អ្នកឃ្លាំមើលបញ្ហាសង្គមចាត់ទុក ការព្រមានចាប់ពលរដ្ឋដែលទាមទារឱ្យរដ្ឋាភិបាលដកខ្លួនចេញពីគម្រោងអភិវឌ្ឍន៍(CLV) ដាក់ពន្ធនាគារគឺជាអំពើឃោរឃៅ និងផ្ដាច់ការ។ ការលើកឡើងបែបនេះ គឺបន្ទាប់ពីក្រសួងយុត្តិធម៌គំរាមចាប់ពលរដ្ឋដែលមិនគាំទ្រគម្រោងតំបន់ត្រីកោណអភិវឌ្ឍន៍CLVដាក់ពន្ធនាគារពីបទ«ឧបឃាត និងរួមគំនិតក្បត់»។
ស្របពេលដែលប្រធានព្រឹទ្ធសភា លោក ហ៊ុន សែន ព្រមានចាប់អ្នកប្រឆាំងនឹងគម្រោងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ដាក់ពន្ធនាគារនោះ រដ្ឋមន្ត្រីក្រសួងយុត្តិធម៌ លោក កើត រិទ្ធ ក៏បានចេញសេចក្ដីប្រកាសរៀបចំបទចោទរួចជាស្រេចលើក្រុមពលរដ្ឋដែលលោក ហៅថាអ្នកប៉ុនប៉ងធ្វើបដិវត្តន៍ពណ៌ដើម្បីផ្ដួលរំលំរដ្ឋាភិបាល។
ប្រធានក្រុមប្រឹក្សាឃ្លាំមើលកម្ពុជាលោក ម៉ែន ណាត ប្រាប់វិទ្យុអាស៊ីសេរីនៅថ្ងៃទី១៤ ខែសីហា ថា ការណ៍ដែលក្រសួងយុត្តិធម៌ចាត់ទុកពលរដ្ឋ ដែលបារម្ភខ្លាចបាត់បង់ទឹកដីគឺក្រុមប្រឆាំងជ្រុលនិយម ឬចង់ផ្ដួលរំលំរដ្ឋាភិបាលនោះ គឺជារឿងអយុត្តិធម៌ និងដឹកនាំបែបផ្ដាច់ការ។ លោកមើលឃើញថា ស្ថាប័នយុត្តិធម៌បច្ចុប្បន្ន គឺស្ថាប័នបម្រើឱ្យផលប្រយោជន៍គ្រួសារត្រកូលហ៊ុន មិនមែនបម្រើផលប្រយោជន៍ឱ្យពលរដ្ឋនោះទេ។
លោក ម៉ែន ណាត៖«គំរាមប្រជាពលរដ្ឋ ជាពិសេស គំរាមផ្ទៃក្នុងគណបក្សខ្លួនគាត់ហ្នឹង ពីព្រោះផ្ទៃក្នុងគណបក្សប្រជាជន ក៏គ្មានអ្នកណាគេទៅគាំទ្ររឿងដាក់គម្រោងCLVជាមួយនឹងវៀតណាមទេ ពីព្រោះវៀតណាមយើងដឹងហើយតើមានមហិច្ឆតាឈ្លានពានប្រទេសកម្ពុជា ហើយពួកផ្ទៃក្នុងគណបក្សប្រជាជន។ ខ្ញុំជឿថា គេមិនតាម ហ៊ុន សែន ដោយសារតែរឿង លោក ហ៊ុន សែន ខ្លាចគ្នាឯងនៅក្នុងជួរមន្ត្រីផ្ទៃក្នុងហ្នឹងបានជាឃើញប៉ុន្មានថ្ងៃនេះឃើញមានសារបែកធ្លាយ»។
រដ្ឋមន្ត្រីក្រសួងយុត្តិធម៌ លោក កើត រិទ្ធ កាលពីថ្ងៃទី១៣ ខែសីហា បានចេញសេចក្ដីប្រកាសអំពីព្រមានដាក់ទោសធ្ងន់ធ្ងរលើក្រុម ឬពលរដ្ឋរូបណា ដែលហ៊ានចេញតវ៉ាឱ្យរដ្ឋាភិបាលដកខ្លួនចេញពីគម្រោងតំបន់ត្រីកោណអភិវឌ្ឍន៍។ លោក កើត រិទ្ធ បញ្ជាក់ថា ប្រសិនបើប្រជាពលរដ្ឋនៅក្នុងស្រុកប្រមូលផ្ដុំគ្នាធ្វើបាតុកម្ម ដើម្បីប្រឆាំងនឹងគម្រោងត្រីកោណអភិវឌ្ឍន៍ CLVនោះមិនមែនជាការសម្ដែងមតិទេ ប៉ុន្តែ គឺជាផែនការប៉ុនប៉ងផ្ដួលរំលំរដ្ឋាភិបាល និងជាអំពើវិទ្ធង្សនា ដែលជាឧក្រិដ្ឋកម្មធ្ងន់ធ្ងរប៉ះពាល់សុខសង្គម។ ក្រសួងយុត្តិធម៌ព្រមានថា ករណីនេះក្រុមពលរដ្ឋប្រឈមមុខនឹង ជាប់ពន្ធនាគារពី ១៥ឆ្នាំ ទៅដល់ ៣០ឆ្នាំ ពីបទ «ឧបឃាត» ហើយប្រសិនបើអ្នកទោសនោះ គឺជាមន្ត្រីរាជការវិញនឹងត្រូវជាប់ពន្ធនាគារអស់មួយជីវិត។ ដោយឡែក ចំពោះបុគ្គល ដែលបានចូលរួមក្នុងគម្រោងនេះ នឹងត្រូវជាប់ពន្ធនាគារពី ៥ឆ្នាំ ទៅដល់ ១០ឆ្នាំ ពីបទ «រួមគំនិតក្បត់» និងត្រូវបន្ថែមស្ថានទម្ងន់ទោសដាក់ពន្ធនាគារពី ១០ឆ្នាំ ទៅដល់ ២០ឆ្នាំ ប្រសិនបើជាមន្ត្រីរាជការ។ សេចក្ដីប្រកាសរបស់ក្រសួងយុត្តិធម៌ ក៏បានឱ្យដឹងដែរថា បុគ្គលរូបណាហ៊ានសារភាពទោសកំហុស និងសហការ ដើម្បីបង្ក្រាបលើអ្នកប្រព្រឹត្តនឹងទទួលបានការលើកលែងទោស។ លោក កើត រិទ្ធ អំពាវនាវឱ្យកងកម្លាំងសមត្ថកិច្ចពាក់ព័ន្ធទាំងអស់ចាត់វិធានការឱ្យម៉ឺងម៉ាត់ ដើម្បីការពារសន្តិសុខជាតិ និងស្ថិរភាពជាតិ។
ក្រៅពីក្រសួងយុត្តិធម៌ព្រមានចាប់ពលរដ្ឋដាក់ពន្ធនាគារហើយនោះ នៅមានសារសំឡេងបែកធ្លាយរយៈពេលជាង ៣នាទី នៅលើបណ្ដាញសង្គម ដែលគេស្គាល់ថា ជារដ្ឋមន្ត្រីក្រសួងមហាផ្ទៃគឺ លោក ស សុខា បានបញ្ជាឱ្យកងកម្លាំងត្រូវមានការប្រុងប្រយ័ត្ន ចាប់ពីថ្ងៃទី១៥ ខែសីហា ដើម្បីទប់ស្កាត់ពលរដ្ឋមិនធ្វើបាតុកម្ម នៅថ្ងៃទី១៨ ខែសីហាខាងមុខ។ លោក ស សុខា បញ្ជាក់ថា បញ្ជាការពារនៅគ្រប់រាជធានីខេត្តទាំងអស់ត្រូវទប់ស្កាត់មិនឱ្យមានការជួបជុំ ឬការធ្វើដំណើរជាក្រុមៗ មករាជធានីភ្នំពេញ ឬនៅជិតរាជធានីភ្នំពេញឡើយ។
លោក ស សុខា៖«តាមរយៈការប្រមូលព័ត៌មានក្រុមការងារសន្តិសុខយើងទទួលបានថា មានការគ្រោងមានការបំផុសឱ្យប្រជាពលរដ្ឋឡើងមករាជធានីភ្នំពេញនៅថ្ងៃទី១៨ មកធ្វើបាតុកម្មទាក់ទងនឹងការទាមទារឱ្យរដ្ឋាភិបាលដកខ្លួនចេញពីគម្រោងCLVហើយជនមួយចំនួន ក៏បានឆ្លៀតឱកាសក្នុងការប្រើរឿងនេះក្នុងការធ្វើឱ្យរដ្ឋាភិបាលចុះចេញពីតំណែង ក៏ដូចជាធ្វើបដិវត្តន៍ពណ៌ជាដើម។ល។ ក្នុងន័យនេះ ខ្ញុំបានឱ្យអគ្គស្នងការនគរបាលជាតិណែនាំទៅស្នងការរាជធានីខេត្តទាំងអស់»។
ទោះជាយ៉ាងណាក្ដី ប្រតិកម្មខ្លាំងៗ ទាំងនេះ កើតឡើងបន្ទាប់ពីមានក្រុមតេឡេក្រាមមួយ ឈ្មោះ «រួបរួម ដើម្បីជាតិ» ប្រកាសគ្រោងប្រមូលគ្នាធ្វើបាតុកម្មនៅថ្ងៃទី១៨ ខែសីហា ក្នុងរាជធានីភ្នំពេញដើម្បីទាមទារឱ្យរដ្ឋាភិបាលដកខ្លួនចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV)។
ទាក់ទិនរឿងនេះ អ្នកឃ្លាំមើលសិទ្ធិមនុស្ស និងសង្គម លោក ស៊ឹង សែនករុណា សង្កេតឃើញថា ស្ថាប័នតុលាការ កងកម្លាំងប្រដាប់អាវុធហត្ថ និងស្ថាប័នរដ្ឋមួយចំនួនទៀត បច្ចុប្បន្ន គឺជាឧបករណ៍បម្រើឱ្យគណបក្សកាន់អំណាច។ លោកបន្តថា រដ្ឋាភិបាលគួរតែដកខ្លួនចេញពីគម្រោងតំបន់ត្រីកោណអភិវឌ្ឍន៍ CLV ជាជាងការព្រមានចាប់ពលរដ្ឋដាក់ពន្ធនាគារ ដែលធ្វើឱ្យខាតប្រយោជន៍ជាតិ។
លោក ស៊ឹង សែនករុណា៖«ខ្ញុំថា ប្រើប្រាស់មធ្យោបាយបែបហ្នឹងមិនមែនជាមធ្យោបាយរកដំណោះស្រាយទេ អ៊ីចឹងផ្ទុយទៅវិញ អ្វីដែលត្រូវរកដំណោះស្រាយ។ ត្រូវមើលថា ការទាមទារតវ៉ា វាគឺជារឿងត្រូវរកដំណោះស្រាយ ឬអត់ ហើយអាចធ្វើទៅបានអត់ ហើយប្រសិនមានការគោរពតាមទាមទារចង់បានរបស់ប្រជាពលរដ្ឋបានគួរតែអនុវត្តន៍ទៅ ហើយទទួលបានផលមកខ្លួនឯងវិញទេ មិនមែនទៅធ្វើការរឹតត្បិតអ៊ីចឹង។ ខ្ញុំថា ធ្វើអ៊ីចឹងគ្មានប្រសិទ្ធភាពទេថ្ងៃណាមួយអាចនឹងមានបះបោរ»។
បើទោះជាលោក ហ៊ុន សែន និងមន្ត្រីក្រោមឱវាទរបស់លោកគំរាមសម្លុតប្រើគុកច្រវាក់ និងកងកម្លាំងប្រដាប់អាវុធ ដើម្បីបង្ក្រាបលើពលរដ្ឋមិនឱ្យចេញតវ៉ាយ៉ាងណាក្ដី ក៏ប្រជាពលរដ្ឋខ្មែរទាំងក្នុងប្រទេស និងក្រៅប្រទេសនៅតែពុះកញ្ជ្រោល ដោយទាមទាររដ្ឋាភិបាលឱ្យដកខេត្តខ្មែរទាំង៤ ចេញពីគម្រោងCLVដោយពួកគាត់ថា នេះជារឿងបូរណភាពទឹកដី និងជាជោគវាសនា នៃប្រទេសជាតិទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។