បណ្ឌិត ​សេង សារី ​មិនទាន់​មាន​ទំនុកចិត្ត​វិល​ចូល​កម្ពុជា​វិញ

ដោយ មាន ឫទ្ធិ
2021-09-20
Share
បណ្ឌិត ​សេង សារី ​មិនទាន់​មាន​ទំនុកចិត្ត​វិល​ចូល​កម្ពុជា​វិញ លោកនាយករដ្ឋមន្ត្រី ហ៊ុន សែន ប្រកាស​​ឲ្យ​​តុលាការ​បញ្ឈប់​ដីកា​តាម​ចាប់ខ្លួនបណ្ឌិត សេង សារី នៅថ្ងៃទី២០ ខែកញ្ញា ឆ្នាំ២០២១។
រូប៖ RFA

អ្នកស្រាវជ្រាវ​ការអភិវឌ្ឍសង្គម​បណ្ឌិត សេង សារី ​មិនទាន់​មាន​ទំនុក​ចិត្តវិលទៅ​កម្ពុជា​វិញ​ឡើយទេ ​ទោះបីជា​មេដឹកនាំ​របបក្រុងភ្នំពេញលោក ហ៊ុន សែន ​ប្រកាស​​ឲ្យ​​តុលាការ​បញ្ឈប់​ដីកា​តាម​ចាប់ខ្លួនលោក​ក្តី។ ការលើកឡើងបែបនេះ​ ដោយសារ​លោក​មិនទាន់​ឃើញ​តុលាការប្រកាស​ទម្លាក់​ចោល​ដីកា​ចាប់ខ្លួន​ និង​បទចោទ​ប្រកាន់​លើ​រូបលោក​នៅ​ឡើយ។

បណ្ឌិត សេង សារី ​ដែល​កំពុង​ស្នាក់នៅ​និង​គេច​ខ្លួន​ក្នុងប្រទេសថៃ ​​ សាទរ​ដោយប្រយ័ត្នប្រយែង​ចំពោះ​ការផ្លាស់ប្តូរ​​ជំហរ​របស់​លោកនាយករដ្ឋមន្ត្រី ហ៊ុន សែន ទៅលើ​ការវិភាគបែបសេនារីយ៉ូ​របស់​លោក។

បណ្ឌិត​ សេង សារី ​ថ្លែងប្រាប់​អាស៊ីសេរី​នៅ​រសៀល​ថ្ងៃទី២០ ​ខែកញ្ញាថា ​លោក​ត្រេកអរ និង​អរគុណ​ដល់​​លោក​ ហ៊ុន សែន​ ដែល​បាន​យោគយល់​ចំពោះ​ទស្សនៈ​​វិភាគ​របស់​លោក​កន្លង​មក។ ​លោក​ចាត់ទុកថា​ នេះជា​សញ្ញាណ​ល្អ​មួយ​ ដែល​ប្រមុខ​រដ្ឋាភិបាលចាប់​ផ្តើម​ស្តាប់​មតិយោបល់​របស់​អ្នកវិភាគ ​ឬ​បញ្ញវន្ត​ ដើម្បី​រួម​ចំណែក​ដោះ​ស្រាយ​បញ្ហាសង្គម​ និង​នយោបាយ​នៅកម្ពុជា។ ទោះជាយ៉ាងណា​អ្នកវិភាគនយោបាយរូបនេះយល់ថា ​លោកនៅ​មិនទាន់​មាន​សុវត្ថិភាព​ទាំងស្រុង​នៅឡើយទេ ​ព្រោះ​លោក​មិន​ទាន់​ឃើញ​តុលាការ​បញ្ឈប់​ដីកា​ចាប់ខ្លួន​ និង​ទម្លាក់​ចោល​បទចោទ​ប្រកាន់​តាម​ការ​ស្នើសុំ​របស់​លោក​ ហ៊ុន សែន ​នៅឡើយទេ៖ «ដូចខ្ញុំ​បាន​លើកឡើង​អ៊ីចឹង​ បើខ្ញុំ​អត់ទាន់​ឃើញ​តុលាការទម្លាក់​ចោល​ករណី​ខ្ញុំទេ​ ខ្ញុំ​ក៏​ពិបាក​សម្រេច​ចិត្តថា ​តើខ្ញុំ​គួរ​ត្រឡប់​ទៅ​កម្ពុជា​ដែរ​ឬទេ​ ព្រោះ​វា​ទាក់ទង​នឹង​សុវត្ថិភាព​របស់ខ្ញុំ​ដែរ។ ប៉ុន្តែ​យ៉ាងណាក៏ដោយ​ខ្ញុំ​សង្ឃឹម​ថា ​ខ្ញុំ​នឹង​ទទួលបាន​ការ​ទម្លាក់​ចោល​បទចោទ​របស់​ខ្ញុំ​ក្នុង​ពេល​ឆាប់ៗ»

