កម្មករ​រោងចក្រ​អាយរីច (IREACH) នៅ​ខេត្ត​កណ្ដាល​​ប្រមាណ ៣០នាក់​ តវ៉ា​ឱ្យ​ថៅកែ​គោរព​លក្ខខណ្ឌ​ការ​ងារ

ដោយ ជុន ច័ន្ទបុត្រ
2020-01-06
អ៊ីម៉ែល
មតិ
Share
បោះពុម្ព
កម្មករ​រោងចក្រ​អាយរីច (IREACH) ប្រមាណ ៣០នាក់ នៅ​ខេត្ត​កណ្ដាល នៅ​ថ្ងៃ​ទី៦ ខែ​មករា ឆ្នាំ២០២០ តវ៉ា​នៅ​មុខ​រោងចក្រ ទាមទារ​ឱ្យ​ថៅកែ​គោរព​លក្ខខណ្ឌ​ការងារ​ល្អ​ប្រសើរ។
កម្មករ​រោងចក្រ​អាយរីច (IREACH) ប្រមាណ ៣០នាក់ នៅ​ខេត្ត​កណ្ដាល នៅ​ថ្ងៃ​ទី៦ ខែ​មករា ឆ្នាំ២០២០ តវ៉ា​នៅ​មុខ​រោងចក្រ ទាមទារ​ឱ្យ​ថៅកែ​គោរព​លក្ខខណ្ឌ​ការងារ​ល្អ​ប្រសើរ។
រូប៖ កម្មករ​ផ្ដល់​ឱ្យ

កម្មករ​រោងចក្រ​ផលិត​កាបូប​ អាយរីច​ ហ្វេកធើរី (I REACH FACTORY) ប្រមាណ ៣០នាក់ នៅ​ស្រុក​អង្គស្នួល ខេត្ត​កណ្ដាល​ បាន​នាំ​គ្នា​តវ៉ា​នៅ​មុខ​រោងចក្រ​ទាមទារ​លក្ខខណ្ឌ​ការងារ​មួយ​ចំនួន មាន​ដូច​​ជា​ ទាម​ទារ​ឱ្យ​ថៅកែ​ជនជាតិ​ចិន​ អនុញ្ញាត​ឱ្យ​តំណាង​កម្មករ ៣នាក់ ដែល​ខាង​រោង​ចក្រ​បាន​បញ្ឈប់​ពី​ការងារ​បាន​ចូល​ធ្វើ​ការ​វិញ។ ទាមទារ​ឱ្យ​បើក​ប្រាក់​ខែ​ទៀងទាត់​ ទាមទារ​ប្រាក់​រង្វង់​លើក​ទឹក​ចិត្ត​ដល់​កម្មករ​ និង​ស្នើ​ឱ្យ​ឈប់​ដក​កម្មករ​តាម​អំពើ​ចិត្ត​បន្ត​ទៀត​ ជា​ដើម។

តំណាង​កម្មករ​ម្នាក់ គឺ​លោក កៃ សុខណាត ប្រាប់​អាស៊ី​សេរី​នៅ​រសៀល​ថ្ងៃ​ទី​៦ ​មករា​ថា មូលហេតុ​ដែល​កម្មករ​តវ៉ា​ ដោយសារ​ពួក​គេ​មិន​ពេញ​ចិត្ត​នឹង​មន្ត្រី​រដ្ឋបាល​រោងចក្រ​នេះ​បញ្ឈប់​កម្មករ​តាម​អំពើ​ចិត្ត និង​មិន​គោរព​ច្បាប់​ការងារ​របស់​កម្ពុជា៖ «ថៅកែ​និង​រដ្ឋបាល​រោងចក្រ​នេះ​គាត់​ធ្វើ​ដូច​បំបាក់​កម្មករ​ពេក​ ហើយ​គាត់​ក៏​មិន​ជួយ​ដល់​កម្មករ​ដែរ។ បើ​ពួក​ខ្ញុំ​មិន​តវ៉ា​ឱ្យ​តំណាង​សហជីព​ចូល​ធ្វើ​វិញ​ អីចឹង​ថ្ងៃ​ក្រោយ​ពេល​មាន​បញ្ហា​អី ពួក​ខ្ញុំ​មិន​មាន​សិទ្ធិ​ទៅ​ប្ដឹង​គេ​បាន​ឡើយ ព្រោះ​ខ្លាច​ថៅកែ​បញ្ឈប់​ពី​ការងារ ដល់​តែ​មាន​តំណាង​សហជីព​បាន​ខ្ញុំ​អាច​ឱ្យ​ជួយ​ពួក​ខ្ញុំ​ទាមទារ​ទៅ​ថៅកែ​បាន»

ឆ្លើយ​តប​នឹង​ការ​ទាមទារ​នេះ​ ប្រធាន​រដ្ឋបាល​រោងចក្រ​ អាយរីច លោក ដួង សារិន ប្រាប់​អាស៊ី​សេរី​ថា ខាង​រោងចក្រ​មិន​អាច​ធ្វើ​តាម​ការ​ស្នើសុំ​របស់​កម្មករ​បាន​ទេ ដោយសារ​តំណាង​កម្មករ​ទាំង​នោះ​ទាមទារ​ខុស​ពី​ច្បាប់​កំណត់។ លោក​បញ្ជាក់​ថា មូលហេតុ​ដែល​ខាង​រោងចក្រ​បញ្ឈប់​តំណាង​កម្មករ​ទាំង ៣នាក់​ ដោយសារ​ពួក​គេ​មាន​កំហុស​នៅ​ពេល​បំពេញ​ការងារ។

ប៉ុន្តែ​លោក កៃ សុខណាត អះអាង​ថា មូលហេតុ​ដែល​រដ្ឋបាល​រោងចក្រ​នេះ​បញ្ឈប់​តំណាង​កម្មករ គឺ​ដោយសារ​រោងចក្រ​ចង់​បិទ​កម្មករ​មិន​ឱ្យ​នាំ​គ្នា​តវ៉ា​ទៅ​ថ្ងៃ​ក្រោយ​ទៀត គឺ​ពុំ​មែន​ពួក​គាត់​ប្រព្រឹត្ត​ខុស​ច្បាប់​ការងារ​នោះ​ឡើយ។

ក្រុម​កម្មករ​បាន​តវ៉ា​អស់​រយៈ​ពេល ៤ថ្ងៃ​ហើយ ហើយ​ខាង​រោងចក្រ​ពុំ​ទាន់​ដោះ​ស្រាយ​ឱ្យ​ពួក​គាត់​នៅ​ឡើយ​ទេ។

អាស៊ី​សេរី​មិន​អាច​ទាក់​ទង​អ្នក​នាំ​ពាក្យ​ក្រសួង​ការងារ​ លោក ហេង សួរ ដើម្បី​សុំ​អត្ថាធិប្បាយ​ជុំ​វិញ​បញ្ហា​នេះ​បាន​ទេ​នៅ​ថ្ងៃ​ទី​៦​ មករា​ ដោយ​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

រោងចក្រ​មួយ​នេះ​បាន​បើក​ដំណើរ​ការ​នៅ​ខេត្ត​កណ្ដាល​ប្រមាណ ១ឆ្នាំ​ហើយ និង​មាន​កម្មករ​ធ្វើ​ការ​ជិត ៥០០នាក់។ ក្រុម​អ្នក​តវ៉ា​​បាន​ត្រឡប់​ទៅ​ផ្ទះ​វិញ​នៅ​ព្រឹក​ថ្ងៃ​ដដែល ប៉ុន្តែ​ពួក​គាត់​ព្រមាន​ថា ពួក​គេ​នឹង​បន្ត​ការ​តវ៉ា​រហូត​ដល់​មាន​ដំណោះស្រាយ៕

 


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល