១ . អ្នកសារព័ត៌មានឯករាជ្យស្នើឱ្យបញ្ឈប់ការរើសអើងក្នុងការអនុញ្ញាតឱ្យចូលយកព័ត៌មាន
សង្គមស៊ីវិល និងអ្នកសារព័ត៌មានខកចិត្តចំពោះការរើសអើងមិន អនុញ្ញាតឱ្យអ្នកសារព័ត៌មានឯករាជ្យចូលយកព័ត៌មាន។ ពួកគេទាមទាររដ្ឋាភិបាលបកស្រាយមូលហេតុ និងកែលម្អស្ថានភាពរើសអើងឡើងវិញ។
២ . នាយករដ្ឋមន្ត្រីជប៉ុន ចង់ឃើញការបោះឆ្នោតនៅកម្ពុជាឆ្នាំ២០២៣ ដំណើរការទៅដោយសេរី ត្រឹមត្រូវ និងយុត្តិធម៌
នាយករដ្ឋមន្ត្រីជប៉ុនលោក ហ្វូមីអូ គីស៊ីដា (KISHIDA Fumio) ចង់ឃើញការបោះឆ្នោតនៅកម្ពុជានៅក្នុងឆ្នាំ២០២៣ ខាងមុខ ដំណើរការទៅដោយសេរី ត្រឹមត្រូវ និងយុត្តិធម៌ និងឆ្លុះបញ្ចាំងពីសំឡេងចម្រុះរបស់ពលរដ្ឋកម្ពុជា។
៣ . មន្ត្រីអង្គការសង្គមស៊ីវិលថា រដ្ឋាភិបាលគួរយកលុយជាងកន្លះលានដុល្លារជួយជនក្រីក្រ ជាជាងទិញនាឡិកាជូនមេដឹកនាំបរទេសចូលរួមកិច្ចប្រជុំអាស៊ាន
មន្ត្រីអង្គការសង្គមស៊ីវិល លើកឡើងថា រដ្ឋាភិបាល គួរតែយកលុយជាងកន្លះលានដុល្លារអាមេរិកនោះ ទៅជួយជនក្រីក្រវិញ ជាជាងយកទៅផលិតនាឡិកាដៃដ៏ប្រណិតជូនទៅដល់មេដឹកនាំអាស៊ាន និងមេដឹកនាំពិភពលោក ដែលចូលរួមកិច្ចប្រជុំអាស៊ានកាលពីពេលថ្មីៗនេះ។ ការលើកឡើងនេះ គឺបន្ទាប់ពីលោកនាយករដ្ឋមន្ត្រី ហ៊ុន សែន ប្រាប់ឱ្យដឹងថា នាឡិកាដៃដែលមានចំនួន២៥គ្រឿង ដែលលោកជូនជាកាដូអនុស្សាវរីយ៍ដល់ថ្នាក់ដឹកនាំដែលបានមកចូលរួម កិច្ចប្រជុំកំពូលអាស៊ាន មានតម្លៃជាង២ម៉ឺនដុល្លារអាមេរិក ក្នុងមួយគ្រឿង (២០,០០០ដុល្លារ)។
៤ . អាជ្ញាធរថៃមិនទាន់បញ្ជូនមន្ត្រីយោធាកម្ពុជាបើកឡានចូលប្រទេសថៃខុសច្បាប់មកកម្ពុជាវិញទេ
អាជ្ញាធរថៃមិនទាន់បញ្ជូនមន្ត្រីយោធាកម្ពុជា ដែលបើកឡានចូលប្រទេសថៃខុសច្បាប់ កាលពីព្រលប់ថ្ងៃទី៥ ខែវិច្ឆិកា ត្រង់ចំណុចព្រំដែនអន្តរជាតិស្រុកសំពៅលូន ខេត្តបាត់ដំបង មកកម្ពុជាវិញនោះទេ។ តុលាការថៃនឹងកាត់ទោសនាយទាហានខ្មែរស័ក្ដិ៥នោះ តាមបទចោទ៤ករណី ដែលប៉ូលិសព្រំដែនថៃបានចោទប្រកាន់ ហើយត្រូវអនុវត្តទោសនៅប្រទេសថៃគ្រប់ពេលកំណត់ ទើបបញ្ជូនទៅខ្មែរវិញ។
៥ . យុវជនខ្មែរ៩នាក់ជួបប្រធានាធិបតីអាមេរិក លោក ចូ បៃឌិនជជែកពីការងារជំរុញការគោរពសិទ្ធិមនុស្ស
យុវជនខ្មែរ៩នាក់មកពីភ្នំពេញនិងតាមបណ្តាខេត្តនានាមានឱកាសជួបជាមួយប្រធានាធិបតីសហរដ្ឋអាមេរិកលោក ចូ បៃឌិន (Joseph R. Biden Jr.) នៅពេលលោកមកចូលរួមកិច្ចប្រជុំកំពូលអាស៊ាននិងកិច្ចប្រជុំពាក់ព័ន្ធនៅកម្ពុជាកាលពីថ្ងៃទី១៣ ខែវិច្ឆិកា។ យុវជនទាំង៩នាក់នោះជាសមាជិកនៃគម្រោងគំនិតផ្តួចផ្តើមនៃមេដឹកនាំយុវជននៅអាស៊ីអាគ្នេយ៍ (YSEALI)។
ពួកគេជួបជាមួយលោក បៃឌិន ដើម្បីប្រាប់ពីការងាររបស់ពួកគេក្នុងការជំរុញការគោរពសិទ្ធិមនុស្សការអភិវឌ្ឍន៍ប្រកបដោយនិរន្តរភាពនិងការអប់រំព្រមទាំងការចូលរួមប្រឆាំងការជួញដូរមនុស្សនិងការបំផ្លាញបរិស្ថាន។ ពួកគេក៏បានរម្លឹកប្រាប់លោក ចូ បៃឌិន ពីបទពិសោធន៍របស់គេនៅក្នុងសហរដ្ឋអាមេរិកនៅក្នុងអំឡុងពេលពួកគេបានទៅចូលរួមកម្មវិធីនៅទីនោះ។
ក្នុងជំនួបនោះដែរលោកប្រធានាធិបតីអាមេរិកបានបញ្ជាក់ពីការប្តេជ្ញាចិត្តរបស់សហរដ្ឋអាមេរិកចំពោះសមាគមអាស៊ានតំបន់ឥណ្ឌូប៉ាស៊ីហ្វិកនិងយុវជនជំនាន់ក្រោយនៅអាស៊ីអាគ្នេយ៍៕
៦ . កូដករណាហ្គាវើលដ៍២នាក់ចូលបំភ្លឺនៅសាលាដំបូងរាជធានីភ្នំពេញ
ក្រុមកូដករក្រុមហ៊ុនបនល្បែងកាស៊ីណូណាហ្គាវើលដ៍ (NagaWorld) ២នាក់បានចូលបំភ្លឺនៅសាលាដំបូងរាជធានីភ្នំពេញ នៅថ្ងៃទី១៤ ខែវិច្ឆិកា តាមបណ្ដឹងរបស់ក្រុមហ៊ុន ដែលបានប្ដឹងពួកគាត់ថា បានរំលោភលំនៅឋាន និងបង្ខាំងដោយខុសច្បាប់។ កូដករណាហ្គាវើលដ៍ និងមន្ត្រីសង្គមស៊ីវិលទាមទារឲ្យតុលាការទម្លាក់ចោលការចោទប្រកាន់លើពួកគាត់ហើយរដ្ឋាភិបាលនិងស្ថាប័នពាក់ព័ន្ធគួរពន្លឿនបញ្ចប់វិវាទដោយយកច្បាប់ការងារជាគោលដើម្បីលើកកម្ពស់សិទ្ធិការងារនៅកម្ពុជា។
៧ . ប្រជាសហគមន៍ខេត្តកំពង់ស្ពឺ បារម្ភពីសុវត្ថិភាពសត្វព្រៃកម្រ បន្ទាប់ពីមានការលួចពង្រាយអន្ទាក់ជាច្រើននៅតំបន់ឧទ្យានជាតិជួរភ្នំក្រវាញកណ្តាល
ប្រជាសហគមន៍ការពារព្រៃឈើខេត្តកំពង់ស្ពឺព្រួយបារម្ភ ពីសកម្មភាពដាក់អន្ទាក់ចាប់សត្វព្រៃ កំពុងបង្កគ្រោះថ្នាក់ខ្លាំង ដល់សុវត្ថិភាពសត្វព្រៃជាច្រើនប្រភេទ ដែលកំពុងរស់នៅ ក្នុងតំបន់ឧទ្យានជាតិជួរភ្នំក្រវាញ់កណ្តាល។ ពួកគាត់អះអាងថា សត្វព្រៃងាប់ និងបាត់ខ្លួនជារៀងរាល់ថ្ងៃ ដោយសារមានជនល្មើសអន្ទាក់ និងការលួចបរបាញ់ខុសច្បាប់ ក្នុងតំបន់អភិរក្សមួយនេះ។
៦ . ពលរដ្ឋអ្នកដាំដំឡូងមី បារម្ភតម្លៃដំឡូងមីធ្លាក់ថ្លៃ ប៉ះពាល់ដល់ជីវភាព
ប្រជាពលរដ្ឋប្រកបរបរដាំដំឡូងមីបារម្ភតម្លៃដំឡូងចុះធ្លាក់ថ្លៃប៉ះពាល់ដល់ជីវភាពស្របពេលកសិករកំពុងមមាញឹកប្រមូលផលបណ្ដើរៗ។មន្ត្រីសង្គមស៊ីវិលយល់ថា រដ្ឋាភិបាលនិងស្ថាប័នពាក់ព័ន្ធគួរស្វះស្វែងរកវិនិយោគទុនបរទេសមកកែច្នៃដំឡូងមីនិងដំណាំផ្សេងៗដើម្បីអោយកសិករមានទីផ្សារលក់កសិផលសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។