង​គោរព​ស្រឡាញ់​ពី​ប្រជាពលរដ្ឋ បែរជា​ស្លៀកពាក់​អ្នកទោស​ជាប់គុក​ទៅវិញ​។ អ្នកស្រី ថាច់ សុខបូរ៉ានី ថា ប្ដី​លោកស្រី​មិនបាន​ប្រព្រឹត្ត​ខុសច្បាប់​ដូច​ការចោទប្រកាន់​ទេ ពីព្រោះ​គ្រួសារ​លោកស្រី​បាន​ដោះស្រាយ​រឿងរ៉ាវ​នេះ​ជាមួយ​ក្រុមហ៊ុន​បញ្ចាំ​រួចហើយ ហើយ​កន្លងមក​តុលាការ​ក៏​បាន​សម្រេច​ក្តី​ឱ្យ​ប្តី​លោក​ស្ត្រី​រួចផុត​ពី​ការ​ប្តឹងផ្តល់​យូរ​ឆ្នាំ​ហើយ​ដែរ។ អ្នកស្រី​ស្នើ​ដល់​តុលាការ​ដោះលែង​ប្តី​ឱ្យ​មាន​សេរីភាព​ឡើងវិញ។

លោកស្រី ថាច់ សុខបូរ៉ានី៖ «ខ្ញុំ​ពិបាកចិត្ត និង​បារម្ភ​ពី​គាត់​(លោក ថាច់ សេដ្ឋា) ហ្នឹង សុខភាព​គាត់​ពេល​សួរសុខទុក្ខ​គាត់​ទៅ​គាត់​ថា អត់​អី​ទេ សុខ​សប្បាយ​ជា​ទេ គាត់​ឱ្យ​ហូបបាយ​ហូប​ទឹក​ទៅ។ ខ្ញុំ​សោកស្តាយ​ដែរ ពីព្រោះ​រឿង​នេះ​តាំង​ពី​ឆ្នាំ​២០១៩ តុលាការ​ទើប​យក​មក​ចាប់ខ្លួន​គាត់ ខ្ញុំ​មាន​តែ​សំណូមពរ​តុលាការ​យោគយល់​ដោះលែង​អ៊ីចឹង»។

អាជ្ញាធរ​រដ្ឋាភិបាល​លោក ហ៊ុន សែន បាន​ចាប់ខ្លួន​លោក ថាច់ សេដ្ឋា កាល​ពី​ថ្ងៃទី​១៦ ខែ​មករា ការ​ចាប់​ឃុំខ្លួន​អនុប្រធាន​គណបក្ស​ប្រឆាំង​រូប​នេះ ធ្វើឡើង​ក្នុង​រយៈពេល​មិន​ដល់​ជាង ៦​ខែ​ផង​នៅ​មុន​ពេល​ការបោះឆ្នោត​ថ្ងៃទី​២៣ ខែកក្កដា និង​នៅ​មួយ​សប្តាហ៍​មុន​ការ​ចាប់ខ្លួន​លោក ថាច់ សេដ្ឋា នេះ លោក ហ៊ុន សែន បាន​ទម្លាយ​ថា លោក ថាច់ សេដ្ឋា បាន​ជួប​ជាមួយ​កូនប្រុស​ច្បង​របស់​លោក គឺ​លោក ហ៊ុន ម៉ាណែត។ តុលាការ​បាន​ចោទ​លោក ថាច់ សេដ្ឋា ពាក់ព័ន្ធ​នឹង​ការ​ចេញ​សែក​អត់​លុយ ដោយ​សារ​បាន​ខកខាន​មិន​ចូល​ខ្លួន​បំភ្លឺ​តាម​ដីកា​បង្គាប់​ឱ្យ​ចូល​ខ្លួន​ចំនួន​ពីរ​លើក​របស់​ចៅក្រម​ស៊ើបសួរ កាល​ពី​ឆ្នាំ​២០២១ និង​ឆ្នាំ​២០២២។ ទោះ​យ៉ាងណា​ប្រពន្ធ​លោក ថាច់ សេដ្ឋា អះអាង​ថា គ្រួសារ​លោកស្រី​មិន​ដែល​ទទួល​ដីកាកោះ​របស់​តុលាការ​ទាំងពីរ​លើក​នោះ​ទេ ហើយ​ប្តី​លោកស្រី​មិន​មាន​បំណង​គេចវេស​ដោះស្រាយ​រឿង​ក្តី​នោះ​ដែរ។

មេធាវី​ការពារ​ក្ដី លោក ថាច់ សេដ្ឋា គឺ​លោក ជូង ជូងី ឱ្យ​ដឹង​ថា លោក​បាន​ដាក់​បណ្តឹង​ឧទ្ធរណ៍​ប្រឆាំង​នឹង​ការសម្រេច​ឃុំខ្លួន​អនុប្រធាន​បក្ស​ភ្លើងទៀន​លោក ថាច់ សេដ្ឋា រួច​ហើយ ដើម្បី​ស្នើសុំ​សាលាឧទ្ធរណ៍​បដិសេធ​ដីកា​ឃុំខ្លួន​របស់​សាលាដំបូង ហើយ​ដោះលែង​លោក ថាច់ សេដ្ឋា ឱ្យ​មាន​សេរីភាព​ឡើង​វិញ។ លោក​ថា កូនក្ដី​របស់​លោក​អះអាង​ថា គាត់​មិន​បាន​ប្រព្រឹត្ត​ល្មើស​ដូច​ការ​ចោទប្រកាន់​ទេ។

លោក ជូង ជូងី៖ «ខ្ញុំ​បាន​ថតចម្លង​សំណុំរឿង​យក​មក​នឹង​ដៃ​អស់ហើយ ហើយ​អ្វី​ដែល​ឯកឧត្តម ថាច់ សេដ្ឋា បញ្ជាក់​មក​ខ្ញុំ គឺ​វា​ដូច​ទៅ​ហ្នឹង​សំណុំរឿង​ដែល​ថត​បាន​មក​ហ្នឹង​។ ផ្លូវច្បាប់​បន្ទាប់​សាលាឧទ្ធរណ៍ បន្ទាប់​ពី​ទទួល​ចុះបញ្ជី​សំណុំរឿង​យ៉ាង​យូរ​រយៈពេល​១៥​ថ្ងៃ​ត្រូវ​ដាក់​កាត់ អ៊ីចឹង​បែបបទ​ផ្លូវច្បាប់​សាលាឧទ្ធរណ៍​នឹង​ដាក់​កាត់​រឿង​គាត់ ដែល​ខ្ញុំ​ប្តឹង​ឧទ្ធរណ៍​នៅ​ពេល​ឆាប់ៗ​ខាងមុខ​នេះ​ហើយ»។

ChuongChuongy_លោកមេធាវី ជូង ជូងី.JPG
លោក ជូង ជូងី មេធាវី​ការពារក្ដី​គណបក្ស​ប្រឆាំង។ Photo Provided

លោក​មេធាវី ជូង ជូងី ឱ្យ​ដឹង​ទៀត​ថា សំណុំ​រឿង​នេះ ភាគី​ដើមបណ្ដឹង​បាន​ប្ដឹង​លោក ថាច់ សេដ្ឋា កាលពី​អំឡុង​ឆ្នាំ​២០១១ ម្ដង​រួចហើយ ពី​បទ​ឆបោក តែ​ត្រូវ​បាន​តុលាការ​ច្រានចោល ហើយ​ទើប​ពេល​នេះ ឃើញ​ភាគី​ដើមបណ្ដឹង​នោះ​ចេញ​មក​ប្ដឹង​កូនក្ដី​របស់​លោក​ជា​ថ្មី ពី​ករណី​ចេញ​សែក​ស្អុយ​នេះ​ទៅ​វិញ។

លោក ជូង ជូងី ឱ្យ​ដឹង​ថា ក្រោយ​ពេល​លោក​ជួប​ជជែក​ជាមួយ​កូន​ក្តី និង​ថតចម្លង​សំណុំរឿង​យក​ទៅ​ពិនិត្យ​មើល​ឃើញ​ថា ក្រុមហ៊ុន​បាន​យក​សែក​ចំនួន ៥​សន្លឹក ធ្វើជា​ភស្តុតាង​ដែល​សែក​នីមួយៗ​មាន​សរសេរ​ចំនួន​ទឹកប្រាក់​បើក​ជាង ៤​លាន ២​សែន​រៀល (៤.២៣២.០០០) និង​មាន​ចុះ​ថ្ងៃខែ​អំឡុង​ពាក់​កណ្តាល​ឆ្នាំ​២០១៩។ ទោះ​យ៉ាងណា​លោក​ថា កូន​ក្តី​របស់​លោក​អះអាង​ថា​ចាប់​តាំង​ពី​ឆ្នាំ​២០១៦ គាត់​មិន​ដែល​បាន​ជួប ឬ​ផ្តល់​សែក​ទៅ​ក្រុមហ៊ុន ឬ​ដើម​បណ្តឹង​ទេ។ ដូច្នេះ​លោក​យល់​ថា សែក​ដែល​ដើម​បណ្តឹង​យក​ធ្វើជា​មូលដ្ឋាន​មក​ប្តឹង​នោះ​មាន​ភាព​មិន​ប្រក្រតី ។ លោក​ឆ្ងល់​ថា តើ​ក្រុមហ៊ុន​យក​សែក​ទាំង​ប្រាំ​សន្លឹក​មក​ប្តឹង​កូន​ក្តី​របស់​លោក​ដោយ​របៀបមិច? តើ​នរណា​ជា​អ្នក​សរសេរ​ចំនួន​ប្រាក់ និង​កាលបរិច្ឆេទ​លើ​សែក ខណៈ​សែក​ដែល​លោក ថាច់ សេដ្ឋា ចេញ​ឱ្យ​ក្រុមហ៊ុន កាល​ពី​ឆ្នាំ​២០១១ គ្រាន់​តែ​ចុះ​ហត្ថលេខា តែ​មិន​បាន​ចុះ​កាលបរិច្ឆេទ​ថ្ងៃខែ​ឆ្នាំ​នៃ​ការ​បើក​ប្រាក់ និង​ចំនួន​ទឹកប្រាក់​ដែល​ត្រូវ​ផ្ដល់​ឱ្យ​នោះ។ លោក​យល់​ថា អ្នក​ដែល​សរសេរ​ជា​អ្នក​ក្លែង​បន្លំ ដូច្នេះ​មេធាវី​កត់​សម្គាល់​ថា មាន​ការ​ក្លែងបន្លំ​សែក​ទាំងនោះ។

ចំណែក​អ្នក​សិក្សា​ផ្នែក​ច្បាប់​លោក វ៉ន ចាន់ឡូត លើក​ឡើង​ថា បញ្ហា​ខ្ចីប្រាក់​ជា​រឿង​រដ្ឋប្បវេណី។ ទោះ​យ៉ាងណា​លោក​ថា តាមច្បាប់​នោះ​អ្នក​ដែល​ប្រើប្រាស់​សែក​មិន​មាន​លុយ​អាច​រង​បណ្តឹង​ទោស​ព្រហ្មទណ្ឌ តែ​ករណី​បែប​នេះ​មិនមែន​ត្រូវតែ​យក​ច្បាប់​មក​អនុវត្ត​ទាំងស្រុង​នោះ​ទ ដោយ​ត្រូវ​សិក្សា​ពី​ចេតនា​របស់​ម្ចាស់​សែក និង​បរិយាកាស​នានា​នៃ​ការ​ចេញ​សែក​ដែរ។

លោក​មើល​ឃើញ​ថា លោក ថាច់ សេដ្ឋា មិន​គេចវេស​ការ​សង​ប្រាក់​ទេ ដោយសារ​គាត់​កន្លងមក​បាន​យក​ទ្រព្យ​ទៅ​បញ្ចាំ​ជាមួយ​ក្រុមហ៊ុន​នោះ។ លោក​បន្ត​ថា តាម​ច្បាប់​បើសិន​ម្ចាស់​បំណុល​រក​ឃើញ​ថា កូនបំណុល​មិន​សង​ប្រាក់​អាច​ប្រើប្រាស់​សិទ្ធិ​ស្របច្បាប់​លក់​ឡាយឡុង​ទ្រព្យ​ទាំងនោះ​ដើម្បី​ទូទាត់​បំណុល​បាន។ តែ​យ៉ាងណា​លោក​យល់​ថា ករណី​នេះ​អាច​ធ្វើ​ឱ្យ​ប៉ះពាល់​ដល់​សិទ្ធិ​នយោបាយ​របស់​លោក ថាច់ សេដ្ឋា និង​ប្រជាប្រិយភាព​របស់​បក្ស​ភ្លើងទៀន​សម្រាប់​ការ​បោះឆ្នោត​ថ្នាក់​ជាតិ​ខាងមុខ។

Vorn_Chanlout_FB.JPG
​អ្នក​សិក្សា​ផ្នែក​ច្បាប់​លោក វ៉ន ចាន់ឡូត។ រូប៖ ពីហ្វេសប៊ុក

លោក វ៉ន ចាន់ឡូត៖ «អ្នកច្បាប់ មេធាវី​របស់​លោក ថាច់ សេដ្ឋា បើសិន​លោក ថាច់ សេដ្ឋា ពិតជា​ស្អាតស្អំ​នោះ ខ្ញុំ​គិតថា នឹង​មាន​ការ​បង្ហាញ​នៅ​ពេល​ខាងមុខ​ហើយ ដំណើរ​នេះ​មាន​តែ​យើង​រង់ចាំ​នៅ​ពេល​ខាងមុខ​ហើយ​អំពី​អង្គហេតុ អង្គច្បាប់ ប៉ុន្តែ​គ្រាន់តែ​ខ្ញុំ​មើល​ឃើញ​ថា​ទោះ​បី​យ៉ាងណា​ក៏ដោយ​វា​ធ្វើ​ឱ្យ​ប៉ះពាល់​ដល់​សិទ្ធិ​នៃ​ការ​ធ្វើ​នយោបាយ​របស់​លោក ថាច់ សេដ្ឋា ផង​ដែរ វា​អាច​ត្រូវការ​ពេលវេលា​ក្នុង​ករណី​នេះ»។

ប្រធាន​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា មានប្រសាសន៍​ថា បើសិន​ភស្តុតាង​ចោទប្រកាន់​ទាំងឡាយ​បាន​ដោយ​អំពើ​ទុច្ចរិត​នោះ គឺ​មិន​អាច​យក​មក​ចោទប្រកាន់​ជនជាប់ចោទ​បានទេ។ លោក​យល់​ថា ដើម្បី​ស្រាយ​មន្ទិល​ជុំវិញ​ភស្តុតាង​ដាក់បន្ទុក​លើ​លោក ថាច់ សេដ្ឋា នោះ​មេធាវី​គួរ​ស្នើ​យក​ភស្តុតាង​ធ្វើ​កោសល្យ​វិច័យ​ឱ្យ​ច្បាស់​។ ទោះ​យ៉ាង​ណា​លោក នី សុខា យល់​ថា ការ​ចាត់​វិធានការ​របស់​តុលាការ​មក​លើ​លោក ថាច់ សេដ្ឋា មិន​ផ្តល់​ផល​ចំណេញ​ដល់​រដ្ឋាភិបាល​នោះ​ទេ ផ្ទុយ​ទៅវិញ​ធ្វើ​បរិយាកាស​នយោបាយ​មុន​ការបោះឆ្នោត​ខាង​មុន​កាន់​តែ​អាប់អួរ ខណៈ​គណបក្ស​ភ្លើងទៀន​ជា​ដៃគូ​ប្រកួតប្រជែង​ក៏​លេចធ្លោ​ជាមួយ​បក្ស​កាន់​អំណាច។

Ny_Sokha_លោក នី សុខា ប្រធាន​សមាគម​ការពារ​សិទ្ធិមនុស្ស អាដហុក ពេល​ផ្ដល់​បទ​សម្ភាសន៍​ដល់​អ្នក​កាសែត ក្រោយ​ពី​សវនាការ​តុលាការ​កំពូលលើ​រឿងក្ដី​របស់​លោក​ និង​មន្ត្រី​សិទ្ធិមនុស្ស​ ៤រូបផ្សេង​ទៀត នៅថ្ងៃ​ទី៤ ខែ​វិច្ឆកា ឆ្នាំ២០២២។ រូបពលរដ្ឋផ្ដល់ឱ្យ.JPG
លោក នី សុខា ប្រធាន​សមាគម​ការពារ​សិទ្ធិមនុស្សអាដហុក (Adhoc) ពេល​ផ្ដល់​បទ​សម្ភាសន៍​ដល់​អ្នក​កាសែត ក្រោយ​ពី​សវនាការ​តុលាការ​កំពូលលើ​រឿងក្ដី​របស់​លោក​ និង​មន្ត្រី​សិទ្ធិមនុស្ស​ ៤រូបផ្សេង​ទៀត នៅថ្ងៃ​ទី៤ ខែ​វិច្ឆកា ឆ្នាំ២០២២។ រូប៖ ពលរដ្ឋផ្ដល់ឱ្យ

លោក នី សុខា៖ «រឿង​រដ្ឋប្បវេណី​ហៅ​មក​ដោះស្រាយ​គ្នា​ចរចា​គ្នា រក​ភស្តុតាង​អី​ឱ្យ​បាន​ច្បាស់លាស់​សិន​ទៅ​មុន​នឹង​ចាប់ខ្លួន​អ៊ីចឹង បើ​តាម​លោក​មេធាវី​លើកឡើង​ពី​ភស្តុតាង​ទាំងអស់​ហ្នឹង ខ្ញុំ​គាត់​ថា ជា​ភស្តុ​តាំង​មួយ​មាន​លក្ខណៈ​នៅ​មាន​មន្ទិលសង្ស័យ​នៅឡើយ​ទេ ដូច្នេះ​យើង​មិន​គួរ​មាន​វិធានការ​ចាប់​លឿន​ពេក​ទេ បាទ! យើង​គួរ​មាន​មធ្យោបាយ​ក្នុង​ការ​ដោះស្រាយ​បញ្ហា​នេះ​បាទ»។

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​តុលាការ​ក្រុង​ភ្នំពេញ​លោក អ៊ី រិន្ទ និង​អ្នកនាំពាក្យ​សាលាឧទ្ធរណ៍ លោក ប្លង់ សំណាង ដើម្បី​បកស្រាយ​ជុំវិញ​រឿង​នេះ​បាន​ទេ នៅ​ថ្ងៃទី​២៤ ខែ​មករា។

ទោះ​យ៉ាងណា គណបក្ស​ភ្លើងទៀន និង​អ្នកឃ្លាំមើល ចាត់ទុក​ថា ការ​ចាប់ និង​ឃុំខ្លួន លោក ថាច់ សេដ្ឋា គឺ​ជា​រឿង​នយោបាយ និង​ជា​រូបភាព​គំរាមកំហែង ដើម្បី​បំបាក់​ស្មារតី​ប្រជាពលរដ្ឋ​ខ្មែរ មិន​ឱ្យ​ចូលរួម​សកម្មភាព​នយោបាយ​ជាមួយ​គណបក្ស​ភ្លើងទៀន​។ អ្នកឃ្លាំមើល យល់​ថា ជារឿយៗ រដ្ឋាភិបាល​លោក ហ៊ុន សែន តែង​ប្រើ​តុលាការ ជា​ឧបករណ៍​ដើម្បី​ចាប់​អ្នក​រិះគន់​ដាក់​ពន្ធនាគារ ហើយ​តែងតែ​ប្រឌិត​បទ​ចោទប្រកាន់​មិន​សមរម្យ​ផ្សេងៗ ដើម្បី​បង្ខូច​កិត្តិយស​របស់​ពួកគេ​ថែម​ទៀត​ដូចជា​ករណី លោក ថាច់ សេដ្ឋា ជាដើម។

សំណុំរឿង​ចាប់ខ្លួន​អនុប្រធាន​គណបក្ស​ភ្លើងទៀន លោក ថាច់ សេដ្ឋា មិន​បាន​ធ្វើ​ឱ្យ​ស្ថានទូត​លោកខាងលិច សម្ងំ​ស្ងៀម​ឡើយ បើ​ទោះ​ជា​មានការ​ព្រមាន​ពី​លោកនាយក​រដ្ឋមន្ត្រី ហ៊ុន សែន កុំឱ្យ​ជនបរទេស​លូកដៃ​ក៏ដោយ។

ស្ថានទូត​សហរដ្ឋអាមេរិក​បាន​ជំរុញ​ឱ្យ​អាជ្ញាធរ​កម្ពុជា​ពង្រឹង​លទ្ធិ​ប្រជាធិបតេយ្យ សេរី ពហុបក្ស ដោយ​អនុញ្ញាត​ឱ្យ​មាន​ទស្សនៈ​នយោបាយ​ផ្ទុយ ជំរុញ​ការប្រកួតប្រជែង​តាមរយៈ​ការបោះឆ្នោត​ដោយ​សេរី និង​យុត្តិធម៌​សម្រាប់​ភាគី​ទាំងអស់ ព្រមទាំង​លើកកម្ពស់​ការផ្លាស់ប្ដូរ​គំនិត​យោបល់​ដោយ​សេរី និង​បើកចំហ​។ ជាមួយ​គ្នា​នេះ ស្ថានទូត​សហរដ្ឋអាមេរិក​ក៏​ជំរុញ​ឱ្យ​រដ្ឋាភិបាល​កម្ពុ​ជា​បើក​ឱ្យ​មាន​សេរីភាព​នៃ​ការ​ប្រមូលផ្ដុំ និង​ការ​ចងក្រង​ជា​សមាគម ព្រមទាំង​បើក​ឱ្យ​សង្គម​ស៊ីវិល និង​ប្រព័ន្ធ​ផ្សព្វផ្សាយ​បំពេញការងារ​របស់​ខ្លួន​បាន​ដោយ​សេរី​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
គណបក្ស​ភ្លើង​ទៀន​ចាប់​ផ្ដើម​យុទ្ធនាការ​ពង្រឹង​​សមាជិក​បក្ស​តាម​មូលដ្ឋាន ដើម្បី​ទទួល​បាន​​ការ​​គាំទ្រ​​ពី​​ប្រជាពលរដ្ឋ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។