មន្ត្រី​របប​ភ្នំពេញ​ថា ការ​លើក​ពេល​ប្រជុំ​គណៈ​រដ្ឋមន្ត្រី​ មិន​ពាក់ព័ន្ធ​នឹង​​សុខភាព លោក ហ៊ុន សែន

ដោយ មាន ឫទ្ធិ
2019-07-24
អ៊ីម៉ែល
មតិ
Share
បោះពុម្ព
លោក ហ៊ុន សែន ពេល​សម្រាក​ព្យាបាល​ជំងឺនៅ​ប្រទេស​សិង្ហបុរី​។
លោក ហ៊ុន សែន ពេល​សម្រាក​ព្យាបាល​ជំងឺនៅ​ប្រទេស​សិង្ហបុរី​។
រូប​ពី​ហ្វេសប៊ុក​លោក ហ៊ុន សែន

ទីស្ដីការ​គណៈរដ្ឋមន្ត្រី ប្រកាស​លើក​ពេល​កិច្ច​ប្រជុំ​ពេញអង្គ​គណៈរដ្ឋមន្ត្រី​ប្រចាំ​សប្ដាហ៍​ដែល​គ្រោង ប្រជុំ​នៅ​ថ្ងៃ​សុក្រ​ទី​២៦ ខែ​កក្កដា ខាងមុខនេះ ទៅ​ប្រជុំ​នៅ​ពេល​ក្រោយ​វិញ ដោយ​មិន​កំណត់ពេល និង​មិន​បញ្ជាក់​អំពី​មូលហេតុ​ច្បាស់លាស់​នោះ​ទេ។

ប៉ុន្តែ​អ្នកនាំពាក្យ​រដ្ឋាភិបាល លោក ផៃ ស៊ីផាន ប្រាប់​អាស៊ីសេរី​ថា ការ​លើក​ពេល​នៃ​កិច្ចប្រជុំ គណៈរដ្ឋមន្ត្រី​នេះ គឺ​មិន​ពាក់ព័ន្ធ​នឹង​សុខភាព​របស់​លោកនាយក​រដ្ឋមន្ត្រី ហ៊ុន សែន នោះ​ទេ គឺ​ដោយ សារ​តែ​រដ្ឋមន្ត្រី​ម្នាក់ៗ​រវល់​ចុះទៅ​មូលដ្ឋាន និង​ដោយសារ​គ្មាន​របៀបវារៈ​គ្រប់គ្រាន់​ដើម្បី​ពិភាក្សា៖ «អាស្រ័យ​ដោយ​រដ្ឋមន្ត្រី​មិន​ទាន់​មាន​របៀបវារៈ​គ្រប់គ្រាន់​សម្រាប់ គណៈរដ្ឋមន្ត្រី​ប្រជុំ​ទេ គឺ​យើង​មិន​ប្រជុំ​ទេ វា​ខាត​ពេល។ អាស្រ័យ​ដោយ​រដ្ឋមន្ត្រី​អនុវត្ត​តាម​គោលការណ៍​ថ្មី ត្រូវ​ចុះ​ទៅតាម​មូលដ្ឋាន​នៃ​ការ​ទទួលខុសត្រូវ​រៀងៗ​ខ្លួន​ដូចជា​រដ្ឋមន្ត្រី​ក្រសួង​កសិកម្ម ចុះទៅ​តា​ វាលស្រែ រដ្ឋមន្ត្រី​ខាង​ដឹកជញ្ជូន​ចុះទៅ​តាម​ថ្នល់​សំណង់។ សូម​ជម្រាប​ជូន​ដែរ​ថា សុខ ភាព​របស់​សម្ដេច​ធម្មតា​អាស្រ័យ​ខ្ញុំ​ទើប​ទាក់ទង​លោក​មិន​ដល់​១០​នាទី​មុន​នេះ​ផង​ទេ។ លោក​បាន​ចុះហត្ថលេខា​លើ​ឯកសារ​មួយ​ចំនួន ដែល​សុំ​យោបល់​ពី​លោក។ ចំពោះ​ជន​ណា​ដែល​ប្រមាថ​ម៉ាក់​ងាយ និង​បំប៉ោង​ព័ត៌មាន​ប្រឌិត​ផ្សេងៗ​ទៀត​គឺជា​ក្រុម​ចង្រៃ»

កាលពី​ថ្ងៃ​ទី​៦ ខែ​កក្កដា កន្លងទៅ​ថ្មីៗ លោក ហ៊ុន សែន ធ្លាប់​បាន​ប្រកាស​បញ្ជា​ឱ្យ​លុបចោល​រាល់ ជំនួប​ផ្លូវការ​ជាមួយ​ភ្ញៀវ​ជាតិ និង​អន្តរជាតិ ដោយសារតែ​លោក​មាន​បញ្ហា​គ្រេច​ស្មា ដែល​ត្រូវ​ទៅ សម្រាក​ព្យាបាល​នៅ​ប្រទេស​សិង្ហបុរី​ជិត​មួយ​១​សប្ដាហ៍។ បន្ទាប់ពី​ព្យាបាល​រួច លោក ហ៊ុន សែន បាន​ចូលរួម​ដឹកនាំ​កិច្ចប្រជុំ​គណៈរដ្ឋមន្ត្រី​ម្ដង កាលពី​ថ្ងៃ​ទី​១២ ខែ​កក្កដា ប៉ុន្តែ​ក្រោយមក​លោក​មិន សូវ​ចេញមុខ និង​ឡើង​ថ្លែង​សារ​ជា​សាធារណៈ​ទៀត​ឡើយ ខណៈ​កម្ពុជា កំពុង​ពើប​ប្រទះ​បញ្ហា ចម្រូងចម្រាស​ជាច្រើន ដែល​តាម​ទម្លាប់​របស់​លោក​តែងតែ​ដើរ​ថ្លែង​សុន្ទរកថា បញ្ចេញ​ប្រតិកម្ម តបត។ ម្យ៉ាងវិញទៀត មួយ​រយៈ​ចុងក្រោយ​នេះ មេដឹកនាំ​របប​ក្រុងភ្នំពេញ តែងតែ​បង្ហោះ​សារ​ត្អូញត្អែរ​ពី​សុខភាព​របស់​លោក ដែល​ពេទ្យ​ហាម​មិន​ឱ្យ​ហាត់ប្រាណ និង​តែងតែ​បង្ហោះ​រូបភាព​ចាស់ៗ​និង​បទ​ចម្រៀង​នៅ​តាម​បណ្ដាញ​សង្គម​ហ្វេសប៊ុក។

មេដឹកនាំ​របប​ក្រុងភ្នំពេញ តែងតែ​ព្រមាន​ចាប់ខ្លួន​អ្នកណា​ដែល​ហ៊ាន​បង្ហោះ​សារ​បន់​ឱ្យ​លោក ឆាប់​ស្លាប់ ឬ​និយាយ​អំពី​ស្ថានភាព​ជំងឺ​របស់​លោក ឱ្យ​ឈប់​ជាបន្ទាន់ ព្រោះ​លោក​មិន​ងាយ​ស្លាប់​នោះ​ទេ ។ ទោះជា​មានការ​គំរាម​បែបនេះ​ក្តី ថ្ងៃនេះ​នៅ​លើ​បណ្ដាញ​សង្គម​ហ្វេសប៊ុក មានការ​បង្ហោះ​សារ​ព្រោងព្រាត​ថា​លោក ហ៊ុន សែន មាន​ជំងឺ​ជា​ទម្ងន់​ហើយ​ត្រូវ​គេ​បញ្ជូន​ទៅ​ព្យាបាល​នៅ​ប្រទេស​សិង្ហបុរី កាលពី​រាត្រី​ថ្ងៃ​ទី​២៣ ខែ​កក្កដា។ ក្រៅពី​ការ​ឆ្លើយ​តប​ជាមួយ​អាស៊ីសេរី​ពី​សំណាក់​លោក ផៃ ស៊ីផាន មិន​មាន​សេចក្ដី​ប្រកាស​ជា​ផ្លូវការ​ណាមួយ ឆ្លើយតប​ទៅ​នឹង​ការ​បង្ហោះ​សារ​ថា លោក ហ៊ុន សែន ឈឺ​លើ​បណ្ដាញ​សង្គម​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល