រដ្ឋាភិបាល​កាណាដា​ថា នឹង​បន្ត​តាម​ដាន​ករណី លោក កឹម សុខា

ដោយ ខែ សុណង
2019.12.19
Share on WhatsApp
Share on WhatsApp
កឹម សុខា អាលីសិន ស្ទេវ៉ាត់ (Allison Stewart) 121919 អ្នកស្រី អាលីសិន ស្ទេវ៉ាត់ (Allison Stewart) ភារធារី​នៃ​ស្ថានទូត​កាណាដា​ប្រចាំ​កម្ពុជា ជួប​សួរ​សុខ​ទុក្ខ​លោក កឹម សុខា នៅ​ផ្ទះ​ឯ​ទួលគោក រាជធានី​ភ្នំពេញ ថ្ងៃ​ទី១៩ ខែ​ធ្នូ ឆ្នាំ២០១៩។
រូប៖ RFA

ប្រធានគណបក្សសង្គ្រោះជាតិ ដែលត្រូវបានរដ្ឋាភិបាលលោក ហ៊ុន សែន រំលាយចោល គឺ លោក កឹម សុខា បន្ត​ទទួល​ជួប​ភារធារី​នៃ​ស្ថានទូត​ប្រទេស​កាណាដា​ប្រចាំ​កម្ពុជា នៅ​ថ្ងៃ​ទី១៩ ខែ​ធ្នូ។ អ្នក​​វិភាគ​​នយោបាយ​​មើល​​ឃើញ​​ថា ការ​ជួប​សួរ​សុខ​ទុក្ខ​ពី​​សំណាក់​អ្នក​ការ​ទូត​ប្រទេស​សេរី​ធំៗ នេះ ​មិន​មែន​ជា​រឿង​​សាមញ្ញ​​នោះ​ទេ ប៉ុន្តែជាចេតនាបង្ហាញថា រដ្ឋាភិបាល​ប្រទេស​​ទាំង​នោះ នៅ​តែ យក​​ចិត្ត​​ទុក​ដាក់​ខ្លាំង​បំផុត ចំពោះ​សិទ្ធិ​សេរីភាព​របស់​មេ​បក្ស​ប្រឆាំង​រូប​នេះ ដែល​ពួក​គេ​​យល់​ថា ការ​​ចាប់​​ឃុំ​ឃាំង និង​​ចោទ​ប្រកាន់​កន្លង​មក ជា​រឿង​អយុត្តិធម៌ និង​គ្មាន​​មូលដ្ឋាន។

នាយខុទ្ទកាល័យរបស់លោក កឹម សុខា គឺលោក មុត ចន្ថា ឲ្យដឹងថា លទ្ធផល​ជំនួប​​រវាង​​លោក កឹម សុខា និង​​ភារធារី​​នៃ​​ស្ថានទូត​​កាណាដា​​​ប្រចាំ​​កម្ពុជា អ្នកស្រី អាលីសិន ស្ទេវ៉ាត់ (Allison Stewart) គឺ​​ផ្តោត​​​សំខាន់​​លើ​​ការ​​សួរ​​សុខ​ទុក្ខ និង​​ពិភាក្សា​​លើ​​ការងារ​​មួយ​​ចំនួន ដែល​​ជា​​ប្រយោជន៍​​សម្រាប់​​ជាតិ និង​​​ប្រជាពលរដ្ឋ​​ខ្មែរ។

លោក មុត ចន្ថា សរសេរនៅលើទំព័រហ្វេសប៊ុករបស់ខ្លួនថា ​អ្នកស្រី អាលីសិន ស្ទេវ៉ាត់ (Allison Stewart) ថ្លែងថា ប្រទេសកាណាដា នឹងនៅតែបន្តជួយ និងគាំទ្រដំណើរការប្រជាធិបតេយ្យ និង​ការលើកកម្ពស់ការគោរពសិទ្ធិមនុស្ស និង​សេរីភាព​ជា​មូលដ្ឋាន​នៅ​កម្ពុជា។ ភារៈធារីនៃស្ថានទូតប្រទេសកាណាដារូបនេះ បន្តថា រដ្ឋាភិបាលកាណាដា ក៏​​នឹង​​បន្ត​​តាម​​ដាន​​យ៉ាង​យក​ចិត្ត​ទុក​ដាក់ ចំពោះ​ស្ថានភាព និង​​ករណី​របស់​លោក កឹម សុខា ជាពិសេស ក្នុង​ពេល​សវនាការ​ជំនុំ​ជម្រះ​ក្តី​នៅ​ពេល​ខាង​មុខ​នេះ។

ក្នុងជំនួបនោះ លោក កឹម សុខា ថ្លែងអំណរគុណចំពោះរដ្ឋាភិបាលកាណាដា ដែលបានជួយគាំទ្រ ដំណើរ​ការ​ប្រជាធិបតេយ្យ និងការគោរពសិទ្ធិមនុស្សនៅកម្ពុជា ហើយ​លោក​ស្វាគមន៍​ចំពោះ​ការ​ពង្រឹង និង​ពង្រីក​ទំនាក់ទំនង​ល្អ​រវាង​កម្ពុជា​ជាមួយ​បណ្តា​​ប្រទេស​នានា ដើម្បី​បម្រើ​​ការពារ និង​កសាង​ផល​ប្រយោជន៍​សម្រាប់​ប្រទេស និង​ប្រជាពលរដ្ឋ​ខ្មែរ។

ការទទួលជួបជាមួយអ្នកការទូតបរទេសជាបន្តបន្ទាប់គ្នានៅផ្ទះ​របស់​លោក ស្ថិត​​នៅ​​ខណ្ឌ​​ទួល​​គោក ក្រុង​​ភ្នំពេញ​នេះ គឺ​​បន្ទាប់​ពី​តុលាការ​របប​ក្រុង​ភ្នំពេញ កាល​​ពី​​ថ្ងៃ​ទី១០ ខែ​​វិច្ឆិកា អនុញ្ញាត​​ឱ្យ​លោក កឹម សុខា មាន​​សេរីភាព​​អាច​​ធ្វើ​​ដំណើរ​​បាន​​​នៅ​​ក្នុង​​ប្រទេស​​បាន ប៉ុន្តែ​​មិន​​ឱ្យ​​ហួស​​ពី​​ព្រំ​​ប្រទល់​​ដែន​​របស់​​កម្ពុជា​​ឡើយ ហើយ​​ក៏​​មិន​​ឲ្យ​​លោក​​ធ្វើ​​សកម្មភាព​​នយោបាយ​​បាន​​នោះ​​ដែរ។ ក្រៅ​​ពី​នេះ តុលាការ​បាន​តម្រូវ​ឱ្យ​លោក​ឆ្លើយ​តប​នឹង​ការ​កោះហៅ​ពី​គ្រប់​សមត្ថកិច្ច។

សមាជិកក្រុមអ្នកវិភាគវ័យក្មេង លោក បុង ដែត លើកឡើងថា ករណី​អ្នក​ការទូត​ប្រទេស​សេរី​ធំៗ បណ្តាក់​គ្នា​ទៅ​ជួប​សួរ​សុខ​តុក្ខ​លោក កឹម សុខា ដល់​ផ្ទះ​នេះ​ គឺ​បង្ហាញ​ថា ពួក​គេ​យក​ចិត្ត​ទុក​ដាក់​យ៉ាង​​​ខ្លាំង​ ចំពោះ​​សិទ្ធិ​​សេរីភាព​​របស់​មេ​បក្ស​ប្រឆាំង​រូប​នេះ ខណៈ​​តុលាការ​កម្ពុជា​គ្រោង​បើក​សវនាការ​ជំនុំ​ជម្រះ​នៅ​ពាក់​កណ្តាល​ខែ​មករា​ខាង​មុខ។ លោក​​បន្ត​​ថា កាយវិការ​នេះ ក៏​ជំរុញ​តុលាការ ដែល​ស្ថិត​ក្រោម​សម្ពាធ​របស់​លោក ហ៊ុន សែន ឱ្យ​​ទម្លាក់​ចោល​ការ​ចោទ​ប្រកាន់​លោក កឹម សុខា ដែរ បើ​​ពុំ​​នោះ​​ទេ រដ្ឋាភិបាល​លោក ហ៊ុន សែន នឹង​ទទួល​រង​ទណ្ឌកម្ម​ធ្ងន់ធ្ងរ​ទាំង​លើ​បុគ្គល​ជា​​មន្ត្រី​ធំៗ ផ្ទាល់​ផង និង​​ប្រទេស​កម្ពុជា​ផង ដូច​ដែល​អាមេរិក​​​បាន​​ដាក់​​ទណ្ឌកម្ម​​បង្កក​​ទ្រព្យ​​សម្បត្តិ​​មន្ត្រី​​ជំនិត​​របស់​​លោក ហ៊ុន សែន ពីរ​​នាក់ ​គឺ​​លោក​​ផ្កាយ៤ គន់ គីម និង​​ក្រុម​​គ្រួសារ ព្រម​ទាំង​​ឈ្មួញ​​​ឈើ​​ដ៏​​ល្បី​​នៅ​​ស្រុក​​ខ្មែរ គឺ​​ឧកញ៉ា ទ្រី ភាព តាម​​​រយៈ​​ការ​​ប្រើប្រាស់​​​ច្បាប់ Global Magnitsky Act«អង្គ​ទូត​ខ្លះ​ខំ​មក​ប្រទេស​ថៃ​ដោយសារ​ខ្លះ​មាន​ទីស្នាក់ការ​នៅ​ទី​នោះ គឺ​ស​បញ្ជាក់​ថា មាន​ការ​យក​ចិត្ត​ទុក​ដាក់​ខ្លាំង​ចំពោះ​កម្ពុជា ជា​ពិសេស អ្នកនយោបាយ ដែល​ត្រូវ​រង​សម្ពាធ​ពី​គណបក្ស​កាន់​អំណាច។ បើ​សិន​ជា​ការ​កាត់​ទោស​លោក កឹម សុខា នៅ​ពេល​ខាង​មុខ នៅ​តែ​មាន​ភាព​ល្អ​ប្រសើរ ខ្ញុំ​គិត​ថា អ្នក​ការ​ទូត​ទាំង​នេះ អាច​រុញ​ឲ្យ​សហគមន៍​អន្តរជាតិ ដាក់​ទណ្ឌកម្ម​លើ​គណបក្ស​ប្រជាជន​កម្ពុជា ដែល​មិន​បាន​ធ្វើ​ឲ្យ​លទ្ធិ​ប្រជាធិបតេយ្យ​ល្អ​ប្រសើរ​ឡើង»

ការប្រកាសបន្តតាមដានករណីលោក កឹម សុខា ពីក្រុមប្រទេសប្រធាធិបតេយ្យនេះ គឺ​បន្ទាប់​ពី​ចៅក្រម​​ស៊ើបសួរ​​​សាលា​ដំបូង​​រាជធានី​​ភ្នំពេញ លោក គី ឫទ្ធី បាន​​សម្រេច​​បញ្ជូន​​​សំណុំ​​រឿង​សន្ទិដ្ឋិភាព ឬ​ការ​ត្រូវរ៉ូវ​គ្នា​ជាមួយ​បរទេស​របស់​លោក កឹម សុខា ដែល​​ជា​សំណុំ​រឿង​មាន​ចរិត​នយោបាយ និង​​ធ្វើ​ឡើង​តាម​​ការ​ចង់​បាន​​របស់​លោក ហ៊ុន សែន ​ទៅ​ជំនុំ​ជម្រះ​​ថ្ងៃ​ទី១៥ ខែ​មករា។

រហូត​មក​ដល់​ពេល​នេះ មាន​ឯក​អគ្គ​រដ្ឋ​ទូត​បរទេស​ជាង ១០ហើយ ដែល​បាន​បណ្ដាក់​គ្នា​ចូល​ជួប​សួរ​សុខ​ទុក្ខ លោក កឹម សុខា រួម​មាន ​ឯកអគ្គរដ្ឋទូត​បារាំង សហរដ្ឋ​អាមេរិក អាល្លឺម៉ង់ អូស្ត្រាលី សហភាព​អឺរ៉ុប ជប៉ុន ​អង់គ្លេស ប្រទេស​ស្វីស ស៊ុយអែត ហ្វាំងឡង់ បែលហ្ស៊ិក ប្រទេស​ណូវែលហ្សេឡង់ និង​ប្រទេស​កាណាដា​នេះ។ តំណាង​រដ្ឋាភិបាល​នៃ​ប្រទេស​សេរី​ធំៗ ទាំង​នេះ នៅ​តែ​ជំរុញ​ដល់​រដ្ឋាភិបាល​កម្ពុជា​ ឲ្យ​ស្តារ​លទ្ធិ​ប្រជាធិបតេយ្យ ការ​គោរព​សិទ្ធិ​មនុស្ស​ឡើង​វិញ ដោយ​ការ​ទម្លាក់​ចោល​រាល់​បទ​ចោទ​ប្រកាន់​លើ​លោក កឹម សុខា និង​ដោះលែង​ជន​​ទាំង​ឡាយ​​ណា​ ដែល​​​ត្រូវ​​បាន​​ឃុំ​ខ្លួន​​តាម​​ទំនើង​ចិត្ត ក្នុង​​នោះ​​រួម​មាន​អ្នក​សារ​ព័ត៌មាន សកម្មជន​​សង្គម​ស៊ីវិល ព្រម​ទាំង​​អ្នក​គាំទ្រ និង​​សមាជិក​​គណបក្ស​​ប្រឆាំង​ផង​ដែរ។ ប្រទេស​ទាំង​នោះ​សង្កត់​ធ្ងន់​ថា មាន​តែ​ធ្វើ​តាម​អនុសាសន៍​របស់​ពួក​គេ​នេះ​ទេ ទើប​មាន​ប្រយោជន៍​សម្រាប់​កម្ពុជា​ទាំង​វិស័យ​អភិបាលកិច្ច និង​សេដ្ឋកិច្ច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
អ្នកវិភាគ​ថា លោក ហ៊ុន ម៉ាណែត បកស្រាយ​បំភ្លៃ​ច្បាប់​បោះឆ្នោត​ជ្រើសតាំង​តំណាងរាស្ត្រ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។