លោក កឹម សុខា ផ្ញើ​សារ​រំលែក​ទុក្ខ​ដល់​ក្រុម​គ្រួសារ​អ្នក​ស្លាប់ ដោយ​វីរុស​កូរ៉ូណា និង​សុំ​កុំ​ឲ្យ​មាន​ការ​រើសអើង​គ្នា

ដោយ សុជីវី
2020-02-09
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះ​ជាតិ កាល​ពី​មិន​ទាន់​ជាប់​ឃុំឃាំង។
លោក កឹម សុខា ប្រធាន​គណបក្ស​សង្គ្រោះ​ជាតិ កាល​ពី​មិន​ទាន់​ជាប់​ឃុំឃាំង។
រូប៖ ហ្វេសប៊ុក​លោក កឹម សុខា

លោក កឹម សុខា ប្រធាន​គណបក្ស​សង្គ្រោះ​ជាតិ បាន​ផ្ញើ​សារ​រំលែក​ទុក្ខ​ដល់​មេ​ដឹក​នាំ​ប្រទេស និង ក្រុម​គ្រួសារ​អ្នក​ស្លាប់​ដោយ​សារ​វីរុស​កូរ៉ូណា (Conronavirus) គ្រប់​ជាតិ​សាសន៍​នៅ​លើ​ពិភពលោក។

សារ​រំលែក​ទុក្ខ​របស់​លោក កឹម សុខា ដែល​សរសេរ​នៅ​លើ​ហ្វេសប៊ុក​ផ្ទាល់​ខ្លួន​របស់​លោក​នេះ ធ្វើ​ឡើង​នៅ​ចំ​ថ្ងៃ​បុណ្យ​មាឃបូជា កាលពីថ្ងៃទី៨កុម្ភៈ។

លោក កឹម សុខា បាន​សរសេរ​រៀបរាប់​ថា ក្នុង​នាម​ជា​ពុទ្ធសាសនិក លោក​សូម​សម្ដែង​នូវ​សេចក្ដី មេត្តា ករុណា អាណិត ស្រលាញ់ ចំពោះ​មនុស្ស​គ្រប់​រូប គ្រប់​ជាតិ​សាសន៍​នៅ​លើ​សាកល​លោក ឲ្យ​ជួប​តែ​សេចក្ដី​សុខ និង​ជៀស​ផុត​ពី​ការ​រាតត្បាត​ឆ្លង​មេរោគ​កូរ៉ូណា​នេះ។

លោក កឹម សុខា បួងសួង​ដល់​គុណ​បុណ្យ​ព្រះ​រតន​ត្រៃ បារមី​វត្ថុ​សក្ដិសិទ្ធិ​ក្នុង​លោក សូម​ជួយ​ប្រោស​ប្រទាន​ពរ​ដល់​មនុស្ស​ទាំង​ឡាយ ដែល​កំពុង​មាន​ជំងឺ​ផ្លូវ​ដង្ហើម ឬ​កំពុង​ផ្ទុក​មេរោគ​វីរុស​កូរ៉ូណា​ប្រភេទ​ថ្មី​នេះ សូម​ឲ្យ​បាន​ជា​សះ​ស្បើយ​យ៉ាង​ឆាប់​រហ័ស។ ជា​ពិសេស លោក កឹម សុខា អំពាវនាវ ឲ្យ​មនុស្ស​គ្រប់​រូប គ្រប់​ជាតិ​សាសន៍ គ្រប់​ប្រទេស រួបរួម​គ្នា ទប់​ស្កាត់ និង​កម្ចាត់​វីរុស​កូរ៉ូណា​នេះ ឲ្យ​អស់​ពី​ភព​ផែនដី ដោយ​កុំ​មាន​ការ​រើសអើង​គ្នា។

លោក កឹម សុខា ផ្ញើ​សារ​រំលែក​ទុក្ខ​ដល់​មេ​ដឹក​នាំ​ប្រទេស និង​ក្រុម​គ្រួសារ​អ្នក​ស្លាប់ ដោយ​វីរុស​កូរ៉ូណា នៅ​ទូទាំង​ពិភពលោក​នេះ នៅ​ស្រប​ពេល​លោក ត្រៀម​ខ្លួន​ចូល​រួម សវនាការ​ជំនុំ​ជម្រះ​ក្ដី​របស់​លោក​ ក្នុង​សំណុំ​រឿង​ចោទ​ប្រកាន់​ពី​បទ​សន្ទិដ្ឋិភាព នៅ​តុលាការ នា​សប្ដាហ៍​ក្រោយ ដែល​ជា​សប្ដាហ៍​ទី៥ គឺ​នៅ​ថ្ងៃ​ពុធ ទី១២ និង​ថ្ងៃ​ទី១៣ កុម្ភៈ​ខាង​មុខ ដែល​តុលាការ​នឹង​សួរ​នាំ​លោក​បន្ត​ក្នុង​សំណុំ​រឿង​នេះ​ចាប់​ពី​ឆ្នាំ២០១៣ ដល់​ថ្ងៃ​ចាប់​ខ្លួន​លោក​នៅ​ឆ្នាំ២០១៧៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល