ពលករខ្មែរធ្វើការនៅប្រទេសប្រមាណ ៥០នាក់នៅតែជួបជុំគ្នាថ្លែងសាររង់ចាំទទួលប្រធានស្ដីគណបក្សសង្គ្រោះជាតិ លោក សម រង្ស៊ី វិលចូលស្រុកវិញជាបន្តទៀត។ ពួកគាត់អះអាងថា មូលហេតុដែលថ្លែងសារនយោបាយ ដោយសារមិនពេញចិត្តនឹងមេដឹកនាំក្រុងភ្នំពេញ លោក ហ៊ុន សែន បានបំផ្លាញប្រជាធិបតេយ្យនៅកម្ពុជា ហើយមិនព្រមដោះស្រាយបញ្ចប់វិបត្តិនយោបាយ។
ក្រុមពលករខ្មែរធ្វើការនៅប្រទេសថៃនៅតែជឿជាក់ថា កម្លាំងសាមគ្គីរបស់ប្រជាពលរដ្ឋនឹងអាចជំរុញឱ្យ លោក ហ៊ុន សែន ងាកមកស្ដារប្រជាធិបតេយ្យនៅកម្ពុជាវិញបាន។ ពលករទាំងនោះបានថ្លែងសារគាំទ្រព្រមគ្នាថា លោក កឹម សុខា និង លោក សម រង្ស៊ី ជាមនុស្សតែមួយ។
ពលករខ្មែរធ្វើការនៅខេត្ត សមុទ្រប្រាកាន (Samut Prakan) លោក ហង្ស ចន្ថា ថ្លែងនៅថ្ងៃទី១៩ ធ្នូថា ពួកលោកបានជួបប្រជុំគ្នាប្រមាណកន្លះម៉ោង ក្រោយពីបញ្ចប់ការងារនៅខេត្តជាប់ទីក្រុងបាងកក កាលពីយប់ថ្ងៃទី១៨ ធ្នូ។ លោកបន្តថា ពួកលោកនៅតែចង់ឱ្យលោក សម រង្ស៊ី វិលចូលស្រុក ដើម្បីដឹកនាំប្រជាពលរដ្ឋទាមទារយកអាសនៈសមាជិកក្រុមប្រឹក្សាឃុំសង្កាត់ជាង ៥ពាន់អាសនៈ (៥០០៧) ដែលរដ្ឋាភិបាលលោក ហ៊ុន សែន ប្លន់យកទៅចែកគ្នាកាលពីឆ្នាំ២០១៧ កន្លងទៅ យកមកប្រគល់ជូនម្ចាស់ឆ្នោតវិញ។ លោកបន្តថា មេដឹកនាំក្រុងភ្នំពេញ គឺលោក ហ៊ុន សែន ដឹកនាំប្រទេសជិត ៤០ឆ្នាំហើយ គឺប្រជាពលរដ្ឋនៅតែក្រ និងនាំគ្នាធ្វើចំណាកស្រុកកាន់តែច្រើន ដោយសារគ្មានការងារធ្វើនៅក្នុងស្រុក៖ «ទោះបីជាយូរយ៉ាងណាក៏ខ្ញុំរង់ចាំដែរ ព្រោះបើកាលណាគ្មានលោក កឹម សុខា និងលោក សម រង្ស៊ី ទេ គឺនៅស្រុកខ្មែរអត់មានអ្នកតស៊ូដូចពួកគាត់ទេ។ ពួកខ្ញុំនៅប្រទេសថៃគឺចង់ទាមទារឱ្យលោក សម រង្ស៊ី និងលោក កឹម សុខា ចាប់ដៃគ្នា ដើម្បីស្ដារប្រជាធិបតេយ្យនៅកម្ពុជាវិញ។អីចឹងបានតែលោកទាំង២ហ្នឹងទេ ដែលជាអ្នកដឹកនាំ និងអ្នកប្រជាធិបតេយ្យពិតប្រាកដ ព្រោះគាត់ធ្វើដើម្បីជាតិនិងដើម្បីពលរដ្ឋខ្មែរ » ។
រីឯពលការិនីមកពីខេត្តព្រៃវែង កញ្ញា រុន សាដា ថ្លែងថា មូលហេតុដែលកញ្ញាចូលរួមថ្លែងសារនយោបាយ ដោយសារចង់ផ្លាស់ប្ដូរមេដឹកនាំចាស់ គឺលោក ហ៊ុន សែន ហើយដាក់មេដឹកនាំថ្មី ដែលស្រឡាញ់ប្រជាពលរដ្ឋពិតប្រាកដ និងជួយរកទីផ្សារលក់កសិផលជូនដល់កសិករ ដើម្បីកុំឱ្យពិបាកធ្វើចំណាកស្រុកដូចសព្វថ្ងៃទៀត។ កញ្ញាបញ្ជាក់ថា ពួកគាត់មិនចង់ធ្វើការក្រៅប្រទេសទេ ប៉ុន្តែគ្មានជម្រើស ពីព្រោះនៅផ្ទះគ្មានការងារធ្វើ និងជំពាក់ប្រាក់ធនាគារ ដោយសារខ្វីគេមកធ្វើស្រែហើយខាតអស់ដើមទុន ធ្វើឱ្យគ្មានប្រាក់សងគេ ក៏ចេញពីស្រុកកំណើតមកការប្រទេសថៃតែម្ដង៖ «ខ្ញុំរាល់ថ្ងៃនេះមិនពេញសោះត្រង់ថា ហេតុអីរដ្ឋាភិបាល មិនខ្វាយខ្វល់ជនជាតិខ្លួនឯង ដែលធ្វើពលករនៅស្រុកគេ ចំណែកឯជនជាតិយួនហេតុអីបានជាគាត់ខ្វាយខ្វល់ត្រូវរកដីឱ្យធ្វើផ្ទះស្នាក់នៅស្រុកខ្មែរ ចុះត្រង់ពលរដ្ឋខ្លួនឯងវេទនាលំបាកហេតុអីគាត់មិនខ្វល់។អីចឹងពួកខ្ញុំដាច់ខាតអត់ពេញចិត្តរបបផ្ដាច់ការមួយហ្នឹងទេ » ។
កញ្ញាបន្តថា ថ្វីត្បិតតែពួកគាត់មកធ្វើការនៅក្រៅប្រទេសក្ដី ក៏ជីវភាពរបស់ពួកគាត់នៅតែក្រីក្រ ដដែល ព្រោះអ្នកផ្ទះពឹងផ្អែកទៅលើពួកគាត់ធ្វើការងារនៅប្រទេសថៃតែម្យ៉ាង ដោយមិនមានរបរផ្សេងរកប្រាក់ចំណូលនោះទេ។ កញ្ញាបន្ថែមថា ការជួបជុំគ្នានេះ មានសកម្មជនគណបក្សសង្គ្រោះជាតិប្រមាណ ១០នាក់ ដែលភៀសខ្លួនទៅនៅប្រទេសថៃ ចូលរួមជាមួយពួកគាត់ ថ្លែងសារជុំគ្នា ដើម្បីផ្ដល់កម្លាំងចិត្តដល់អ្នកប្រជាធិបតេយ្យខ្មែរធ្វើមាតុភូមិនិវត្តន៍ ទៅទាមទារអំណាចពីលោក ហ៊ុន សែន មកវិញ។
អ្នកនាំពាក្យរដ្ឋាភិបាល លោក ផៃ ស៊ីផាន ធ្លាប់មានប្រសាសន៍ថា អាជ្ញាធរមិនព្រួយបារម្ភ ចំពោះចលនារបស់សកម្មជនបក្សប្រឆាំងនៅក្រៅប្រទេសនោះទេ។ លោកចោទក្រុមសកម្មជនបក្សប្រឆាំងទាំងនោះថា ជាក្រុមអត់មានការងារធ្វើត្រឹមត្រូវ ហើយការធ្វើសកម្មភាពនយោបាយនៅក្នុងប្រទេសថៃ គឺក្នុងបំណងចង់បានសិទ្ធិជ្រកកោននៅប្រទេសទី៣៖ «ជាសិទ្ធិបោះគាត់ ប៉ុន្តែគាត់ក៏នឹងអាចប្រឈមនូវច្បាប់នៅកន្លែងរបស់ពួកគាត់ឬមួយច្បាប់នៅកម្ពុជា។គោលបំណងរបស់គាត់មិនមែនរឿងនយោបាយហ្នឹងទេ គោលបំណងរបស់គាត់ចង់បានប្រទេសទី៣ ដែលគាត់ត្រូវទេ » ។
ទោះយ៉ាងណាក្តី សកម្មជនដែលរត់ភៀសខ្លួននៅប្រទេសថៃ សុទ្ធតែអះអាងថា មូលហេតុដែលពួកគាត់បង្ខំ ចិត្តភៀសខ្លួនរស់នៅក្រៅប្រទេស ដោយសារតែរបបក្រុងភ្នំពេញប្លន់តួនាទីមុខតំណែងរបស់គាត់ និងធ្វើទុក្ខបុកម្នេញគ្រប់យ៉ាង មិនឲ្យពួកគាត់អនុវត្តសិទ្ធិនយោបាយ និងសិទ្ធិបញ្ចេញមតិបាន។ ពួកគាត់បន្តថា ការភៀសខ្លួននៅក្រៅប្រទេស គឺគ្រាន់តែជាយុទ្ធសាស្ត្ររក្សាកម្លាំងសម្រាប់ចូលរួមអមដំណើរមាតុភូមិនិវត្តន៍របស់លោក សម រង្ស៊ី។
អ្នកនាំពាក្យសមាគមការពារសិទ្ធិមនុស្ស អាដហុក (Adhoc) លោក សឹង សែន ករុណា ធ្លាប់បញ្ជាក់ថា ការចូលរួមគាំទ្រគណបក្សនយោបាយ ជាសិទ្ធិសេរីភាពរបស់ប្រជាពលរដ្ឋស្របច្បាប់ ដែលមានកំណត់នៅក្នុងរដ្ឋធម្មនុញ្ញ។ លោកកត់សំគាល់ថា ថ្វីត្បិតតែថ្មីៗ នេះរដ្ឋាភិបាលបានបន្ធូរបន្ថយលក្ខខណ្ឌមួយចំនួនដល់លោក កឹម សុខា និងដោះលែងសកម្មជនគណបក្សប្រឆាំងជាច្រើននាក់ក្ដី ក៏ស្ថានការណ៍នយោបាយនៅកម្ពុជាមិនទាន់ធូរស្រាលនៅឡើយ ពីព្រោះពួកគេមិនទាន់មានសិទ្ធិពេញលេញធ្វើនយោបាយនៅឡើយ៖ «ហើយច្បាប់នានា កន្លងមកដែលយើងយល់ថា វាជាច្បាប់មួយដែលបង្កើតឡើងក្នុងន័យរឹតត្បិតទៅលើសិទ្ធិសេរីភាពទាំងសង្គមស៊ីវិល កម្មករ គណបក្សនយោបាយនិងសហជីពជាដើមហ្នឹងយើងឃើញថា មិនទាន់មានការធ្វើវិសោធនកម្ម ឬក៏បើកលំហឱ្យពួកគេបានធ្វើសកម្មភាពដោយសេរី ឱ្យស្របតាមប្រទេសប្រជាធិបតេយ្យនៅឡើយទេ។ អីចឹងចំណុចទាំងអស់ហ្នឹង ដរាបណានៅតែមានស្ថានភាពបែបហ្នឹងវាមិនទាន់ល្អប្រសើរនៅឡើយទេ » ។
អ្នកគាំទ្រគណបក្សប្រឆាំងនៅតែជឿជាក់ថា លោក សម រង្ស៊ី នឹងអាចរកច្រកចូលទៅកម្ពុជាបានក្នុងពេលដ៏ខ្លីខាងមុខ ពីព្រោះលោក សម រង្ស៊ី កំពុងតែធ្វើកិច្ចការទូតជាមួយសហគមន៍អន្តរជាតិជាថ្មីទៀត ដើម្បីដាក់សម្ពាធលោក ហ៊ុន សែន ឱ្យងាកមកស្ដារប្រជាធិបតេយ្យឡើងវិញ ដើម្បីបញ្ចប់វិបត្តិនយោបាយនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។