រំឭក​អំពី​គុណសម្បត្តិ​លោក​បណ្ឌិត កែម ឡី

ដោយ ឡេង ម៉ាលី
2016-08-10
អ៊ីម៉ែល
មតិ
Share
បោះពុម្ព
លោក​បណ្ឌិត ឡៅ ម៉ុងហៃ ចូលរួម​ពិធី​បញ្ចុះ​សព​លោក​បណ្ឌិត កែម ឡី នៅ​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ នៅ​ថ្ងៃ​ទី​២៥ ខែ​កក្កដា ឆ្នាំ​២០១៦។ RFA/Brach Chev
លោក​បណ្ឌិត ឡៅ ម៉ុងហៃ ចូលរួម​ពិធី​បញ្ចុះ​សព​លោក​បណ្ឌិត កែម ឡី នៅ​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ នៅ​ថ្ងៃ​ទី​២៥ ខែ​កក្កដា ឆ្នាំ​២០១៦។ RFA/Brach Chev
RFA/Brach Chev

អ្នក​ដែល​ស្រឡាញ់​ចូលចិត្ត​បណ្ឌិត កែម ឡី ចាត់​ទុក​ថា លោក​ជា​អ្នក​ក្លាហាន ហ៊ាន​និយាយ​ការ​ពិត​ដ៏​ឆ្នើម​ឧត្ដម​ម្នាក់ ដើម្បី​ភាព​យុត្តិធម៌​នៅ​ក្នុង​សង្គម​ជាតិ​ខ្មែរ។ អ្នក​ខ្លះ​យល់​ថា បណ្ឌិត កែម ឡី ជា​អវតា​តំណាង​ឲ្យ​ពន្លឺ​នៃ​ការ​ពិត និង​ចង់​ដាក់​ឈ្មោះ​លោក​ថា “អាទិទេព​នៃ​សច្ចធម៌”។

នៅ​ក្នុង​ការ​ប្រារព្ធ​ខួប ៣០​ថ្ងៃ នៃ​មរណភាព​របស់​លោក នៅ​ថ្ងៃ​ទី​១០ សីហា នេះ សូម​អញ្ជើញ​លោក​អ្នក​នាង​ស្ដាប់​បូជនកិច្ច​វាចា​រំឭក​គុណសម្បត្តិ លោក​បណ្ឌិត កែម ឡី អ្នក​និយាយ​ការ​ពិត​ដើម្បី​យុត្តិធម៌ ដែល​និពន្ធ​ដោយ​បណ្ឌិត ឡៅ ម៉ុងហៃ និង​អាន​ដោយ​លោក ឡេង ម៉ាលី៖

នៅ​ព្រឹក​ថ្ងៃ​អាទិត្យ ទី​១០ ខែ​កក្កដា ឆ្នាំ​២០១៦ គ្រាប់​កាំភ្លើង ២​គ្រាប់​បាន​ផ្ដាច់​ជីវិត​លោក​បណ្ឌិត កែម ឡី។ ជាតិ​ខ្មែរ​បាន​បាត់បង់​មហា​បុត្រា​ដ៏​ឆ្នើម​ម្នាក់​ហើយ។ ឃាតកម្ម​លើ​រូប​គាត់ គឺ​ជា​សោកនាដកម្ម​មួយ​ទៀត​របស់​ជាតិ​ខ្មែរ។ រំពេច​នោះ ដំណឹង​នេះ​បាន​ធ្វើ​ឲ្យ​ប្រជាជាតិ​ទាំង​មូល​តក់ស្លុត​ជា​ខ្លាំង ហើយ​ភ្លាមៗ នោះ មនុស្ស​ម្នា​ជា​ច្រើន​ពពាក់ពពូន​នៅ​កន្លែង​ឃាតកម្ម ដោយ​ទឹក​មុខ​ក្រៀមក្រំ ចិត្ត​សោកសង្រេង និង​ខឹងសម្បា​ជា​ខ្លាំង។ ពួក​គេ​ក៏​បាន​ដឹក​សាកសព​ទៅ​តម្កល់​នៅ​វត្ត​ចាស់ នៅ​ត្រើយ​ខាង​កើត​នៃ​ដង​ទន្លេសាប ក្នុង​ក្រុង​ភ្នំពេញ ដើម្បី​ប្រារព្ធ​ពិធីបុណ្យ​សព។

ជាតិ​ខ្មែរ​មាន​ការ​សោកស្ដាយ​ចំពោះ​ការ​ស្លាប់​បាត់បង់​ជីវិត​របស់​គាត់។ អស់​ពេល​ជា​ច្រើន​ថ្ងៃ មនុស្ស​ជា​ច្រើន​បាន​ចូលរួម​សម្ដែង​មរណទុក្ខ​ គោរព​វិញ្ញាណក្ខន្ធ និង​កាន់ទុក្ខ​ចំពោះ​មរណភាព​គាត់​យ៉ាង​ច្រើន​កុះករ។ មនុស្សម្នា​ជា​ច្រើន​ទៀត ដែល​មិន​អាច​ទៅ​វត្ត​នោះ ក៏​បាន​ប្រារព្ធ​ពិធីបុណ្យ​កាន់ទុក្ខ​នៅ​តាម​ភូមិឋាន​រៀងៗ ខ្លួន។ មរណភាព​របស់​គាត់​ក៏​បាន​ធ្វើ​ឲ្យ​សហគមន៍​អន្តរជាតិ​ក្រៀមក្រំ​ផង​ដែរ ហើយ​មាន​អ្នក​មុខ​អ្នក​ការ​បរទេស​ជា​ច្រើន បាន​ចូលរួម​សម្ដែង​មរណទុក្ខ និង​គោរព​វិញ្ញាណក្ខន្ធ​គាត់។

ទាំង​អស់​គ្នា​ទទូច​សុំ​ឲ្យ​មាន​ការ​ស៊ើបអង្កេត​ជា​លក្ខណៈ​ឯករាជ្យ​មួយ​លើ​ឃាតកម្ម​នេះ ដោយ​មាន​ការ​ចូលរួម​ពី​អន្តរជាតិ​ផង ពីព្រោះ​ពួក​គេ​មិន​ទុក​ចិត្ត​ការ​ស៊ើប​អង្កេត​របស់​ខ្មែរ ដោយសារ​លោក​បណ្ឌិត កែម ឡី ជា​អ្នក​រិះគន់​ដ៏​ល្បីល្បាញ​ម្នាក់​ចំពោះ​រដ្ឋាភិបាល ហើយ​ឃាតកម្ម​នេះ ត្រូវ​បាន​មតិ​ទូទៅ​សង្ស័យ​ថា ជា​ឃាតកម្ម​ដោយ​មូល​ហេតុ​នយោបាយ។ ជា​ច្រើន​ឆ្នាំ​មុន​ឃាតកម្ម​នេះ គាត់​បាន​ប្ដេជ្ញា​បូជា​ជីវិត​គាត់​ដើម្បី​ស្រាវជ្រាវ​ដល់​ទីកន្លែង​ផ្ទាល់​រក​ការ​ពិត​លើ​រឿងរ៉ាវ​មួយ​ចំនួន​ធំ ដែល​ពាក់ព័ន្ធ​នឹង​នយោបាយ ជា​ពិសេស ក្នុង​វិស័យ​អភិបាលកិច្ច និង​យុត្តិធម៌​សង្គម។ ក្នុង​ចំណោម​រឿង​ទាំង​នេះ មាន​រឿង​ពុករលួយ និង​រឿង​ខ្វះ​ប្រសិទ្ធភាព​របស់​រដ្ឋាភិបាល និង​រដ្ឋបាល​សាធារណៈ ចំណុច​ខ្វះខាត និង​បរាជ័យ ការ​គ្រួសារ​បក្សពួក​និយម ការ​រង​ទុក្ខវេទនា​របស់​កម្មករ​ក្នុង​ស្រុក និង​កម្មករ​ចំណាក​ស្រុក ការ​មិន​បាន​ការពារ​សិទ្ធិ និង​សុខុមាលភាព​របស់​ពួក​គាត់ ការ​ទន្ទ្រាន​យក​ដីធ្លី ការ​កាប់​បំផ្លាញ​ព្រៃឈើ អន្តោប្រវេសន៍​ខុស​ច្បាប់​ពី​សំណាក់​ជនជាតិ​វៀតណាម ដី​សម្បទាន​ធំៗ នៅ​ជាប់​នឹង​ប្រទេស​វៀតណាម បញ្ហា​ព្រំដែន​ជាមួយ​ប្រទេស​នោះ ការ​មក​តាំង​ទីលំនៅ​លើ​ទឹកដី​ដោយ​ជនជាតិ​វៀតណាម ការ​ផ្ដល់​សម្បទាន​កោះ​នានា នៅ​ក្នុង​ឈូង​សមុទ្រ​ថៃ និង​ដំណើរ​ការ​មិន​ប្រជាធិបតេយ្យ​នៃ​គណបក្ស​នយោបាយ។

មុន​មរណភាព​របស់​លោក​បណ្ឌិត កែម ឡី បាន​ផ្ដើម​គម្រោង​មួយ​ឈ្មោះ​ថា “យុទ្ធនាការ​១០០​រាត្រី”។ នៅ​ក្នុង​គម្រោង​នេះ គាត់​ទៅ​ស្នាក់​នៅ​តាម​ផ្ទះ​ប្រជាពលរដ្ឋ​នៅ​ក្នុង​ភូមិ តាម​បណ្ដោយ​ទល់​ដែន​ជាមួយ​ប្រទេស​វៀតណាម នៅ​តាម​កោះ​ខ្លះ​ក្នុង​ឈូង​សមុទ្រ​ថៃ និង​នៅ​តាម​ភូមិ​ខ្មែរ​ក្រោម​នៅ​វៀតណាម ខាងត្បូង ហើយ​និង​នៅ​ភូមិ​ខ្មែរសុរិន្ទ ក្នុង​ខេត្ត​សុរិន្ទ នៃ​ភូមិភាគ​ឦសាន​ប្រទេស​ថៃ។​ គាត់​មាន​គោល​បំណង​ស្វែង​យល់​អំពី​ជីវិត​រស់​នៅ និង​ក្ដី​បារម្ភ​របស់​អ្នក​ភូមិ​ទាំង​នោះ។ គាត់​កំពុង​តែ​បណ្ដុះបណ្ដាល និង​រៀបចំ​ក្រុម​យុវជន និង​បញ្ញវន្ត​ជា​ច្រើន​រូប​ឲ្យ​ចេះ​ធ្វើ​ការ​ស្រាវជ្រាវ និង​ចេះ​តាក់តែង​គោល​នយោបាយ​ក្នុង​វិស័យ​ផ្សេងៗ​ជា​ច្រើន។

អ្នក​សិក្សា​ការ​អភិវឌ្ឍ​សង្គម និង​ជា​អ្នក​វិភាគ​នយោបាយ បណ្ឌិត កែម ឡី ពេល​ចុះ​ទៅ​ពិនិត្យ​ការ​កាប់​បំផ្លាញ​ព្រៃ​ឈើ​នៅ​តំបន់​ព្រៃឡង់ ខេត្ត​ស្ទឹងត្រែង កាល​ពី​ថ្ងៃ​ទី​២៧ ខែ​ឧសភា ឆ្នាំ​២០១៥។ RFA/Brach Chev
អ្នក​សិក្សា​ការ​អភិវឌ្ឍ​សង្គម និង​ជា​អ្នក​វិភាគ​នយោបាយ បណ្ឌិត កែម ឡី ពេល​ចុះ​ទៅ​ពិនិត្យ​ការ​កាប់​បំផ្លាញ​ព្រៃ​ឈើ​នៅ​តំបន់​ព្រៃឡង់ ខេត្ត​ស្ទឹងត្រែង កាល​ពី​ថ្ងៃ​ទី​២៧ ខែ​ឧសភា ឆ្នាំ​២០១៥។ RFA/Brach Chev RFA/Brach Chev

អម​ដោយ​ហេតុការណ៍ និង​ទិន្នន័យ​ផង លោក​បណ្ឌិត កែម ឡី និយាយ​ការ​ពិត​ជាក់ស្ដែង​អស់​ទាំង​នេះ ដោយ​ត្រង់ៗ និង​តាម​រយ:​រឿង​និទាន​នៅ​ក្នុង​វេទិកា​នានា តាម​វិទ្យុ និង​ប្រព័ន្ធ​ផ្សព្វផ្សាយ​សង្គម។ គាត់​ធ្វើការ​នេះ ទាំង​ទឹក​ចិត្ត​ក្លាហាន​ដោយ​គ្មាន​បារម្ភ​អ្វី​ដល់​សន្តិសុខ​របស់​គាត់​ផ្ទាល់​ឡើយ។ គាត់​និយាយ​ពី​រឿងរ៉ាវ​អស់​ទាំង​នោះ ដោយ​ធ្វើ​ការ​បទអត្ថាធិប្បាយ ការ​ពិនិត្យពិច័យ​មើល​ពី​របៀប​ដែល​រឿង​ទាំង​នោះ​ត្រូវ​បាន​មើល​រំលង ឬ​ត្រូវ​បាន​ចាត់ចែង ឬ​ដោះស្រាយ ទិតៀន​ដល់​ការ​ធ្វេសប្រហែស ការ​ខ្វះ​ប្រសិទ្ធភាព ឬ​ការ​បរាជ័យ​ក្នុង​ការ​ចាត់ចែង​ដោះស្រាយ​រឿង​ទាំង​នោះ ព្រម​ទាំង​ដាក់​ស្នើ​សុំ​ដំណោះស្រាយ​ចំពោះ​រឿង​ទាំង​នោះ ហើយ​និង​ទាមទារ​ឲ្យ​មាន​ការ​កែ​ទម្រង់ និង​ផ្លាស់ប្ដូរ។ រឿងរ៉ាវ​អស់​ទាំង​នោះ​ជា​ច្រើន និង​ការ​ពិត​ជាក់​ស្ដែង​ខ្លះ​ក្នុង​រឿង​នោះ ត្រូវ​បាន​សាធារណជន​ដឹង​ឮ​ជា​ទូទៅ​ទៅ​ហើយ។ ក្នុង​ចំណោម​អ្នក​ស្ដាប់​គាត់​ទាំង​អស់ មាន​អ្នក​ស្ដាប់​ជា​ច្រើន ប្រាថ្នា​ចង់​សម្ដែង​មតិ​អំពី​រឿង​ទាំង​នេះ​ជា​សាធារណៈ ប្រសិន​បើ​ពួក​គេ​មាន​ចំណេះ​ដឹង គុណ​សម្បត្តិ ភាព​ប៉ិនប្រសព្វ និង​សេចក្ដី​ក្លាហាន ដូច​លោក​បណ្ឌិត កែម ឡី។

លោក​បណ្ឌិត កែម ឡី បាន​ដឹង​ការ​ពិត​ទាំង​នោះ​យ៉ាង​ពេញលេញ និង​គ្រប់​ជ្រុងជ្រោយ​ទាំង​អស់។ គាត់​បាន​និយាយ​បញ្ជាក់​ពី​រឿងរ៉ាវ​ទាំង​នោះ ដោយ​មាន​ហេតុការណ៍ និង​ទិន្នន័យ​ជាក់​ស្ដែង ហើយ​បាន​រៀបរាប់​ប្រាប់​អ្នក​ស្ដាប់​គាត់​ដោយ​ប្រើប្រាស់​ពាក្យពេចន៍​សាមញ្ញ ងាយ​យល់​ គឺ​គាត់​និយាយ​ភាសា​របស់​ប្រជាពលរដ្ឋ ជួនកាល​មាន​ទាំង​ប្រើប្រាស់​ការ​ឌឺដង​បញ្ឈឺ ដើម្បី​ធ្វើ​ឲ្យ​គេ​ចាប់​អារម្មណ៍​កាន់​តែ​ខ្លាំង​ទៅ​លើ​អ្វី​ដែល​គាត់​និយាយ។ អ្នក​ស្ដាប់​ទាំង​ឡាយ​បាន​យល់​កាន់​តែ​ច្បាស់​នូវ​ការពិត​ទាំង​នោះ។ ក្នុង​នាម​ប្រជាពលរដ្ឋ​គាត់​និយាយ​ផ្ដាំ​ផ្ញើ​ជា​សាធារណៈ នូវ​ការ​ពិត​អស់​ទាំង​នោះ ទៅ​ឲ្យ​អ្នក​ដែល​មាន​អំណាច និង​មាន​កាតព្វកិច្ច​ត្រូវ​ដោះស្រាយ​រឿង​ទាំង​នោះ។ ពលរដ្ឋ​ស្រឡាញ់​ចូល​ចិត្ត​គាត់​ណាស់ ហើយ​ថែម​ទាំង​គាំទ្រ​គំនិត និង​ការ​ទាមទារ​របស់​គាត់​ផង។ ពួក​គេ​ជឿជាក់​តាម​ពាក្យ​សម្ដី​របស់​គាត់​ដែល​ពោរពេញ​ដោយ​ការពិត និង​សោភណភាព​ពីរោះ​ពិសា។

ការ​និយាយ​ពិត​របស់​គាត់​បាន​ធ្វើ​ឲ្យ​ពលរដ្ឋ​ចេះ​ដឹង​ច្រើន។ ឥឡូវ​នេះ​មនុស្សម្នា​យល់​ច្បាស់​ហើយ​ថា នៅ​ស្រុក​ខ្មែរ​សព្វថ្ងៃ​មាន​អ្វី​ខ្លះ​ដែល​មាន​ដំណើរការ​មិន​ល្អ ហើយ​អ្នក​ណា​ខ្លះ​ជា​អ្នក​ទទួល​ខុស​ត្រូវ​ចំពោះ​ដំណើរ​ការ​មិន​ល្អ​ទាំង​នោះ។ មហាជន​យល់​ថា ត្រូវ​ធ្វើ​យ៉ាង​ណា​ដើម្បី​កែលម្អ ហើយ​ប្រហែល​ជា​ដឹង​ថា អ្នក​ណា​អាច​នាំ​មក​នូវ​ការ​ផ្លាស់ប្ដូរ​បាន​ទៀត​ផង។ ប្រជាពលរដ្ឋ​ស្រឡាញ់​ចូលចិត្ត​គាត់​ណាស់ ហើយ​ចង់​ស្តាប់​សម្តី​គាត់។ មាន​អ្នក​ស្ដាប់​គាត់​កាន់​តែ​ច្រើន​ឡើង ទាំង​នៅ​ក្នុង​ប្រទេស និង​ក្រៅ​ប្រទេស។ គាត់​ត្រូវ​បាន​ប្រជាពលរដ្ឋ​ខ្មែរ​ចាត់​ទុក​ជា​មនុស្ស​របស់​ពួក​គេ។ ប៉ុន្តែ​សុភាសិត​ខ្មែរ​មួយ​បាន​ពោល​ថា “ពាក្យ​ពិត​រែង​ស្លែង”។ ការ​និយាយ​ការ​ពិត​បែប​នេះ មិន​បាន​ធ្វើ​​ឲ្យ​ក្រុម​អ្នក​នយោបាយ​ទាំង​សង្ខាង ដែល​ជា​ទិសដៅ​ចម្បង​នៃ​ពាក្យ​សម្ដី​ទាំង​នោះ ដែល​ជួនកាល​ជា​ពាក្យ​សម្ដី​ទិតៀន​ខ្លាំងៗ ផង​នោះ មាន​ការ​ចូលចិត្ត​ប៉ុន្មាន​ទេ។

លោក​បណ្ឌិត កែម ឡី គឺ​ជា​អ្នក​និយាយ​ការ​ពិត​ដ៏​ឆ្នើម​មួយ​រូប ដែល​មាន​អ្នក​កាន់​ទុក្ខ​សោក​នៃ​មរណភាព​របស់​គាត់​ដ៏​ច្រើន​មហិមា បន្ទាប់​ពី​ចំនួន​អ្នក​កាន់​ទុក្ខសោក​នៃ​ការ​ចូល​ទិវង្គត​របស់​ព្រះមហាវីរក្សត្រ កាល​ពី​ជិត ៤​ឆ្នាំ​មុន​ដែរ។ នេះ​ជា​សក្ខីភាព​បញ្ជាក់​ថា គាត់​ពិត​ជា​មាន​ឥទ្ធិពល​ដ៏​ធំធេង​ណាស់។

ចំពោះ​​អ្នក​ដែល​យល់​ឃើញ​ថា គាត់​ជា​អ្នក​ទិតៀន គេ​មិន​ស្វាគមន៍​រូប​គាត់ និង​ពាក្យ​ពិត​របស់​គាត់​ទេ។ ជួនកាល គាត់​បាន​ទទួល​រង​ការ​ត្មះតិះដៀល​យ៉ាង​សែន​ឈឺ​ចាប់ និង​ទទួល​គំរាម​លាក់មុខ​ខ្លះ ដល់​ជីវិត​ទៀត​ផង។ ការ​មិន​ស្វាគមន៍​នេះ កាន់​តែ​កើន​ឡើង​ថែម​ទៀត នៅ​ពេល​ដែល​និយាយ​ការ​ពិត គឺ​បដិវត្តន៍ គឺ​នាំ​មក​នូវ​ការ​ផ្លាស់ប្ដូរ –មែន​ទែន​ទៅ​ ការ​និយាយ​ការពិត​របស់​គាត់ គឺ​ជា​បដិវត្តន៍​មែន​ដែល​ជា​ការវិវឌ្ឍន៍​មួយ​ត្រូវ​បាន​ប្រឆាំង​ទប់ទល់​វិញ​យ៉ាង​ខ្លាំងក្លា។

ដូច​ដែល​អ្នក​និពន្ធ​ជាតិ​រុស្សី​ឈ្មោះ អាឡិចសាន់ឌ័រ សូលសេស្ស៊ីធស៊ីន (Alexander Solzhesitsyn) បាន​និយាយ​ថា “អ្នក​និពន្ធ​ដ៏​ឆ្នើម​ឧត្តម គឺ​ជា​រដ្ឋាភិបាល​ទី​ពីរ​នៅ​ក្នុង​ប្រទេស​ខ្លួន”។ ដូច្នេះ លោក​បណ្ឌិត កែម ឡី ដែល​ជា​អ្នក​និយាយ​ការ​ពិត ដ៏​ឆ្នើម​ឧត្ដម​ម្នាក់ ក៏​មិន​ខុស​អី​ពី​រដ្ឋាភិបាល​ទី​ពីរ​នៅ​ក្នុង​ប្រទេស​គាត់​ឡើយ ដែល​ជា​ប្រទេស​មួយ មាន​វប្បធម៌​និយាយ​ច្រើន​ជាង​សរសេរ។ គេ​មិន​ចូល​ចិត្ត​កាន់​តែ​ខ្លាំង​ថែម​ទៀត ខណៈ​ដែល​ការ​បោះឆ្នោត​ឆ្នាំ​២០១៧ និង ២០១៨ ឈាន​ជិត​មក​ដល់។ ការ​និយាយ​ការ​ពិត​របស់​បណ្ឌិត កែម ឡី អាច​នឹង​បំបែរ​សំឡេង​ឆ្នោត និង​ផ្លាស់ប្ដូរ​ជោគវាសនា​របស់​គណបក្ស​នយោបាយ ដែល​ប្រកួត​ប្រជែង​គ្នា​នោះ​បាន។ គាត់​អាច​នឹង​ទៅ​ជា​គ្រោះថ្នាក់​ដល់​ជីវិត ជា​ពិសេស​ដល់​គណបក្ស​ណា​ដែល​កំពុង​មាន​វាសនា​ទីទើរ អាច​លិច​អាច​អណ្ដែត​បំផុត។ គ្រោះថ្នាក់​បែប​នេះ គឺ​ត្រូវ​តែ​កម្ចាត់​ចោល។ គេ​មិន​ត្រូវ​ទុក​ឲ្យ​​បណ្ឌិត កែម ឡី និយាយ​ការ​ពិត​តទៅ​ទៀត​ទេ។ គាត់​ត្រូវ​បាន​គេ​បាញ់​សម្លាប់។ មនុស្ស​ស្លាប់​អត់​និយាយ​ទេ។

ទោះ​បី​ជា​បាន​បាត់បង់​មហា​បុត្រា​ដ៏​ឆ្នើម​ម្នាក់​ក៏ដោយ ជាតិ​ខ្មែរ​នៅ​តែ​អាច និង​គួរ​តែ​ស្រាវជ្រាវ​រក​ឲ្យ​ឃើញ ហើយ​ប្រមូល​យក​មក​វិញ​នូវ​កំណប់​គតិបណ្ឌិត​របស់​លោក​បណ្ឌិត កែម ឡី។ ប៉ុន្តែ​ជា​ដំបូង​ជាតិ​ខ្មែរ​នេះ ត្រូវ​ដោះ​បំណុល​យុត្តិធម៌​ដែល​ខ្លួន​ជំពាក់​គាត់​ជា​បន្ទាន់ ហើយ​ដើម្បី​យុត្តិធម៌​នេះ ត្រូវ​ស្វែង​រក​ការពិត​ទាំង​អស់ និង​គ្មាន​អ្វី​ក្រៅ​ពី​ការ​ពិត​តែ​ប៉ុណ្ណោះ ក្នុង​ការ​ស៊ើបអង្កេត​របស់​ខ្លួន​ក្នុង​ករណី​ឃាតកម្ម​ទៅ​លើ​រូប​គាត់ ព្រោះ​ថា យុត្តិធម៌​មិន​អាច​មាន​ទេ​បើ​គ្មាន​ការ​ពិត។

បន្ទាប់​មក​ជាតិ​ខ្មែរ​គួរ​តែ​ពិចារណា និង​ឲ្យ​តម្លៃ​ដល់​គតិ​បណ្ឌិត​របស់​លោក​បណ្ឌិត កែម ឡី គំនិត​របស់​គាត់ គោលការណ៍​របស់​គាត់ បរិចារកិច្ច​របស់​គាត់ និង​តម្លៃ​របស់​គាត់​ចំពោះ​ជាតិ។ គាត់​គឺ​ជា​មនុស្ស​របស់​ប្រជាពលរដ្ឋ គាត់​ជា​អ្នក​អប់រំ​របស់​ពួក​គេ ជា​សំឡេង​របស់​ពួក​គេ ជា​ពន្លឺ​រស្មី​ភ្លឺ​ចែងចាំង​ ជា​ពន្លឺ​នៃ​ការ​ពិត​របស់​ពួក​គេ។ ពន្លឺ​នេះ មិន​ត្រូវ​ទុក​ឲ្យ​រលត់​ជាមួយ​រូបកាយ​គាត់​ឡើយ។ គេ​គួរ​តែ​ធ្វើ​អ្វីៗ ទាំង​អស់ ដើម្បី​រក្សា​ការពារ​ឲ្យ​បាន​គង់វង្ស​នូវ​អមតភាព​របស់​គាត់។

លោក​បណ្ឌិត កែម ឡី បាន​បូជា​ជីវិត​គាត់​ដោយ​មិន​គិត​ពី​ប្រយោជន៍​ផ្ទាល់​ខ្លួន ដើម្បី​ស្វែង​រក​ការពិត និយាយ​ពាក្យ​ពិត​ដោយ​ជម្នះ​រាល់​គ្រោះ​កាច​ទាំង​ឡាយ ដើម្បី​និយាយ​ការពិត​ហើយ​ទាំង​នេះ​គឺ​សម្រាប់​តែ​ជាតិ​ទាំង​មូល​ប៉ុណ្ណោះ ដើម្បី​លើក​កម្ពស់​អភិបាលកិច្ច និង​សុខុមាលភាព​ដល់​ប្រជាពលរដ្ឋ​ទាំង​អស់​ហើយ និង​ដើម្បី​ប្រយុទ្ធ​ប្រឆាំង​នឹង​អយុត្តិធម៌​ដែល​កំពុង​យាយី​ដល់​អ្នក​ទន់​ខ្សោយ និង​អ្នក​ក្រីក្រ។ នៅ​ក្នុង​បទសម្ភាសន៍​មួយ​កាល​ពី​ឆ្នាំ​២០១៤ គាត់​បាន​និយាយ​ថា គាត់​មិន​ចង់​ធ្វើ​អ្វី​ទេ គាត់​អត់​មាន ចង់​ធ្វើ​គណបក្ស​ អត់​មាន​ចង់​ធ្វើ​រដ្ឋាភិបាល អត់​មាន​ចង់​អង្គុយ​កៅអី​ធំ ក្រៅ​ពី​ការ​ចូលរួម​សកម្មភាព​សង្គម “រហូត​ដល់​ស្លាប់​ទៅ​ក៏​ជា​មុខ​តំណែង​ដ៏​វិសេសវិសាល​សម្រាប់​គាត់"។

ដូច្នេះ ដើម្បី​ឲ្យ​ក្លាយ​ជា​មហានគរ​ដ៏​ឆ្នើម​មួយ ជាតិ​ខ្មែរ​ត្រូវ​ផ្ដល់​កិត្តិយស និង​ធ្វើ​បូជនកិច្ច​ឲ្យ​បាន​សម​ស្រប​ជូន​គាត់។ សម្រាប់​កិច្ចការ​នេះ ជាតិ​ខ្មែរ​គួរ​សម្លឹង​មើល​ទៅ​សហរដ្ឋអាមេរិក ដែល​ជា​មហានគរ​មួយ​ដ៏​ឆ្នើម​ដើម្បី​រៀន​អំពី​អ្វី​ដែល​ប្រទេស​នោះ​បាន​ធ្វើ​ដើម្បី​ផ្តល់​កិត្តិយស និង​ធ្វើ​បូជនកិច្ច​ជូន​ដល់​មហា​បុត្រា​ដ៏​ឆ្នើម​របស់​គេ​មួយ​រូប គឺ​លោក​បណ្ឌិត ម៉ាទីន លូធឺ ឃីង  (Martin Luther King Jr.)  ដែល​ជា​មេដឹកនាំ​ចលនា​ទាមទារ​សិទ្ធិ​ពលរដ្ឋ​នៅ​ក្នុង​ទសវត្សរ៍​ឆ្នាំ​ទី​១៩៥០ និង ១៩៦០ ដែល​លោក​បណ្ឌិត កែម ឡី មាន​ដំណើរ​ជីវិត និង​ភ័ព្វវាសនា​ស្រដៀង​នឹង​គាត់​ច្រើន​ណាស់។ មនុស្ស​ទាំង​ពីរ​នាក់​នេះ សុខចិត្ត​បូជា​ជីវិត​ដើម្បី​មូលហេតុ​ដ៏​ឧត្ដុង្គឧត្ដម លោក ម៉ាទីន លូធឺ ឃីង សិទ្ធិ​ពលរដ្ឋ​សម្រាប់​ពលរដ្ឋ​អាមេរិកាំង ស្បែក​ខ្មៅ និង​លោក​បណ្ឌិត កែម ឡី  អភិបាលកិច្ច សុខុមាលភាព និង​យុត្តិធម៌ សម្រាប់​ពលរដ្ឋ​ខ្មែរ។ មនុស្ស​ទាំង​ពីរ​នាក់​នេះ បាន​ពុះពារ​យ៉ាង​អង់អាច​ដោយ​ប្រឈម​នឹង​គ្រោះថ្នាក់​ដល់​ជីវិត។ នេះ​គឺ​ជា​គ្រោះ​កាច​ធំ​បំផុត​ដែល​ពួកគាត់​ទាំង​ពីរ​នាក់​មាន​ប្រផ្នូល​ដឹង​ជា​មុន។ មនុស្ស​ទាំង​ពីរ​នាក់​នេះ ត្រូវ​បាន​ធ្វើ​ឃាត​ដោយ​បាញ់​នឹង​កាំភ្លើង ហើយ​មនុស្ស​ទាំង​ពីរ​នាក់​នេះ គ្មាន​បន្សល់​ទុក​អ្វី​ឲ្យ​គ្រួសារ​ខ្លួន​ទាល់​តែ​សោះ។

បើ​យោង​តាម​គំរូ​នៅ​សហរដ្ឋអាមេរិក ប្រទេស​កម្ពុជា គួរ​ពិនិត្យ​ឲ្យ​ល្អិតល្អន់​លើ​បញ្ហា​នានា ដែល​លោក​បណ្ឌិត កែម ឡី បាន​លើក​ឡើង ហើយ​ដើម្បី​ជា​បូជនកិច្ច​ជូន​រូប​គាត់ ត្រូវ​ធ្វើ​តាម​អនុសាសន៍​របស់​គាត់ ហើយ​និង​ដោះស្រាយ​ឲ្យ​បាន​សមស្រប។ បូជនកិច្ច​នេះ នឹង​កាន់តែ​សម​ស្រប​ថែម​ទៀត ប្រសិន​បើ​យើង​អាច​ទទួល​ស្គាល់​គាត់​ថា​ជា “អ្នក​និយាយ​ការ​ពិត​ដ៏​ឆ្នើម​ឧត្ដម”។

នៅ​ក្នុង​ប្រទេស​ដែល​មាន​ការ​លោភលន់​អត្តទត្ថភាព (គឺ​ការ​គិត​តែ​ប្រយោជន៍​ខ្លួន​ឯង​ហួសហេតុ) អគតិ (គឺ​សេចក្ដី​លំអៀង) ការ​ប្រកាន់​បក្សពួក​ស្មារតី​វង្វេងវង្វាន់ ការ​ភូត​កុហក ការ​និយាយ​ពាក្យ​មិន​ពិត និង​ការ​ឃោសនា កំពុង​តែ​ធ្វើ​ឲ្យ​គំនិត​ស្មារតី​ប្រជាពលរដ្ឋ​ខ្លួន​រារែក​ស្ទាក់ស្ទើរ ច្របូកច្របល់​ខូច​ប្រឡូច និង​ពុល​ទៅ​ទៀត​ផង​នោះ ហើយ​និង​បណ្ដាល​ឲ្យ​សីលធម៌​ពួកគេ​ធ្លាក់​ចុះ ប្រទេស​នេះ គួរ​តែ​លើក​តម្កើង​នូវ​គុណ​តម្លៃ​ដែល​គាត់​ប្រកាន់​ខ្ជាប់​នៅ​ពេល​ដែល​គាត់​និយាយ​ពន្យល់​គេ។ គុណ​តម្លៃ​នេះ គឺ​ការពិត។ ជាតិ​ខ្មែរ​គួរ​តែ​ប្រកាន់​យក​ការពិត និង​ភាព​ទៀង​ត្រង់​ទុក​ជា​គុណតម្លៃ​គោល​មួយ​របស់​ជាតិ និង​ជា​គុណធម៌​មួយ​សម្រាប់​ប្រជាពលរដ្ឋ។ ប្រទេស​នេះ គួរ​លើក​ទឹក​ចិត្ត​ឲ្យ​ពលរដ្ឋ​ខ្លួន​ចេះ​ស្វះស្វែង​រក​ការពិត លើក​ស្ទួយ​ការ​និយាយ ការ​ពិត និង​ការ​ឲ្យ​តម្លៃ​ទៅ​លើ​ការពិត ហើយ​និង​អនុញ្ញាត​ឲ្យ​អ្នក​ស្រាវជ្រាវ​រក​ការ​ពិត និង​អ្នក​និយាយ​ការ​ពិត​មាន​លំហ​ឯករាជ្យ និង​សុខ​សុវត្ថិភាព​មួយ​សម្រាប់​ពួក​គេ​ផ្ទាល់។

បូជនកិច្ច​ជូន​លោក​បណ្ឌិត កែម ឡី​ ដែល​បាន​ចូល​មរណភាព​ហើយ​នោះ និង​កាន់តែ​ឧត្តុងឧត្តម​ឡើង​ថែម​ទៀត ប្រសិនបើ​ជាតិ​ខ្មែរ​អាច​រក្សា​ការពារ​ពន្លឺ​នៃ​ការពិត ដែល​គាត់​ជា​តំណាង​នោះ​ឲ្យ​នៅ​តែ​ភ្លឺ​ចែងចាំង​រហូត​ត​រៀង​ទៅ ហើយ​ជាតិ​ខ្មែរ​គួរ​តែ​សាងសង់​រូប​សំណាក់​ធំ​មួយ​របស់​លោក​បណ្ឌិត កែម ឡី ទុក ជា​ស្ដូប​អនុស្សាវរីយ៍​ដែល​ជា​អវតារ​តំណាង​ឲ្យ​ពន្លឺ​នៃ​ការ​ពិត​នេះ និង​ប្រារព្ធ​ដាក់​ឈ្មោះ​ថា “អាទិទេព​នៃ​សច្ចធម៌” ដែល​ភាសា​សំស្ក្រឹត​ហៅ​ថា “សត្យទេវៈ” ឬ​បាលី​ហៅ​ថា “សច្ចទេវៈ” និង​ភាសា​ឡាតាំង​ហៅ​ថា “Veritas” ដោយ​មាន​ចំណារ​ចារិក​ភាសិត ២ នៅ​ពី​ក្រោម​រូប​សំណាក់​នោះ​ថា “យុត្តិធម៌​ត្រូវ​តែ​មាន​ទោះ​ជា​មេឃ​ត្រូវ​រលំ​ភ្នំ​ត្រូវ​រលាយ​ក៏ដោយ” ជា​ភាសា​ឡាតាំង​ថា “Fiat Veritas, et pereat mundus” និង “ការពិត​ត្រូវ​តែ​មាន​ទោះ​ជា​មេឃ​ត្រូវ​រលំ​ភ្នំ​ត្រូវ​រលាយ​ក៏ដោយ” ជា​ភាសា​ឡាតាំង​ថា “Fiat institia, et pereat mundus”។

សោកនាដកម្ម​នៃ​ការ​ធ្វើឃាត​លោក​បណ្ឌិត កែម ឡី បាន​បណ្ដាល​ឲ្យ​ជាតិ​ខ្មែរ​រួបរួម​គ្នា​រួច​ហើយ។ បូជនកិច្ច​ជាតិ​ជូន​គាត់​ដូច​មាន​ស្នើ​ខាង​លើ មាន​តែ​ជួយ​ការ​រួបរួម​គ្នា​នេះ​ឲ្យ​បាន​កាន់​តែ​រឹងមាំ​ថែម​ទៀត​ប៉ុណ្ណោះ ហើយ​បើ​សម្រេច​បាន​យ៉ាង​ដូច្នេះ​មែន​នោះ​ មរណភាព​ដ៏​សង្វេគ​របស់​លោក​បណ្ឌិត កែម ឡី នឹង​អាច​ជា​ចំណុច​ផ្លូវបត់​មួយ​ទៅ​រក​ល្អ​សម្រាប់​ជាតិ​ខ្មែរ​ទាំងមូល។ ការ​ធ្វើ​យ៉ាង​នេះ គឺ​អាច​ជួយ​ព្រលឹង​លោក​បណ្ឌិត កែម ឡី ឲ្យ​បាន​ទៅ​ដល់​សុគតិភព​មិន​ខាន​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (4)
Share

Kem Ley

ពី California, USA

We are continuing our journey. As you see the news on Radio Free Asian about the Representative Alan Lowenthal sail, we are the Khmer-American support and push this resolution “H.Res.728” to pass when the full House Congressional Meeting, then we’ll continue our journey until we reach our destination.

Aug 12, 2016 02:54 PM

SP

ពី BTB

កាដុំឆែប អញស្មានថាពីរគ្រាប់ស្ងាប់ម៉ាប្រទេស មិនដឹងថាបែរជាងើប​រាប់​លាននាក់ទាំងក្នុងស្រុក និងក្នុងលោកទៅវិញទេ ស៊យហើយវើយ​អាពួក​យើង អញថាបាតជើងសព្រាតមិនខានទេពួកយើង២០១៨នេះ។

Aug 11, 2016 03:44 AM

Kem Ley

ពី California

Dr. Kem Ley said "Wipe your tears and continue your journey!" We'll continue our journey until justice is served for Dr. Kem Ley and the real democracy is served for all Khmer people.

Aug 10, 2016 03:21 PM

អ្នក​អាន​អនាមិក

ពី Khmer USA

I love Dr. Kem Ley; His dead will shake the whole Khmer nation to wake up from failure. Be with God is the happy place that Dr. Kem Ley Go right now. God had plans to send Dr. Kem Ley to hurt the sinful human with his truth words. I remember my grandparent told me since I was young
((Hurt me with the truth…But don’t comfort me with a lie)) The God words in Bible may hurt you with the truth, but the God words in the Bible Never comfort you with a lie.
I see a lot of words that Dr. Kem ley used to perform on his expressing opinions are close to the words in the Bible
Example:
Joshua 1:9
Have I not commanded you? Be strong and courageous. Do not be frightened, and do not be dismayed, for the LORD your God is with you wherever you go.
Dr. Kem Ley said:
Be strong and courageous, get up from your failure and move forward with confidence.
So I would Thanks to God sent the truth message thru Dr. Kem Ley to all Khmer people.

Aug 10, 2016 10:49 AM

គេហទំព័រ​ទាំងមូល