អតីតមន្ត្រីក្រសួងកសិកម្មដែលទើបបានចេញពីពន្ធនាគារលោក នី ណាក់ ប្រកាសថាលោកនឹងចូលរួមធ្វើនយោបាយជាមួយគណបក្សប្រឆាំង។ លោក នី ណាក់ បានចាត់ទុកថា ការកាត់ទោសលោកជារឿងអយុត្តិធម៌។
លោក នី ណាក់ ដែលត្រូវបានតុលាការកាត់ទោសឱ្យជាប់ពន្ធនាគារ ១៨ខែ កាលពីឆ្នាំ២០២០ក្រោយលោកបង្ហោះសាររឿងចង់ទិញម៉ាស់ពាក់ឱ្យមាន់នោះប្រាប់វិទ្យុអាស៊ីសេរីនៅថ្ងៃទី១២ខែមិថុនាថា ការចាប់ខ្លួននិងផ្តន្ទាទោសលោកជាប់ពន្ធនាគារថាជាការរំលោភសិទ្ធិមនុស្សយ៉ាងធ្ងន់ធ្ងរទៅលើសិទ្ធិបញ្ចេញមតិនិងជារឿងអយុត្តិធម៌។ លោកបន្តថាលោកនឹងចូលរួមក្នុងវិស័យនយោបាយដើម្បីលើកស្ទួយសិទ្ធិសេរីភាពរបស់ពលរដ្ឋជាមួយគណបក្សដែលស្រលាញ់ប្រជាធិបតេយ្យនិងផលប្រយោជន៍ពលរដ្ឋជាធំ ពិសេស គឺគណបក្សភ្លើងទៀន៖ « ខ្ញុំនិងចងក្រងកសិករទូទាំងប្រទេសដើម្បីបង្កើតជាសមាគមន៍កសិករការពារសិទ្ធិកសិករហ្នឹងដោយមានការចុះបញ្ជីជាមួយក្រសួងមហាផ្ទៃហើយហ្នឹងមួយទៀតនោះគឺ ខ្ញុំបាទនិងចូលរួមក្នុងវិស័យនយោបាយក្នុងការបោះឆ្នោតតំណាងរាស្ត្រឆ្នាំ២០២៣ខាងមុខនេះ»។
លោក នី ណាក់ អំពាវដល់រដ្ឋាភិបាលឲ្យដោះលែងសកម្មជននយោបាយទាំងអស់ដែលកំពុងជាប់ឃុំដើម្បីអោយពួកគាត់មានសិទ្ធិចូលរួមបោះឆ្នោតតំណាងរាស្ត្រនៅឆ្នាំ២០២៣ខាងមុខនេះ។
ពាក់ព័ន្ធរឿងនេះអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាលលោក កត្តា អ៊ន យល់ឃើញថារឿងយុត្តិធម៌ឬអយុត្តិធម៌មិនមែនស្រេចតែបុគ្គលណាម្នាក់លើកឡើងទេគឺសមត្ថកិច្ចធ្វើឡើងតាមអង្គហេតុនិងអង្គច្បាប់។ លោកបន្តថា រដ្ឋធម្មនុញ្ញបានចែងពលរដ្ឋគ្រប់រូបមានសិទ្ធិចូលរួមសកម្មភាពនយោបាយដូច្នេះលោក នី ណាក់ ចូលរួមនយោបាយគឺជាសិទ្ធិរបស់លោក៖ « នៅកម្ពុជាពុំមានការរំលោភសិទ្ធិមនុស្សដូចការលើកឡើងនោះទេ ការលើកឡើងថា កម្ពុជាមានការរំលោភសិទ្ធិមនុស្ស គឺជាការចោទប្រកាន់ ជាការលាបពណ៍មកលើប្រទេសជាតិខ្លួន ប្រជាជនខ្លួនឯង ជាការសន្និដ្ឋាន ជាការវាយតម្លៃ និងការចោទប្រកាន់ដោយគ្មានមូលដ្ឋានត្រឹមត្រូវ និងភាពពិតទាល់តែសោះ »។
លោក នី ណាក់ ត្រូវបានដោះលែងពីពន្ធនាគានៅថ្ងៃទី១០ ខែមិថុនា ក្រោយពីលោកអនុវត្តទោសក្នុងពន្ធនាគារយៈពេល ១៨ខែ។ លោកត្រូវបានសាលាដំបូងរាជធានីភ្នំពេញផ្ដន្ទាទោសដាក់ពន្ធនាគារ១៨ខែ និងពិន័យជាប្រាក់ចំនួន ២លានរៀល កាលពីថ្ងៃទី១២ខែធ្នូ ២០២០ក្រោមការចោទប្រកាន់ពីបទជេរប្រមាថជាសាធារណៈនិងញុះញង់ឱ្យមានការរើសអើងបន្ទាប់ពីលោកបានបង្ហោះសារផ្សព្វផ្សាយពីការទិញម៉ាស់ពាក់ឱ្យកូនមាន់និងត្រៀមដាក់ទ្រុងមាន់ក្នុងគ្រាមានអាសន្នខណៈកម្ពុជានិងពិភពលោកកំពុងផ្ទុះជំងឺកូវីដ-១៩កាលចុងឆ្នាំ២០១៩។
អង្គការសិទ្ធិមនុស្សជាតិនិងអន្តរជាតិបានថ្កោលទោសការចាប់ខ្លួននិងការផ្តន្ទាទោសលោក នី ណាក់ ថាជាការរំលោភសិទ្ធិមនុស្សនិងបំពានច្បាប់កម្ពុជាខ្លួនឯង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។