សង្គមស៊ីវិលស្នើឲ្យមានការស៊ើបអង្កេតករណីទាហានដាក់ញត្តិទាមទារដកលោក កឹម សុខា
2015.10.27
អគ្គបញ្ជាការរងនៃកងយោធពលខេមរភូមិន្ទ នាយឧត្ដមសេនីយ៍ គន់ គីម ចូលរួមសិក្ខាសាលាស្ដីពីសម្ព័ន្ធមេត្រីភាពរវាងអង្គភាពកងទ័ព-នគរបាលជាតិ ជាមួយអង្គភាពសង្គមស៊ីវិលនាវិមានសន្តិភាព កាលពីថ្ងៃទី២៩ ខែកក្កដា ឆ្នាំ២០១៥។
Photo: RFA
បណ្ដាញផ្សាយព័ត៌មានក្នុងស្រុកមួយចំនួន រួមទាំងបណ្ដាញទំនាក់ទំនងសង្គម ឬហ្វេសប៊ុក (Facebook) ផង ផ្សព្វផ្សាយថា នាយទាហានគ្រប់គ្រងកម្លាំងនៅតាមបណ្ដោយព្រំដែនកម្ពុជា-ថៃ ដាក់ញត្តិទៅប្រធានរដ្ឋសភាអោយដកលោក កឹម សុខា ពីអនុប្រធានរដ្ឋសភា។
យ៉ាងណាមកដល់ពេលនេះគណៈកម្មការទី១ រដ្ឋសភា នៅមិនទាន់ទទួលបានសំណើនេះនៅឡើយ។ ចំណែកក្រុមអង្គការមិនមែនរដ្ឋាភិបាលហៅការដាក់ញត្តិបែបនេះថា ជាការរំលោភលើឯករាជ្យភាពរបស់កងកម្លាំងប្រដាប់អាវុធ។
ក្រុមអង្គការមិនមែនរដ្ឋាភិបាលស្នើអោយមានការស៊ើបអង្កេតករណីក្រុមនាយទាហានដែលទាមទារអោយដកលោក កឹម សុខា ពីអនុប្រធានរដ្ឋសភា។
សំណើរបស់ក្រុមអង្គការមិនមែនរដ្ឋាភិបាលនេះ បន្ទាប់ពីមានការផ្សព្វផ្សាយញត្តិដែលសារព័ត៌មានក្នុងស្រុកអះអាងថា ចេញដោយអនុប្រធានទី១គណៈបញ្ជាការឯកភាព សមរភូមិព្រំដែនកម្ពុជា-ថៃ នាយឧត្ដមសេនីយ៍ គន់ គីម ពីការទាមទារទម្លាក់តំណែងលោក កឹម សុខា។
នាយកវេទិកាអនាគត លោក អ៊ូ វីរៈ មានប្រសាសន៍ថា រដ្ឋាភិបាលមានតួនាទីចាត់វិធានការលើករណីនេះ ដើម្បីធានាថា ឯករាជ្យភាពរបស់កងកម្លាំងប្រដាប់អាវុធ។ ម្យ៉ាងការប្រកាសរបស់កងកម្លាំងប្រដាប់អាវុធនៅពេលនេះ អាចនឹងរុញច្រានអោយមានការប៉ះទង្គិចគ្នាជាយថាហេតុរវាងកងកម្លាំងដែលមានទស្សននយោបាយផ្ទុយគ្នា៖ «ប្រសិនបើករណីយោធាទាំងអស់មានសិទ្ធិនយោបាយទាំងអស់ ហើយចូលរួមបាតុកម្មបានចូលរួមទាមទារបានស្រេចនឹងចិត្ត ថ្ងៃក្រោយប្រយ័ត្នតែថ្ងៃក្រោយយោធាឈ្លោះគ្នាជាមួយយោធា យើងនឹងមានបញ្ហាដល់សង្គមតែម្តង ហើយវាធ្វើឲ្យមានហិង្សា និងបង្ហូរឈាមតែម្ដង។ នេះ គឺជារឿងមួយដែលយើងបានឆ្លងកាត់រួចទៅហើយ ដែលគួរជាមេរៀនដែលយើងចេះរៀនសូត្រផង កុំឲ្យដើរឆ្លងកាត់ឈឺចាប់ប៉ុណ្ណឹងហើយ នៅតែដើរជាន់ប្រវត្តិសាស្ត្រដ៏ជូរចត់ទៀត»។
នៅក្នុងញត្តិមួយទំព័រដែលមានបង្ហាញឈ្មោះនាយឧត្ដមសេនីយ៍ គន់ គីម នៅចុងខាងក្រោមនៃទំព័របញ្ជាក់ថា នាយទាហាន នាយទាហានរង និងពលទាហានទាំងអស់ដែលកំពុងបំពេញភារកិច្ចនៅសមរភូមិព្រំដែនកម្ពុជា-ថៃ ស្នើអោយប្រធានសភា និងអ្នកតំណាងរាស្ត្រទាំងអស់ដកលោក កឹម សុខា ចេញពីប្រធានរដ្ឋសភា។ ញត្តិដដែលលើកឡើងថា ពួកគេបានមើលឃើញសកម្មភាពពិសពុលរបស់លោក កឹម សុខា ដែលឃោសនាបោកប្រាស់ ញុះញង់អុចអាលលាបពណ៌ បង្កកំហឹង រើសអើងពូជសាសន៍ ដែលនឹងឈានទៅអោយមានសង្គ្រាមផ្ទៃក្នុង។
ចំណែកអ្នកសម្របសម្រួលបច្ចេកទេសស៊ើបអង្កេតនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត លើកឡើងថា ញត្តិរបស់នាយទាហានកំពុងបំភិតបំភ័យស្មារតីពលរដ្ឋនៅទូទាំងប្រទេស៖ «ពីព្រោះថាតែកាលណាកងកម្លាំងប្រកាសគាំទ្រគណបក្សនយោបាយមួយណា ឬអ្នកនៅក្នុងគណបក្សនយោបាយមួយណា នឹងបង្កឲ្យមានការភ័យខ្លាច ហើយក៏ចេះតែបង្កឲ្យមានបាតុភាពនឹងគ្នាទៅវិញទៅមក នោះនឹងអាចមានអំពើហិង្សាណាមួយ»។
ស្របគ្នានេះ លោក អ៊ូ វីរៈ បានមើលឃើញថា អ្នកដែលមានការភ័យខ្លាចពិតប្រាកដគឺក្រុមអ្នកជំនួញ ឬអ្នកវិនិយោគ ដែលនឹងនាំអោយសេដ្ឋកិច្ចជាតិជួបបញ្ហា។
វិទ្យុអាស៊ីសេរី មិនទាន់អាចទាក់ទងរដ្ឋមន្ត្រីក្រសួងការពារជាតិ លោក ទៀ បាញ់ និងអ្នកនាំពាក្យក្រសួងនេះ លោក ឈុំ សុជាត បាននៅឡើយទេ នៅថ្ងៃទី២៧ ខែតុលា ដោយទូរស័ព្ទមិនចូល។
បើទោះជាយ៉ាងណា ប្រធានគណៈកម្មការទី១ លោក អេង ឆៃអ៊ាង បញ្ជាក់ថា គណៈកម្មការនេះនៅមិនទាន់ទទួលបានញត្តិនេះជាផ្លូវការនៅឡើយ។
នៅក្នុងគេហទំព័រព័ត៌មានក្នុងស្រុក និងបណ្ដាញសង្គមបានបង្ហោះរូបថតជាច្រើនដែលបង្ហាញអោយឃើញក្រុមកងកម្លាំងយោធាកាន់បដា ដែលមានខ្លឹមសារទាមទារទម្លាក់តំណែងលោក កឹម សុខា។
មកដល់ពេលនេះនៅមិនទាន់មានប្រតិកម្មតបពីលោក កឹម សុខា ចំពោះការទាមទារទម្លាក់រូបលោកពីសំណាក់កងកម្លាំងយោធានេះនៅឡើយទេ។
នៅក្នុងច្បាប់ស្ដីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ ត្រង់មាត្រា ៩ ចែងថា យោធិនត្រូវមានអព្យាក្រឹតភាពក្នុងមុខនាទី និងក្នុងសកម្មភាពការងារ ហើយត្រូវបានហាមឃាត់ការប្រើមុខងារ និងសម្ភារៈរបស់រដ្ឋដើម្បីបម្រើសកម្មភាពនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
នយោបាយ
- គណបក្សកម្លាំងជាតិបោះឆ្នោតជ្រើសតាំងលោក ជា មុនី ធ្វើជាប្រធានបក្ស
- អ្នកឃ្លាំមើលថា កម្ពុជាខាតបង់ផលប្រយោជន៍ធំធេង ក្រោយពេលស៊ុយអែតបិទស្ថានទូតនៅក្រុងភ្នំពេញ
- អ្នកឃ្លាំមើលថា លោក ហ៊ុន សែន និងលោក ហ៊ុន ម៉ាណែត អសមត្ថភាពក្នុងការដោះស្រាយបញ្ហា ទើបប្រកាសធ្វើច្បាប់ចោទអ្នករិះគន់ថា ជាក្រុមភេរវកម្ម
- ហេតុអ្វីបានជាលោក ហ៊ុន សែន មិនហ៊ានក្អកជាមួយវៀតណាមក្នុងរឿង CLV?
- មន្ត្រីបក្សប្រឆាំង និងសង្គមស៊ីវិល រិះគន់រដ្ឋមន្ត្រីក្រសួងមហាផ្ទៃ ដែលណែនាំនគរបាលឲ្យបន្តបង្ក្រាបអ្នកប្រឆាំង