ស្ថានបេសកកម្មអចិន្ត្រៃយ៍កម្ពុជា ប្រចាំនៅទីក្រុងហ្សឺណែវ ប្រទេសស្វីស បដិសេធការអំពាវនាវរបស់អ្នករាយការណ៍ពិសេសអង្គការសហប្រជាជាតិឱ្យរបបលោក ហ៊ុន សែន ផ្ដល់សិទ្ធិធ្វើនយោបាយដល់បក្សប្រឆាំងឡើងវិញ។ ស្ថានអចិន្ត្រៃយ៍កម្ពុជា បានចាត់ទុកការលើកឡើងរបស់អ្នកស្រី រ៉ូណា ស្មីត (Rhona Smith) ថា បានតាំងខ្លួនជាចៅក្រម អារកាត់កិច្ចការផ្ទៃក្នុងរបស់កម្ពុជា។
ទោះបីជាបែបនេះក្ដី អ្នកវិភាគនយោបាយអះអាងថា របបលោក ហ៊ុន សែន នឹងរងសម្ពាធកាន់តែធ្ងន់ថែមទៀត នៅក្រោយពេលអ្នកជំនាញសិទ្ធិមនុស្សអង្គការសហប្រជាជាតិ បានលើកឡើងជាបន្តបន្ទាប់ អំពីការធ្វើទុក្ខបុកម្នេញបក្សប្រឆាំងនេះ។
អ្នកវិភាគនយោបាយអះអាងថា ស្ថានបេសកកម្មអចិន្ត្រៃយ៍កម្ពុជា ប្រចាំនៅទីក្រុងហ្សឺណែវ កំពុងតែការពាររបបឯកបក្សគ្មានមូលដ្ឋាន និងមិនឆ្លុះបញ្ចាំងពីការពិតឡើយ។
អ្នកវិភាគនយោបាយដែលនិរទេសខ្លួននៅក្រៅប្រទេស លោក គឹម សុខ មានប្រសាសន៍ថា អ្វីដែលដែលអ្នករាយការណ៍ពិសេសអង្គការសហប្រជាជាតិប្រចាំនៅកម្ពុជា អ្នកស្រី រ៉ូណា ស្មីត (Rhona Smith) បានលើកឡើងថា របបឯកបក្សកំពុងតែធ្វើទុក្ខបុកម្នេញបក្សប្រឆាំង និងទាមទារឱ្យផ្ដល់សិទ្ធិសេរីភាពនយោបាយជូនគណបក្សប្រឆាំងវិញនោះ គឺជារឿងត្រឹមត្រូវ។ ក៏ប៉ុន្តែស្ថានបេសកកម្មអចិន្ត្រៃយ៍កម្ពុជាប្រចាំនៅក្រុងហ្សឺណែវ បានបដិសេធនោះ គ្រាន់តែជារឿងការពាររបបឯកបក្សគ្មានមូលដ្ឋានទៅវិញទេ។
លោក គឹម សុខ អះអាងថា សហគមន៍អន្តរជាតិពិសេសសហគមន៍អឺរ៉ុប រួមទាំងអង្គការសហប្រជាជាតិផង គេមិនចង់ឱ្យកម្ពុជាដើរជាន់ដានប្រវត្តិសាស្ត្រដដែលៗ ពិសេសការទាញកម្ពុជាឱ្យវិលទៅរបបអតីតកាលវិញ គឺរបបខ្មែរក្រហមជាដើម៖ «ពីព្រោះគាត់ (ស្ថា នអចិន្ត្រៃយ៍កម្ពុជា ) ត្រូវមានភារកិច្ចការពារអំណាចប្លន់អំណាចរបស់លោក ហ៊ុន សែនដូច្នេះគាត់មិនខ្វល់ពីច្បាប់ទេ ក៏ប៉ុន្តែអន្តរាគមន៍របស់អន្តរជាតិ របស់អាមេរិក អឺរ៉ុប អង្គការសហប្រជាជាតិគឺគេធ្វើតាមគន្លងច្បាប់»។
ការលើកឡើងរបស់អ្នកវិភាគនេះ ជាការឆ្លើយតបទៅស្ថានអចិន្ត្រៃយ៍កម្ពុជាប្រចាំនៅទីក្រុងហ្សឺណែវ ច្រានចោលរបាយការណ៍របស់ក្រុមអ្នកជំនាញសិទ្ធិមនុស្សអង្គការសហប្រជាជាតិ។ ស្ថានអចិន្ត្រៃយ៍បានចេញសេចក្ដីថ្លែងការណ៍ ចោទប្រកាន់ក្រុមអ្នកជំនាញសិទ្ធិមនុស្សអង្គការសហប្រជាជាតិ ថាកំពុងលូកលាន់កិច្ចការផ្ទៃក្នុងរបស់តុលាការកម្ពុជា ដែលជារដ្ឋអធិបតេយ្យ។ សេចក្ដីថ្លែងការណ៍ បានហៅរបាយការណ៍របស់អ្នកជំនាញសិទ្ធិមនុស្សអង្គការសហប្រជាជាតិថា ជាទស្សនៈផ្ទាល់ខ្លួន ហើយជ្រើសតែមួយជ្រុង ព្រមទាំងមិនយកចិត្តទុកដាក់លើការពិតជាក់ស្ដែង និងបានធ្វើឱ្យសាធារណជន មានការយល់ច្រឡំពីត្រូវទៅជាខុស។
ក្រុមអ្នកជំនាញសិទ្ធិមនុស្សអង្គការសហប្រជាជាតិ ៤រូប សោកស្ដាយចំពោះការសម្រេចរបស់តុលាការ ដែលបានកាត់ទោសមេដឹកនាំជាន់ខ្ពស់នៃគណបក្សសង្គ្រោះជាតិឱ្យជាប់គុករយៈពេលច្រើនឆ្នាំ។ ពួកគេហៅការកាត់ទោសមេដឹកនាំជាន់ខ្ពស់នៃគណបក្សសង្គ្រោះជាតិទាំង ៩ រូប ដែលរួមមានទាំងលោក សម រង្ស៊ី ផង ឱ្យជាប់គុករហូតដល់ ២៥ឆ្នាំ ថា ជាការកាត់ទោសដាក់គុកក្នុងរយៈពេលមិនសមាមាត្រ និងខ្វះមូលដ្ឋានច្បាប់ច្បាស់លាស់។ ពួកគេសង្កត់ធ្ងន់ថា ដំណើរការជំនុំជម្រះក្តីទាំងមូល មិនមានភាពប្រក្រតី និងបំពានយ៉ាងជាក់ច្បាស់ទៅនឹងច្បាប់អន្តរជាតិ រួមទាំងការជំនុំជម្រះមិនបានប្រព្រឹត្តិទៅជាសាធារណៈ។
ក្រុមអ្នកជំនាញសិទ្ធិមនុស្សអង្គការសហប្រជាជាតិ ដែលក្នុងនោះក៏រួមមាន អ្នករាយការណ៍ពិសេសនៃអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្មីត ផង បានអំពាវនាវដល់រដ្ឋាភិបាលឱ្យផ្ដល់សិទ្ធិធ្វើនយោបាយដល់មន្ត្រីជាន់ខ្ពស់គណបក្សសង្គ្រោះជាតិទាំងនោះឡើងវិញ និងធានាឱ្យគណបក្សនយោបាយទាំងអស់មានឱកាសស្មើគ្នាដើម្បីចូលរួមក្នុងជីវភាពនយោបាយ។
កាលពីថ្ងៃទី១ មីនា តុលាការនៃរបបលោក ហ៊ុន សែន បានកាត់ទោសកំបាំងមុខមេដឹកនាំជាន់ខ្ពស់នៃគណបក្សសង្គ្រោះជាតិ ៩រូប ក្នុងនោះរួមមាន លោក សម រង្ស៊ី អ្នកស្រី មូរ សុខហួរ លោក អេង ឆៃអ៊ាង អ្នកស្រី ជូឡុង សូមូរ៉ា លោក ម៉ែន សុថាវរិន្ទ្រ លោក អ៊ូ ច័ន្ទរិទ្ធ លោក ហូ វ៉ាន់ លោក ឡុង រី និងលោក នុត រំដួល ឱ្យជាប់គុកពី ២០ឆ្នាំ ដល់ ២៥ឆ្នាំ និងពិន័យជាប្រាក់សរុបជិតកន្លះលានដុល្លារ ពីបទប៉ុនប៉ងផ្តួលរំលំរដ្ឋាភិបាល ឬ ឧបឃាត និងបទប៉ុនប៉ងប្រព្រឹត្តិបទឧក្រិដ្ឋ។
ក្រុមអ្នកជំនាញសិទ្ធិមនុស្សអង្គការសហប្រជាជាតិ ក៏អំពាវនាវដល់រដ្ឋាភិបាលឱ្យការពារសេរីភាពចងក្រងសមាគម និងសេរីភាពក្នុងការបញ្ចេញមតិ ដើម្បីធានាដល់ដំណើរការប្រជាធិបតេយ្យ និងសកម្មភាពនយោបាយ។
កន្លងទៅ ក្រុមអ្នកជំនាញសិទ្ធិមនុស្សអង្គការសហប្រជាជាតិ តែងលើកឡើងពីកង្វល់របស់ពួកគេជាខ្លាំងជុំវិញការធ្លាក់ចុះលំហប្រជាធិបតេយ្យ និងរបៀបនៃការជំនុំជម្រះក្ដីក្នុងទ្រង់ទ្រាយធំ ដែលមានមនុស្សច្រើន ពាក់ព័ន្ធនឹងគណបក្សសង្គ្រោះជាតិ ដោយសារហេតុផលនយោបាយ។
អ្នកវិភាគនយោបាយលើកឡើងថា បើសិនជារបបលោក ហ៊ុន សែន មិនងាកមកស្ដារប្រជាធិបតេយ្យ និងបើកលំហសិទ្ធិសេរីភាព និងសិទ្ធិធ្វើនយោបាយឱ្យបានពេញលេញទេនោះ របបឯកបក្សនឹងរងទណ្ឌកម្មកាន់តែធ្ងន់ថែមទៀតនៅពេលខាងមុខជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។