មន្ត្រី​បក្ស​ប្រឆាំង​ចាត់​ទុក​ដីកាកោះ​របស់​តុលាការ​របប​ក្រុងភ្នំពេញ​ថា ជា​រឿង​កំប្លែង

ដោយ ខែ សុណង
2020-11-15
អ៊ីម៉ែល
មតិ
Share
បោះពុម្ព
លោក អេង ឆៃអ៊ាង អនុប្រធានគណបក្ស​សង្គ្រោះជាតិ ក្នុង​កិច្ច​ប្រជុំ​នៅ​សហរដ្ឋអាមេរិក ជាមួយ​ថ្នាក់ដឹកនាំ​បក្ស​នេះ កាល​ពី​ថ្ងៃទី១៦ ខែមីនា ឆ្នាំ​២០១៩។
លោក អេង ឆៃអ៊ាង អនុប្រធានគណបក្ស​សង្គ្រោះជាតិ ក្នុង​កិច្ច​ប្រជុំ​នៅ​សហរដ្ឋអាមេរិក ជាមួយ​ថ្នាក់ដឹកនាំ​បក្ស​នេះ កាល​ពី​ថ្ងៃទី១៦ ខែមីនា ឆ្នាំ​២០១៩។
RFA/Sorn Chanratha

អាជ្ញាធរ​របប​ក្រុងភ្នំពេញ​កាល​ពី​ថ្ងៃ​ទី​១៤ វិច្ឆិកា បាន​យក​ដីកា​កោះហៅ មន្ត្រី​គណបក្ស​សង្គ្រោះ​ជាតិ​ចំនួន ៦៨​នាក់​បន្ថែម​ទៀត ដើម្បី​ចូលរួម​សវនាការ ជំនុំជម្រះ​នៅ​ថ្ងៃ​ទី​២៦ វិច្ឆិកា ខាងមុខនេះ​ពី​បទ​« រួមគំនិត​ក្បត់ និង​ញុះញង់​ឱ្យ​ប្រព្រឹត្តិ​បទឧក្រិដ្ឋ​ជាអាទិ៍​» ដែល​បាន​ប្រព្រឹត្តិ​កាលពី​ក្នុង​អំឡុង​ឆ្នាំ​២០១៩។

តុលាការ​ក្រុង​ភ្នំពេញ កាលពី​ខែ​តុលា បាន​កោះហៅ​មន្ត្រី​ជាន់ខ្ពស់​នៃ​គណបក្ស​សង្គ្រោះ​ជាតិ ចំនួន ៩​រូប​រួម​ទាំង ប្រធាន​ស្ដីទី​បក្ស​ប្រឆាំង លោក សម រង្ស៊ី ផង ឲ្យ​ចូល​បំភ្លឺ​នៅមុខ​​សាលាដំបូង ក្រុងភ្នំពេញ​នៅ​ថ្ងៃ​ទី​១១ ខែ​វិច្ឆិកា ក្នុង​សំណុំរឿង រួមគំនិត​ក្បត់។

ដីកា​កោះហៅ​មន្ត្រី បក្ស​សង្គ្រោះ​ជាតិ ទាំងពីរ​លើក​នេះ​ត្រូវ​បាន​អាជ្ញាធរ​ក្រុងភ្នំពេញ​យក​ទៅ​បិទ​នៅ​ទីស្នាក់ការ​កណ្ដាល​របស់​គណបក្ស​សង្គ្រោះ​ជាតិ ដែល​មាន​ទីតាំង​ក្នុង​សង្កាត់​ចាក់អង្រែលើ ខណ្ឌ មានជ័យ។

លោក អេង ឆៃអ៊ាង អនុប្រធាន​គណបក្ស​សង្គ្រោះជាតិ បាន​ចាត់​ទុក​ដីកា កោះហៅ​របស់​តុលាការ​ក្រុង​ភ្នំពេញ​ថា ជា​រឿង​កំប្លែង និង​មាន​លក្ខណៈ​ជា​រឿង​នយោបាយ​ច្រើនជាង​ការអនុវត្ត​ច្បាប់។

លោក​ថា ដីកា​កោះហៅ​មន្ត្រី​គណបក្ស​សង្គ្រោះ​ជាតិ​ភាគច្រើន គឺជា​ពលរដ្ឋ​ខ្មែរ រស់នៅ​ក្រៅ​ប្រទេស ហើយ​បើ​តាម​ច្បាប់​តុលាការ គួរតែ​ផ្ដល់​លិខិត​នេះ​ដល់ដៃ​នៅ​តាម​ផ្ទះ​របស់​សាមីខ្លួន នីមួយៗ មិន​ត្រូវ​យក​ទៅ​បិទ​នៅ​ទីស្នាក់ការ គណបក្ស​ដែល​កំពុង​ជាប់​បម្រាម​របស់​តុលាការ​នោះ​ទេ៖ «គេ​កោះហៅ​ហ្នឹង​គឺ​អ្នក​ហ្នឹង​ខ្មែរ​នៅ​ក្រៅ​ប្រទេស គាត់​អត់​មាន​អាសយដ្ឋាន នៅ​ក្នុង​ប្រទេស​កម្ពុជា​ទេ គាត់​រស់នៅ​ក្រៅ​ប្រទេស​។​អញ្ចឹង​ប្រសិន បើ​តុលាការ​ធ្វើតាម​នីតិវិធី​ច្បាប់ គេ​ត្រូវតែ​ឱ្យ​អាជ្ញាធរ ទាក់ទង​ជាមួយ បណ្ដា​ប្រទេស​ដែល​ថា អ្នក​ទាំងអស់​ហ្នឹង​រស់​នៅ បើ​ថា​រឿង​ហ្នឹង​ជា​រឿង​ឧក្រិដ្ឋកម្ម»

ពាក់ព័ន្ធ​សំណុំ​រឿង​នេះ មន្ត្រី​ជាន់ខ្ពស់​គណបក្ស​សង្គ្រោះ​ជាតិ​កាលពី​ថ្ងៃ​ទី​១០ វិច្ឆិកា បាន​យក​លិខិត ស្នើសុំ​សុពលភាព​លិខិតឆ្លងដែន ទៅ​ដាក់​នៅ​ស្ថានទូត​ខ្មែរ​ប្រចាំ​ទីក្រុង វ៉ាស៊ីតោនឌីស៊ី (Washington DC) ប៉ុន្តែ​មិន​មាន​មន្ត្រី​ទូត ណា​ម្នាក់​ចេញ​មក​ទទួល​ឡើយ ហើយ​ចុងក្រោយ​មន្ត្រី​បក្ស​ប្រឆាំង​បាន​ត្រឹមតែ​ដាក់​លិខិត​នៅ​ក្នុង​ប្រអប់​សំបុត្រ​របស់​ស្ថានទូត​ប៉ុណ្ណោះ។

មន្ត្រី​បក្ស​ប្រឆាំង​ចាត់ទុកថា ទង្វើ​បែបនេះ​ជា​ការ​រើសអើង ធ្វើ​ការ​បម្រើ​បក្ស​កាន់អំណាច ជាជាង​បម្រើ​ប្រយោជន៍​ពលរដ្ឋ​ខ្មែរ​ទូទៅ។

ក្នុង​លិខិត​នោះ​បាន​ស្នើសុំ​ទៅ​រដ្ឋមន្ត្រី​ក្រសួងមហាផ្ទៃ តាមរយៈ​ស្ថានទូត​ខ្មែរ ឱ្យ​ផ្ដល់​សុពលភាព លិខិតឆ្លងដែន ដល់​មន្ត្រី​គណបក្ស​សង្គ្រោះ​ជាតិ​ចំនួន ១១​រូប​ដែល​ត្រូវ​ក្រសួងការបរទេស​បញ្ឈប់​សុពលភាព កាល​ពី​ខែ​វិច្ឆិកា ឆ្នាំ​២០១៩។

កាលពី​ថ្ងៃ​ទី​៦ ខែ​វិច្ឆិកា ឆ្នាំ​២០១៩ ក្រសួង​ការបរទេស​កម្ពុជា​បាន​លុបចោល​សុពលភាព​លិខិតឆ្លងដែន​មន្ត្រី​គណបក្ស​សង្គ្រោះ​ជាតិ​ចំនួន ១២​នាក់ បច្ចុប្បន្ន​មាន ១១​នាក់​កំពុង​និរទេស​ខ្លួន​នៅ​ក្រៅ​ប្រទេស និង​ម្នាក់​កំពុង​ស្ថិត​ក្នុង​ប្រទេស​។ នៅ​ក្នុង​ខែ​វិច្ឆិកា​ដដែល​នោះ ក្រសួង​ការបរទេស​ក៏បាន​លុបចោល​សុពលភាព​លិខិតឆ្លងដែន​សកម្មជន​ចំនួន ២៧​នាក់​ផ្សេង​ទៀត៕

ព័ត៌មាន (0)
Share
គេហទំព័រ​ទាំងមូល