ថ្លែងទៅកាន់ក្រុមអ្នកយកព័ត៌មាននៅឯវិមានរដ្ឋសភា នៅថ្ងៃទី២៤ កញ្ញា លោកនាយករដ្ឋមន្ត្រីបានថ្លែងថា គណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា (ខុមហ្វ្រែល) បានធ្វើឲ្យសង្គមចលាចលមុនថ្ងៃបោះឆ្នោត ដោយសារខុមហ្វ្រែល បានប្រកាសថា ទឹកខ្មៅសម្រាប់ជ្រលក់ដៃសម្គាល់អ្នកបោះឆ្នោតដែលចែកចាយដោយ គ.ជ.ប នោះ អាចលុបលាងជ្រះ។
លោកនាយករដ្ឋមន្ត្រីបានបញ្ជាក់ថា ការអះអាងរបស់ខុមហ្វ្រែលនោះ ថាជារឿងមិនពិត ដោយលោកបានបង្ហាញចង្អុលដៃរបស់លោកដែលជ្រលក់ក្រោយបោះឆ្នោតថ្ងៃទី២៨ កក្កដា នោះ ធ្វើជាភស្តុតាងថា ទឹកខ្មៅនោះមិនអាចលុបជ្រះបានទេ ហើយមានស្នាមជាប់ម្រាមដៃរហូតមកទល់ពេលនេះ មានរយៈពេលជិត ២ខែហើយ។
ជាងនេះទៅទៀត លោក ហ៊ុន សែន ថា ខុមហ្វ្រែល ត្រូវទទួលខុសត្រូវបញ្ហានេះ៖ «ហើយនេះទឹកខ្មៅដែលខុមហ្វ្រែល បានខិតខំមុនប៉ុន្មានម៉ោង មិនបោះឆ្នោត ធ្វើឲ្យមានការឆោឡោ ថាទឹកខ្មៅជូតជ្រះ។ ខ្ញុំបានប្រើអស់លទ្ធភាពដើម្បីសាកល្បង ប៉ុន្តែទីចុងបំផុត ថ្ងៃនេះជិត ២ខែហើយមិនទាន់រលុបទេៗ។ អ៊ីចឹង! ខាងខុមហ្វ្រែល ត្រូវតែយល់ខ្លួនឯង…។ ដូច្នេះតើអ្នកនិយាយធ្វើឲ្យឆោឡោមុន ការបោះឆ្នោតប៉ុន្មានម៉ោង ត្រូវទទួលខុសត្រូវយ៉ាងណាអំពីសាធារណៈមតិ អំពីខ្លួនជាអង្គការក្រៅរដ្ឋាភិបាល? ហើយទទួលបន្ទុកអំពីអ្វីដែលខ្លួនហៅថា ការបោះឆ្នោត។ ខ្លួនត្រូវទទួលខុសត្រូវប៉ុណ្ណា តើត្រូវសុំទោសចំពោះប្រជាជាតិទាំងមូលយ៉ាងណា អំពីការដែលខ្លួនធ្វើឆោឡោមុនការបោះឆ្នោតតែប៉ុន្មានម៉ោង? ខ្ញុំគិតថា ហោចណាស់ខ្លួនត្រូវទទួលខុសត្រូវខាងផ្នែកសីលធម៌ដែរ ព្រោះវាទាក់ទងនឹងរឿងធំណាស់»។
គេនៅចាំបានថា មុនថ្ងៃបោះឆ្នោតមួយថ្ងៃ គឺនៅថ្ងៃទី២៧ កក្កដា ឆ្នាំ២០១៣ ខុមហ្វ្រែល បានធ្វើសន្និសីទកាសែតមួយបង្ហាញការអំពីសាកល្បងលុបទឹកខ្មៅដែលចែកចាយដោយ គ.ជ.ប នោះ អាចលុបជ្រះដោយងាយ បន្ទាប់ពីជ្រលក់ដៃហើយក្នុងរយៈពេលពីរ ឬបីម៉ោងក្រោយបោះឆ្នោតរួច។ កាលនោះ ខុមហ្វ្រែល បានបង្ហាញថា ទឹកខ្មៅនោះអាចលុបជ្រះបានដោយងាយ ដោយប្រើសារជាតិគីមីដែលងាយរកបំផុតនៅទីផ្សារ។
ឆ្លើយតបទៅនឹងការអះអាងរបស់លោកនាយករដ្ឋមន្ត្រីនេះ នាយកប្រតិបត្តិអង្គការ ខុមហ្វ្រែល លោក គល់ បញ្ញា បញ្ជាក់នៅថ្ងៃទី២៤ កញ្ញា ថា មន្ត្រីខុមហ្វ្រែល បានធ្វើសន្និសីទកាសែតនៅពេលនោះ ព្រោះព្រួយបារម្ភថា ទឹកខ្មៅដែលលុបជ្រះនោះ អាចធ្វើឲ្យមនុស្សម្នាក់អាចបោះឆ្នោតបានច្រើនដងនាំឲ្យប៉ះពាល់ដល់លទ្ធផលបោះឆ្នោត។
លោកបានរំលឹកថា ការធ្វើការពិសោធសាកល្បងលុបទឹកខ្មៅនៅពេលនោះ ក៏ធ្វើឡើងតាមសំណើរបស់ គ.ជ.ប ដែល គ.ជ.ប ចង់ឲ្យតំណាងបក្សនយោបាយ និងអង្គការមិនមែនរដ្ឋាភិបាលដែលធ្វើការទាក់ទងនឹងការបោះឆ្នោតនោះ មានជំនឿថា ទឹកខ្មៅនោះមិនអាចលុបជ្រះបានទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។