ចអាជ្ញាធរប្រមាណជាង ៥០នាក់ បានរារាំងមិនឱ្យក្រុមស្ត្រីស្រែកតវ៉ា ឬឈរនៅមុខសាលាដំបូងនៅថ្ងៃសុក្រនេះ នោះទេ។ មន្ត្រីសិទ្ធិមនុស្សយល់ថា រដ្ឋាភិបាលគួរពិនិត្យមើល និងពន្លឿននីតិវិធីក្នុងការដោះស្រាយ និងស្វែងរកយុត្តិធម៌ជូនពួកគេ។
ក្រុមស្ត្រីជាសាច់ញាតិសកម្មជនគណបក្សសង្គ្រោះជាតិកំពុងជាប់ឃុំ បាននាំគ្នាធ្វើដំណើរទៅស្ថានទូតអង់គ្លេស ដើម្បីដាក់ញត្តិជាលើកទី៣ ក្រោយតវ៉ានៅមុខតុលាការ។ អាជ្ញាធរបានរារាំងស្ត្រីទាំងនោះមិនឱ្យដើរ ហើយបង្ខំឱ្យក្រុមស្ត្រីឡើងជិះផាស់អាប់វិញ។ ក្រុមស្ត្រីទាំងនោះក៏សម្រេចចិត្តជិះផាស់អាប់មកស្ថានទូតអង់គ្លេស ដើម្បីដាក់ញត្តិ ដោយមានក្រុមសន្តិសុខខណ្ឌ និងប៉ូលិសជិះតាមពួកគេផងដែរ។
ប្រពន្ធរបស់សមាជិកគណបក្សសង្គ្រោះជាតិ លោក កាក កុម្ភារ គឺអ្នកស្រី ព្រំ ចន្ថា ឱ្យដឹងថា លោកស្រីសម្រេចចិត្តមកដាក់ញត្តិនៅស្ថានទូតនេះម្តងទៀត គឺដោយសារប្រទេសនេះ ក៏ជាប្រទេសដែលបានចុះហត្ថលេខីលើសន្ធិសញ្ញាទីក្រុងប៉ារីស ២៣ តុលា ។ លោកស្រី សង្ឃឹមថា ស្ថានទូតនេះនឹងជួយជំរុញទៅរដ្ឋាភិបាលដោះលែងប្តីរបស់ពួកគេឱ្យមានសេរីភាពវិញ៖ «អ៊ីចឹងប្រជាជនត្រូវមានសិទ្ធិទាមទារ សិទ្ធិនឹងការរិះគន់ សិទ្ធិនឹងការរិះគន់ដល់ថ្នាក់ដឹកនាំ ដើម្បីឱ្យគាត់កែតម្រូវឡើងវិញ មិនមែនគេរិះគន់ គេធ្វើទៅខុសទេ មិនមែនទេ អ៊ីចឹងបានថា សូមឱ្យលោកគិតឡើងវិញទៅ។ ក្រុមគ្រួសារខ្ញុំជាប់ពន្ធនាគារ គឺពិបាកណាស់ ខ្ញុំជាស្ត្រី រាល់ថ្ងៃនេះ ដើរតួជាម្តាយ ជាឪពុក ដើម្បីចិញ្ចឹមគ្រួសារ ហើយនៅជំពាក់បំណុលធនាគារសព្វបែបយ៉ាង លើសតែមួយថ្ងៃគឺគេតេមកហើយនិយាយរួមទៅ។ ហើយបើសិនជាមានពួកគាត់នៅ គឺខ្ញុំគ្រាន់តែជួយមានដំណោះស្រាយខ្លះ ជួយខ្ញុំបានខ្លះ ហើយដល់ពេលអញ្ចឹងទៅពិបាកខ្លាំងមែនទែន»។
ចំណែក ប្រពន្ធរបស់សមាជិកគណបក្សសង្គ្រោះជាតិ លោក ស៊ុន ធន់ គឺលោកស្រី សេង ចាន់ថនស្នើឱ្យអាជ្ញាធរ និងរដ្ឋាភិបាលបញ្ឈប់ការធ្វើទុកបុកម្នេញទៅលើប្រជាពលរដ្ឋ ដែលប្រើប្រាស់សិទ្ធិរបស់ខ្លួន ក្នុងការតវ៉ា ការបញ្ចេញមតិ និងបញ្ឈប់ការរឹតត្បិតសេរីភាពទៅលើសកម្មជននយោបាយផងដែរ៖ «សូមឱ្យគាត់ពិចារណា ហើយដោះលែងពួកខ្ញុំមកវិញ ហើយដើម្បីឱ្យប្រទេសជាតិមួយដែលហៅថា ជាលទ្ធិប្រជាធិបតេយ្យពិតប្រាកដឱ្យគេមើលឃើញ ពួកបរទេសខាងក្រៅដែលគេមើលឃើញថា ប្រទេសកម្ពុជាមានលទ្ធិប្រជាធិបតេយ្យពិតប្រាកដ ហើយដោយសារពួកគាត់បានដោះលែងអ្នកនយោបាយដែលគ្មានកំហុសសោះឱ្យមានសេរីភាព»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (Licadho) លោក អំ សំអាត មានប្រសាសន៍ថា ការតវ៉ាដោយសន្តិវិធីនេះ គឺជាសិទ្ធិសេរីភាពរបស់ប្រជាពលរដ្ឋ។ លោកបន្តថា ករណីចាប់ខ្លួនសកម្មជនកន្លងមក គឺជាការរំលោភលើសិទ្ធិរបស់ប្រជាពលរដ្ឋដែលមានចែងក្នុងច្បាប់ហើយ អាជ្ញាធរ គួរតែពិនិត្យមើល និងពន្លឿននីតិវិធីបញ្ហានយោបាយ និងរកយុត្តិធម៌ជូនពលរដ្ឋរងគ្រោះវិញ៖ «ទាំងអង្គការសហប្រជាជាតិ និងអង្គការអន្តរជាតិ គេសំណូមពរឱ្យមានការគោរពទៅតាមគោលការណ៍នៃលទ្ធិប្រជាធិបតេយ្យ និងការគោរពសិទ្ធិមនុស្ស ក៏ប៉ុន្តែអ្វីដែលយើងឃើញកន្លងមក គឺកត្តានៃបញ្ហានយោបាយនេះ វារុញច្រានឱ្យមានបញ្ហាទាក់ទងនឹងការរំលោភសិទ្ធិមនុស្សអ៊ីចឹង ទាក់ទងនឹងរឿងនយោបាយ ខ្ញុំគិតថា អ្នកនយោបាយទាំងអស់គឺគួរតែឈរលើគោលការណ៍ឧត្ដមប្រយោជន៍ជាតិ ឧត្ដមប្រយោជន៍ប្រជាពលរដ្ឋជាធំ ហើយមានការចរចា ដើម្បីបញ្ចប់វិបត្តិនយោបាយទៅ ដើម្បីកុំឱ្យប្រជាពលរដ្ឋដែលគាំទ្រហ្នឹងមានការរងធ្វើទុកបុកម្នេញ ដោយសារបញ្ហានយោបាយ ដោយសារតែគាត់អនុវត្តនូវសិទ្ធិ និងសេរីភាពរបស់គាត់ក្នុងបញ្ហាជីវភាពនយោបាយនោះ»។
របបលោក ហ៊ុន សែន បានចាប់ខ្លួនមន្ត្រីបក្សសង្គ្រោះជាតិ អ្នកនយោបាយ សកម្មជន យុវជន ព្រះសង្ឃ និងមន្ត្រីអង្គការសង្គមស៊ីវិល យ៉ាងហោចណាស់ក៏ជិត ៥០នាក់ ចាប់តាំងពីខែមករា រហូតដល់ចុងខែធ្នូនេះ ។ សកម្មជនបក្សប្រឆាំងច្រើនរងការចោទប្រកាន់ពីបទរួមគំនិតក្បត់ ញុះញង់មិនឱ្យយោធិនស្តាប់បញ្ជា និងប្រមាថថ្នាក់ដឹកនាំរដ្ឋាភិបាល។ ចំណែក ក្រុមសកម្មជនសិទ្ធិមនុស្សនិងបរិស្ថាន និងយុវជនវិញ ពួកគេក៏រងការចោទប្រកាន់ពីបទញុះញង់ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។