មេដឹកនាំ​របបក្រុងភ្នំពេញ ​លោក ​ហ៊ុន សែន​ នៅ​ព្រឹក​ថ្ងៃទី​២០ ​ខែកញ្ញា ​បាន​ប្រកាសនៅលើទំព័រហ្វេសប៊ុករបស់លោកពីការផ្លាស់ប្តូរ​ចិត្ត​របស់​លោកវិញ​ ​ដោយ​ស្នើ​ដល់​​ស្ថាប័ន​តុលាការឲ្យ​​ពិនិត្យ​ពិចារណា​​បញ្ឈប់​ដីកា​ចាប់​ខ្លួន​​បណ្ឌិត សេង សារី។ លោក ហ៊ុន សែន ​បញ្ជាក់ថា ​ការ​បកស្រាយ​ពន្យល់​របស់​បណ្ឌិត ​សេង សារី ​នៅលើ​បណ្តាញ​​សារ​ព័ត៌មាន​កន្លង​មក ​គឺ​សម​ហេតុ​ផល​ និង​អាច​ទទួល​យក​បានថា​ ជាការ​វិភាគ​បែប​សេណារីយ៉ូ ​មិន​មែន​ជាគាំទ្រ​គំនិត​ផ្តួច​ផ្តើម​បង្កើត​រដ្ឋាភិបាល​បង្រួបបង្រួម​ជាតិ​ ដែល​ប្រកាស​ដោយ​លោក សម រង្ស៊ី ​នោះ​ទេ។ ទន្ទឹមគ្នានេះ ​លោក ហ៊ុន សែន ​លើក​ទឹកចិត្ត​ឲ្យ​បណ្ឌិត​ សេង សារី ​បន្ត​កិច្ចការ​ស្រាវ​ជ្រាវ​ និង​វិភាគ​បញ្ហា​សង្គម​បន្តទៀត ​ដើម្បី​ជា​ប្រយោជន៍​ដល់​ការ​សិក្សា​ស្រាវជ្រាវ​ផ្នែក​វិទ្យាសាស្ត្រ​សង្គម។ មេដឹក​នាំ​របប​ឯកបក្សរូបនេះ ​ក៏បាន​អំពាវនាវ​ដល់​ភរិយា​ កូន ​និង​ឪពុក​ម្តាយ​របស់​បណ្ឌិត សេង សារី ​កុំឲ្យ​មាន​ការ​ព្រួយបារម្ភជុំវិញ​បញ្ហា​នេះ​ទៀត។

ការស្នើឲ្យ​តុលាការ​បញ្ឈប់​ការ​ចាប់ខ្លួន​អ្នកវិភាគ​នយោបាយ​នេះ​ ធ្វើឡើង​ ៤ ថ្ងៃ​ក្រោយ​ពីលោក ​ហ៊ុន សែន ​បាន​ប្រតិកម្មខ្លាំង​ និង​ប្រកាស​​តាម​​ចាប់​ខ្លួនបណ្ឌិត​ សេង សារី​ ពាក់​ព័ន្ធនឹង​ការ​​បង្ហោះ​ទស្សនៈ​វិភាគ​នៅ​លើ​បណ្ដាញ​សង្គម​ហ្វេសប៊ុក (Facebook) អំពី​លក្ខខណ្ឌ ​៦​ចំណុច​ដែល​អាច​បង្កើត​រដ្ឋា​ភិ​បាល​បង្រួប​បង្រួម​ជាតិ​តាម​ការ​អំពាវនាវ​របស់​លោក សម រង្ស៊ី។ បើតាម​បណ្ឌិត សេង សារី លក្ខខណ្ឌទាំង ៦ចំណុចនេះ រួមមាន កម្លាំង​អ្នកគាំទ្រគណបក្សប្រឆាំង កម្លាំងមហាជន កម្លាំងយុវជន កម្លាំងផ្ទៃក្នុងគណបក្ស​កាន់អំណាច កម្លាំងប្រដាប់អាវុធ និង​កម្លាំងអន្តរជាតិ ដែលលោក​ថា អាចធ្វើឱ្យ​នយោបាយ​នៅកម្ពុជា​ប្រែប្រួលបាន។ លោក ហ៊ុន សែន ថែមទាំងព្រមានបណ្ឌិត សេង សារី ថាអាចប្រឈមនឹង​ការបាញ់ចោលផងប្រសិនបើលោកគាំទ្រអ្វីមួយ ​ដែលលោក ហ៊ុន សែន ហៅថា «ចលនាឧទ្ទាម» ហើយបាន​ជំរុញឱ្យបណ្ឌិត សេង សារី លុបទស្សនៈវិភាគ​នោះ​ចេញ​ពីទំព័រហ្វេសប៊ុករបស់​លោក បើមិនចង់ប្រឈមនឹងការចាប់ខ្លួន។ ប៉ុន្តែបណ្ឌិត សេង សារី នៅតែ​រក្សាជំហរ​របស់លោកដដែល។

