ព្រឹទ្ធសភាសហរដ្ឋអាមេរិក កាលពីថ្ងៃទី១ ខែសីហា បានអនុម័តជាផ្លូវការ យល់ព្រមតែងតាំងលោក ប៉ាទ្រីក ម័រហ្វី (Patrick Murphy) ជាឯកអគ្គរដ្ឋទូតវិសាមញ្ញ និងពេញសមត្ថភាពរបស់សហរដ្ឋអាមេរិក ប្រចាំកម្ពុជា។ នេះបើផ្អែកតាមសេចក្ដីជូនដំណឹងអំពីចំណាត់ការចុងក្រោយរបស់ព្រឹទ្ធសភាអាមេរិក ទាក់ទងទៅនឹងការវិវត្តនៃដំណើរការតែងតាំងលោក ប៉ាទ្រីក ម័រហ្វី ជាឯកអគ្គរដ្ឋទូតអាមេរិកប្រចាំកម្ពុជា។
ការសម្រេចនេះ ធ្វើឡើងទន្ទឹមគ្នានឹងថ្ងៃដែលមន្ត្រីនាំពាក្យរបបលោក ហ៊ុន សែន លោក ផៃ ស៊ីផាន បានបង្កើនវោហារសាស្ត្រប្រឆាំងនឹងសហរដ្ឋអាមេរិក ដោយបានត្អូញត្អែរថា កម្ពុជាពិបាកធ្វើការជាមួយសហរដ្ឋអាមេរិក ដោយសារតែគ្មានឯកអគ្គរដ្ឋទូត។ លើសពីនេះ លោក ផៃ ស៊ីផាន បានបន្តុះបង្អាប់មន្ត្រីការទូតអាមេរិកាំងនៅកម្ពុជា ថាជា «មន្ត្រីរម៉ិករម៉ក់» និងជា «មនុស្សព្រៃ»។ ប្រតិកម្មធ្ងន់ៗពីសំណាក់របបក្រុងភ្នំពេញនេះ កើតឡើងក្រោយស្ថានទូតសហរដ្ឋអាមេរិកប្រចាំកម្ពុជា បានបញ្ចេញសាររិះគន់ចំពេលខួប ១ឆ្នាំ នៃព្រឹត្តិការណ៍បោះឆ្នោតជាតិនៅកម្ពុជា ថា ជាកំហុសឆ្គងយ៉ាងខ្លាំង មិនមានភាពសេរី គ្មានយុត្តិធម៌ និងមិនតំណាងឱ្យឆន្ទៈពិតប្រាកដរបស់ប្រជាពលរដ្ឋកម្ពុជា។សហរដ្ឋអាមេរិក បានទុកតំណែងឯកអគ្គរដ្ឋទូតរបស់ខ្លួននៅកម្ពុជា ឱ្យនៅទំនេរ ត្រឹមកម្រិតភារធារី អស់រយៈពេលជាងកន្លះឆ្នាំមកហើយ ក្រោយតំណែងឯកអគ្គរដ្ឋទូតចាស់ លោក វីល្លៀម ហៃដ៍ (William Heidt) បានចប់អាណត្តិ កាលពីចុងឆ្នាំ២០១៨ កន្លងទៅ។
លោក ប៉ាទ្រីក ម័រហ្វី បច្ចុប្បន្នជាឧបការីរងរដ្ឋមន្ត្រីក្រសួងការបរទេសទទួលបន្ទុកតំបន់អាស៊ីអាគ្នេយ៍។ លោកធ្លាប់បានបម្រើការងារជាអនុប្រធានបេសកកម្ម និងជាភារធារីនៃស្ថានទូតសហរដ្ឋអាមេរិកប្រចាំប្រទេសថៃ ពីឆ្នាំ២០១៣ ដល់ឆ្នាំ២០១៦ និងប្រចាំប្រទេសប្រទេសឡឺសូតូ (Lesotho) ពីឆ្នាំ ២០០៦ ដល់ឆ្នាំ ២០០៨។ លោកនឹងក្លាយជាឯកអគ្គរដ្ឋទូតវិសាមញ្ញ និងពេញសមត្ថភាព ទី១៧ របស់សហរដ្ឋអាមេរិកប្រចាំកម្ពុជា នៅពេលលោកស្បថចូលកាន់តំណែងជាផ្លូវការនាពេលខាងមុខនេះ។
អាស៊ីសេរីនៅមិនទាន់ទទួលបានការបញ្ជាក់ពីមន្ត្រីនាំពាក្យស្ថានទូតសហរដ្ឋអាមេរិក ប្រចាំកម្ពុជានៅឡើយទេ អំពីពេលវេលាជាក់លាក់ នៃការចូលកាន់តំណែងជាផ្លូវការរបស់លោកនៅកម្ពុជា។
ដំណើរការតែងតាំងឯកអគ្គរដ្ឋទូតថ្មីរបស់អាមេរិកនេះ ធ្វើឡើងស្របពេលដែលទំនាក់ទំនងរវាងសហរដ្ឋអាមេរិក និងកម្ពុជាកំពុងស្ថិតនៅក្នុងភាពល្អក់កករ និងរកាំរកូសខ្លាំង ក្រោយរបបក្រុងភ្នំពេញបានរម្លាយប្រជាធិបតេយ្យ និងសិទ្ធិមនុស្ស ហើយងាកទៅឱបក្រសោបមហាយក្សចិនកាន់តែខ្លាំង។ របបក្រុងភ្នំពេញកន្លងទៅ សង្ស័យថា សហរដ្ឋអាមេរិក ជាមេក្លោងបដិវត្តពណ៌នៅកម្ពុជា ដើម្បីផ្តួលរំលំរដ្ឋាភិបាលស្របច្បាប់។ ការឡើងកាន់តំណែងរបស់លោកនេះ ក៏ធ្វើឡើងស្របពេលដែលសមាជិកសភា និងព្រឹទ្ធសភាអាមេរិក កំពុងនាំគ្នាស្នើច្បាប់ដាក់ទណ្ឌកម្មរបបក្រុងភ្នំពេញ តាមរយៈការបង្កកទ្រព្យសម្បត្តិការរឹតត្បិតទិដ្ឋាការដល់មន្ត្រីជាន់ខ្ពស់នៃរបបនេះ និងការព្យួរប្រព័ន្ធអនុគ្រោះពន្ធទូទៅ ឬហៅថា GSP របស់ខ្លួន។ ទន្ទឹមនឹងនោះ សហរដ្ឋអាមេរិក ក៏បានសម្ដែងក្តីព្រួយបារម្ភរបស់ខ្លួនជាបន្តបន្ទាប់ ពីរឿងដែលកម្ពុជាអាចអនុញ្ញាតឱ្យចិនដាក់មូលដ្ឋានយោធា លើទឹកដីរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។