ជុំវិញការបន្ទន់​ឥរិយាបថ​របស់​លោក ហ៊ុន សែន នេះ ​វិទ្យុអាស៊ីសេរី ​​មិនទាន់​អាច​ទាក់ទង​សុំការ​ឆ្លើយតប​ពីអ្នកនាំពាក្យ​ក្រសួងយុត្តិធម៌​លោក ជិន ម៉ាលីន ​និង​អ្នកនាំពាក្យអយ្យការអម​សាលាដំបូង​រាជ​ធានីភ្នំពេញលោក ប្លង់ សុផល ​បានទេ​ដោយ​ទូរស័ព្ទ​ចូល​ពុំ​មាន​អ្នកទទួល។

បណ្ឌិត​ សេង សារី ​ចាត់ទុកថា ​ជាសំណាងល្អដែល​ក្នុងថ្ងៃលោក ហ៊ុន សែន ប្រកាសតាម​​ចាប់ខ្លួននោះលោក​កំពុង​ស្ថិត​ក្នុង​ប្រទេសថៃ ​បើពុំនោះទេ ​លោក​ប្រាកដ​ជា​មិន​អាច​រួច​ខ្លួន ​ហើយ​គ្មាន​ឱកាស​​បកស្រាយ​ឲ្យ​លោក​នាយករដ្ឋមន្ត្រី ​ឈប់​ភ័ន្ត​ច្រឡំ​លើ​​ការ​វិភាគ​របស់​លោក​​នោះទេ៖ «ខ្ញុំ​សង្ឃឹម​ថា ​ទៅមុខ​ទៀត​ប្រមុខ​រដ្ឋាភិបាល​​នឹង​​មានការពិចារណា​ឲ្យ​បាន​ល្អិតល្អន់​ទៅលើ​សំណេរ​លើ​បណ្តាញសង្គម​ ជាពិសេស​អ្នក​ដែល​មាន​និន្នាការផ្ទុយ​ក្តី ​អ្នកដែល​សរសេរសំណេរ​ដោយ​មិន​បាន​យល់​ដឹង​គ្រប់ជ្រុងជ្រោយ​ក្តី ​សូមឲ្យ​រដ្ឋាភិបាល​ ផ្តល់ការ​យោគយល់​ឲ្យបាន​ខ្ពស់​ចំពោះ​ទស្សនៈ​ដែល​មាន​លក្ខណៈ​ផ្ទុយ​ ឬ​ទស្សនៈ​នយោបាយ​ដែល​ពលរដ្ឋ​ចង់បាន​។ ខ្ញុំគិតថា ​ការយោគ​យល់​នេះ ​មិនមែន​សម្រាប់​តែខ្ញុំ​ទេ​ គឺ​សម្រាប់​សកម្មជន​នយោបាយ ​សម្រាប់​សង្គមស៊ីវិល ​ក៏ដូច​ជា​អ្នកវិភាគ​ផ្សេង​ទៀត»

មន្ត្រីសង្គមស៊ីវិល ​ស្វាគមន៍​ចំពោះការ​បញ្ឈប់​ដីកា​ចាប់​ខ្លួន​បណ្ឌិត សេង សារី ​និង​ទទូចឲ្យ​រដ្ឋាភិបាល​បើកចិត្ត​ឲ្យ​ទូលាយ​ទទួល​យក​មតិយោបល់​ចម្រុះ​របស់​ប្រជា​ពល​​រដ្ឋ​ទូទៅ ទាំង​​អ្ន​ក​វិភាគ​ និង​បញ្ញវន្ត​ជាដើម។

នាយិការមជ្ឈមណ្ឌលសិទ្ធិមនុស្សកម្ពុជាអ្នកស្រី ​ចក់ សុភាព ​ថ្លែងថា ​ប្រជាពលរដ្ឋ​គ្រប់​រូប​មាន​សិទ្ធិសេរីភាព​បញ្ចេញ​មតិ​ដោយ​គ្មាន​​ការ​ភ័យខ្លាច ​ឬ​ប្រឈម​ការដាក់​​ទោស​ទណ្ឌ​តាម​ផ្លូវ​តុលាការ​នោះទេ ​ ហើយ​រដ្ឋាភិបាល​មាន​កាតព្វកិច្ច​លើកស្ទយ​ និង​ធានា​បរិយាកាស​អំណោយ​ផល​ ព្រមទាំង​​ស្តាប់​នូវ​មតិយោបល់​ពី​គ្រប់ភាគី​​ដើម្បី​ធ្វើឲ្យ​ប្រ​សើរ​ឡើង​នូវ​អភិបាលកិច្ច​របស់​ខ្លួន។ អ្នកស្រី​បន្តថា ​ករណីគំរាមកំហែង​ និង​​តាម​ចាប់​ខ្លួន​បណ្ឌិត​ សេង សារី ​នេះ ​មិនគួរ​កើត​មាន​តាំងពី​ដំបូង​មកម្ល៉េះ​។ អ្នកស្រីយល់​ថា ​ដើម្បី​ឲ្យ​បណ្ឌិត ​សេង សារី​ និង​ពលរដ្ឋ​ទូទៅមាន​ទំនុកចិត្ត​ឬ​មានភាព​កក់ក្តៅ​នោះ​ រដ្ឋាភិបាល​ត្រូវ​ស្តាស្ថាន​ភាព​សិទ្ធិមនុស្ស​និង​ប្រជាធិបតេយ្យ​ឲ្យ​ល្អ​ប្រសើរ​ឡើងវិញ ​និង​ធានា​នូវប្រព័ន្ធ​​តុលាការមួយ​​ដែល​ឯករាជ្យ​៖ «សំខាន់បំផុត ​គឺការ​ធានា​នូវ​បរិយាកាស​​អំណោយផលជា​លក្ខណៈ​ប្រព័ន្ធ ​មិនមែន​ចោះៗទេ​ គឺជា​លក្ខណៈ​ប្រព័ន្ធ​ គឺ​ត្រូវ​ធានាថា ​ប្រជាពលរដ្ឋមាន​សិទ្ធិសេរីភាព​ពេញលេញ ​ក្នុងការ​បញ្ចេញមតិ ​ហើយ​មិនគួរ​មាន​ការចោទ​ប្រកាន់​ ឬក៏​ចាប់ខ្លួន​ដោយ​គ្រាន់តែ​ពលរដ្ឋ​បញ្ចេញមតិ​ទេ»។

ចំពោះការផ្លាស់ប្តូរ​ចិត្ត​របស់​លោក ហ៊ុន សែន នេះដែរ ​ប្រជាពលរដ្ឋ​មួយចំនួនបង្ហាញ​សារ​គាំទ្រ ​និង​មួយ​ចំនួន​ទៀត ​នៅ​មិនទាន់​ជឿជាក់​នៅឡើយទេ ​ដោយ​ពួក​គេ​​យល់ថា លោក​ ហ៊ុន សែន ​កំពុង​ប្រើ​គុណធម៌​ក្លែងក្លាយ។ មូលហេតុ​ដែល​ពលរដ្ឋ​មួយចំនួន មិនទាន់​ជឿជាក់​បែបនេះ​ ព្រោះ​កន្លងទៅ​លោក ហ៊ុន សែន ​តែង​លេប​សម្តី​របស់ខ្លួន​វិញ ​ដូចជា​ករណី​លោក ហ៊ុន សែន ​មិន​គោរព​តាមការ​​សន្យា​ក្នុងការ​បញ្ឈ​ប់​ការ​​ចាប់​ចង ឬ​​ធ្វើ​ទុក្ខ​បុក​ម្នេញ​សកម្មជន​បក្សប្រឆាំង​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល